Abudiyási 1 - MAWUXÓWÉMA

Aklúnɔ ɖe xlɛ́ Abudiyási ɖɔ Edɔ́mu ná gba

¹ Aklúnɔ Mawu ɖe nǔ xlɛ́ Abudiyási. É ɖɔ xó n'i dó togun Edɔ́mu tɔn ɔ́ wú. Xó e é ɖɔ ɔ́ ɖíe: Mǐ se wɛn Mawu Mavɔmavɔ tɔn ɖokpó. É sɛ́ wɛnsagun ɖokpó dó akɔta lɛ́ɛ tɛ́ntin bɔ é wá ɖɔ nú yě ɖɔ: “Mi sí te, mi nú mǐ ná yi fun ahwan xá Edɔ́munu lɛ́ɛ.”

² Mawu Mavɔmavɔ ɖɔ: “Edɔ́mu, un ná ɖe hlɔ̌nhlɔ́n towe kpo ɖo akɔta lɛ́ɛ bǐ mɛ. Mɛ ɖé sɔ́ ná mɔ we dó mɔ nǔɖé ǎ.

³ Goyíyí towe dɔn we bú ali. A yi cí sókan mɛ, bó yi jínjɔ́n só ta aga ɖéé, bó nɔ́ ɖɔ: ‘Mɛ̌ ká sixú kpíkpé mì sín fí nyi dodomɛ?’

⁴ A na bo sɔ́ adɔ̌tɛn towe yi ɖó aga ɖéé gangan ɖɔhun ɔ́, a na bo sɔ́ yi ɖó sunví lɛ́ɛ tɛ́ntin ɔ́, nyɛ ná kpíkpé we sín dɔ̌n wá dodomɛ; nyɛ Mawu Mavɔmavɔ wɛ ɖɔ mɔ̌.

⁵ Ényí ajotɔ́ mɛvɔtɔ́ lɛ́ɛ wá xwé ɖé gbe zǎn mɛ ɔ́, nǔ e myá nukún nú yě lɛ́ɛ wɛ yě nɔ́ bɛ́. Ényí vǐwungbɛtɔ́ lɛ́ɛ yi vǐwungbo ɖé mɛ ɔ́, yě nɔ́ sixú gbɛ bǐ gbeɖé ǎ. Amɔ̌, hwɛ ɔ́, è vɔ we bǐ.

⁶ Yéége Esawu ví lɛ́ɛ mi, mi kpɔ́n lě e è bɛ̌ nǔ mitɔn lɛ́ɛ bǐ gbɔn é! Dɔkun mitɔn e ɖo nǔglɔ́ lɛ́ɛ bǐ wɛ è lɛ̌ mɔ bó bɛ́.

⁷ Mɛ e ɖo jǐ mitɔn lɛ́ɛ bǐ nya mi sín to mitɔn mɛ. Xɔ́ntɔn mitɔn lɛ́ɛ flú mi bo ɖu ɖo mi jí. Mɛ e nɔ ɖu nǔ xá mi lɛ́ɛ ɖésú ɖó mɔ nú mi, bɔ è nɔ ɖɔ dó mi wú ɖɔ: ‘Ayi yětɔn mɔ nǔ ɖěbǔ ǎ.’

⁸ Gbe e gbe un ná sin xomɛ ɔ́, un ná sú nǔnywɛ́tɔ́ Edɔ́mu tɔn lɛ́ɛ sín kún dó, un ná jó nukúnnú-mɔjɛnǔmɛtɔ́ ɖěbǔ dó nyi Edɔ́mu só lɛ́ɛ jí ǎ. Nyɛ Mawu Mavɔmavɔ wɛ ɖɔ mɔ̌.

⁹ Temani toxo e, ahwanfuntɔ́ towe lɛ́ɛ sín ayi bǐ ná gba dó, bɔ è nǎ hu sɔ́ja e ɖo Esawu só jí lɛ́ɛ bǐ tɛ́.”

Awě e xo Izlayɛ́li ví lɛ́ɛ é wa ɖagbe nú Edɔ́munu lɛ́ɛ

¹⁰ “Edɔ́mu, a nǎ ɖu winnyá bɔ é ná vɛ́ jlɛ́. È nǎ vívá kún towe bǐ sésé, ɖó adǎka e a xo nɔví towe Jakɔ́bu ví lɛ́ɛ wú é wútu.

¹¹ Gbe e gbe toɖévomɛnu lɛ́ɛ bɛ́ nǔ e wú yě gán jɛ lɛ́ɛ xweyǐgbe ɔ́, a ɖo fínɛ́. Hwenu e yě gba toxo Jeluzalɛ́mu tɔn sín hɔn, bó byɔ́ toxo ɔ́ mɛ, lobo ɖo akɔ nyi dó dɔkun yětɔn lɛ́ɛ wɛ ɔ́, a ɖo fínɛ́, bɔ hwi lɔ wa nǔ toɖévomɛnu lɛ́ɛ ɖɔhun.

¹² Hwenu e awě ɖo nɔví towe Judáanu lɛ́ɛ xo wɛ ɔ́, é ná kó gɔn nukún towe mɛ nyɔ́. Hwenu e è ɖo nǔ yětɔn hɛn gblé wɛ ɔ́, xomɛ ná ko gɔn hunhun we, hwenu e yě ɖo wǔvɛ́ mɔ wɛ ɔ́, a nǎ kó gɔn yě zun.

¹³ Hwenu e è ɖo togun ce sín nǔ lɛ́ɛ hɛn gblé wɛ ɔ́, é ná kó gɔn nukún towe mɛ nyɔ́; a nǎ kó gɔn nǔ tɔn lɛ́ɛ bɛ́.

¹⁴ Hwenu e mɛ yětɔn lɛ́ɛ ɖo hinhɔn wɛ ɔ́, a nǎ kó gɔn ali gbo nú yě bó hu yě. A nǎ kó gɔn mɛ yětɔn e gán lɛ́ɛ jó nú kɛntɔ́ adǎngbomɛ zán énɛ́ ɔ́ gbe.

¹⁵ Đó Mawu Mavɔmavɔ zán ɔ́ kó sɛkpɔ́. Azǎn énɛ́ ɔ́ gbe ɔ́, Mawu Mavɔmavɔ ná ɖɔ hwɛ xá akɔta lɛ́ɛ bǐ. Lě e a wa mɛ ɖě lɛ́ɛ nú gbɔn ɔ́ wɛ è nǎ wa nǔ towe gbɔn. Nǔ nyanya e a wa ɔ́ ná húzú kpan nukɔn we.”

Izlayɛ́li ná sí te dó Edɔ́mu jí lobo ná ba hlɔn

¹⁶ Izlayɛ́li ví lɛ́ɛ mi, mi ko nu xomɛsin ce ahan ɖɔhun ɖo só mímɛ́ ce jí, mɔ̌ ɖokpó ɔ́ jɛ́n akɔta lɛ́ɛ bǐ ná nu magbokɔ. Yě ná nu, bó ná mú, bɔ kún yětɔn ná sú dó bǐ gbídígbídí.

¹⁷ Amɔ̌, mɛ e gán lɛ́ɛ ná mɔ bibɛtɛn ɖo Sinyɔ́ɔ só ɔ́ jí, bɔ é ná nyí nǔ mímɛ́, bɔ Jakɔ́bu xwédo ɔ́ ná lɛ́ yí to tɔn ɖo mɛ e wá klá jɛ nu lɛ́ɛ sí.

¹⁸ Esawu xwédo ɔ́ ná nyí sɛníyɔ, bɔ Jakɔ́bu kpó Jozɛ́fu kpó sín xwédo ɔ́ ná nyí myɔ, bó ná dó Esawu xwédo ɔ́ zo, bɔ é ná ji kɔn afín. Nǔ ɖěbǔ sɔ́ ná kpo ɖo xwédo ɔ́ mɛ ǎ. Nyɛ Mawu Mavɔmavɔ wɛ ɖɔ mɔ̌.

Izlayɛ́li ná lɛ́ vɔ́ yí to e lɛ́ lɛ̌ dó e lɛ́ɛ é

¹⁹ Mɛ e ɖo tofɔligbé lɛ́ɛ ná yí Esawu só ɔ́. Mɛ e ɖo ayǐkúngban wɛnjɛ jí lɛ́ɛ ná yí Filisitɛ́ɛn lɛ́ɛ sín to. Izlayɛ́linu lɛ́ɛ ná yí Eflayímu kpó Samalíi kpó sín ayǐkúngban, bɔ Bɛnjamɛ́ɛ ná yí Galadi.

²⁰ Izlayɛ́li ví e ahwan wlí yi kannumɔgbénu lɛ́ɛ ná lɛ́ kɔ wá yí to e mɛ Kanáanu lɛ́ɛ ɖe ɔ́ káká yi Salɛfaɖo Salɛ́pu, bɔ Jeluzalɛ́munu e ahwan wlí hɛn yi kannumɔgbénu ɖo Sefaladi lɛ́ɛ ná lɛ́ kɔ wá yí toxo ɖaxó ɖaxó e ɖo tofɔligbé lɛ́ɛ.

²¹ Yě ná ɖu ɖ'é jí, bó ná byɔ́ Jeluzalɛ́mu toxo ɔ́ mɛ, bó ná kpa acɛ nú Edɔ́munu lɛ́ɛ. Axɔ́súɖuɖu ɔ́ ná nyí Mawu Mavɔmavɔ tɔn.