2 Tan 34 - MAWUXÓWÉMA

Joziyási ɖu axɔ́sú

¹ Xwe tántɔn wɛ Joziyási ɖó bó yi axɔ́súzinkpo jí ɖo Jeluzalɛ́mu, bó ɖu axɔ́sú nú xwe gban nukún ɖokpó (31).

² É bló nǔ e nɔ́ nyɔ́ Mawu Mavɔmavɔ nukún mɛ lɛ́ɛ, bó gbɔn ali e tɔ́gbó tɔn Davídi gbɔn é. É zɛ sín ali ɔ́ jí, bó yi ɖisí ǎ, é ka yi amyɔ ǎ.

³ Hwenu e Joziyási ɖo xwe tántɔn bló wɛ ɖo zinkpo jí ɔ́, é kpo ɖo vǔ, bó ka jɛ Mawu e tɔ́gbó tɔn Davídi sɛn ɔ́ sín jlǒ ba ná tunwun jí. Énɛ́ ɔ́, hwenu e é wá ɖo xwe wěwe bló wɛ ɖo zinkpo jí ɔ́, é jɛ vodún e ɖo Jeluzalɛ́mu kpó Judáa kpó lɛ́ɛ ɖe síin jí: é gba vodún xwé e ɖo só jí lɛ́ɛ, bó ɖe vodún Acela lɛ́ɛ síin, bó ɖe bǒcyɔ e è sɔ́ gan dó kɔn lɛ́ɛ kpódó ée è kpa lɛ́ɛ kpó síin.

⁴ È mu vɔ̌sákpe Baalu tɔn lɛ́ɛ ɖo nukún tɔn mɛ, bɔ é gba nǔ e mɛ yě nɔ́ dó zǎlínkpɔ́n zo ɖe lɛ́ɛ. É li vodún Acela e yě tun te bó nɔ́ sɛn lɛ́ɛ kpó bǒcyɔ tɛnmɛ tɛnmɛ lɛ́ɛ kpó, bo fúnfún gbɔn mɛ e nɔ sá vɔ̌ nú yě ɖ'ayǐ bó kó kú lɛ́ɛ sín yɔta.

⁵ É dó vodúnnɔ lɛ́ɛ sín xúgloxú zo ɖo vɔ̌sákpe yětɔn lɛ́ɛ jí. Lě e é slá wǔ nú Judáa kpó Jeluzalɛ́mu kpó gbɔn ɔ́ nɛ́.

⁶ Énɛ́ ɔ́ gúdo ɔ́, é gbɔn toxo Manasée tɔn lɛ́ɛ, Eflayímu tɔn lɛ́ɛ, Sinmɛnyɔ́ɔ tɔn lɛ́ɛ kpódó Nɛfutali ɖésú tɔn lɛ́ɛ lɔ kpó mɛ, bó kíjé xwé lɛ́ɛ.

⁷ É mu vɔ̌sákpe lɛ́ɛ bó já vodún Acela lɛ́ɛ kpódó bǒcyɔ tɛnmɛ tɛnmɛ lɛ́ɛ kpó, bó li bǐ, bó gba zǎlínkpɔ́nfyɔ́nú lɛ́ɛ gbɔn Izlayɛ́li to ɔ́ bǐ mɛ. Énɛ́ ɔ́ gúdo ɔ́, é lɛ́ kɔ yi Jeluzalɛ́mu.

Vɔ̌sánú-xwlémawutɔ́ ɖaxó ɔ́ mɔ sɛ́nwéma ɔ́

⁸ Hwenu e Joziyási ɖo xwe afɔtɔn-nukún-atɔn bló wɛ ɖo zinkpo jí ɔ́, é wá su gbe ɖokpó, bɔ é ɖɔ nú Cafáni Asaliyahu ví ɔ́, kpó Maaseyahu toxo ɔ́ sín gǎn ɔ́ kpó, kpódó Yoáxi Yoaxázi ví e nyí wěgbóhɛntɔ́ axɔ́sú ɔ́ tɔn ɔ́ kpó ɖɔ yě ní yi bló Mawu Mavɔmavɔ, Mawu émítɔn sín xwé ɖó; é ká kó slá wǔ nú to ɔ́ kpó Mawu Mavɔmavɔ xwé ɔ́ kpó hwenɛ́nu.

⁹ Mɛ e Joziyási sɛ́ dó lɛ́ɛ yi vɔ̌sánú-xwlémawutɔ́ ɖaxó Ilukya gɔ́n, bó bɛ́ akwɛ́ e è jɔ ɖo Mawu xwé é jó n'i. Akwɛ́ énɛ́ ɔ́, Levíi ví hɔnjínɔtɔ́ lɛ́ɛ wɛ nɔ nu bó yí ɖo akɔta Manasée tɔn, Eflayímu tɔn kpó Izlayɛ́li ví ɖě lɛ́ɛ e kpo ɖo axɔ́súɖuto Taligbé tɔn mɛ é kpó sí; mɔ̌ ɖokpó ɔ́ wɛ yě lɛ́ yí ɖo akɔta Judáa tɔn ɔ́, Bɛnjamɛ́ɛ tɔn ɔ́ kpó Jeluzalɛ́munu lɛ́ɛ kpó sí.

¹⁰ Énɛ́ ɔ́, è bɛ̌ akwɛ́ ɔ́ jó nú mɛ e ɖo azɔ̌ e wa wɛ è ɖe ɖo Mawu Mavɔmavɔ xwé ɔ́ wú é nu lɛ́ɛ. Yědɛɛ lɛ́ɛ sɔ́ dó sú axɔ́ mɛ e ɖo azɔ̌ ɔ́ wa wɛ, bó ná ná syɛ́nsyɛ́n xwé ɔ́, bó ná bló xwé ɔ́ ɖó lɛ́ɛ.

¹¹ Yě dó sú axɔ́ xɔgbátɔ́ lɛ́ɛ kpó xɔmɛtɔ́ lɛ́ɛ kpó. Bó ná akwɛ́ bɔ è nǎ dó xɔ awǐnnya kpikpa kpódó atín kpó, bó ná dó bló xɔ e axɔ́sú Judáa tɔn lɛ́ɛ hɛn gblé lɛ́ɛ ɖó ná.

¹² Azɔ̌watɔ́ lɛ́ɛ kpé nukún dó azɔ̌ yětɔn wú ganjí. Azɔ̌watɔ́ énɛ́ lɛ́ɛ ɔ́, Levíi ví Yaxáti kpó Ovadiahu kpó e jɔ ɖo Mɛlali kún mɛ lɛ́ɛ wɛ ɖo yě nu. Levíi ví Zekaliya kpó Mɛculamu kpó e jɔ ɖo Kexáti kún mɛ lɛ́ɛ lɔ ɖo yě nu. Levíi ví énɛ́ lɛ́ɛ bǐ wɛ nyɔ́ nǔ xo ganjí.

¹³ Yě nɔ́ kpé nukún dó mɛ e ɖo azɔ̌wanú tɛnmɛ tɛnmɛ fɔ wá wɛ lɛ́ɛ wú, bó ɖo mɛ e ɖo azɔ̌ wa wɛ lɛ́ɛ bǐ jí kpɔ́n wɛ gbɔn azɔ̌ ɖokpó ɖokpó kɔn. Levíi ví ɖěvo lɛ́ɛ nyí wěgbójínɔtɔ́, nǔjíkpɔ́ntɔ́ kpó hɔnjínɔtɔ́ kpó.

¹⁴ Akwɛ́ e è hɛn wá Mawu Mavɔmavɔ xwé gbe ɔ́, hwenu e è nǎ ɖe tɔ́n sín gbǎ ɔ́ mɛ ɔ́, vɔ̌sánú-xwlémawutɔ́ Ilukya mɔ sɛ́n e Mawu Mavɔmavɔ dó gbɔn Mɔyízi jí ɔ́ sín wěma ɖo sinsɛnxɔ mɛ.

¹⁵ Énɛ́ ɔ́, Ilukya yí xó, bó ɖɔ nú Cafáni wěgbójínɔtɔ́ ɔ́ ɖɔ: “Un mɔ sɛ́nwéma ɔ́ ɖo Mawu Mavɔmavɔ xwé gbe.” Ée é ɖɔ mɔ̌ ɔ́, é zé wěma ɔ́ jó nú Cafáni.

¹⁶ Bɔ Cafáni zé wěma ɔ́ wá nú axɔ́sú ɔ́, bó lɛ́ ɖó lě e nǔ lɛ́ɛ yi gbɔn ɔ́ sín gbe n'i ɖɔ: “Mɛsɛntɔ́ mɛtɔn lɛ́ɛ wa nǔ e mɛ zɔ́n yě lɛ́ɛ bǐ.

¹⁷ Yě sɛ akwɛ́ e ɖo Mawu Mavɔmavɔ xwé gbe ɔ́ kplé, bó zé dó alɔ mɛ nú azɔ̌jíkpɔ́ntɔ́ lɛ́ɛ kpó mɛ e ɖo azɔ̌ ɔ́ wa wɛ lɛ́ɛ kpó.”

¹⁸ Cafáni wěgbójínɔtɔ́ ɔ́ lɛ́ ɖɔ nú axɔ́sú ɔ́ ɖɔ: “Vɔ̌sánú-xwlémawutɔ́ Ilukya zé wěma ɖé nú mì.” Ée Cafáni ɖɔ mɔ̌ ɔ́, é xa wěma ɔ́ ɖo axɔ́sú ɔ́ nukɔn.

Joziyási sɛ́ mɛ dó gbeyíɖɔ Mawu tɔn nyɔ̌nu Hulida gɔ́n

¹⁹ Ée axɔ́sú ɔ́ se xó e ɖo sɛ́nwéma ɔ́ mɛ ɔ́, é vún awu dó kɔ nú éɖée,

²⁰ bó zɔ́n vɔ̌sánú-xwlémawutɔ́ Ilukya kpó Axikamu Cafáni ví ɔ́ kpó, kpó Avidɔni Mika ví ɔ́ kpó, kpó Cafáni wěgbójínɔtɔ́ ɔ́ kpó, kpódó Asaya azaglɔ́gán tɔn ɖokpó kpó ɖɔ:

²¹ “Mi yi kan nǔ byɔ́ Mawu Mavɔmavɔ nú mì, bó kanbyɔ́ nú mɛ e kpo ɖo Izlayɛ́li kpó Judáa kpó lɛ́ɛ, dó xó e ɖo wěma élɔ́ e è mɔ ɔ́ mɛ é wú. Đó Mawu Mavɔmavɔ ɖo xomɛ sin jí ɖésú. É sin xomɛ dó mǐ, ɖó tɔ́gbó mǐtɔn lɛ́ɛ se tónú nú nǔ e è wlǎn dó wěma élɔ́ mɛ ɔ́ ǎ; yě ká bló ɖě ɖ'é jí ǎ.”

²² Ilukya kpó mɛ e axɔ́sú ɔ́ ɖe gɔ́ n'i lɛ́ɛ kpó yi gbeyíɖɔ Mawu tɔn nyɔ̌nu Hulida, Calúmu sín asi ɔ́ gɔ́n. Calúmu ɔ́, Tokáti ví wɛ, bó nyí Hasla vívú; é wɛ nɔ cɔ́ awu e ɖo Mawu xwé gbe lɛ́ɛ. Jeluzalɛ́mu wɛ Hulida nɔ́ nɔ, ɖo Jeluzalɛ́mu sín slá yɔ̌yɔ́ ɔ́ mɛ. Yě yi mɔ Hulida, bó ɖɔ xó ɔ́ n'i, lě e axɔ́sú ɔ́ ɖɔ gbɔn é.

²³ É ɖɔ nú yě ɖɔ yě ní yi ɖɔ nú mɛ e sɛ́ yě dó gɔ̌n émí tɔn ɔ́ ɖɔ xó e Mawu Mavɔmavɔ, Mawu Izlayɛ́li tɔn ɔ́ ɖɔ ɔ́ ɖíe;

²⁴ “Mawu Mavɔmavɔ ɖɔ: ‘Mi ɖótó, un ná sɛ́ awě dó toxo élɔ́, bó sɛ́ dó mɛ e ɖo toxo ɔ́ mɛ lɛ́ɛ. Un ná bló mɔ̌ bɔ nudómɛ e xó è ɖɔ dó wěma e è xa ɖo axɔ́sú Judáa tɔn ɔ́ nukɔn lɛ́ɛ bǐ ná jɛ.

²⁵ Đó yě jó mì dó, bó nɔ sá vɔ̌ nú nǔmɛsɛn ɖěvo lɛ́ɛ, bó ná dó sɔ́ nǔ e alɔ yětɔn bló lɛ́ɛ bǐ do dó xomɛsin nú mì. Énɛ́ ɔ́ wú wɛ un sin xomɛ dó toxo élɔ́, bó ɖo gbɔ ná se wɛ ǎ.

²⁶ Amɔ̌, mi ná ɖɔ nú axɔ́sú Judáa tɔn e sɛ́ mi dó ɖɔ mi ní wá kan nǔ byɔ́ Mawu Mavɔmavɔ ɔ́ ɖɔ xó e Mawu Mavɔmavɔ, Mawu Izlayɛ́li tɔn ɔ́ ɖɔ dó xó e a se lɛ́ɛ wú ɔ́ ɖíe:

²⁷ xó e un ɖɔ nú we ɔ́ xo ayi towe zlɛ́, a sɔ́ hwiɖée hwe ɖo Mawu nukɔn hwenu e a se xó e é ɖɔ dó Jeluzalɛ́mu kpó Jeluzalɛ́munu lɛ́ɛ kpó wú é, a sɔ́ hwiɖée hwe ɖo nukɔn ce, bó vún awu dó kɔ nú hwiɖée, bó ya avǐ ɖo nukɔn ce; énɛ́ wú ɔ́, nyi lɔ un se xó towe;

²⁸ un ná yí we ɖó tɔ́gbó towe lɛ́ɛ kpá; a nǎ yi yɔdo towe mɛ kpó fífá kpó bɔ nukún towe ná mɔ awě énɛ́ lɛ́ɛ e un ná sɛ́ dó Jeluzalɛ́mu kpó Jeluzalɛ́munu lɛ́ɛ kpó é ɖě ǎ.’ ” Ée yě se xó énɛ́ lɛ́ɛ ɔ́, yě yi ɖó gbe tɔn nú axɔ́sú ɔ́.

Joziyási lɛ́ vɔ́ akɔ jɛ xá Mawu

²⁹ Axɔ́sú Joziyási ylɔ́ tomɛxó Judáa tɔn lɛ́ɛ bǐ kpó Jeluzalɛ́mu tɔn lɛ́ɛ bǐ kpó kplé.

³⁰ Bɔ yě yi Mawu Mavɔmavɔ xwé gbe. Yě kpó Judáanu lɛ́ɛ bǐ kpó, Jeluzalɛ́munu lɛ́ɛ bǐ kpó, vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó, kpódó togun ɔ́ bǐ kpó wɛ yi, bɛ́ sín yɔkpɔ́vú lɛ́ɛ jí, káká yi jɛ mɛxó lɛ́ɛ jí. Ée yě yi xwé ɔ́ gbe ɔ́, axɔ́sú ɔ́ zé akɔjijɛwéma e è mɔ ɖo Mawu Mavɔmavɔ xwé gbe ɔ́ bó xa bǐ nú yě.

³¹ Axɔ́sú ɔ́ nɔ te ɖo tɛn tɔn mɛ, ɖo Mawu Mavɔmavɔ nukɔn, bó jɛ akɔ xá Mawu Mavɔmavɔ; mɛ ɖokpó ɖokpó ɖó ná zin alɔ dó akɔ́n ɖɔ émí ná nɔ gbejí nú Mawu Mavɔmavɔ, lobo ná nɔ́ wa nǔ e é zɔ́n lɛ́ɛ, bó ná nɔ nyi sɛ́n tɔn lɛ́ɛ kpó ayi émítɔn bǐ kpó. Émí ná wa nǔ gbɔn mɔ̌, dó nɔ gbejí nú xó e ɖo akɔjijɛwéma élɔ́ mɛ lɛ́ɛ é.

³² Énɛ́ ɔ́, é ɖɔ bɔ yě mɛ e ɖo Jeluzalɛ́mu lɛ́ɛ kpó mɛ e ɖo akɔta Bɛnjamɛ́ɛ tɔn mɛ lɛ́ɛ kpó bǐ yí gbe bo jɛ akɔ ɖokpó énɛ́ ɔ́. Bɔ Jeluzalɛ́munu lɛ́ɛ wa nǔ lě e akɔ e Mawu tɔ́gbó yětɔn lɛ́ɛ tɔn ɔ́ jɛ xá yě ɔ́ byɔ́ gbɔn é.

³³ Walɔ baɖabaɖa e zán wɛ yě ɖe ɖo Izlayɛ́li lɛ́ɛ ɔ́, axɔ́sú Joziyási sú dó, bó ɖɔ mɛ e ɖo to ɔ́ mɛ lɛ́ɛ bǐ ɖó ná sɛn Mawu Mavɔmavɔ, Mawu yětɔn ɔ́ dandan. Ée é bló mɔ̌ ɔ́, yě mɛ ɖěbǔ sɔ́ lɛ́ kɔ sín Mawu Mavɔmavɔ, Mawu e tɔ́gbó yětɔn lɛ́ɛ nɔ sɛn ɔ́ gúdo káká có nú zǎn tɔn wá kú ǎ.