Bǐbɛ́mɛ 10 - MAWUXÓWÉMA

Togun e ɖo ayǐkúngban ɔ́ jí lɛ́ɛ

¹ Ée tɔ gba gbɛ ɔ́ gúdo ɔ́, Nɔwée sín vǐ lɛ́ɛ: Sɛ́mu, Cámu kpódó Jafɛ́ti kpó ji vǐ. Vǐ yětɔn lɛ́ɛ sín nyǐkɔ ɖíe:

² Jafɛ́ti ɔ́, vǐ tɔn súnnu lɛ́ɛ sín nyǐkɔ ɖíe: Gomɛ́ɛ, Magɔ́gi, Madayi, Yaváni, Tubalu, Mɛcɛ́ki kpódó Tilaasi kpó.

³ Gomɛ́ɛ ɔ́, vǐ tɔn súnnu lɛ́ɛ sín nyǐkɔ ɖíe: Acikenázi, Hlifáti kpódó Togáama kpó.

⁴ Yaváni ɔ́, vǐ tɔn súnnu lɛ́ɛ sín nyǐkɔ ɖíe: Elica, Taasísi, Kitímu kpódó Hlodanímu kpó.

⁵ Jafɛ́ti kúnkan énɛ́ lɛ́ɛ wɛ dó akɔta e gbɔn xutó xutó lɛ́ɛ sín kún, bɔ yě ɖo xwédo yětɔn yětɔn mɛ, ɖo akɔta yětɔn yětɔn mɛ, ɖo to yětɔn yětɔn mɛ, bó nɔ́ dó gbe yětɔn yětɔn.

⁶ Cámu ɔ́, vǐ tɔn súnnu lɛ́ɛ sín nyǐkɔ ɖíe: Kúci, Misilayimu, Púti kpódó Kanáa kpó.

⁷ Kúci ɔ́, vǐ tɔn súnnu lɛ́ɛ sín nyǐkɔ ɖíe: Seva, Hawíla, Savuta, Hlaema, kpódó Savuteka kpó. Hlaema ɔ́, vǐ tɔn súnnu lɛ́ɛ sín nyǐkɔ ɖíe: Saba kpódó Dedáni kpó.

⁸ Kúci wɛ lɛ́ nyí Nɛmulɔ́di sín tɔ́. Nɛmulɔ́di ɔ́ wɛ nyí gǎn ɖaxó nukɔntɔn ɖo ayǐkúngban jí.

⁹ Gbětɔ́ ɖaxó ɖokpó wɛ é nyí. Énɛ́ ɔ́ wú wɛ è nɔ ɖɔ: “É nyí gbětɔ́ ɖaxó Nɛmulɔ́di ɖɔhun.”

¹⁰ Toxo e mɛ Nimulodi ɖu axɔ́sú ɖe jɛ nukɔn lɛ́ɛ wɛ nyí: Babɛ́li, Elɛ́ki, Akadi kpó Kalunɛ́ɛ kpó ɖo Mɛzopotamíi yíkúngban jí.

¹¹ Fínɛ́ wɛ Asilíi gosín, bó yi ɖó Ninívu toxo ɔ́ ayǐ kpódó Hlexɔvɔ́ti-Ii toxo ɔ́ kpó, kpódó Kalaxi toxo ɔ́ kpó,

¹² kpódó Hlɛsɛ́ni toxo ɔ́ kpó; Hlɛsɛ́ni ɔ́, toxo ɖé wɛ, bó ɖo Ninívu kpódó toxo ɖaxó Kalaxi kpó tɛ́ntin.

¹³ Misilayimu wɛ nyí tɔ́gbó Lǔdinu lɛ́ɛ tɔn, Eyinamunu lɛ́ɛ tɔn, Lexávu lɛ́ɛ tɔn, Nafutwaxi lɛ́ɛ tɔn,

¹⁴ Patlɔ́sinu lɛ́ɛ tɔn, Kafutɔ́ɔnu lɛ́ɛ tɔn, kpódó Kasluaxinu lɛ́ɛ tɔn kpó. Yě wɛ dó Filisitɛ́ɛn lɛ́ɛ sín kún.

¹⁵ Kanáa ji Sidɔ́ɔn kpódó Xɛti kpó. Sidɔ́ɔn wɛ nyí nukɔn ví tɔn.

¹⁶ É wɛ lɛ́ nyí tɔ́gbó nú Jebuzinu lɛ́ɛ, Amɔliti lɛ́ɛ, Giigacíti lɛ́ɛ,

¹⁷ Hivíti lɛ́ɛ, Aakíti lɛ́ɛ, Sini ví lɛ́ɛ,

¹⁸ Aavadinu lɛ́ɛ, Semáa ví lɛ́ɛ kpódó Hamáti ví lɛ́ɛ kpó. Énɛ́ ɔ́ gúdo ɔ́, Kanáanu lɛ́ɛ sín hɛ̌nnu lɛ́ɛ gbadó.

¹⁹ Đo Geláa wa jí ɔ́, Kanáanu lɛ́ɛ sín dogbó bɛ́ sín Sidɔ́ɔn káká yi Gaza; bɔ ɖo Sodɔ́mu wa jí ɔ́, é bɛ́ sín Gomɔ́ɔ bó gbɔn Adima kpó Sevoyímu kpó káká yi Lɛca.

²⁰ Cámu ɔ́, vǐ tɔn súnnu lɛ́ɛ nɛ́. Yě ɖo xwédo yětɔn yětɔn mɛ, bó nɔ́ dó gbe yětɔn yětɔn ɖo akɔta yětɔn yětɔn mɛ ɖo to yětɔn yětɔn mɛ.

²¹ Sɛ́mu, Jafɛ́ti sín fofó ɔ́ lɔ ji vǐ súnnu. É wɛ nyí tɔ́gbó nú Ebɛ́ɛ kpó vǐ tɔn lɛ́ɛ bǐ kpó.

²² Sɛ́mu ví súnnu lɛ́ɛ sín nyǐkɔ ɖíe: Elámu, Asúu, Aapakisadu, Lǔdi kpódó Alamu kpó.

²³ Alamu ɔ́, vǐ tɔn súnnu lɛ́ɛ sín nyǐkɔ ɖíe: Wúsi, Huli, Gɛtɛ́ɛ kpódó Maci kpó.

²⁴ Aapakisadu ji Cɛláxi, bɔ Cɛláxi ji Ebɛ́ɛ.

²⁵ Ebɛ́ɛ ɔ́, vǐ súnnu we wɛ é ji: vǐ nukɔntɔn ɔ́ nɔ́ nyí Pɛlɛ́gi. Pɛlɛ́gi sín tínmɛ wɛ nyí “Mǐmá”, ɖó hwe éyɛ́ tɔn nu wɛ gbɛtɔ́ lɛ́ɛ gba kpé ayǐkúngban ɔ́ jí. Vǐ wegɔ́ ɔ́ nɔ́ nyí Yokitáni.

²⁶ Yokitáni ji Alumɔdadi, Cɛlɛ́fu, Hasáamawɛ́ti, Yeláxi,

²⁷ Hadolámu, Wuzálu, Dikla,

²⁸ Ovalu, Avimayɛ́li, Saba,

²⁹ Ofíi, Hawíla kpódó Yovavu kpó. Yokitáni wɛ ji mɛ énɛ́ lɛ́ɛ bǐ.

³⁰ Yě nɔ́ nɔ Mɛca ɖo Sefáa wa jí káká yi só e ɖo zǎnzǎnhwe jí lɛ́ɛ kɔn.

³¹ Sɛ́mu ví lɛ́ɛ nɛ́. Yě ɖo xwédo yětɔn yětɔn mɛ, bó nɔ́ dó gbe yětɔn yětɔn, ɖo akɔta yětɔn yětɔn mɛ ɖo to yětɔn yětɔn mɛ.

³² Hɛ̌nnu e Nɔwée ví lɛ́ɛ ɖó ayǐ lɛ́ɛ nɛ́. È wlǎn nyǐkɔ vǐ yětɔn lɛ́ɛ ɖokpó ɖokpó tɔn gbɔn akɔta yětɔn yětɔn mɛ. Ée tɔ gba gbɛ ɔ́ gúdo ɔ́, yě wɛ dó akɔta e gba kpé ayǐkúngban ɔ́ jí lɛ́ɛ bǐ sín kún.