Ajée 2 - MAWUXÓWÉMA

¹ Hwenu e axɔ́sú Daliwúsi ɖo xwe we bló wɛ ɖo zinkpo jí ɔ́, azǎn ko-nukún-ɖokpógɔ́ ɔ́ e ɖo sun tɛ́nwegɔ́ ɔ́ mɛ ɔ́ gbe ɔ́, Aklúnɔ lɛ́ dó wɛn ɖokpó gbeyíɖɔ tɔn Ajée.

² É ɖɔ é ní yi ɖɔ nú Zolobabɛ́li tokpɔngán Judáa tɔn Calutiyɛ́li ví ɔ́, kpódó vɔ̌sánú-xwlémawutɔ́ ɖaxó Jozuwée Yexosadaki ví ɔ́ kpó, kpódó mɛ e lɛ́ kɔ sín kannumɔgbénu wá xwé lɛ́ɛ kpó ɖɔ:

³ “Mɛ̌ ká kpo ɖo mi mɛ bo ɖo lě e Mawu Mavɔmavɔ xwé ɔ́ nyɔ́ ɖɛkpɛ gbɔn ɖ'ayǐ ɔ́ flín wɛ? Nɛ̌ mɔ élɔ́ gbɔn wɛ mi ɖe din? Mi mɔ din ɖɔ é kún hwɛ́n nǔɖé ó ǎ cé?

⁴ Énɛ́ ɔ́ wú wɛ nyɛ Mawu Mavɔmavɔ ɔ́, un ɖo ɖiɖɔ nú mi wɛ ɖɔ: Zolobabɛ́li, kpan akɔ́n. Vɔ̌sánú-xwlémawutɔ́ ɖaxó Jozuwée, hwi lɔ ní kpan akɔ́n. Mi mɛ e lɛ́ kɔ sín kannumɔgbénu wá xwé lɛ́ɛ, mi lɔmɔ̌ mi kpan akɔ́n. Mi jɛ azɔ̌ wú; un ná nɔ kpɔ́ xá mi. Nyɛ Mawu Mavɔmavɔ Nǔbǐwúkpétɔ́ ɔ́ wɛ dó akpá tɔn nú mi.

⁵ Un ko zin alɔ énɛ́ ɔ́ dó akɔ́n hwenu e mi tɔ́n sín Ejípu é. Un ka na nɔ tɛ́ntin mitɔn. Mi ma ɖi xɛsi ó.

⁶ Nyɛ Mawu Mavɔmavɔ Nǔbǐwúkpétɔ́ ɔ́, un ɖo ɖiɖɔ wɛ. Zaanɖé din ɔ́, un ná húnhún jǐnukúnsin kpó ayǐkúngban kpó; un ná húnhún agě kpó tɔ kpó.

⁷ Un ná dán togun ɖě lɛ́ɛ bǐ, bɔ yě ná bɛ́ dɔkun yětɔn lɛ́ɛ wá fí, bɔ un ná bɛ́ bó dó vɔ́ acɔ́ ɖó nú xwé ce, bɔ é ná nyɔ́ ɖɛkpɛ ɖésú; nyɛ wɛ ɖɔ mɔ̌ nú mi.

⁸ Đó akwɛ́ kpó siká kpó e ɖo gbɛ ɔ́ mɛ ɔ́ bǐ ɔ́, ce wɛ.

⁹ Énɛ́ ɔ́, xwé yɔ̌yɔ́ ɔ́ ná nyɔ́ ɖɛkpɛ hú xwé nukɔntɔn ɔ́. Tɛn énɛ́ ɔ́ mɛ wɛ un ná ná fífá mi ɖe. Nyɛ Mawu Mavɔmavɔ Nǔbǐwúkpétɔ́ ɔ́ wɛ dó akpá tɔn.”

Togun ɔ́ hu hwɛ

¹⁰ Hwenu e axɔ́sú Daliwúsi ɖo xwe we bló wɛ ɖo zinkpo jí ɔ́, sun tɔn tɛ́nnɛgɔ́ ɔ́ sín azǎn ko-nukún-ɛnɛgɔ́ ɔ́ gbe ɔ́, Mawu Mavɔmavɔ Nǔbǐwúkpétɔ́ ɔ́ lɛ́ ɖɔ xó nú gbeyíɖɔ tɔn Ajée. É ɖɔ n'i ɖɔ:

¹¹ “Yi ɖɔ nú vɔ̌sánú-xwlémawutɔ́ lɛ́ɛ ɖɔ yě ní gbo xó élɔ́.

¹² Ényí mɛɖé hɛn lan e è sá vɔ̌ ná ɔ́ gǒ mɛ, bɔ avɔ e ɖo mɛ ɔ́ wú ɔ́ jɛ wɔ̌xúxú, abǐ mǎ, abǐ vɛ̌ɛn, abǐ ami, abǐ nǔɖuɖu alɔkpa ɖěbǔ wú ɔ́, è nǎ sɔ́ nǔɖuɖu énɛ́ ɔ́ ɖó vo nú Mawu wɛ a?” Vɔ̌sánú-xwlémawutɔ́ lɛ́ɛ ɖɔ: “Éeǒ.”

¹³ Ajée lɛ́ kanbyɔ́ yě ɖɔ: “Din ɔ́, ɖǒ alɔ nǔ kúkú wú, lobo húzú mɛ blíblí, nú mɛ énɛ́ ɔ́ yi ɖó alɔ nǔɖuɖu ɖé wú ɔ́, nǔɖuɖu énɛ́ ɔ́ lɔ ná húzú nǔ blíblí wɛ a?” Vɔ̌sánú-xwlémawutɔ́ lɛ́ɛ yí gbe n'i ɖɔ: “Ɛɛn”

¹⁴ Énɛ́ ɔ́ gúdo ɔ́, Ajée ɖɔ nú yě lo ɖɔ: “Éénɛ́! Mi bo ɖótó nǔ e Mawu Mavɔmavɔ ɖɔ é. É ɖɔ: Mɔ̌ wɛ to élɔ́ mɛ nu lɛ́ɛ kpó nǔ e yě sɔ́ alɔ yětɔn dó bló ná lɛ́ɛ cí. Nǔ e yě nɔ́ xwlé mì ɖo vɔ̌sákpe jí lɛ́ɛ bǐ wɛ nyí nǔ blíblí ɖo nukún ce mɛ.”

Bɛ́ sín égbé ɔ́, mi nɔ acéjí

¹⁵ Mawu Mavɔmavɔ lɛ́ ɖɔ nú yě ɖɔ: “Mi zé ayi mitɔn ɖó te ganjí bó ná kpɔ́n nǔ e ná jɛ jijɛ jí sín din lɛ́ɛ. Cóbónú mi na jɛ xwé ɔ́ sín dǒ mɛ jí kpó awǐnnya kpó ɔ́,

¹⁶ étɛ́ wɛ nɔ jɛ dó mi jí? Hwenɛ́nu ɔ́, ényí mɛɖé ɖó jinukún gannú ko ɖo kɔ́zún mɛ, bó xwe jlɛ̌jlɛ́ gbé ɔ́, é má nyí wǒ jɛ́n é nɔ́ yi mɔ ǎ cé? Ényí mɛɖé ɖó vɛ̌ɛn lǐtli kanɖé wǒ (50) ɖo balíi mɛ, bó xwe jlɛ̌jlɛ́ gbé ɔ́, é má nyí lǐtli ko jɛ́n é nɔ́ yi mɔ ǎ cé?

¹⁷ Un hɛn azɔ̌ e mi wa é bǐ gblé. Un ɖɔ bɔ jinukún lɛ́ɛ bǐ fyɔ́, abǐ nyɔ dó te. Un ɖɔ bɔ kɛ́njí ja. Un wa nǔ énɛ́ lɛ́ɛ bǐ có mi lɛ́ kɔ wá nyɛ Mawu Mavɔmavɔ ɔ́ gɔ́n ǎ.

¹⁸ Mi zé ayi mitɔn ɖó te ganjí, bó ná kpɔ́n nǔ e ná jɛ jijɛ jí sín égbé é. Azǎn ko-nukún-ɛnɛgɔ́ ɔ́ e ɖo sun tɛ́nwegɔ́ ɔ́ mɛ é gbe ɖíe mi ɖo xwé ɔ́ sín awǐnnya dó do wɛ e. Mi bo ɖó kɛ́n jí ganjí.

¹⁹ Jinukún ɖěbǔ sɔ́ kpo ɖo kɔ́zún mɛ nú mi din a? Vǐwuntín lɛ́ɛ, fígitín lɛ́ɛ, glenáditín lɛ́ɛ, kpódó olívutín lɛ́ɛ kpó ɖěbǔ sɔ́ sɛ́n ǎ. Amɔ̌, bɛ́ sín égbé ɔ́, un ná kɔn nyɔ̌ná ce lɛ́ɛ dó mi jí.”

Mawu Mavɔmavɔ dó akpá nú Zolobabɛ́li

²⁰ Azǎn ko-nukún-ɛnɛgɔ́ ɔ́ e ɖo sun énɛ́ ɔ́ mɛ ɔ́ gbe ɔ́, Mawu Mavɔmavɔ ɖɔ xó nú Ajée azɔn wegɔ́ ɔ́, bó ɖɔ:

²¹ “Yi ɖɔ nú Zolobabɛ́li tokpɔngán Judáa tɔn ɔ́ ɖɔ nyɛ Mawu Mavɔmavɔ Nǔbǐwúkpétɔ́ ɔ́ ná húnhún jǐxwé kpó dodomɛ kpó.

²² Un ná flí zinkpo sín axɔ́sú lɛ́ɛ glɔ́, bó ná hu acɛ nú axɔ́súɖuto e ɖo ayǐkúngban jí lɛ́ɛ bǐ. Un ná flí ahwanhún lɛ́ɛ kpó mɛ e ɖo kunkun wɛ lɛ́ɛ kpó nyi kɔ́ mɛ. Sɔ́ lɛ́ɛ ná kú bɔ sɔ́xátɔ́ lɛ́ɛ ná hu yěɖée.

²³ Zolobabɛ́li, mɛsɛntɔ́ ce wɛ a nyǐ, amɔ̌, gbe énɛ́ gbe ɔ́, un ná zɔ́n azɔ̌ ɖokpó we. A nǎ nyí mɛvívɛ́ná ɖokpó nú mì, alɔkɛ́ e un nɔ dó ɖó wuntun nǔ ná é ɖɔhun, ɖó hwi wɛ un sɔ́. Nǔ e nyɛ Mawu Mavɔmavɔ Nǔbǐwúkpétɔ́ ɔ́ ɖɔ ɔ́ nɛ́.”