2 Tan 6 - MAWUXÓWÉMA

¹ Énɛ́ ɔ́, Salomɔ́ɔ sú xó bó ɖɔ: “Mawu Mavɔmavɔ! A ɖɔ émí ná nɔ zǐnflú mɛ.

² Nyɛ ka gbá nɔtɛn towe nú we, fí e a nǎ nɔ káká sɔ́yi é!”

Salomɔ́ɔ sɔ́ xwé ɔ́ d'alɔ mɛ nú Mawu

³ Izlayɛ́li togun ɔ́ bǐ kplé bó ɖo te, bɔ axɔ́sú Salomɔ́ɔ lílɛ́ kpan nukɔn yě, bó xo ɖɛ dó yě jí,

⁴ bó ɖɔ: “Susu nú Mawu Mavɔmavɔ, Mawu Izlayɛ́li tɔn! É ɖésúnɔ wɛ ɖɔ xó nú tɔ́ ce, bɔ nǔ e é ɖɔ ɔ́, é ɖésúnɔ sɔ́ alɔ tɔn dó bló.

⁵ É ɖɔ: ‘Sín gbe e gbe un ko ɖe togun ce Izlayɛ́li ɔ́ tɔ́n sín Ejípu ɔ́, un sɔ́ toxo ɖěbǔ ɖo Izlayɛ́li sín toxo lɛ́ɛ mɛ, bónú è nǎ sá xwé ɖé, bónú má nɔ́ ɖe susu ce xlɛ́ ɖo fínɛ́ ǎ; un ka sɔ́ mɛɖé ɖó togun ce Izlayɛ́li ɔ́ nu ǎ.

⁶ Lo ɔ́, un zé Jeluzalɛ́mu bónú nyǐkɔ ce ná nɔ fínɛ́; un sɔ́ Davídi bɔ é ɖu axɔ́sú ɖo togun ce Izlayɛ́li ɔ́ nu!’

⁷ Salomɔ́ɔ lɛ́ ɖɔ: tɔ́ ce Davídi wɛ kó lin ɖɔ émí ná sá xwé nú Mawu Mavɔmavɔ, Mawu Izlayɛ́li tɔn.

⁸ Bɔ Mawu Mavɔmavɔ ɖɔ n'i ɖɔ: ‘Linlin e ɖó wɛ a ɖe, bó ɖɔ émí ná sá xwé ɖokpó nú mì ɔ́, linlin ɖagbe wɛ.

⁹ Amɔ̌, hwi wɛ ná sá xwé nú mì ǎ, vǐ towe jiji wɛ ná sá xwé nú mì.’

¹⁰ Xó énɛ́ e Mawu Mavɔmavɔ ɖɔ ɔ́, é bló ɖ'é jí. Un jɛ tɔ́ ce Davídi sín tɛnmɛ, bo jínjɔ́n axɔ́súzinkpo Izlayɛ́li tɔn ɔ́ jí, lě e Mawu Mavɔmavɔ ɖɔ gbɔn é, bó sá xwé ɔ́ nú Mawu Mavɔmavɔ, Mawu Izlayɛ́li tɔn ɔ́.

¹¹ Gbǎ e mɛ nǔ e Mawu Mavɔmavɔ jɛ akɔ xá Izlayɛ́li ví lɛ́ɛ ɔ́ ɖe ɔ́, un zé dó xɔ ɔ́ mɛ.”

Salomɔ́ɔ xo ɖɛ

¹² Salomɔ́ɔ yi cí vɔ̌sákpe Mawu Mavɔmavɔ tɔn ɔ́ nukɔn, bó kpan nukɔn Izlayɛ́li ví e kplé lɛ́ɛ bǐ, bó dlɛ́n alɔ.

¹³ Salomɔ́ɔ ká kó zé ganvɔ dó bló nǔ kpe ɖɔhun ɖé nyi kɔ́xo ɔ́ ta. Ga tɔn nyí mɛ̌tlu we adaɖé, bɔ gblǒ tɔn lɔ ɔ́ nyí mɛ̌tlu we adaɖé, bɔ jǐ yiyi tɔn nyí mɛ̌tlu ɖokpó adaɖé. É xá nǔ ɔ́ jí, bó jɛ kpoli kpan nukɔn Izlayɛ́li ví e kplé lɛ́ɛ bǐ, bó dlɛ́n alɔ tɔn lɛ́ɛ sɛ́ dó jǐnukúnsin, bó ɖɔ:

¹⁴ “Mawu Mavɔmavɔ, Mawu Izlayɛ́li tɔn! Nǔmɛsɛn towe ɖɔhun ɖě sɔ́ tíin ǎ; ɖě sɔ́ ɖo jǐxwé aga ǎ, ɖě ká sɔ́ ɖo do ɖo ayǐkúngban jí fí ǎ. Mɛsɛntɔ́ towe e nɔ xwedó sɛ́n towe lɛ́ɛ kpódó ayixa yětɔn bǐ kpó lɛ́ɛ ɔ́, a nɔ́ nɔ gbejí nú akɔ e a jɛ xá yě ɔ́, bó nɔ́ ɖe xomɛnyínyɔ́ towe xlɛ́ yě.

¹⁵ Akpá e a dǒ nú tɔ́ ce Davídi mɛsɛntɔ́ towe ɔ́, a ɖe; nǔ e a ɖɔ n'i ɔ́ ɖíe hwi ɖésúnɔ bló ɖ'é jí égbé e.

¹⁶ Din ɔ́, Mawu Mavɔmavɔ, Mawu Izlayɛ́li tɔn, lɛ̌ ɖe akpá e a dǒ nú tɔ́ ce Davídi bo ɖɔ n'i ɖɔ nú vǐ tɔn lɛ́ɛ nyi sɛ́n émítɔn lɛ́ɛ, bó xwedó émí lě e é ɖésúnɔ blǒ gbɔn ɔ́, mɛ e ná nɔ tɛn tɔn mɛ, ɖo axɔ́súzinkpo Izlayɛ́li tɔn ɔ́ jí ɔ́, é kún ná ba kpo ɖo yě mɛ gbeɖé ó.

¹⁷ Din ɔ́, Mawu Mavɔmavɔ, Mawu Izlayɛ́li tɔn, akpá e a dǒ nú mɛsɛntɔ́ towe Davídi ɔ́ ní bó nyí mɔ̌.

¹⁸ “Mawu ka sixú nɔ ayǐkúngban jí xá gbɛtɔ́ lɛ́ɛ nǔgbó a? Jǐnukúnsin ɖíe sɔ́ avɔ sɔ mɔ̌ cóbó ma ka sixú hɛn ɛ ǎ e! Ani ka sɔ́ nyí xɔ élɔ́ e nyɛ gbá n'i ɔ́ tɔn?

¹⁹ Amɔ̌, Mawu Mavɔmavɔ, Mawu ce, nyi kɔ kpɔ́n mì; ɖǒtó vo e sa wɛ un ɖe ɔ́. Xó e sú wɛ nyɛ mɛsɛntɔ́ towe ɖe ɔ́ kpódó ɖɛ e xo wɛ un ɖe ɔ́ kpó ɔ́, wlǐ tó.

²⁰ Nukún towe ní nɔ hunhun ɖó xɔ élɔ́ jí zǎn kéze; tɛn élɔ́ e mɛ a ɖɔ émí ná nɔ é. Đǒtó ɖɛ e nyɛ mɛsɛntɔ́ towe ɖo tɛn élɔ́ mɛ bó ɖo xixo sɛ́ dó we wɛ é!

²¹ Đǒtó xó e sú ylɔ́ we wɛ un ɖe é, bó ɖótó xó e togun towe Izlayɛ́li kpan nukɔn tɛn élɔ́ bó ɖo susu sɛ́ dó we wɛ é! Mawu Mavɔmavɔ, ɖǒtó mǐ ɖo jǐxwé fí e a nɔ nɔ é! Đǒtó mǐ, bó sɔ́ hwɛ kɛ mǐ!

²² “Nú mɛɖé hu hwɛ dó nɔzo tɔn, bónú è ɖɔ n'i ɖɔ é ní xwlé nǔ dandan, bɔ é wá xwlé nǔ ɖo vɔ̌sákpe towe nukɔn, ɖo xɔ élɔ́ mɛ hǔn,

²³ Mawu Mavɔmavɔ, nɔ jǐxwé dɔ̌n bó ɖótó; blǒ gbɔn ɖě; gbo hwɛ nú mɛsɛntɔ́ towe lɛ́ɛ, nú mɛ e wa nǔ nyi do ɔ́, è nǎ dɔn tó n'i, bɔ hwɛ ka ná jó mɛ e nyí hwɛjijɔnɔ é.

²⁴ “Ényí Izlayɛ́li ví lɛ́ɛ hu hwɛ dó we, bónú é ná sín énɛ́ ɔ́ wú bɔ kɛntɔ́ yětɔn lɛ́ɛ ná ɖu ɖo yě jí ɔ́, nú yě byɔ́ hwɛsɔ́kɛ ɔ́, nú yě kpa susu nú we ɔ́, nú yě xo ɖɛ lobo sa vo nú we ɖo xwé élɔ́ gbe hǔn,

²⁵ nɔ jǐxwé dɔ̌n, bó ɖótó yě, bó sɔ́ hwɛ kɛ togun towe Izlayɛ́li ɔ́, bó kplá yě wá ayǐkúngban e a nǎ tɔ́gbó yětɔn lɛ́ɛ kpó yě ɖésúnɔ lɛ́ɛ kpó ɔ́ jí.

²⁶ “Hwenu e jǐnukúnsin ná sú dó togun towe Izlayɛ́li, bɔ jǐ má sɔ́ ná ja ǎ, ɖó yě hu hwɛ dó we wútu ɔ́, nú yě kpan nukɔn tɛn élɔ́ bó xo ɖɛ ɔ́, nú yě kpa susu nú we ɔ́, nú yě lɛ́ kɔ sín hwɛ yětɔn lɛ́ɛ gúdo, ɖó a dɔn tó nú yě wútu ɔ́,

²⁷ nɔ jǐxwé dɔ̌n, bó ɖótó yě, bó sɔ́ hwɛ kɛ togun towe mɛsɛntɔ́ towe lɛ́ɛ. Xlɛ́ ali ɖagbe e yě ɖó ná gbɔn ɔ́ yě, bó bló bónú jǐ ní ja kɔn nyi ayǐkúngban e a nǎ yě, bɔ é nyí yětɔn ɔ́ jí.

²⁸ “Hwenu e adɔ abǐ jɛmɛjí ná byɔ́ to ɔ́ mɛ ɔ́, hwenu e jinukún lɛ́ɛ ná fyɔ́ abǐ yě ná nyɔ dó te ɔ́, hwenu e wɛn kpó bɔkle kpó ná vun blá to ɔ́, hwenu e kɛntɔ́ lɛ́ɛ ná hun káká yi gba Izlayɛ́li ví lɛ́ɛ ɖo toxo yětɔn e yě mɛ ahohó lɛ́ lɛ̌ dó lɛ́ɛ mɛ ɔ́, hwenu e nǔ baɖabaɖa ɖěbǔ, abǐ azɔnhwi ná byɔ́ to ɔ́ mɛ ɔ́,

²⁹ nú togun towe Izlayɛ́li ɔ́ mɔ ɖɔ émí wa nǔ nyi do, bɔ hwɛ tɔn vɛ́ n'i, bɔ é sa vo sɛ́ dó we ɔ́, nú é kpan nukɔn xwé élɔ́, bó dlɛ́n alɔ tɔn, lobo xo ɖɛ sɛ́ dó we hǔn,

³⁰ nɔ jǐ, fí e a nɔ nɔ é, bó ɖótó e, bó sɔ́ hwɛ tɔn lɛ́ɛ kɛ ɛ. Blǒ nǔ e jɛ xá mɛ ɖokpó ɖokpó é, nú é ní sɔgbe xá lě e é zán gbɛ tɔn gbɔn é, ɖó a tunwun ayixa tɔn; hwi ɖokpónɔ géé wɛ tunwun gbɛtɔ́ lɛ́ɛ bǐ sín ayixa.

³¹ A blǒ gbɔn mɔ̌ ɔ́, Izlayɛ́li ví lɛ́ɛ ná nɔ́ ɖó sísí nú we, bó ná nɔ́ wa nǔ lě e a jlǒ gbɔn é hwebǐnu ɖo ayǐkúngban e a nǎ tɔ́gbó mǐtɔn lɛ́ɛ ɔ́ jí.

³² “Mɔ̌ ɖokpó ɔ́, ényí toɖévomɛnu e ma nyí Izlayɛ́li ví ǎ é ɖě se lě e nyǐkɔ towe d'agba gbɔn é, lě e mɛɖé ma nɔ sixú nɔ te hlɔ̌nhlɔ́n towe nukɔn gbɔn ǎ é, lě e a kpé nǔ bǐ wú gbɔn ɔ́, bó gosín to línlín ɖé mɛ wá, lobo xo ɖɛ ɖo xwé élɔ́ gbe hǔn,

³³ nɔ jǐxwé fí e a nɔ nɔ é, bó ɖótó e, bó ná ɛ nǔ e é byɔ́ we é; a blǒ gbɔn mɔ̌ ɔ́, togun e ɖo ayǐkúngban jí lɛ́ɛ bǐ ná tunwun we, bó ná ɖó sísí nú we togun towe Izlayɛ́li ɖɔhun, bó ná tunwun ɖɔ nyǐkɔ towe wɛ ɖo xwé élɔ́ e un sá ɔ́ jí.

³⁴ “Hwenu e a nǎ ná gbe Izlayɛ́li ví lɛ́ɛ, bɔ yě ná yi ahwan fun xá kɛntɔ́ yětɔn lɛ́ɛ gbé ɔ́, nú yě kpan nukɔn toxo e a sɔ́ ɔ́ kpódó xwé élɔ́ e un sá nú we ɔ́ kpó, bó xo ɖɛ sɛ́ dó hwi Mawu Mavɔmavɔ hǔn,

³⁵ nɔ jǐxwé dɔ̌n, bó ɖótó yě; ɖǒtó vo e sa sɛ́ dó we wɛ yě ɖe é, bó wá dó alɔ yě.

³⁶ “Gbɛtɔ́ ɖě nɔ́ gɔn hwɛ hu ǎ. Hwenu e Izlayɛ́li ví lɛ́ɛ ná hu hwɛ dó we, bɔ a nǎ sin xomɛ dó yě, bó ná jó yě nú kɛntɔ́ yětɔn lɛ́ɛ, bɔ yě ná wlí kannumɔ yětɔn hɛn yi to yětɔn e lín lɛ́ɛ, abǐ ée yá lɛ́ɛ ɖě mɛ ɔ́,

³⁷ nú yě byɔ́ yěɖée mɛ ɖo to e mɛ yě nyí kannumɔ ɖe ɔ́ mɛ ɔ́, nú yě lɛ́ kɔ wá gɔ̌n towe, bó sa vo nú we ɖo to e mɛ è wlǐ yě yi ɔ́ mɛ, bó ɖɔ: ‘Mǐ vɛ́ tóli, mǐ hu hwɛ, mǐ wa nǔ nyi do’ ɔ́,

³⁸ nú yě lɛ̌ kɔ wá gɔ̌n towe kpó ayixa yětɔn bǐ kpó, kpódó lǐndɔ̌n yětɔn bǐ kpó ɔ́, nú yě nɔ to e mɛ kɛntɔ́ yětɔn lɛ́ɛ wlí kannumɔ yětɔn hɛn yi ɔ́ mɛ, bó kpan nukɔn to e a nǎ tɔ́gbó yětɔn lɛ́ɛ, toxo e a sɔ́ ɔ́, xwé e un sá nú we ɔ́, bó xo ɖɛ sɛ́ dó we hǔn,

³⁹ nɔ jǐxwé, fí e a nɔ nɔ ɔ́, bó ɖótó yě; ɖǒtó vo e sa sɛ́ dó we wɛ yě ɖe é bó wá dó alɔ yě; sɔ́ hwɛ e togun towe hu dó we ɔ́ kɛ ɛ.

⁴⁰ “Mawu ce, kpɔ́n jǐ ce; ɖǒtó ɖɛ e xo sɛ́ dó we wɛ un ɖe sín tɛn élɔ́ mɛ é.

⁴¹ Din ɔ́, Mawu Mavɔmavɔ, kplá akɔjijɛgbá e mɛ hlɔ̌nhlɔ́n towe ɖe ɔ́ wá tɛn élɔ́ e è blǒ ɖ'ayǐ, bɔ a nǎ gbɔjɛ́ ɖ'é mɛ é mɛ. Mawu Mavɔmavɔ, mɛ e nɔ xwlé vɔ̌sánú we lɛ́ɛ ɔ́, hwlɛngán ɔ́ ní nyí awu bó nɔ kɔ nú yě; mɛ e nɔ́ nɔ gbejí nú we lɛ́ɛ ní xlɛ́ ɖɔ nǔ nyɔ́ nú émí, lobo j'awǎ.

⁴² Mawu Mavɔmavɔ, mɛ e a sɔ́ axɔ́sú ɔ́, ma jó e dó ó; ma wɔn ɖagbe e a wa nú mɛsɛntɔ́ towe Davídi lɛ́ɛ ó.”