3 Jǎan 1 - MAWUXÓWÉMA

Gbedómɛ

¹ Nyɛ Agunmɛxó ɔ́ wɛ ɖo wěma élɔ́ wlán sɛ́ dó mɛvívɛ́ná ce Gayiwúsi e un ɖó wǎn yíyí nǔgbó nǔgbó ná é wɛ.

² Mɛvívɛ́ná ce, un jló ɖɔ nǔ bǐ ní yi nú we ganjí, lanmɛ towe ní nɔ ganjí lě e a ɖo ganjí ɖo nǔɖiɖi mɛ gbɔn é.

³ Ée nɔví ɖé lɛ́ɛ wá bó ɖɔ lě e a ɖo gbejí ɖo nǔgbó ɔ́ mɛ gbɔn, kpódó lě e a kpo ɖo gbɛ towe zán wɛ gbɔn ayǐhɔ́ngbe ayǐhɔ́ngbe ɔ́ nú mì ɔ́, xomɛ hun mì tlala.

⁴ Un se ɖɔ vǐ ce lɛ́ɛ ɖo gbɛ zán wɛ ɖo nǔgbó mɛ ɔ́, nǔɖé sɔ́ nɔ hun xomɛ nú mì hú mɔ̌ ǎ.

Gbejíninɔ Gayiwúsi tɔn

⁵ Mɛvívɛ́ná ce, a nɔ gbejí ɖo nǔ e a nɔ wa nú nɔví lɛ́ɛ é mɛ káká bó nɔ lɛ́ nɔ gbejí ɖo nǔ e a nɔ bló nú nɔví e nyí jǒnɔ lɛ́ɛ é lɔ mɛ.

⁶ Yě ɖe kúnnu nú wǎn yíyí e a ɖǒ ɔ́ ɖo agun ɔ́ nukɔn; gɔ̌ alɔ nú yě lě e Mawu jló gbɔn é, nú yě ná yi to e mɛ yě xwe ɔ́.

⁷ Đó Jezu Klísu wú wɛ yě ma yí nǔɖé ɖo mɛ e ma nyí klísusɛntɔ́ ǎ lɛ́ɛ sí cóbó jɛ ali ǎ.

⁸ Mǐ mɛ klísusɛntɔ́ lɛ́ɛ ɔ́, mǐ ɖó ná d'alɔ gbɛtɔ́ mɔ̌hun lɛ́ɛ, bó ná sixú wa azɔ̌ xá yě, nú nǔgbó ɔ́ ná yi nukɔn.

Diotlefɛ́si kpódó Demɛtliwúsi kpán

⁹ Un wlán wěma kléwún ɖé sɛ́ dó agun ɔ́; lo ɔ́, Diotlefɛ́si e nɔ yí wǎn nú gǎnɖuɖu ɖo yě nu ɔ́ ka gbɛ́ ɖɔ émí kún ná kpé nǔɖé xá mǐ ó.

¹⁰ Énɛ́ ɔ́ wú ɔ́, hwenu e un ná wá mi gɔ́n ɔ́, un ná ɖɔ nǔ nyanya e é nɔ́ dó sin lɛ́ɛ nú mi, bó ná ɖɔ nǔyá e é ɖɔ nú mǐ ɔ́ kpódó adingban e é ɖó dó mǐ nu ɔ́ kpán nú mi; énɛ́ kɛ́ɖɛ́ ká wɛ ǎ; é nɔ́ yí nɔví e nɔ wá lɛ́ɛ ɖě ǎ; mɛ ɖěvo lɛ́ɛ ka jló ná yí yě ɔ́, é nɔ lɛ́ lɔn nú yě ǎ, bó nɔ lɛ́ ba ná ɖe yě sín agun ɔ́ mɛ.

¹¹ Mɛvívɛ́ná ce, ma nɔ wa nǔ mɛ e nɔ wa nǔ nyanya é ɖɔhun ó; lo ɔ́, nɔ wa nǔ mɛ e nɔ wa nǔ ɖagbe é ɖɔhun. Mɛ e nɔ wa nǔ ɖagbe ɔ́, Mawu tɔn wɛ é nyí, bɔ mɛ e ka nɔ wa nǔ nyanya ɔ́ mɔ Mawu ǎ.

¹² Mɛ bǐ wɛ nɔ ɖɔ Demɛtliwúsi xó ɖagbe; nǔgbó ɔ́ ɖésúnɔ ɖe kúnnu n'i; mǐ lɔ ɔ́, mǐ nɔ́ ɖe kúnnu ɖagbe n'i; a ka tunwun ɖɔ xó nǔgbó wɛ mǐ nɔ́ ɖɔ.

Gbedómɛ gǔdo gúdo tɔn lɛ́ɛ

¹³ Un ɖó xó gěgé bó ná ɖɔ nú we; un ka jló ná wlán yě dó wěma jí sɛ́ dó we ǎ.

¹⁴ Un ɖo linlin wɛ ɖɔ un ná wá mɔ we ɖo malín málín mɛ, bɔ mǐ ná kpé nu bó ɖɔ xó.

¹⁵ Fífá ní nɔ kpɔ́ xá we. Xɔ́ntɔn towe lɛ́ɛ dó gbe sɛ́ dó we. Dǒ gbe xɔ́ntɔn mǐtɔn lɛ́ɛ ɖokpó ɖokpó nú mǐ.