Bǐbɛ́mɛ 18 - MAWUXÓWÉMA

Mawu lɛ́ ɖɔ Sala ná ji vǐ súnnu ɖokpó

¹ Mawu Mavɔmavɔ tɔ́n dó Ablaxámu jí ɖo zun Mamulée tɔn mɛ gbe ɖokpó. Gbe nɛ́ gbe ɔ́, Ablaxámu ɖo ayǐjínjɔ́n ɖo goxɔ tɔn sín alihɛ́nnu hwemɛ cíɖíɖí.

² É zé ta d'aga bó ná mɔ nǔɖé kpowun ɔ́, é mɔ súnnu atɔn ɖo te ɖo nukɔn tɔn; yě lín dó e ǎ. Ée é mɔ yě ɔ́, é kán wezun sín goxɔ tɔn nukɔn bó yi kpé yě, bó ɖe kɔ́ nú yě.

³ Énɛ́ ɔ́ gúdo ɔ́, é ɖɔ nú mɛ ɖokpó ɖo yě mɛ ɖɔ: “Mɛɖaxó, un jló ná byɔ́ nǔɖé we. Kɛnklɛ́n, ma nɔ zɔ nú nyɛ mɛsɛntɔ́ towe ó.

⁴ È nǎ hɛn sin kpɛɖé wá, bó ná dó klɔ́ afɔ ná nú mi, bɔ mi ná gbɔjɛ́ ɖo atín élɔ́ sá.

⁵ Un ná ba nǔɖé wá nú mi, bɔ mi ná ɖu, bó ná mɔ hlɔ̌nhlɔ́n. Énɛ́ ɔ́ gúdo ɔ́, mi ná lɛ́ wlí ali mitɔn. Énɛ́ ɔ́, gɔ̌n ce e mi wá gbɔn ɔ́ sɔ́ ná nyí nǔ yǎyá ǎ.” Ée Ablaxámu ɖɔ mɔ̌ ɔ́, súnnu atɔn lɛ́ɛ ɖɔ n'i ɖɔ: “É nyɔ́, bó bló lě e a ɖɔ gbɔn é.”

⁶ Énɛ́ ɔ́, Ablaxámu fyá yi goxɔ tɔn mɛ, bó ɖɔ nú Sala ɖɔ: “Yǎ wǔ jlɛ́ linfín gannú atɔn, bó nya, bó dó ɖa acɔnmɔ.”

⁷ Ée é ɖɔ mɔ̌ nú Sala ɔ́, é kán wezun yi wutó tɔn mɛ, bó wlí nyibúví e su ɖuɖu bó dó jǒ ɔ́ ɖokpó, bó zé nú mɛsɛntɔ́ tɔn lɛ́ɛ ɖokpó ɖɔ é ní wa azɔ̌ tɔn. Bɔ mɛsɛntɔ́ ɔ́ yá wǔ wa azɔ̌ tɔn.

⁸ Ée lan ɔ́ bí ɔ́, Ablaxámu zé wǎgací kpó nyibúnɔ́sin kpó d'é jí, bó sɔ́ yi nú yě. Yě ɖo nǔ ɔ́ ɖu wɛ bɔ Ablaxámu ɖo te ɖo yě gɔ́n ɖo atín ɔ́ sá.

⁹ Mɛ lɛ́ɛ ɖokpó kanbyɔ́ Ablaxámu ɖɔ: “Fítɛ́ asi towe Sala ɔ́ ɖe?” Bɔ é yí gbe n'i ɖɔ: “É ɖo goxɔ mɛ.”

¹⁰ É lɛ́ ɖɔ nú Ablaxámu ɖɔ: “Đǒtó mì, xwe ɖě ɔ́ mɛ lěhwenu ɔ́, un ná lɛ́ kɔ wá gɔ̌n towe; asi towe Sala ná kó ɖó vǐ súnnu ɖokpó hwenɛ́nu.” Goxɔ ɖé ká ɖo mɛ e ɖo xó ɖɔ wɛ ɔ́ gǔdo, bɔ asi tɔn Sala ɖo goxɔ ɔ́ sín alihɛ́nnu, bó ɖo xó e ɖɔ wɛ yě ɖe ɔ́ se wɛ.

¹¹ Ablaxámu kpó Sala kpó ká ko kpo, xwe yětɔn kó sɛ yi. Sala ko kpo lǎ.

¹² Ée Sala se xó e nya ɔ́ ɖɔ ɔ́, é ko nǔ dó ayi mɛ, bó lin ɖɔ: “Nyɛ ná ko kpo sɔ lě din, bɔ súnnu ná lɛ́ jló mì a? Sɛ́ ce lɔmɔ̌ ká ko kpo.”

¹³ Mawu Mavɔmavɔ ká kanbyɔ́ Ablaxámu ɖɔ: “Nɛ̌ gbɔn bɔ Sala ka ko nǔ bó ɖɔ émí ko kpo dín, bó kún sɔ́ sixú ji vǐ ó?

¹⁴ Nǔɖé gló Mawu Mavɔmavɔ wɛ a? Xwe ɖě ɔ́ mɛ lěhwenu ɔ́, un ná lɛ́ wá gɔ̌n towe lě e un ɖɔ gbɔn ɔ́. Sala ná kó ɖó vǐ súnnu ɖokpó nɛ́.”

¹⁵ Sala ka gbɛ́ ɖɔ émí kún ko nǔ ó, ɖó xɛsi jɛ jǐ tɔn. Lo ɔ́, Mawu Mavɔmavɔ ɖɔ n'i ɖɔ: “A ko nǔ ján.”

Ablaxámu sa vo dó Sodɔ́mu tamɛ

¹⁶ Énɛ́ ɔ́, mɛ lɛ́ɛ sí te bó wlí ali ɖidó, bó ɖo Sodɔ́mu kpɔ́n sɛ́ dó wɛ. Ablaxámu nyi yě kpɛɖé.

¹⁷ Mawu Mavɔmavɔ ɖɔ dó ayi mɛ ɖɔ: “Un jló ná zé nǔ e wa gbé un ja ɔ́ hwlá dó Ablaxámu ǎ.

¹⁸ Ablaxámu ná wá húzú tɔ́gbó akɔta ɖaxó hlɔ̌nhlɔ́nnɔ ɖé tɔn dandan. Éyɛ́ jí wɛ un ná gbɔn bó xo ɖɛ dó akɔta e ɖo ayǐkúngban ɔ́ jí lɛ́ɛ bǐ jí.

¹⁹ Un sɔ́ ɛ, bónú é ná ɖɔ nú vǐ súnnu tɔn lɛ́ɛ kpó vǐvú vivu tɔn e ná jɔ sɔ lɛ́ɛ kpó ɖɔ yě ní nyi sɛ́n ce lɛ́ɛ: yě ní zán gbɛ ɖagbe, bó zán gbɛ jlɔ́jlɔ́. Énɛ́ ɔ́, nyɛ Mawu Mavɔmavɔ ɔ́ ná ɖe akpá e un dó nú Ablaxámu lɛ́ɛ.”

²⁰ Mawu Mavɔmavɔ lɛ́ ɖɔ nú Ablaxámu ɖɔ: “Hwɛ e dó Sodɔ́munu lɛ́ɛ kpó Gomɔ́ɔnu lɛ́ɛ kpó wɛ è ɖe lɛ́ɛ sukpɔ́ dín; hwɛ e hu wɛ yě ɖe lɛ́ɛ vɛ́ jlɛ́.

²¹ Énɛ́ ɔ́ wú wɛ un ná jɛ te bó ná wá kpɔ́n ɖɔ hwɛ e dó yě wɛ è ɖe lɛ́ɛ ɔ́, mɔ̌ jɛ́n wa nǔ gbɔn wɛ yě ɖe nǔgbó a jí, abǐ adingban wɛ. Un jló ná tunwun.”

²² Nya lɛ́ɛ gosín fínɛ́, bó tunta Sodɔ́mu. Ablaxámu ka kpo ɖo te ɖo Mawu Mavɔmavɔ nukɔn fínɛ́.

²³ Ablaxámu sɛkpɔ́ ɛ, bó ɖɔ: “A nǎ sú mɛ ɖagbe kpó mɛ nyanya kpó sín kún dó ɖó kpɔ́ wɛ a?

²⁴ Afɔ nyɔ́ din ɔ́, mɛ ɖagbe kanɖé wǒ (50) kó sixú ɖo Sodɔ́mu; a nǎ sú yě lɔmɔ̌ sín kún dó wɛ a? A nǎ kpɔ́n dó mɛ ɖagbe kanɖé wǒ (50) e ɖo to ɔ́ mɛ lɛ́ɛ wú, bó sɔ́ hwɛ kɛ to ɔ́ ǎ cé?

²⁵ A nǎ hu mɛ ɖagbe kpó mɛ nyanya kpó. A nǎ bló mɔ̌ bɔ é ná nyí ɖɔ nǔ ɖokpó ɔ́ wɛ ɖo te kpɔ́n mɛ ɖagbe kpó mɛ nyanya kpó wɛ a? Ma wa nǔ gbɔn mɔ̌ ó; hwi mɛ e nyí hwɛɖɔtɔ́ gbɛ ɔ́ bǐ tɔn ɔ́ ná gɔn hwɛjijɔ xwedó dó wa nǔ wɛ a?”

²⁶ Bɔ Mawu Mavɔmavɔ ɖɔ: “Nú un mɔ mɛ ɖagbe kanɖé wǒ (50) ɖo Sodɔ́mu toxo ɔ́ mɛ ɔ́, un ná kpɔ́n dó mɛ ɖagbe énɛ́ lɛ́ɛ wú, bó sɔ́ hwɛ kɛ toxo ɔ́ bǐ.”

²⁷ Ablaxámu lɛ́ yí xó bó ɖɔ: “Aklúnɔ, kɛnklɛ́n, ta wɛ un syɛ́n bó ɖɔ xó nú we, ɖó kɔ́ kpó afín kpó yǎyá wɛ un nyí.

²⁸ Din ɔ́, mǐ ní ɖɔ mɛ atɔ́ɔ́n hwe ɖo mɛ ɖagbe kanɖé wǒ (50) lɛ́ɛ mɛ. A nǎ gba toxo ɔ́ bǐ ɖó mɛ atɔ́ɔ́n énɛ́ lɛ́ɛ wú wɛ a?” Bɔ Mawu Mavɔmavɔ ɖɔ: “Nú un mɔ mɛ ɖagbe kanɖé atɔ́ɔ́n (45) ɖo to ɔ́ mɛ ɔ́, un sɔ́ ná gba toxo ɔ́ ǎ.”

²⁹ Ablaxámu lɛ́ ɖɔ: “Afɔ nyɔ́ ɔ́, è sixú mɔ mɛ ɖagbe kanɖé (40) ɖo toxo ɔ́ mɛ.” Bɔ Mawu Mavɔmavɔ ɖɔ: “Nú un mɔ mɛ ɖagbe kanɖé (40) ɖo toxo ɔ́ mɛ ɔ́, un ná gba toxo ɔ́ ǎ, ɖó yědɛɛ lɛ́ɛ wú.”

³⁰ Ée Mawu Mavɔmavɔ ɖɔ mɔ̌ ɔ́, Ablaxámu ɖɔ: “Aklúnɔ, nú un lɛ́ kpo ɖo xó ɖɔ wɛ hǔn, kɛnklɛ́n bó má sin xomɛ ó; un ná lɛ́ ɖɔ xó; afɔ nyɔ́ ɔ́, è sixú mɔ mɛ ɖagbe gban (30).” “Nú un mɔ mɛ ɖagbe gban (30) ɖo toxo ɔ́ mɛ ɔ́, un ná gba toxo ɔ́ ǎ.”

³¹ Ablaxámu ɖɔ: “Aklúnɔ kɛnklɛ́n, ta wɛ un syɛ́n bó ɖɔ xó nú we. Afɔ nyɔ́ ɔ́, è sixú mɔ mɛ ɖagbe ko ɖo toxo ɔ́ mɛ.” Mawu Mavɔmavɔ ká ɖɔ: “Un ná gba toxo ɔ́ ǎ, ɖó mɛ ɖagbe ko énɛ́ lɛ́ɛ wú.”

³² Ablaxámu lɛ́ ɖɔ: “Aklúnɔ, kɛnklɛ́n bó ma sin xomɛ ó; xó gǔdo gúdo tɔn ɖíe ɖɔ gbé un ja e. Afɔ nyɔ́ ɔ́, è sixú mɔ mɛ ɖagbe wǒ ɖo toxo ɔ́ mɛ.” Mawu Mavɔmavɔ ka ɖɔ: “Un ná gba toxo ɔ́ ǎ, ɖó mɛ ɖagbe wǒ énɛ́ lɛ́ɛ wú.”

³³ Ée Mawu Mavɔmavɔ ɖɔ xó nú Ablaxámu fó ɔ́, Mawu Mavɔmavɔ yi. Bɔ Ablaxámu lɛ́ kɔ yi xwé tɔn gbe.