2 Tan 36 - MAWUXÓWÉMA

¹ Ée Joziyási zán wá kú ɔ́, Judáanu lɛ́ɛ sɔ́ vǐ tɔn Yoakázi bɔ é ɖu axɔ́sú ɖó tɔ́ ɔ́ tɛnmɛ ɖo Jeluzalɛ́mu.

² Xwe ko-nukún-atɔn wɛ Yoakázi ɖó bó yi zinkpo jí ɖo Jeluzalɛ́mu, bó ɖu axɔ́sú nú sun atɔn.

³ Ejípu xɔ́sú ɔ́ ka wá ɖe e sín axɔ́súzinkpo jí ɖo Jeluzalɛ́mu, bó byɔ́ nǔjɔ Judáa to ɔ́, bɔ yě ná kpatágan kilóo afɔwó-afatɔ́n (3.000) kpó siká kilóo gban (30) kpó.

⁴ Ejípu xɔ́sú Nɛko sɔ́ Eliyakímu Yoakázi nɔví ɔ́ axɔ́sú ɖó Judáa kpó Jeluzalɛ́mu kpó nu, bó húzú nyǐkɔ n'i bɔ é nɔ nyí Yoyakímu. Axɔ́sú Nɛko kplá nɔví tɔn Yoakázi ɔ́ yi Ejípu.

Yoyakímu ɖu axɔ́sú ɖo Judáa

⁵ Xwe koatɔ́n (25) wɛ Yoyakímu ɖó bó yi zinkpo jí ɖo Jeluzalɛ́mu, bó ɖu axɔ́sú nú xwe wǒ-ɖokpó. Nǔ e ma nyɔ́ Mawu Mavɔmavɔ, Mawu tɔn nukún mɛ ǎ lɛ́ɛ wɛ é wa.

⁶ Axɔ́sú Babilɔ́nu tɔn Nabukodonɔzɔ́ɔ tɔ́n ahwan Yoyakímu, bó wlí i lobo blá ɛ kpó ganvɔwlɔ kpó, bó kplá ɛ yi Babilɔ́nu.

⁷ Nabukodonɔzɔ́ɔ bɛ́ nǔ tɛnmɛ tɛnmɛ ɖo Mawu Mavɔmavɔ xwé gbe yi Babilɔ́nu, bó bɛ́ yě ɖó hɔnmɛ, xwé tɔn gbe ɖo Babilɔ́nu.

⁸ Axɔ́sú Yoyakímu sín tan e kpo ɔ́, è wlǎn dó axɔ́sú Izlayɛ́li tɔn lɛ́ɛ, kpó Judáa tɔn lɛ́ɛ kpó sín Tan wéma mɛ; nǔ e é dó sin lɛ́ɛ kpó nǔ e gbo e lɛ́ɛ kpó bǐ wɛ è wlǎn d'é mɛ. Vǐ tɔn Yoyakini wɛ ɖu axɔ́sú ɖó tɛn tɔn mɛ.

Yoyakini ɖu axɔ́sú ɖo Judáa

⁹ Xwe tántɔn wɛ Yoyakini ɖó bó yi zinkpo jí ɖo Jeluzalɛ́mu, bó ɖu axɔ́sú nú sun atɔn azǎn wǒ. Nǔ e ma nyɔ́ Mawu Mavɔmavɔ nukún mɛ ǎ lɛ́ɛ wɛ é wa.

¹⁰ Hwenu e xwe yɔ̌yɔ́ ɔ́ ɖo nǎ bɛ́ wɛ ɔ́, axɔ́sú Nabukodonɔzɔ́ɔ ɖɔ bɔ è kplá Yoyakini wá yi Babilɔ́nu kpó nǔ xɔ akwɛ́ e è nɔ zán ɖo Mawu Mavɔmavɔ xwé gbe lɛ́ɛ kpó, bó sɔ́ hɛ̌nnumɔ tɔn Sedesíyasi axɔ́sú ɖó Judáa kpó Jeluzalɛ́mu kpó nu.

Sedesíyasi ɖu axɔ́sú ɖo Judáa. È yǐ Jeluzalɛ́mu toxo ɔ́

¹¹ Xwe ko-nukún-ɖokpó wɛ Sedesíyasi ɖó bó yi zinkpo jí ɖo Jeluzalɛ́mu, bó ɖu axɔ́sú nú xwe wǒ-ɖokpó.

¹² Nǔ e má nyɔ́ Mawu Mavɔmavɔ, Mawu tɔn nukún mɛ ǎ lɛ́ɛ wɛ é wa, bó lɛ́ gbɛ́ ɖɔ émí kún ná sɔ́ émíɖée hwe ɖo gbeyíɖɔ Mawu tɔn Jelemíi e nɔ wá ɖɔ xó n'i ɖo Mawu Mavɔmavɔ nyǐkɔ mɛ é nukɔn ó.

¹³ Axɔ́sú Nabukodonɔzɔ́ɔ ɖɔ nú Sedesíyasi ɖɔ é ní xwlé Mawu nú émí ɖɔ émí ná nɔ gbejí nú émí, bɔ é xwlé, có Sedesíyasi fɔ́n gǔ dó jǐ tɔn. É ti tamɛ bó gbɛ́ bǐ ɖɔ émí kún sɔ́ ná lɛ́ kɔ yi Mawu Mavɔmavɔ, Mawu Izlayɛ́li tɔn ɔ́ gɔ́n ó.

¹⁴ Mɔ̌ ɖokpó ɔ́, vɔ̌sánú-xwlémawutɔ́gán lɛ́ɛ bǐ kpó togun ɔ́ kpó lɔ fɔ́n bó ɖo hwɛ baɖabaɖa hu dó hwɛ jí wɛ walɔ baɖabaɖa e akɔta e ma nɔ sɛn Mawu ǎ lɛ́ɛ nɔ́ zán lɛ́ɛ ɖɔhun. Yě ɖu su nú xwé e Mawu Mavɔmavɔ sɔ́ ɖó vo nú éɖée ɖo Jeluzalɛ́mu é.

¹⁵ Mawu Mavɔmavɔ, Mawu tɔ́gbó yětɔn lɛ́ɛ tɔn sɛ́ mɛ dó yě dó hwe tɔn nu, bɔ yě wǎ ɖɔ xó nú yě, ɖó é jló ná hwlɛ́n togun tɔn kpó nɔtɛn é ɖésúnɔ tɔn kpó.

¹⁶ Lo ɔ́, yě cá mɛ e Mawu sɛ́ dó lɛ́ɛ ko. Yě nɔ́ hu tɛ́ nú Mawuxó ɔ́, bó nɔ́ ɖɔ slǎmɛ gbeyíɖɔ tɔn lɛ́ɛ wú káká bɔ Mawu Mavɔmavɔ sin xomɛ dó togun tɔn, bɔ nǔ e ná fá xomɛ n'i ɔ́ ɖe ǎ.

¹⁷ Ée Mawu Mavɔmavɔ sin xomɛ mɔ̌ ɔ́, é sɛ́ Babilɔ́nu xɔ́sú ɔ́ dó to ɔ́ mɛ bó jó nǔ e ɖo to ɔ́ mɛ lɛ́ɛ bǐ n'i. Axɔ́sú ɔ́ hu sɔ́ja lɛ́ɛ káká yi Mawu Mavɔmavɔ xwé ɔ́ gbe; é jó dɔ̌nkpɛvú dó ǎ, é jó ɖyɔ̌vǐ dó ǎ, é jó mɛxó dó ǎ, é jó degénɔ dó ǎ; mɛ bǐ wɛ é hu.

¹⁸ Axɔ́sú Nabukodonɔzɔ́ɔ bɛ́ nǔ e è nɔ zán ɖo Mawu Mavɔmavɔ xwé gbe lɛ́ɛ bǐ, kpɛví kpó ɖaxó kpó, dɔkun e ɖo xwé ɔ́ gbe lɛ́ɛ, dɔkun e nyí axɔ́sú ɔ́ tɔn lɛ́ɛ kpó éé nyí azaglɔ́gán tɔn lɛ́ɛ tɔn lɛ́ɛ kpó yi Babilɔ́nu.

¹⁹ Babilɔ́nunu lɛ́ɛ dó Mawu xwé ɔ́ zo. Yě mu ahohó e ɖo Jeluzalɛ́mu lɛ́ɛ, bó dó hɔnmɛ lɛ́ɛ bǐ zo lobo hɛn nǔ xɔ akwɛ́ e ɖo toxo ɔ́ mɛ lɛ́ɛ bǐ gblé.

²⁰ Nabukodonɔzɔ́ɔ wlí mɛ e kpo ɖo gbɛ lɛ́ɛ yi Babilɔ́nu bɔ yě húzú kannumɔ nú é kpó vǐ tɔn lɛ́ɛ kpó káká wá jɛ hwenu e Pɛ́sinu lɛ́ɛ wá xɔ to é.

²¹ Énɛ́ ɔ́, xó e Mawu Mavɔmavɔ ɖɔ gbɔn gbeyíɖɔ Jelemíi nu mɛ ɔ́ jɛ; é ɖɔ: “È nǎ jó to ɔ́ dó xɔ xwe kanɖé gban (70), ɖó gbɔjɛ́ e é ɖó ná gbɔjɛ́ lě e sɛ́n ɔ́ ɖɔ gbɔn, bɔ é má ká gbɔjɛ́ ǎ ɔ́ sín tɛnmɛ.”

Dadá Silúsi ná gbe ɖɔ è nǐ sá xwé nú Mawu

²² Hwenu e Dadá Pɛ́si tɔn Silúsi ɖo xwe ɖokpó bló wɛ ɖo zinkpo jí ɔ́, Mawu Mavɔmavɔ ɖɔ émí ná bló nǔ e émí ɖɔ gbɔn Jelemíi jí é; énɛ́ ɔ́, é sɔ́ dó ayi mɛ nú Dadá Silúsi, bɔ ayi tɔn mɔ ɖɔ émí ná zé nu émítɔn dó jlá xó élɔ́ gbɔn axɔ́súɖuto émítɔn bǐ mɛ, bó ná wlán ɖɔ:

²³ “Xó e Dadá Pɛ́si tɔn Silúsi ɖɔ ɔ́ ɖíe: Mawu Mavɔmavɔ, Mawu jǐnukúnsin tɔn ɔ́ sɔ́ axɔ́súɖuto e ɖo ayǐkúngban jí lɛ́ɛ bǐ ɖó acɛ ce mɛ; é zɔ́n mì ɖɔ nyɛ ní sá xwé ɖokpó nú émí ɖó Jeluzalɛ́mu ɖo Judáa. Mi mɛ e ko sixú ɖo togun tɔn mɛ lɛ́ɛ bǐ ní lɛ́ kɔ yi Jeluzalɛ́mu. Mawu Mavɔmavɔ, Mawu mitɔn ní nɔ kpɔ́ xá mi.”