2 Tan 9 - MAWUXÓWÉMA

Axɔ́sú nyɔ̌nu Saba tɔn yi ba Salomɔ́ɔ kpɔ́n

¹ Axɔ́sú nyɔ̌nu Saba tɔn se lě e Salomɔ́ɔ sín nyǐkɔ ɖo jǐ yi wɛ gbɔn é. É wá gɔ̌n tɔn, bó ná nyi nǔbasɔ́ ɖé lɛ́ɛ dó e, dó tɛn ɛ kpɔ́n. É kpódó gbɛtɔ́ wɔ̌buwɔ́bú ɖé lɛ́ɛ kpó wɛ wá. É dó nǔsáwǔ wǎnɖagbenɔ, siká, kpódó awǐnnya xɔ akwɛ́ kpó sín agban dó lǎkúnmí gěgé jí wá. É yi Salomɔ́ɔ gɔ́n, bó kan nǔ e é kó lɛ́n dó ayi mɛ lɛ́ɛ bǐ byɔ́ ɛ.

² Salomɔ́ɔ kpé nǔ e é kanbyɔ́ ɛ lɛ́ɛ bǐ wú, bó ná sin nú yě. Nǔ ɖěbǔ kpo bɔ Salomɔ́ɔ gɔn ma tínmɛ n'i ǎ.

³ Axɔ́sú nyɔ̌nu Saba tɔn mɔ lě e Salomɔ́ɔ ɖó nǔnywɛ́ sɔ é, bó mɔ xwé e é sá é.

⁴ É mɔ nǔ e Salomɔ́ɔ nɔ ɖu lɛ́ɛ, bó mɔ fí e gǎn hɔn-yitɔ́ tɔn lɛ́ɛ nɔ́ nɔ é, bó mɔ awu e mɛ mɛ e nɔ ná ɛ nǔɖuɖu lɛ́ɛ kpó mɛ e nɔ ba ahan n'i lɛ́ɛ kpó ɖe é, é mɔ lě e è nɔ kplá axɔ́sú ɔ́ yi Mawu Mavɔmavɔ xwé gbe gbɔn é. Ée é mɔ nǔ énɛ́ lɛ́ɛ mɔ̌ ɔ́, agbɔ̌n kpé e, bɔ é ɖɔ nú axɔ́sú ɔ́ ɖɔ:

⁵ “Xó e a nɔ ɖɔ bɔ un se ɖo to ce mɛ ɔ́, kpódó nǔnywɛ́ e a ɖǒ bɔ un se ɖo to ce mɛ ɔ́ kpó ɔ́, hǔn nǔgbó wɛ!

⁶ Xó énɛ́ lɛ́ɛ e un se ɔ́, un ɖi cóbó wá mɔ ɖó nukún wú ǎ. Nǔnywɛ́ e a ɖǒ ɔ́, un se vlɔ̌ tɔn cóbó wá fí ǎ. A hú gǎn susu e xɔ nú we wɛ è nɔ ɖe bɔ un se é.

⁷ Nǔ nyɔ́ nú mɛ towe lɛ́ɛ, nǔ nyɔ́ nú mɛsɛntɔ́ towe lɛ́ɛ; yě nɔ́ ɖo nukɔn towe hwebǐnu, bó nɔ́ ɖo nǔnywɛ́ yí ɖo así towe wɛ.

⁸ Susu nú Mawu Mavɔmavɔ, Mawu towe e wa ɖagbe nú we, bó sɔ́ we axɔ́sú ɖó axɔ́súzinkpo tɔn jí, bɔ a nǎ ɖu axɔ́sú ɖo Izlayɛ́li ví lɛ́ɛ nu ɖo nyǐkɔ tɔn mɛ é. É yí wǎn nú togun Izlayɛ́li tɔn ɔ́, bó jló ná bló bɔ é ná nɔ ayǐ káká sɔ́yi; énɛ́ ɔ́ wú wɛ Mawu towe sɔ́ we axɔ́sú, bónú a nǎ wa nǔ jlɔ́jlɔ́, bó ná dó hwɛjijɔ.”

⁹ Ée axɔ́sú nyɔ̌nu Saba tɔn ɔ́ ɖɔ mɔ̌ ɔ́, é ná siká tɔ́nu atɔn adaɖé mɔ̌ axɔ́sú Salomɔ́ɔ, bó ná ɛ nǔsáwǔ wǎnɖagbenɔ kɔn nyi kpɔ́ gégé, bɔ è ko mɔ mɔ̌hunkɔtɔn ɖě kpɔ́n ǎ; é ná ɛ awǐnnya xɔ akwɛ́. Sín gbe énɛ́ gbe ɔ́, è sɔ́ mɔ mɛɖé hɛn nǔsáwǔ wǎnɖagbenɔ ɖé wá Izlayɛ́li, bɔ é sukpɔ́ sɔ ée axɔ́sú nyɔ̌nu Saba tɔn wá ná axɔ́sú Salomɔ́ɔ ɔ́ kpɔ́n gbeɖé ǎ.

¹⁰ Mɛsɛntɔ́ axɔ́sú Ilámu tɔn lɛ́ɛ kpódó Salomɔ́ɔ tɔn lɛ́ɛ kpó e hɛn siká sín Ofíi wá lɛ́ɛ lɛ́ hɛn santálutín lɛ́ɛ kpódó awǐnnya xɔ akwɛ́ lɛ́ɛ kpó wá.

¹¹ Axɔ́sú Salomɔ́ɔ tɛ́ santálutín lɛ́ɛ ɖó Mawu Mavɔmavɔ xwé gbe, bó lɛ́ tɛ́ dó hɔnmɛ. É lɛ́ zé dó bló agǐdigbo kpódó kanhún kpó ná nú hanjitɔ́ lɛ́ɛ. È sɔ́ hɛn santálutín wá Izlayɛ́li bɔ é sukpɔ́ sɔ mɔ̌ kpɔ́n gbeɖé ɖo Judáa ǎ.

¹² Axɔ́sú Salomɔ́ɔ ká ná nǔ e jló axɔ́sú nyɔ̌nu Saba tɔn, bɔ é byɔ́ ɛ lɛ́ɛ bǐ i. É ná ɛ nǔ bɔ é lɛ́ hú gǎn nǔ e é ɖésúnɔ hɛn wá lɛ́ɛ. Énɛ́ ɔ́ gúdo ɔ́, axɔ́sú nyɔ̌nu ɔ́ kpódó mɛsɛntɔ́ tɔn lɛ́ɛ kpó lɛ́ kɔ yi to yětɔn mɛ.

Dɔkun Salomɔ́ɔ tɔn lɛ́ɛ

¹³ Siká e nɔ wá nú Salomɔ́ɔ xwewú xwewú ɔ́ yi tɔ́nu ko.

¹⁴ Nǔjɔ e è nɔ ɖe ɖo agban e nɔ gosín togúdo wá lɛ́ɛ jí lɛ́ɛ kpó ée è nɔ ɖe ɖo ajɔ̌nú lɛ́ɛ jí lɛ́ɛ kpó gɔ́ ná. Siká kpó kpatágan kpó e Alabíi xɔ́sú lɛ́ɛ kpó tokpɔngán Alabíi tɔn lɛ́ɛ kpó nɔ hɛn wá nú Salomɔ́ɔ lɛ́ɛ lɔ gɔ́ ná.

¹⁵ Axɔ́sú Salomɔ́ɔ zɔ́n bɔ è blǒ gǎglónú ɖaxó ɖaxó afɔɖé (200) n'i, bó tɛ́ siká d'é wú; siká kilóo ayizɛ́n ayizɛ́n wɛ è tɛ́ dó gǎglónú ɖokpó ɖokpó wú.

¹⁶ È lɛ̌ bló gǎglónú kpɛví kpɛví afɔɖé kanwe ko (300) n'i, bó tɛ́ siká d'é wú; siká kilóo atɔn atɔn wɛ è tɛ́ dó gǎglónú ɖokpó ɖokpó wú. É bɛ́ yě dó xwé e è nɔ ylɔ́ ɖɔ: “Zungbó Libáan tɔn” ɔ́ gbe.

¹⁷ Axɔ́sú ɔ́ lɛ́ zɔ́n bɔ è blǒ axɔ́súzinkpo ɖaxó ɖokpó n'i, bó zé ajinakúɖú dó ɖó acɔ́ ná, bó tɛ́ siká akú d'é wú.

¹⁸ Axɔ́súzinkpo énɛ́ ɔ́ ɖó kpekán ayizɛ́n, bɔ gǎnjɛmɛ tɔn cí toboo. É ɖó awaɖótɛn we. È kpa kinnikínní we ɖó awaɖótɛn ɖokpó ɖokpó kpá.

¹⁹ È lɛ̌ kpa kinnikínní wěwé, bó to yě ɖó afɔɖótɛn lɛ́ɛ jí, ayizɛ́n ɖo amyɔxwé, bɔ ayizɛ́n ɖo ɖisíxwé. È blǒ nǔ mɔ̌hunkɔtɔn ɖě ɖo axɔ́súɖuto ɖě lɛ́ɛ mɛ ǎ.

²⁰ Siká wɛ è dǒ bló kɔ́fu axɔ́sú Salomɔ́ɔ tɔn lɛ́ɛ bǐ ná. Gannú e ɖo xwé e è nɔ ylɔ́ ɖɔ “Zungbó Libáan tɔn” ɔ́ gbe lɛ́ɛ bǐ wɛ è sɔ́ siká akú dó bló ná. È zě kpatágan dó bló nǔ ɖěbǔ ná ǎ, ɖó axɔ́sú Salomɔ́ɔ sín hwenu ɔ́, è nɔ mɔ kpatágan dó mɔ nǔɖé wa nú ǎ.

²¹ Axɔ́sú Salomɔ́ɔ ɖó tɔjíhún ɖaxó ɖaxó ɖé lɛ́ɛ, bó nɔ́ sɛ́ dó gbějí zɔga. Tɔzɔ́watɔ́ axɔ́sú Ilámu tɔn lɛ́ɛ wɛ nɔ́ kun tɔjíhún lɛ́ɛ. Xwe atɔn mɛ tɛgbɛ ɔ́, tɔjíhún nɛ́ lɛ́ɛ nɔ́ hɛn siká, kpatágan, ajinakúɖú, zǐnwó kpódó ahlǐnhǎn kpó wá.

²² Axɔ́sú Salomɔ́ɔ hú gǎn axɔ́sú e ɖo ayǐkúngban jí lɛ́ɛ bǐ, ɖo dɔkun kpódó nǔnywɛ́ kpó mɛ.

²³ Axɔ́sú e ɖo gbɛ ɔ́ mɛ lɛ́ɛ bǐ nɔ́ ba ná mɔ Salomɔ́ɔ, bó ná se nǔnywɛ́xó e Mawu sɔ́ dó ayi mɛ n'i é.

²⁴ Yě mɛ ɖokpó ɖokpó nɔ́ wá ná nǔ i. Yě nɔ́ hɛn nǔ e è zě kpatágan dó bló ná lɛ́ɛ, kpódó éé è zě siká dó bló ná lɛ́ɛ kpó. Yě nɔ́ hɛn avɔ, ahwanfunnú, nǔsáwǔ wǎnɖagbenɔ, sɔ́ kpódó tócí kpó wá n'i. Mɔ̌ wɛ yě nɔ́ bló xwewú xwewú tɛgbɛ.

²⁵ Salomɔ́ɔ bló sɔ́kpó děgba (4.000) nú sɔ́ tɔn lɛ́ɛ kpódó kɛkɛ́ví tɔn lɛ́ɛ kpó. É ɖó sɔ́xátɔ́ děgba atɔn (12.000). É bɛ́ ɖě ɖó toxo e mɛ kɛkɛ́ví lɛ́ɛ nɔ́ nɔ é mɛ, bó bɛ́ ɖě dó é ɖésúnɔ gɔ́n ɖo Jeluzalɛ́mu.

²⁶ Salomɔ́ɔ ɖu ɖo axɔ́sú lɛ́ɛ bǐ jí, bɛ́ sín Efláti tɔ ɔ́ kɔn, káká yi Filisitɛ́ɛn lɛ́ɛ sín to mɛ, káká yi Ejípu to ɔ́ sín dogbó jí.

²⁷ Axɔ́sú Salomɔ́ɔ bló bɔ kpatágan e ɖo Jeluzalɛ́mu ɔ́ sukpɔ́ kɛ́n ɖɔhun. É bló bɔ sɛ́dlutín sukpɔ́ sikomɔ́ɔtín e ɖo Cefela lɛ́ɛ ɖɔhun.

²⁸ Ejípu wɛ è nɔ hɛn sɔ́ lɛ́ɛ sín wá nú Salomɔ́ɔ, bó nɔ́ lɛ́ hɛn wá n'i sín to ɖěvo ɖěvo lɛ́ɛ mɛ.

Salomɔ́ɔ kú

²⁹ Salomɔ́ɔ sín tan e kpo ɔ́, è wlǎn sín fí e é bɛ́ sín ɔ́ káká yi fí e é fó dó ɔ́, bɔ é ɖo Tan wéma gbeyíɖɔ Mawu tɔn Natáan tɔn mɛ, bó ɖo xó e Axiya Silóonu ɔ́ ɖɔ ɔ́ sín wěma mɛ, lobo lɛ́ ɖo nǔ e nǔmɔtɔ́ Yedóo mɔ dó Jelobowámu Nɛvati ví ɔ́ wú sín wěma mɛ.

³⁰ Salomɔ́ɔ ɖu axɔ́sú ɖo Jeluzalɛ́mu, ɖo Izlayɛ́li to ɔ́ bǐ nu nú xwe kanɖé (40).

³¹ Énɛ́ ɔ́ gúdo ɔ́, Salomɔ́ɔ zán wá kú, bɔ è sɔ́ ɛ ɖó tɔ́ tɔn Davídi Toxo mɛ. Vǐ tɔn Hlobowámu wɛ ɖu axɔ́sú ɖó tɛn tɔn mɛ.