Amɔ́si 8 - MAWUXÓWÉMA

Nǔ ɛnɛgɔ́ ɔ́ e Mawu ɖe xlɛ́ Amɔ́si ɔ́ wɛ nyí atínsínsɛ́n xasun ɖokpó

¹ Aklúnɔ Mavɔmavɔ ɖe atínsínsɛ́n myámyá xasun ɖokpó xlɛ́ mì,

² bó kanbyɔ́ mì ɖɔ: “Étɛ́ mɔ wɛ a ɖe Amɔ́si?” Un yí gbe n'i ɖɔ: “Un mɔ atínsínsɛ́n myámyá xasun ɖokpó.” Énɛ́ ɔ́, Mawu Mavɔmavɔ ɖɔ nú mì ɖɔ: “Hwenu e togun ce Izlayɛ́li ná vɔ́ dó ɔ́ su. Un sɔ́ ná sɔ́ nǔ e é nɔ wa nyi do lɛ́ɛ ɖěbǔ kɛ ɛ ǎ.

³ Gbe énɛ́ ɔ́ gbe ɔ́, hansinɔ e ɖo sinsɛnxɔ mɛ lɛ́ɛ ɔ́, gbɛvíhan wɛ yě ná dó. Cyɔ ná ɖo kpɔ́ gégé, bɔ è ná bɛ́ yě kɔn nyi gbě gbɔn fí bǐ; ahwi ná xo to ɔ́ bǐ.”

Nukúnkɛn ajɔ̌tɔ́ lɛ́ɛ tɔn nɔ dɔn nǔ hannyahannya wá

⁴ Mi mɛ e nɔ gbídí gbɛ̌dónánɔ lɛ́ɛ dó do lɛ́ɛ ɔ́, mi mɛ e nɔ sú kún dó nú wamamɔnɔ e ɖo to ɔ́ mɛ lɛ́ɛ ɔ́, mi ɖótó xó élɔ́:

⁵ Mi nɔ ɖɔ: “Hwetɛ́nu wɛ mǐ ná ɖu sunwájǐxwe ɔ́ fó dó, bó ná sa jinukún? Hwetɛ́nu wɛ gbɔjɛzán ɔ́ ná fó dó, bɔ mǐ nǎ hun agɔ̌ mǐtɔn lɛ́ɛ?” Mǐ ná ɖe nǔjlɛ́ká ɔ́ kpo; mǐ ná ɖe kilóo lɛ́ɛ kpo; nǔdagan mǐtɔn lɛ́ɛ ná sɔgbe ǎ.

⁶ Mǐ ná sa jinukún nú ajɔ̌tɔ́ mǐtɔn lɛ́ɛ káká yi jɛ wɔn lɛ́ɛ jí. Mɛ e ma ɖó gǎn ǎ lɛ́ɛ kpó wamamɔnɔ lɛ́ɛ kpó ɔ́, mǐ ná kplá yě dó xwé gbe kannumɔ ɖɔhun ɖó yě kpé wú bó sú afɔkpa yětɔn lɛ́ɛ sín axɔ́ ǎ wú.

⁷ Mawu Mavɔmavɔ xwlé nǔ bó ɖɔ: “Un xwlé to e wú Izlayɛ́li ví lɛ́ɛ ɖo afɔ tɛ ayǐ wɛ sɔ mɔ̌ ɔ́, ɖɔ un kún ná wɔn lě e mi nɔ wa nǔ gbɔn lɛ́ɛ gbeɖé ó.”

⁸ Énɛ́ ɔ́ wú ɔ́, ayǐkúngban ná dán wǔ. Mɛ e ɖo ayǐkúngban ɔ́ jí lɛ́ɛ bǐ ná jɛ aluwɛ mɛ. Ayǐkúngban ɔ́ ná fɔ́n yi jǐ bǐ dégbédégbé, bó ká ná lɛ́ hwíhwɛ́ tɔsisa ɖaxó Nilu e ɖo Ejípu ɔ́ ɖi sin ɖɔhun.

⁹ Aklúnɔ Mavɔmavɔ ɖɔ: “Gbe énɛ́ ɔ́ gbe ɔ́, un ná ɖɔ bɔ hwe ná yi xɔ hwemɛ cíɖíɖí; ayǐkúngban ɔ́ ná dó ablu kéze ɖéɖé.

¹⁰ Un ná zé awǎ e jɛ wɛ mi ɖe ɔ́ dó húzú aluwɛ ná, bɔ han e ji wɛ mi ɖe lɛ́ɛ bǐ ná húzú gbɛvíhan. Mɛ bǐ ná sin nǔwamɛvɔ dó alin. È nǎ xwlɛ́ ta nú mɛ bǐ, lě e vǐ ɖokpónɔ kú nú mɛ ɔ́, è nɔ bló gbɔn é. Bɔ nǔ énɛ́ lɛ́ɛ bǐ ná fó wǔvɛ́mimɔ sín azǎn ɖé ɖɔhun.

¹¹ Azǎn ɖé ná wá bɔ un ná sɛ́ adɔ dó to ɔ́ mɛ. Xovɛ́ ná nɔ sin mɛ lɛ́ɛ, é ká ná nyí nǔɖuɖu sín xovɛ́ ǎ. Kɔ ná xú yě, é ká ná nyí sin sín kɔ wɛ na xú yě ǎ; lo ɔ́, xó e ɖɔ wɛ un ɖe ɔ́ sín xovɛ́ wɛ ná sin yě, bɔ kɔ tɔn ná xú yě.

¹² Yě ná nɔ ɖo flúflú kpé wɛ gbɔn xu jí xu jí. Yě ná nɔ́ gosín totaligbé wá yi zǎnzǎnhwe jí, bó ná nɔ́ ɖo Mawu Mavɔmavɔ xó ɔ́ ba na se wɛ, lo ɔ́, yě ná se ǎ.

¹³ Gbe énɛ́ ɔ́ gbe ɔ́, kɔ ná xú ɖyɔ̌vǐ ɖagbe ɖagbe lɛ́ɛ kpó dɔ̌nkpɛvú lɛ́ɛ kpó káká bɔ yě ná xú gǒ.

¹⁴ Yě nɔ́ xwlé vodún Samalíinu lɛ́ɛ tɔn lɛ́ɛ; yě nɔ́ xwlé nǔ bó nɔ́ ɖɔ: ‘Susu nú vodún towe Dan’, abǐ ‘Susu nú vodúnnú e è nɔ wa ɖo Bɛ̌-Ceva é.’ Yě mɛ énɛ́ lɛ́ɛ ná jɛ ayǐ, bó sɔ́ ná fɔ́n gbeɖé ǎ.”