Amɔ́si 2 - MAWUXÓWÉMA

¹ Mawu Mavɔmavɔ ɖɔ: “Mɔwabunu lɛ́ɛ ɔ́, nǔ e yě wa nyi do, bɔ un jló ná kɛ nu d'é wú nú yě ɔ́ nyí ɖokpó kɛ́ɖɛ́ ǎ, amɔ̌, élɔ́ e yě wa ɔ́ vɛ́ nú mì tawun. Yě dǒ axɔ́sú Edɔ́mu tɔn ɔ́ sín xú lɛ́ɛ zo, bɔ xú lɛ́ɛ fyɔ́ bǐ gúnmígúnmí . Nǔ e wú un ma ná lɛ́ kɔ sín gbeta e un ɖe tɔ́n ɔ́ gúdo ǎ é nɛ́.

² Un na dó Mɔwabu toxo ɔ́ zo, bɔ zo ná ji hɔnmɛ e ɖo Keliyɔ́ti toxo ɔ́ mɛ lɛ́ɛ bǐ. Mɔwabunu lɛ́ɛ ná dɔn ɖo zǐngídi tɛ́ntin, bɔ yě ná ɖo ahwan fun wɛ, bó ná ɖo kpɛn kún wɛ.

³ Un ná hu axɔ́sú e ɖo toxo ɔ́ nu é, bó ná vívá kún nú azaglɔ́gán tɔn lɛ́ɛ kpó éyɛ́ kpó.” Xó e Mawu Mavɔmavɔ ɖɔ ɔ́ nɛ́.

⁴ Mawu Mavɔmavɔ ɖɔ: “Judáanu lɛ́ɛ ɔ́, nǔ e yě wa nyi do, bɔ un jló ná kɛ nu d'é wú nú yě ɔ́ nyí ɖokpó kɛ́ɖɛ́ ǎ, amɔ̌, élɔ́ e yě wa ɔ́ vɛ́ nú mì tawun. Yě gbɛ́ wǎn nú sɛ́n ce lɛ́ɛ; yě blǒ nǔ e un zɔ́n yě ɖɔ yě ní bló lɛ́ɛ ǎ; adingbanxó e tɔ́ yětɔn lɛ́ɛ xwedó lɛ́ɛ wɛ yě lɔ jó yěɖée dó ná, bó yi bú ali. Nǔ e wú un ma na lɛ́ kɔ sín gbeta e un ɖe tɔ́n ɔ́ gúdo ǎ é nɛ́.

⁵ Un na dó Judáa to ɔ́ zo, bɔ zo ná ji hɔnmɛ e ɖo Jeluzalɛ́mu lɛ́ɛ.”

⁶ Mawu Mavɔmavɔ ɖɔ: “Izlayɛ́li ví lɛ́ɛ ɔ́, nǔ e yě wa nyi do, bɔ un jló na kɛ nu d'é wú nú yě ɔ́ nyí ɖokpó kɛ́ɖɛ́ ǎ, amɔ̌, élɔ́ e yě wa ɔ́ vɛ́ nú mì tawun; yě nɔ́ zé xomɛvɔ́nɔ sa kannumɔ ɖɔhun, bó ná dó mɔ akwɛ́ yětɔn yí; yě nɔ́ sɔ́ wamamɔnɔ sa ɖó afɔkpa yětɔn nu. Nǔ e wú un ma ná lɛ́ kɔ sín gbeta e un ɖe tɔ́n ɔ́ gúdo ǎ é nɛ́.

⁷ Yě nɔ́ gbídí mɛ e ma ɖó gǎn ǎ lɛ́ɛ sín ta ɖó afɔ wú. Yě yi hwɛɖɔxɔsá bónú wamamɔnɔ ɖo nǔɖé byɔ́ wɛ ɔ́, yě nɔ́ hɔn xó e ɖɔ wɛ é ɖe ɔ́ nyi gbě. Tɔ́ kpó vǐ kpó nɔ ɖó xó xá nyɔ̌nuví ɖokpó ɔ́; nǔ énɛ́ ɔ́ nyí zungbe nú mì bó kɔ́n wi ce.

⁸ Yě nɔ́ mlɔ́ avɔ e yě yí ɖó gbanu ɖo wamamɔnɔ lɛ́ɛ sí lɛ́ɛ jí, ɖo vɔ̌sákpe ɖokpó ɖokpó kpá. Yě nɔ́ nu vɛ̌ɛn e yě wlí ɖo mɛ lɛ́ɛ sí ɔ́ ɖo nǔmɛsɛn yětɔn lɛ́ɛ sín xɔsá.

⁹ Có un vívá kún nú Amɔliti lɛ́ɛ ɖó ta mitɔn mɛ. Yě mɛ énɛ́ lɛ́ɛ e yi jǐ sɔ hǔntín, bó syɛ́n sɔ kákɛ́ lɛ́ɛ é; un vívá kún nú yě sín ɖɔ káká yi ɖaví lɛ́ɛ nu.

¹⁰ Có nyɛ wɛ ka kplá mi sín Ejípu, bó kplá mi gbɔn gbětótló mɛ xɔ xwe kanɖé (40), bó ná dó ná Amɔliti lɛ́ɛ sín to mi.

¹¹ Un bló bɔ gbeyíɖɔ ce lɛ́ɛ lɛ́ tɔ́n ɖo vǐ súnnu mitɔn lɛ́ɛ mɛ, bɔ un lɛ́ ylɔ́ dɔ̌nkpɛvú ɖé lɛ́ɛ ɖo dɔ̌nkpɛvú mitɔn lɛ́ɛ mɛ, bɔ yě dó akpá dó sɔ́ yěɖée kɛ mì . Nǔ e nyɛ Mawu Mavɔmavɔ kanbyɔ́ ɔ́ nɛ́. Izlayɛ́linu lɛ́ɛ mi! Nǔ nyí mɔ̌ ǎ cé?

¹² Lo ɔ́, yě mɛ énɛ́ lɛ́ɛ e dó akpá, dó sɔ́ yěɖée kɛ mì, bó má ɖó ná nu vɛ̌ɛn ǎ lɛ́ɛ ɔ́, mi ná vɛ̌ɛn yě bɔ yě nu; mi gbɛ́ nú gbeyíɖɔ lɛ́ɛ ɖɔ yě nǐ ma sɔ́ yí wɛn ce ɖě bó yi dó ó.

¹³ Éɖíe! Un na li mi dó kɔ mɛ, lě e kɛkɛ́ e jinukúngban gɔ́ ɔ́ nɔ li kɔ́gúdu é ɖɔhun.

¹⁴ Mɛ ɖé ná bó bí ɔ́, é ná sixú hɔn ǎ; mɛɖé ná bó dó hlɔ̌nhlɔ́n ɔ́, é ná sixú sɔ́ hlɔ̌nhlɔ́n tɔn dó wa nǔɖé ná ǎ, mɛɖé ná bó nyí súnnu akowunká ɔ́, é sixú hwlɛ́n gbɛ éɖée tɔn ǎ.

¹⁵ Mɛ ɖé ná bó nɔ́ ɖo gǎ da wɛ ɔ́, é ná sixú nɔ nu ǎ; mɛɖé sín afɔ na bo yá ɔ́, é ná sixú gló ǎ; sɔ́xátɔ́ ná sixú gán ɖ'é mɛ ǎ.

¹⁶ Azǎn énɛ́ ɔ́ gbe ɔ́, mɛɖé ná bó kpan akɔ́n hú mɛ bǐ ɖo ahwanfuntɔ́ lɛ́ɛ mɛ ɔ́, mɛ ɔ́ ná bɛ́ ahwanfunnú tɔn bǐ kɔn nyi gbě, bó hɔn mɛ̌ jɔgbe.” Xó e Mawu Mavɔmavɔ ɖɔ ɔ́ nɛ́.