Amɔ́si 9 - MAWUXÓWÉMA

Nǔ atɔ́ɔ́ngɔ́ ɔ́ e Mawu ɖe xlɛ́ Amɔ́si é

¹ Un mɔ Aklúnɔ ɖo te ɖo vɔ̌sákpe ɔ́ jí, bɔ é ɖo ɖiɖɔ wɛ ɖɔ: “Hɔ̌ azakpo lɛ́ɛ bónú dotín lɛ́ɛ ní mu. Zě azakpo lɛ́ɛ dó vó ta nú yě bǐ. Zě hwǐ dó hu mɛ e kpo lɛ́ɛ ná. Yě mɛ ɖěbǔ sixú hɔn bó gán ǎ. Yě mɛ ɖěbǔ ná hɔn yi ǎ.

² Nú yě tlɛ kun do káká yi kútomɛ bó byɔ́ mɛ ɔ́, un ná yi dɔn yě tɔ́n. Nú yě tlɛ xá nǔ jí káká yi jǐnukúnsin ɔ́, un na ɖe yě jɛ te.

³ Nú yě tlɛ yi hwlá cí Kaamɛ́li só ta ɔ́, un ná ba yě mɔ, lobo wlí yě. Nú yě ná bó ɖɔ un kún na mɔ émí ó, bó yi hwlá cí xuzan jí ɔ́, un ná ɖe gbe nú xumɛdan, bɔ é na xú aɖǔ yě.

⁴ Nú yě ná bó sɔ́ yěɖée yi jó nú kɛntɔ́ yětɔn lɛ́ɛ, bó húzú kannumɔ nú yě ɔ́, un ná ɖe gbe, bɔ è nǎ hu yě bǐ. Nukún ce ná ɖo yě jí, é ká nyí nǔ ɖagbe ná wa nú yě wɛ un ɖe wú wɛ nukún ce ná ɖo yě jí ǎ, lo ɔ́, nǔ nyanya ná wa nú yě wú wɛ.”

⁵ Aklúnɔ Mavɔmavɔ, Mawu Nǔbǐwúkpétɔ́ ɔ́ ɖó alɔ ayǐkúngban ɔ́ wú, bɔ é jɛ wǔ dán jí, bɔ mɛ e ɖ'é jí lɛ́ɛ bǐ jɛ aluwɛ mɛ. Ayǐkúngban ɔ́ ná fɔ́n dó jǐ bǐ, lobo ká ná lɛ́ hwíhwɛ́ tɔsisa ɖaxó Nilu e ɖo Ejípu ɔ́ ɖi sin ɖɔhun.

⁶ Mawu blǒ nɔtɛn tɔn lɛ́ɛ ɖó sɛ́xwé, bó bló jǐnukúnsin bɔ é cyɔ́n ayǐkúngban ɔ́. É dɔn sin e ɖo xu mɛ lɛ́ɛ wá gba kɔn nyi ayǐkúngban ɔ́ jí. Mawu Mavɔmavɔ wɛ é nɔ nyí.

Mawu ná ɖó hwɛ nú mɛ e wa nǔ nyi do lɛ́ɛ

⁷ Mawu Mavɔmavɔ ɖɔ: “Izlayɛ́linu lɛ́ɛ mi, mi xɔ akwɛ́ hú Etiopíinu lɛ́ɛ ɖo gɔ̌n ce wɛ a? Un ɖe mi tɔ́n sín Ejípu; un ka lɛ́ ɖe Filisitɛ́ɛn lɛ́ɛ sín Kafutɔ́ɔ, bó ɖe Silíinu lɛ́ɛ tɔ́n sín Kíi. Mi tunwun ǎ cé?”

⁸ Aklúnɔ Mavɔmavɔ sín nukún ɖo nǔ e axɔ́sú Izlayɛ́li tɔn lɛ́ɛ wa nyi do lɛ́ɛ jí. Bɔ é ɖɔ: “Un ná sú kún yětɔn dó sín ayǐkúngban ɔ́ jí. Amɔ̌, un ná sú Jakɔ́bu ví lɛ́ɛ bǐ sésé sín kún dó ǎ.

⁹ Đó din ɔ́, un ná ɖe gbe bɔ è nǎ ɖe ɖɛ akɔta Izlayɛ́li tɔn ɔ́ sín akɔta ɖě lɛ́ɛ mɛ, lě e è nɔ ɖe ɖɛ jinukún bɔ kɛ́n ɖěbǔ má nɔ́ ján d'é mɛ ǎ é ɖɔhun.

¹⁰ Yě mɛ e wa nǔ nyi do ɖo togun ce mɛ lɛ́ɛ bǐ ná cí ahwan; yě mɛ e nɔ ɖɔ nú gbeyíɖɔ lɛ́ɛ ɖɔ yě kún ná dɔn nyladó e sín adǎn gblɔ́n nú émí wɛ yě ɖe lɛ́ɛ dó émí jí ó lɛ́ɛ bǐ ná cí ahwan.”

Nǔ e jɛ dó nǔ hannyahannya ɔ́ gúdo lɛ́ɛ

¹¹ Mawu Mavɔmavɔ ɖɔ: “É wá yá ɔ́, un ná fɔ́n Davídi sín xwé e mu ɔ́ ɖó te. Un ná bló dǒ e zɛ lɛ́ɛ ɖó. Un ná bló nǔ e gba hánnyá lɛ́ɛ ɖó. Un ná vɔ́ xwé ɔ́ bló ɖó lě e é kó ɖe gbɔn ɖ'ayǐ é.

¹² Énɛ́ ɔ́, Izlayɛ́li ví lɛ́ɛ ná lɛ́ vɔ́ ayǐkúngban e ko nyí Edɔ́mu tɔn ɖ'ayǐ xóxó lɛ́ɛ kpó togun ce ɖě lɛ́ɛ kpó yí. Nyɛ Mawu Mavɔmavɔ ɔ́ wɛ ɖɔ mɔ̌, bó ká ná bló.”

¹³ Mawu Mavɔmavɔ lɛ́ ɖɔ: “Đǒtó! Azǎn ɖé lɛ́ɛ ná wá. Azǎn énɛ́ lɛ́ɛ gbe ɔ́, nú è ya nǔkún nú é nɔ zaan ɔ́, è nǎ nɔ li vǐwun. Énɛ́ ɔ́, vɛ̌ɛn yɔ̌yɔ́ ná nɔ sa tɔ sín kpó lɛ́ɛ jí, bó ná gba kpé só kpɛví kpɛví lɛ́ɛ jí.

¹⁴ Un ná kplá togun ce Izlayɛ́li sín kannumɔgbénu wá. Yě ná vɔ́ toxo ɖaxó ɖaxó e è gba hánnyá lɛ́ɛ gbá, lobo ná nɔ toxo énɛ́ lɛ́ɛ mɛ. Yě ná tun vǐwuntín lɛ́ɛ, lobo ná nɔ́ mɔ vɛ̌ɛn nu. Yě ná bló jikpá lɛ́ɛ, bó ná nɔ ɖu nǔ e ná nɔ tɔ́n sín mɛ lɛ́ɛ é.

¹⁵ Un ná bló bɔ togun ce ná dó ɖɔ do nyi ayǐkúngban e nyí étɔn ɔ́ jí, bɔ è sɔ́ ná ɖe e sín to e un ná ɛ ɔ́ mɛ ǎ. Xó e nyɛ Mawu Mavɔmavɔ, Mawu mitɔn ɖɔ ɔ́ nɛ́.”