2 Tan 5 - MAWUXÓWÉMA1 Ée Salomɔ́ɔ wa azɔ̌ e ɖo Mawu Mavɔmavɔ xwé wú ɔ́ bǐ fó ɔ́, é ɖɔ bɔ è bɛ̌ nǔ e tɔ́ tɔn Davídi ko bɛ́ ɖ'ayǐ nú Mawu Mavɔmavɔ lɛ́ɛ wá: kpatágan, siká kpódó nǔ ɖěvo ɖěvo lɛ́ɛ kpó. É bɛ́ nǔ énɛ́ lɛ́ɛ bǐ ɖó Mawu xwé gbe, ɖo fí e dɔkun Mawu tɔn lɛ́ɛ nɔ́ nɔ é. Salomɔ́ɔ sɔ́ akɔjijɛgbá ɔ́ yi ɖó Mawu xwé gbe ( 1 Axɔ́sú 8.1-13 ) 2 Ée Salomɔ́ɔ bló nǔ lɛ́ɛ fó ɔ́, é ylɔ́ tomɛxó Izlayɛ́li tɔn lɛ́ɛ, akɔtagán lɛ́ɛ, kpódó hɛ̌nnugán Izlayɛ́li tɔn lɛ́ɛ bǐ kpó ɖo Jeluzalɛ́mu, bó ná yi zé akɔjijɛgbá Mawu Mavɔmavɔ tɔn ɔ́ sín Sinyɔ́ɔ Davídi Toxo mɛ, sɔ́ yi Mawu Mavɔmavɔ xwé gbe. 3 Énɛ́ ɔ́, Izlayɛ́li ví lɛ́ɛ bǐ wá axɔ́sú ɔ́ gɔ́n, bó ná ɖu xwe e yě nɔ́ ɖu ɖo sun tɛ́nwegɔ́ ɔ́ mɛ xwewú xwewú é. 4 Ée tomɛxó Izlayɛ́li tɔn lɛ́ɛ wá ɔ́, Levíi ví lɛ́ɛ zé akɔjijɛgbá ɔ́. 5 Vɔ̌sánú-xwlémawutɔ́ Levíi ví lɛ́ɛ wɛ zé akɔjijɛgbá Mawu Mavɔmavɔ tɔn ɔ́ kpó goxɔ ɔ́ kpó, bó bɛ́ nǔ e ɖo goxɔ ɔ́ mɛ lɛ́ɛ. 6 Axɔ́sú Salomɔ́ɔ kpódó Izlayɛ́li ví e wá gɔ̌n tɔn lɛ́ɛ kpó bǐ kplé ɖo akɔjijɛgbá ɔ́ nukɔn. Gbɔ̌ kpó nyibú kpó e yě dǒ sá vɔ̌ ná lɛ́ɛ sukpɔ́ káká bɔ è sixú xa ǎ. 7 Énɛ́ ɔ́ gúdo ɔ́, vɔ̌sánú-xwlémawutɔ́ lɛ́ɛ zé akɔjijɛgbá Mawu Mavɔmavɔ tɔn ɔ́ ɖó tɛn tɔn mɛ, ɖo Tɛn mímɛ́ bǐ ɔ́ mɛ, ɖo Mawu xwé ɔ́ gbe, ɖo wɛnsagun susunɔ lɛ́ɛ sín awa glɔ́. 8 Akɔjijɛgbá ɔ́ sín tɛnmɛ wɛ wɛnsagun susunɔ lɛ́ɛ sín awa ɖo dlɛ̌ndlɛ́n ɖe, bɔ akɔjijɛgbá ɔ́ kpó kpo e è nɔ zé ná lɛ́ɛ kpó ná ɖo awa yětɔn lɛ́ɛ glɔ́. 9 Kpo lɛ́ɛ ɖi ga ɖésú; nú è ɖo akɔjijɛgbá ɔ́ kpódó hɔnli ɔ́ kpó tɛ́ntin ɔ́, è nɔ mɔ kpo lɛ́ɛ sín nuvínu sɛ́ dó. È ka ɖo kɔ́xota ɔ́, è nɔ mɔ yě sɛ́ dó ǎ. Bǐ kpo ɖo mɔ̌ káká wá jɛ égbé. 10 Nǔɖé ɖo akɔjijɛgbá ɔ́ mɛ zɛ awǐnnyatɛ we e Mɔyízi bɛ́ d'é mɛ ɖo Holɛ́bu hwenu e Izlayɛ́li ví lɛ́ɛ tɔ́n sín Ejípu, bɔ Mawu Mavɔmavɔ jɛ akɔ xá yě ɔ́ wú ǎ. 11 Vɔ̌sánú-xwlémawutɔ́ lɛ́ɛ tɔ́n sín Tɛn mímɛ́ ɔ́ mɛ. Vɔ̌sánú-xwlémawutɔ́ e wá fínɛ́ lɛ́ɛ bǐ slá wǔ, é sɔ́ nyí gbɛ̌ta e jí azɔ̌ ɖe ɔ́ kɛ́ɖɛ́ wɛ slá wǔ ǎ. 12 Levíi ví hansinɔ lɛ́ɛ: Asáfu, Hemani, Yedutún, kpó vǐ yětɔn lɛ́ɛ kpó, kpódó hɛ̌nnumɔ yětɔn lɛ́ɛ kpó dó lɛ̌ɛnkanvɔ ɖagbe ɖagbe. Yě hɛn agǐdigbo, bó hɛn kanhún, bó hɛn kpɛn, bó ɖo te vɔ̌sákpe ɔ́ sín zǎnzǎnhwe jí, bɔ vɔ̌sánú-xwlémawutɔ́ e nyɔ́ kpɛn kún ganjí lɛ́ɛ kantɔn (120) ɖo akpá yětɔn. 13 Kpɛnkúntɔ́ lɛ́ɛ kpó nǔxotɔ́ lɛ́ɛ kpó bǐ ɖo kpɔ́, bó ɖo han ji dó kpa susu nú Mawu Mavɔmavɔ wɛ, bó ɖo nyǐkɔ tɔn sɔ́ su wɛ. Yě ɖo kpɛn kún wɛ, bó ɖo hǔn kpó nǔxonú ɖěvo lɛ́ɛ kpó xo wɛ; yě ɖo susu kpa nú Mawu Mavɔmavɔ wɛ ɖɔ: “Mawu Mavɔmavɔ nyɔ́. Xomɛnyínyɔ́ tɔn ɖó dogbó ǎ”. Hwenɛ́nu ɔ́, akpɔ́kpɔ́ ɖé wá gɔ́ Mawu Mavɔmavɔ xwé ɔ́. 14 Ée akpɔ́kpɔ́ gɔ́ xwé ɔ́ mɔ̌ ɔ́, vɔ̌sánú-xwlémawutɔ́ lɛ́ɛ ɖó azɔ̌ yětɔn te, ɖó susu Mawu Mavɔmavɔ tɔn gɔ́ xwé ɔ́. |
La Bible en langue fon © Alliance Biblique du Bénin, 2012.
Bible Society of Benin