Amɔ́si 6 - MAWUXÓWÉMA

Jiɖiɖe e ma nyí jiɖiɖe ǎ é

¹ Mi mɛ e vo fɛɛ ɖo Sinyɔ́ɔ ɖo Samalíi só ta, bó vɛdó ɖɔ nǔɖé kún ná wa émí ó lɛ́ɛ ɔ́, heelú mi. Mi wɛ nyí akɔta e jɛ nukɔn ɖo akɔta ɖě lɛ́ɛ mɛ ɔ́ bɔ è ɖɔ; è ɖɔ mi gɔ́n wɛ Izlayɛ́linu lɛ́ɛ nɔ wá.

² Mi ló kó yi Kalunɛ́ɛ bó yi kpɔ́n nǔ e jɛ ɔ́; énɛ́ ɔ́ gúdo ɔ́, mi ná gosín fínɛ́ bó hun káká yi Hamáti toxo ɖaxó ɔ́ mɛ, bó yi kpɔ́n nǔ e jɛ ɔ́. Énɛ́ ɔ́ gúdo ɔ́, mi ná wá Gati, ɖo Filisitɛ́ɛn lɛ́ɛ gɔ́n. Mi yi to énɛ́ lɛ́ɛ mɛ ɔ́, mi ná mɔ ɖɔ mi kún nyɔ́ hú yě ó. Ayǐkúngban yětɔn ná bó hwe hú mitɔn ɔ́, mi nyɔ́ hú yě ǎ.

³ Nyladó sín azǎn ɔ́ sɛ dó nukɔn wɛ mi ɖe bó ɖɔ, lo ɔ́, dǎkaxixo sín azǎn ɔ́ dɔn sɛkpɔ́ miɖée wɛ mi ɖe.

⁴ Mi nɔ mlɔ́ akánma e è sɔ́ ajinakúɖú dó ba acɔ́ na ɔ́ jí; mi nɔ dlɛ́n ɖo zinkpo gaga mitɔn lɛ́ɛ jí; mi ɖo lɛ̌ngbɔ́ví kpó nyibúví e è sɔ́ ɖó vo bɔ nǔɖuɖu kpé ganjí ɔ́ kpó ɖu wɛ.

⁵ Mi nɔ ji han dó agǐdigbo mɛ kpó xósúsú kpó. Mi nɔ bló hanjinú yɔ̌yɔ́ ɖěvo lɛ́ɛ Davídi ɖɔhun.

⁶ Mi nɔ nu vɛ̌ɛn ɖo kɔ́fu ɖaxó ɖaxó lɛ́ɛ mɛ, bó nɔ́ sá célu axivɛ́nu lɛ́ɛ. Lo ɔ́, nǔ baɖabaɖa e ɖo jijɛ dó Jozɛ́fu sín akɔta lɛ́ɛ jí wɛ lɛ́ɛ nɔ kú wǔ nú mi ǎ.

⁷ Énɛ́ ɔ́ wú ɔ́, mi wɛ ná nyí kannumɔ nukɔn tɔn e è nǎ wlí lɛ́ɛ. Agɔ̌ e ɖu wɛ fɔnlínnɔ lɛ́ɛ ɖe ɔ́ kpé lo!

Mawu gba Samalíi hánnyá

⁸ Aklúnɔ Mavɔmavɔ xwlé éɖée. Mawu Mavɔmavɔ, Mawu Nǔbǐwúkpétɔ́ ɔ́ ɖɔ: “Go e yí wɛ Izlayɛ́li sín togun ɔ́ ɖe ɔ́ vɛ́ mɔ nú mi ɖésú. Un gbɛ́ wǎn nú xɔ tɔn ɖagbe ɖagbe lɛ́ɛ. Nǔ e ɖo Samalíi lɛ́ɛ bǐ wɛ un ná jó nú kɛntɔ́ tɔn lɛ́ɛ.”

⁹ Ényí súnnu wǒ wɛ kpo ɖo xwédo ɖokpó mɛ ɔ́, yě bǐ ná kú.

¹⁰ Hwenu e hɛ̌nnumɔ ɖé na zé mɛkúkú ɖokpó bó ná dó zo, bó ná bɛ́ xúgloxú tɔn lɛ́ɛ sín xwé ɔ́ gbe ɔ́, é ná kanbyɔ́ mɛ e ɖo xwé ɔ́ tɛ́ntin dɔ̌n ɔ́ ɖɔ: “Mɛ ɖé lɛ́ kpo ɖo gɔ̌n towe dɔ̌n a?” Bɔ mɛ ɔ́ ná yí gbe ɖɔ: “Éeǒ! É sɔ́ kpo mɛɖé ǎ.” É ná lɛ́ ɖɔ gɔ́ ná ɖɔ: “Xwɛ! Hwenu e è nǎ ylɔ́ Mawu Mavɔmavɔ sín nyǐkɔ dó ɔ́ ɖíe ǎ.”

¹¹ Đó Mawu Mavɔmavɔ ɖíe ɖe gbeta tɔ́n e; é ná ɖɔ bɔ xɔ ɖaxó ɔ́ ná mu, bɔ xɔ kpɛví ɔ́ ná gba hánnyá.

Đuɖéjí e ma nyí ɖuɖéjí ɖé ǎ é

¹² Sɔ́ nɔ kán wezun gbɔn só jí wɛ a? È nɔ zé nyibú dó lɛ gle ɖo xu jí wɛ a? Bɔ étɛ́wútu mi ka zé nǔjlɔ́jlɔ́wiwa dó húzú nǔvɛ́nu, bó zé hwɛjijɔ dó húzú aɖǐvɛ́?

¹³ Nǔmaɖinǔ lɛ́ɛ tamɛ wɛ mi nɔ j'awǎ dó. Mi nɔ ɖɔ: “É ma nyí hlɔ̌nhlɔ́n mǐtɔn wɛ zɔ́n bɔ mǐ kpé nǔ bǐ wǔ ǎ cé?

¹⁴ Énɛ́ ɔ́ wú ɔ́, Izlayɛ́linu lɛ́ɛ mi, mi ɖótó! Un ná bló bɔ akɔta ɖé ná sí te dó mi jí, bó ná kpa acɛ gannaganna nú mi sín Hamáti hɔntogbó ɔ́ kɔn káká yi tɔsisa e ɖo gbětótló mɛ é kɔn.” Xó e Mawu Mavɔmavɔ, Mawu Nǔbǐwúkpétɔ́ ɖɔ ɔ́ nɛ́.