2 Tan 8 - MAWUXÓWÉMA

Nǔ tɛnmɛ tɛnmɛ e Salomɔ́ɔ wa lɛ́ɛ

¹ Xwe ko wɛ Salomɔ́ɔ sɔ́ ɖó te, bó dó sá Mawu Mavɔmavɔ xwé ɔ́ kpódó xwé é ɖésúnɔ tɔn kpó.

² Énɛ́ ɔ́ gúdo ɔ́, é vɔ́ toxo e axɔ́sú Tíi tɔn Ilámu ná ɛ lɛ́ɛ blóɖó, bó bɛ́ Izlayɛ́li ví lɛ́ɛ dó toxo lɛ́ɛ mɛ.

³ Ée é bló énɛ́ ɔ́ fó ɔ́, é yi tɔ́n ahwan Hamáti-Sova toxo ɔ́.

⁴ É ɖó Tadumɔ́ɔ toxo e ɖo gbětótló mɛ ɔ́ ayǐ; toxo e é kó ɖó ayi ɖo Hamáti yíkúngban jí, bó nɔ́ bɛ́ agban dó yě mɛ lɛ́ɛ ɔ́, é vɔ́ bǐ blóɖó.

⁵ É ɖó Bɛti-Holɔ́ni-Aga-Tɔn ɔ́, kpódó Bɛti-Holɔ́ni-Dodomɛ-Tɔn ɔ́ kpó ayǐ. Toxo énɛ́ lɛ́ɛ ɔ́, è mɛ ahohó lɛ́ lɛ̌ dó yě, bó dó hɔntogbó ná, bɔ è nɔ sú.

⁶ Salomɔ́ɔ vɔ́ Baaláti toxo ɔ́ ɖó ayǐ. É gbá toxo e mɛ é ná nɔ bɛ́ agban tɔn lɛ́ɛ dó lɛ́ɛ, bó gbá ée mɛ é ná nɔ bɛ́ ahwankɛkɛ́ví tɔn lɛ́ɛ dó lɛ́ɛ, bó gbá toxo e mɛ é ná nɔ bɛ́ sɔ́ tɔn lɛ́ɛ dó ɔ́. Salomɔ́ɔ gbá xɔ e é jló ná gbá ɖó Jeluzalɛ́mu lɛ́ɛ, bó gbá ée é jló ná gbá ɖó Libáan lɛ́ɛ kpódó ée é jló ná gbá gbɔn to e mɛ é kpa acɛ gbɔn lɛ́ɛ bǐ kpó.

⁷ Hitíti lɛ́ɛ, Amɔliti lɛ́ɛ, Pɛliziti lɛ́ɛ, Hivíti lɛ́ɛ kpódó Jebuzinu lɛ́ɛ kpó ɖě lɛ́ɛ kpo ɖo to ɔ́ mɛ; yědɛɛ nyí Izlayɛ́li ví ǎ.

⁸ Yědɛɛ lɛ́ɛ kpo ɖo to ɔ́ mɛ, ɖó Izlayɛ́li ví lɛ́ɛ hu yě bǐ sín to ɔ́ mɛ ǎ; yě mɛ énɛ́ lɛ́ɛ sín vǐ wɛ Salomɔ́ɔ nɔ sɔ́ dó wa azɔ̌ syɛ́nsyɛ́n lɛ́ɛ; é kpo ɖo mɔ̌ káká jɛ égbé.

⁹ Salomɔ́ɔ nɔ sɔ́ Izlayɛ́li ví lɛ́ɛ dó wa azɔ̌ syɛ́nsyɛ́n ǎ, ɖó ahwanfuntɔ́ wɛ yě nyí, bó nyí ahwangán tɔn lɛ́ɛ, bó nyí mɛ e kpa acɛ dó kɛkɛ́ví tɔn lɛ́ɛ kpódó sɔ́ tɔn lɛ́ɛ kpó nu lɛ́ɛ.

¹⁰ Gǎn e axɔ́sú Salomɔ́ɔ sɔ́ ɖó azɔ̌ tɔn lɛ́ɛ nu lɛ́ɛ ɔ́, yě mɛ afɔɖé kanɖé wǒ (250) wɛ, bɔ yě nɔ́ cɔ́ azɔ̌watɔ́ lɛ́ɛ.

¹¹ Axɔ́sú Salomɔ́ɔ ná gbe bɔ asi tɔn Ejípu xɔ́sú ɔ́ sín vǐ ɔ́ gosín Davídi Toxo mɛ, bó yi cí xwé e axɔ́sú ɔ́ sá n'i ɔ́ gbe; ɖó axɔ́sú ɔ́ nɔ́ ɖɔ: “Asi ce ná nɔ Izlayɛ́li xɔ́sú Davídi xwé ǎ, ɖó tɛn e mɛ è sɔ́ akɔjijɛgbá Mawu Mavɔmavɔ tɔn ɔ́ ɖó lɛ́ɛ ɔ́, tɛn mímɛ́ wɛ yě nyǐ.”

¹² Hwenɛ́nu ɔ́, Salomɔ́ɔ sá vɔ̌ e è nɔ dó zo lɛ́ɛ nú Mawu Mavɔmavɔ ɖo vɔ̌sákpe e é bló nú Mawu Mavɔmavɔ ɖo sinsɛnxɔ ɔ́ nukɔn ɔ́ jí.

¹³ Salomɔ́ɔ nɔ sá vɔ̌ lě e Mɔyízi ɖɔ è nǎ nɔ́ sá gbɔn ɖo xwezán ɖokpó ɖokpó gbe é: è nɔ sá gbɔjɛzán gbe vɔ́ lɛ́ɛ, bó nɔ́ sá sun wá jǐ vɔ́ lɛ́ɛ kpódó vɔ̌ ɖaxó ɖaxó atɔn e è nɔ sá xwewú xwewú lɛ́ɛ kpó: wɔ̌xúxú e mɛ è ma dó tɔ́n ǎ é xwe ɔ́, Pantekótuxwe ɔ́ kpó azavaxwe ɔ́ kpó.

¹⁴ Salomɔ́ɔ má azɔ̌ dó así nú mɛ e nɔ wa azɔ̌ ɖo Mawu xwé gbe lɛ́ɛ, lě e tɔ́ tɔn Davídi to gbɔn é: é má azɔ̌ dó así nú vɔ̌sánú-xwlémawutɔ́ gbɛ́ta lɛ́ɛ, bó má dó así nú Levíi ví lɛ́ɛ sín gbɛ̌ta lɛ́ɛ: yě ná nɔ́ ji han dó kpa Mawu ayǐhɔ́ngbe ayǐhɔ́ngbe, abǐ yě ná nɔ gɔ́ alɔ nú vɔ̌sánú-xwlémawutɔ́ lɛ́ɛ; é lɛ́ má azɔ̌ dó así nú hɔnjínɔtɔ́ gbɛ́ta lɛ́ɛ. Hɔnjínɔtɔ́ lɛ́ɛ sín gbɛ̌ta ɖokpó ɖokpó ɖó hɔn yětɔn yětɔn jí bó nɔ́ nɔ. Nǔ e Davídi ɖɛ̌mɛnu Mawu tɔn ɔ́ ɖɔ è nǐ bló é nɛ́.

¹⁵ Nǔ e Davídi ɖɔ dó vɔ̌sánú-xwlémawutɔ́ lɛ́ɛ kpódó Levíi ví lɛ́ɛ kpó wú ɔ́, è gɔn ɖě bló ǎ; è blǒ káká jɛ nǔ e kan dɔkun lɛ́ɛ ɔ́ jí.

¹⁶ Nǔ e Salomɔ́ɔ lin ná bló lɛ́ɛ ɔ́, é bló bǐ, sín gbe e gbe é dó sinsɛnxɔ ɔ́ do ɔ́ káká jɛ gbe e gbe é fó dó é. É sá Mawu Mavɔmavɔ xwé ɔ́ bɔ nǔ bǐ vɔ ɖ'é wú.

¹⁷ Ée Salomɔ́ɔ bló nǔ lɛ́ɛ bǐ fó ɔ́, é ɖidó Esiɔ́ni-Gevɛ́ɛ kpódó Eyilati kpó ɖo xutó, ɖo Edɔ́mu tomɛ.

¹⁸ Axɔ́sú Ilámu sɛ́ tɔjíhún gěgé dó Salomɔ́ɔ, bɔ tɔzɔ́watɔ́ e nyɔ́ tɔzɔ́ wa ganjí lɛ́ɛ kun. Tɔzɔ́watɔ́ énɛ́ lɛ́ɛ kpódó Salomɔ́ɔ tɔn lɛ́ɛ kpó yi Ofíi, bó yi bɛ́ siká kilóo děgba atɔn afatɔ́n (13.000) wá nú axɔ́sú Salomɔ́ɔ.