Bǐbɛ́mɛ 15 - MAWUXÓWÉMA

Mawu jɛ akɔ xá Ablámu

¹ Ée nǔ énɛ́ lɛ́ɛ jɛ wá yi gúdo ɔ́, Ablámu mɔ nǔ. É mɔ Mawu Mavɔmavɔ bɔ é ɖɔ xó n'i; é ɖɔ n'i ɖɔ: “Ablámu! Ma ɖi xɛsi ó; nyɛ wɛ nyí gǎglónú towe; un ná ná we ajɔ bɔ é ná d'agba ɖésú.”

² Bɔ Ablámu ɖɔ: “Aklúnɔ Mavɔmavɔ! Un ɖó vǐ ɖěbǔ ǎ, a nǎ nǔ mì ɔ́, étɛ́ un ná wa ná? Un ná kú ma ɖó vǐ donu. Eliezɛ́ɛ Damásinu ɔ́ wɛ ná ɖu nǔ e un ɖó lɛ́ɛ sín gǔ.”

³ Ablámu lɛ́ ɖɔ: “Áo, kpɔ́n! A nǎ vǐ mì ǎ, bɔ vǐ e ɖo gɔ̌n ce ɔ́ wɛ ná wá nyí gǔɖutɔ́ ce.”

⁴ Lo ɔ́, Mawu Mavɔmavɔ ɖɔ xó n'i; é ɖɔ n'i ɖɔ: “É wɛ ná nyí gǔɖutɔ́ towe ǎ. Vǐ e hwi ɖésúnɔ ná ji ɔ́ wɛ ná nyí gǔɖutɔ́ towe.”

⁵ Ée Mawu Mavɔmavɔ ɖɔ mɔ̌ nú Ablámu ɔ́, é kplá ɛ sín goxɔ tɔn mɛ, bó ɖɔ n'i ɖɔ: “Kpɔ́n jǐnukúnsin; nú a sixú xa sunví lɛ́ɛ hǔn, xa.” É lɛ́ ɖɔ n'i ɖɔ: “Lě e vǐ towe lɛ́ɛ ná sukpɔ́ gbɔn ɔ́ nɛ́.”

⁶ Ablámu ka ɖi nǔ nú Mawu Mavɔmavɔ, bɔ Mawu Mavɔmavɔ mɔ ɛ dó mɔ hwɛjijɔnɔ.

⁷ Mawu Mavɔmavɔ lɛ́ ɖɔ nú Ablámu ɖɔ: “Nyɛ wɛ nyí Mawu Mavɔmavɔ e ɖe we tɔ́n sín Wúu, ɖo Kaludée é. Un ná ná to élɔ́ e mɛ a ɖe ɔ́ we, bɔ é ná nyí towe.”

⁸ Bɔ Ablámu kanbyɔ́ Mawu Mavɔmavɔ ɖɔ: “Aklúnɔ Mavɔmavɔ, ani wɛ ná ɖe xlɛ́ mì ɖɔ to élɔ́ ná nyí ce?”

⁹ Mawu Mavɔmavɔ ká ɖɔ n'i ɖɔ: “Zě nyibúsixwɛ e ɖó xwe atɔn ɔ́ ɖokpó, gbɔ̌ e ɖó xwe atɔn ɔ́ ɖokpó, agbo e ɖó xwe atɔn ɔ́ ɖokpó, xwelé ɖokpó, kpódó ahwannɛ́ ɖokpó kpó wá nú mì.”

¹⁰ Ablámu fɔ kanlin énɛ́ lɛ́ɛ wá. É vlɔ́ kanlin lɛ́ɛ; é sɔ́ ɖokpó ɔ́, é nɔ́ vlɔ́ ɖó we bó nɔ́ sɔ́ ɖě kpé dó ɖě nu; é ká vlɔ́ xɛ lɛ́ɛ ɖě ǎ.

¹¹ Aklasú lɛ́ɛ ká wá zɔn kanlin kúkú lɛ́ɛ jí, bɔ Ablámu nya yě.

¹² Ée hwe ɖo xɔ yi wɛ ɔ́, Ablámu byɔ́ sɛnmlɔ ɖé mɛ, zǐnflú gɔngɔn ɖé dó dó e, bó dó xɛsi.

¹³ Bɔ Mawu Mavɔmavɔ ɖɔ n'i ɖɔ: “Tunwun ɖɔ vǐ towe lɛ́ɛ ná wá nyí jǒnɔ ɖo mɛ ɖěvo tomɛ. Yě ná nɔ mɛ kannu ɖo fínɛ́ bɔ è nǎ dó tagba nú yě xɔ xwe afɔwe (400).

¹⁴ Lo ɔ́, un ná ɖɔ hwɛ xá akɔta e yě ná nyí kannumɔ ná é. Énɛ́ ɔ́ gúdo ɔ́, yě ná tɔ́n sín fínɛ́, bó ná bɛ́ dɔkun gěgé wá yi.

¹⁵ Amɔ̌, hwɛ ɔ́, kpikpoxɔmɛ ná nyɔ́ nú we. A nǎ kú dó fífá mɛ, bɔ è nǎ ɖi we.

¹⁶ Vitikli towe lɛ́ɛ ná lɛ́ kɔ wá fí, ɖó Amɔliti lɛ́ɛ kó hu hwɛ sɔ mɔ̌ din bónú má nya yě sín fí ǎ.”

¹⁷ Ée hwe yi xɔ, bɔ zǐnflú dó bǐ ɔ́, myɔ hɛhɛ ɖé nɔ́ gbɔn kanlin e è vlɔ̌ lɛ́ɛ tɛ́ntin dín kpó azizɔ kpó.

¹⁸ Gbe énɛ́ ɔ́ gbe ɔ́, Mawu Mavɔmavɔ jɛ akɔ xá Ablámu bó ɖɔ: “Un ná to élɔ́ kúnkan towe, bɛ́ sín tɔsisa Ejípu tɔn ɔ́ kɔn káká yi tɔsisa ɖaxó Efláti ɔ́ kɔn.”

¹⁹ To énɛ́ ɔ́, Keni ví lɛ́ɛ, Kenázi ví lɛ́ɛ, kpó Kadimɔniti lɛ́ɛ kpó tɔn wɛ.

²⁰ Hitíti lɛ́ɛ, Pɛliziti lɛ́ɛ, Hlafa ví lɛ́ɛ,

²¹ Amɔliti lɛ́ɛ, Kanáanu lɛ́ɛ, Giigacíti lɛ́ɛ kpódó Jebuzinu lɛ́ɛ kpó tɔn wɛ.