Amɔ́si 3 - MAWUXÓWÉMA

Mawu ná dɔn tó nú togun Izlayɛ́li tɔn

¹ Izlayɛ́li ví lɛ́ɛ mi, mi mɛ e nyí hɛ̌nnu e Mawu Mavɔmavɔ ɖe tɔ́n sín Ejípu lɛ́ɛ bǐ, mi ɖótó xó élɔ́ e Mawu Mavɔmavɔ ɖɔ dó mi wú é!

² É ɖɔ: Midɛɛ lɛ́ɛ kɛ́ɖɛ́ wɛ un sɔ́ ɖo hɛ̌nnu e ɖo ayǐkúngban jí lɛ́ɛ bǐ mɛ; énɛ́ ɔ́ wú ɔ́, nǔ nyanya e mi wa lɛ́ɛ bǐ sín tó wɛ un ná dɔn nú mi.

Mawu ɖo xó ɖɔ wɛ ɔ́, gbeyíɖɔ tɔn nɔ sixú nɔ abwɛ̌ ǎ

³ Mɛ we nɔ zɔn yi fí ɖé ma ko ɖɔ ɖ'ayǐ a?

⁴ Ényí kinnikínní ma mɔ nǔ e é na ɖu ɔ́ ǎ ɔ́, é sixú dó gbe ɖo zunkan mɛ a? Nú é ma mɔ nǔɖé wlí ǎ ɔ́, é sixú sú xó ɖo fí e é xo do ɖe ɔ́ a?

⁵ Ényí è ɖǒ mɔ bó má sɔ́ nǔɖuɖu ɖ'é jí ǎ ɔ́, xɛ sixú wá jɛ mɛ a? Ényí mɔ ɖé ma wlí nǔ ǎ ɔ́, é sixú fɛ́ a?

⁶ Ahwankpɛn nɔ jɛ gbe ɖo toxo ɖé mɛ, bɔ ado nɔ gɔn mɛ e ɖo toxo ɔ́ mɛ lɛ́ɛ hu a? Awě nɔ́ xo toxo ɖé Mawu Mavɔmavɔ mɛ vo a?

⁷ Đó Aklúnɔ Mavɔmavɔ nɔ wa nǔɖé ma ɖe nǔbúdo tɔn xlɛ́ mɛsɛntɔ́ tɔn gbeyíɖɔ lɛ́ɛ ǎ.

⁸ Ényí kinnikínní ɖo gbe dó wɛ ɔ́, mɛ̌ xɛsi ma ka ná ɖi ǎ? Aklúnɔ Mavɔmavɔ ɖo xó ɖɔ wɛ ɔ́, mɛ̌ ma ka ná yi dó wɛn tɔn gbɛtɔ́ lɛ́ɛ ǎ?

Mawu ɖó hwɛ nú Samalíinu lɛ́ɛ

⁹ Mi zé gbe yi jǐ bó ɖɔ ɖo Acidɔ́di kpó Ejípu kpó sín hɔn lɛ́ɛ mɛ ɖɔ: “Mi sɛ miɖée kplé ɖo Samalíi sín só ɔ́ ta, bó ná kpɔ́n nǔ hannyahannya wiwa e ɖo fínɛ́ lɛ́ɛ kpó dǎnúwiwa e ɖo fínɛ́ lɛ́ɛ kpó.”

¹⁰ Mawu Mavɔmavɔ ɖɔ: “Samalíinu lɛ́ɛ tunwun nǔ e nyí nǔjlɔ́jlɔ́wiwa ɔ́ ɖě ǎ. Nǔ e yě fán asú mɛ bó yí lɛ́ɛ kpó nǔ e yě fin lɛ́ɛ kpó wɛ yě bɛ́ kplé ɖó hɔn yětɔn lɛ́ɛ mɛ.”

¹¹ Énɛ́ ɔ́ wú wɛ Aklúnɔ Mavɔmavɔ ɖɔ: “Kɛntɔ́ na wá xá to ɔ́; é ná mu dǒ e è mɛ lɛ́dó to ɔ́ bǐ, bó na bɛ́ nǔ e ɖo hɔn towe lɛ́ɛ mɛ lɛ́ɛ.”

Hwlɛngán e ma nyí hwlɛngán ǎ é

¹² Mawu Mavɔmavɔ ɖɔ: “Ényí kinnikínní wlí lɛ̌ngbɔ́ ɖokpó ɔ́, lɛ̌ngbɔ́nyitɔ́ ɔ́ nɔ́ yí afɔ tɔn we, abǐ tó tɔn kánkpo ɖé sín nu tɔn mɛ; lě e é ná nyí gbɔn nú Izlayɛ́li ví e ɖo ayǐjínjɔ́n ɖo akánma tó, abǐ kɔɖónú jí ɖo Samalíi lɛ́ɛ ɔ́ nɛ́; xóyɛ́xóyɛ́ ɖé jɛ́n è na hwlɛ́n gán.”

Afɔ ɖó afɔ jí nú mɛ

¹³ Aklúnɔ Mavɔmavɔ, Mawu Nǔbǐwúkpétɔ́ ɔ́ ɖɔ: “Mi ɖótó xó élɔ́, bó ná yi ɖɔ nú Jakɔ́bu sín kúnkan lɛ́ɛ; mi ná ɖɔ:

¹⁴ Gbe e gbe un ná dɔn nǔ nyanya e Izlayɛ́li ví lɛ́ɛ wa lɛ́ɛ sín tó nú yě ɔ́, un ná gba vɔ̌sákpe e ɖo Betɛ́li lɛ́ɛ hánnyá; un ná gba lanzo e è mɛ ɖó vɔ̌sákpe ɔ́ sín zwe jí zwe jí lɛ́ɛ, bɔ yě ná hɔ́ jɛ ayǐ.

¹⁵ Un ná mu xɔ e mɛ yě nɔ́ nɔ avivɔ hwenu lɛ́ɛ, kpó xɔ e mɛ yě nɔ́ nɔ yǒzo hwenu lɛ́ɛ kpó ; un ná mu hɔnmɛ e yě sɔ́ ajinakúɖú dó ɖó acɔ́ na lɛ́ɛ; un ná gba gbɛtɔ́ nukúnɖéjí lɛ́ɛ sín xɔ ɖagbe ɖagbe lɛ́ɛ.” Xó e Mawu Mavɔmavɔ ɖɔ ɔ́ nɛ́.