Amɔ́si 5 - MAWUXÓWÉMA

Amɔ́si ji gbɛvíhan dó Izlayɛ́linu lɛ́ɛ tamɛ

¹ Izlayɛ́linu lɛ́ɛ mi, mi ɖótó xó e ɖɔ gbé un ja é: gbɛvíhan ɖé wɛ un dó ɖó ta mitɔn mɛ.

² Izlayɛ́li jɛ ayǐ; é sɔ́ ná sí te ǎ; é mlɔ́ ayǐ bɔ mɛ ɖěbǔ fɔ́n ɛ sí te ǎ.

³ Đó Aklúnɔ Mavɔmavɔ ɖɔ dó Izlayɛ́li togun ɔ́ wú ɖɔ: “Súnnu afatɔ́n (1.000) gosín toxo ɖaxó ɖé mɛ yi ahwan fun gbé ɔ́, mɛ kanwe ko (100) jɛ́n ná lɛ́ kɔ wá.”

Mi wá gɔ̌n ce dó hwenu

⁴ Đó Mawu Mavɔmavɔ ɖɔ nú Izlayɛ́li togun ɔ́ ɖɔ: “Mi lɛ́ kɔ wá gɔ̌n ce, bó ná gán!

⁵ Lo ɔ́, mi ma wá gɔ̌n ce ɖo Betɛ́li ó; mi ma ka yi Gilugalu ó; mi ma gbɔn Bɛ̌-Ceva ó. Đó è na wlí Gilugalunu lɛ́ɛ yi kannumɔgbénu, bó ná vívá Betɛ́linu lɛ́ɛ sín kún.”

⁶ Mi lɛ́ kɔ wá Mawu Mavɔmavɔ gɔ́n, bó ná gán! É ma nyí mɔ̌ ǎ ɔ́, Mawu Mavɔmavɔ ná wá dó Jozɛ́fu kúnkan lɛ́ɛ bǐ zo, bɔ mɛ e ná cí zo énɛ́ ɔ́ ná tíin ǎ.

⁷ Heelú mi mɛ e nɔ zé nǔjlɔ́jlɔ́wiwa dó mɔ nǔ nyanya wiwa ná, bó nɔ́ zé hwɛjijɔ dó xo kɔ́ ná lɛ́ɛ.

⁸ Mawu Mavɔmavɔ bló sunvísɛkplé totaligbé tɔn lɛ́ɛ kpó sunvísɛkplé tofɔligbé tɔn lɛ́ɛ kpó. É nɔ sɔ́ zǐnflú dó húzú wěziza zǎnzǎn tɔn; é nɔ sɔ́ kéze dó húzú zǎn. É dɔn sin e ɖo xu mɛ lɛ́ɛ wá gba kɔn nyi ayǐkúngban jí. Mawu Mavɔmavɔ wɛ é nyí.

⁹ É nɔ́ zin hlɔ̌nhlɔ́nnɔ lɛ́ɛ dó ayǐ, bó nɔ́ hɔ́ ahohó lɛ́ɛ.

¹⁰ Mi jɛ hwɛɖɔxɔsá ɔ́, mi nɔ gbɛ́ wǎn nú mɛ e nɔ ɖɔ è nǐ wa nǔ jlɔ́jlɔ́ é, bɔ mɛ e ɖo nǔgbó ɖɔ wɛ ɔ́ nɔ́ vɛ́ mɔ nú mi.

¹¹ “Mi nɔ xo mɛ e ma ɖó gǎn ǎ lɛ́ɛ ɖu, bó nɔ yí nǔjɔ ɖo jinukún yětɔn lɛ́ɛ jí; énɛ́ ɔ́ wútu ɔ́, xɔ ɖagbe ɖagbe e mi gbá lɛ́ɛ ɔ́, mi ná ɖu gbɛ yětɔn ǎ; vǐwuntín ɖagbe ɖagbe e mi tun lɛ́ɛ ɔ́, mi ná dó vɛ̌ɛn yětɔn nu ǎ.

¹² Mawu ká ɖɔ: nyɛ Mawu ɔ́, nǔ nyanya tobutóbú e mi wa lɛ́ɛ ɔ́, un dán ɖěbǔ ǎ; un tunwun lě e nǔ e mi wa nyi do lɛ́ɛ syɛ́n sɔ é: xomɛvɔ́nɔ lɛ́ɛ sín kɛntɔ́ wɛ mi nyí. Mi nɔ yí gbe bɔ è nɔ dó ajɔ mi. Mi jɛ hwɛɖɔxɔsá ɔ́, mi nɔ lɔn nú è na ɖe xlɛ́ ɖɔ wamamɔnɔ lɛ́ɛ sín hwɛ jɔ ǎ.”

¹³ Nyladó hwenu ɖé wɛ nyí hwenu élɔ́; nǔ e wútu mɛ e nyɔ́ nǔ i ɔ́ nɔ́ nɔ abwɛ̌ ɔ́ nɛ́.

¹⁴ Hǔn, mi bó nɔ́ wa nǔ ɖagbe, bó jó nǔ nyanya wiwa dó; énɛ́ ɔ́, mi ná gán bɔ Mawu Mavɔmavɔ, Mawu Nǔbǐwúkpétɔ́ ɔ́ ná nɔ kpɔ́ xá mi lě e mi ba gbɔn é.

¹⁵ Mi gbɛ́ wǎn nú nǔ nyanya wiwa, mi yí wǎn nú nǔ ɖagbe wiwa. Mi jɛ hwɛɖɔxɔsá hǔn, mi nɔ ɖɔ xó e sɔgbe é. Énɛ́ ɔ́, afɔ nyɔ́ ɔ́, Mawu Mavɔmavɔ, Mawu Nǔbǐwúkpétɔ́ ɔ́ sixú kú nǔbláwǔ nú Jozɛ́fu sín vǐ e kpo lɛ́ɛ.

¹⁶ Mawu Mavɔmavɔ, Mawu Nǔbǐwúkpétɔ́, Aklúnɔ ɖɔ: “Énɛ́ ɔ́ wú wɛ è nǎ nɔ́ ya gbɛvíhan ɖo tokplétɛn lɛ́ɛ bǐ; è nǎ nɔ sú xó ɖo toligbó lɛ́ɛ xo ɖɔ: ‘Heelúnú tɛ́ ɖíe! Heelúnú tɛ́ ɖíe!’ È nǎ ylɔ́ glesi lɛ́ɛ, bó ná dɔn yě dó aluwɛ mɛ, bó ná ylɔ́ mɛ e nɔ dó gbɛvíhan lɛ́ɛ, bɔ yě ná wá ji gbɛvíhan.

¹⁷ È nǎ ya gbɛvíhan gbɔn vǐwungle lɛ́ɛ bǐ mɛ, hwenu e un ná gbɔn tɛ́ntin mitɔn é.” Xó e Mawu Mavɔmavɔ ɖɔ ɔ́ nɛ́.

Mawu Mavɔmavɔ sín azǎn ɔ́

¹⁸ Heelú mɛ e ɖo Mawu Mavɔmavɔ sín azǎn ɔ́ nɔ te kpɔ́n wɛ lɛ́ɛ. Étɛ́ ɖó nukún wɛ mi ka ɖe ɖo Mawu Mavɔmavɔ sín azǎn ɔ́ gbe? Zǐnflú sín azǎn wɛ é ná nyí; é na nyí wěziza sín azǎn ǎ.

¹⁹ Mɛ e ɖo hinhɔn nú kinnikínní wɛ, bó yi kpé dó lɔnmɔ nu ɔ́ ɖɔhun wɛ mi ná cí; é hɔn byɔ́ xwé gbe, bó kplá así ta bɔ dan xú aɖǔ i.

²⁰ Mawu Mavɔmavɔ sín azǎn ɔ́, wěziza sín azǎn wɛ é ná nyí a? Éeǒ! Zǐnflú sín azǎn wɛ é ná nyí; ablu sín azǎn wɛ; é ná za wě ɖěbǔ ǎ.

Sinsɛn e Mawu gbɛ́ wǎn ná é

²¹ “Un gbɛ́ wǎn nú xwe e mi nɔ ɖu lɛ́ɛ; yě nɔ́ nyɔ́ nukún ce mɛ ǎ. Mi kplé ɔ́, nǔ e wa wɛ mi nɔ ɖe lɛ́ɛ nɔ́ nyɔ́ mɔ nú mì ǎ.

²² Nú mi xwlé vɔ̌sánú e mi nɔ dó zo lɛ́ɛ kpó nǔníná mitɔn lɛ́ɛ kpó mì ɔ́, yě nɔ́ nyɔ́ nukún ce mɛ ǎ. Nyibúví e mi sɔ́ ɖó vo bɔ nǔɖuɖu kpé lɛ́ɛ ɔ́, mi fɔ yě dó sá vɔ̌ ná nú mì, bó dó dó kú nú mì ɔ́, un tlɛ nɔ kpɔ́n jɛ yětɔn jí lɔ ǎ.

²³ Mi ma sɔ́ ji han ɖě dó tó mɛ nú mì ó. Un sɔ́ jló ná se agǐdigbo e xo wɛ mi ɖe lɛ́ɛ ɖě sín gbe ǎ.

²⁴ Lo ɔ́, nǔjlɔ́jlɔ́wiwa ní cí tɔ e ɖo sisa wɛ ɔ́ ɖɔhun; hwɛjijɔ ní cí tɔsisa e ma nɔ xú gbeɖé ǎ é ɖɔhun.

²⁵ “Izlayɛ́linu lɛ́ɛ mi, hwenu e mi nɔ gbětótló mɛ káká nú xwe kanɖé (40) ɔ́, mi sa vɔ̌ ɖé nú mì a? Mi ka ná nǔɖé mì a?

²⁶ Égbé din ɔ́, mi bɛ́ axɔ́sú Sikútu kpó sunví Kinyu e mi nɔ sɛn ɔ́ kpó sín bǒcyɔ lɛ́ɛ hɛn; mi ɖésúnɔ wɛ ká sɔ́ alɔ mitɔn dó bló nǔ énɛ́ lɛ́ɛ ná; mɔ̌ jɛ́n mi ka nɔ bɛ́ nǔ énɛ́ lɛ́ɛ hɛn ɖ'ayǐ a? Mi tunwun ganjí ɖɔ émí kún nɔ bló mɔ̌ ó sín.

²⁷ Énɛ́ ɔ́ wú ɔ́, un ná wlí kannumɔ mitɔn yi Damási gúdo dɔ̌n.” Xó e Mawu Mavɔmavɔ, Mawu Nǔbǐwúkpétɔ́ ɔ́ ɖɔ ɔ́ nɛ́.