2 Tan 33 - MAWUXÓWÉMA

Manasée ɖu axɔ́sú

¹ Xwe wěwe wɛ Manasée ɖó bó yi axɔ́súzinkpo jí ɖo Jeluzalɛ́mu. É ɖu axɔ́sú nú xwe kanɖé afɔtɔn (55).

² É wa nǔ e má nyɔ́ Mawu Mavɔmavɔ nukún mɛ ǎ lɛ́ɛ. É xwedó walɔ nyanya akɔta e Mawu Mavɔmavɔ nya bó yí ayǐkúngban yětɔn nú Izlayɛ́li ví lɛ́ɛ tɔn.

³ Vɔ̌sákpe e tɔ́ tɔn Ezekiyási gba gbɔn só jí só jí lɛ́ɛ ɔ́, é lɛ́ vɔ́ bǐ blóɖó. É bló vɔ̌sákpe gěgé nú Baalu bó tun vodún Acela te. É nɔ́ sɛn nǔ e nɔ́ ná wěziza ɖo jǐxwé lɛ́ɛ.

⁴ É bló vodúnkpe gbɔn Mawu Mavɔmavɔ xwé gbe, ɖo Jeluzalɛ́mu fí e Mawu Mavɔmavɔ ɖɔ émí ná ɖe émíɖée xlɛ́ ɖe káká sɔ́yi é.

⁵ É bló vodúnkpe nú nǔ e nɔ́ ná wěziza ɖo jǐxwé lɛ́ɛ gbɔn kɔ́xota we e ɖo Mawu Mavɔmavɔ xwé gbe lɛ́ɛ.

⁶ É bló káká bó sɔ́ vǐ tɔn sá vɔ̌ ná ɖo tɔdo Hinnɔ́mu tɔn mɛ; é nɔ́ bló majíki tɛnmɛ tɛnmɛ, lobo ɖu azě; é nɔ́ yi kan nǔ ɖo bokantɔ́ lɛ́ɛ gɔ́n. É nɔ́ fɔ́n, bó nɔ́ ɖo nǔ e ma nyɔ́ Mawu Mavɔmavɔ nukún mɛ ǎ é wa wɛ, bó dó dó xomɛsin xomɛ n'i.

⁷ Vodún e sín bǒcyɔ e é bló ɔ́, é sɔ́ ɖó xwé e gbe Mawu ɖɔ nú Davídi kpó vǐ tɔn Salomɔ́ɔ kpó ɖɔ: “Xwé élɔ́ wɛ un sɔ́ ɖo Jeluzalɛ́mu, ɖo akɔta wěwe Izlayɛ́li tɔn lɛ́ɛ mɛ, bɔ nyǐkɔ ce ná nɔ fínɛ́ káká sɔ́yi.

⁸ Un sɔ́ ná kplá Izlayɛ́li ví lɛ́ɛ sín to e un sɔ́ nú tɔ́gbó yětɔn lɛ́ɛ é mɛ ǎ. Yě ní vɛ́ kó bló nǔ e un zɔ́n lɛ́ɛ bǐ, bó nyi sɛ́n e un dó gbɔn Mɔyízi jí lɛ́ɛ bǐ.”

⁹ Lo ɔ́, Manasée dɔn Judáa to ɔ́ kpódó Jeluzalɛ́munu lɛ́ɛ kpó bú, bɔ nǔ nyanya e yě dó sin ɔ́ hú nǔ nyanya e togun e Mawu Mavɔmavɔ nya bo yí ayǐkúngban yětɔn nú Izlayɛ́li ví lɛ́ɛ é tɔn.

¹⁰ Mawu Mavɔmavɔ ɖɔ xó nú Manasée kpó togun tɔn kpó có yě ké ya ná ǎ.

¹¹ Énɛ́ ɔ́, Mawu Mavɔmavɔ sɛ́ ahwangán Asilíi xɔ́sú ɔ́ tɔn lɛ́ɛ dó Manasée kpó togun tɔn kpó, bɔ yě wlí Manasée bo dó klɔcée aglan n'i. Yě zě ganvɔ wlɔ dó dó gɛdɛ ɛ, bó sɔ́ ɛ yi Babilɔ́nu.

¹² Ée adǎn gbo e mɔ̌ ɔ́, é sú xó ylɔ́ Mawu Mavɔmavɔ, Mawu tɔn, lobo sɔ́ éɖée hwe bǐ, ɖo Mawu e tɔ́gbó tɔn lɛ́ɛ nɔ sɛn ɔ́ nukɔn.

¹³ É sa vo nú Mawu ɖɔ é ní kú nǔbláwǔ nú émí, bɔ Mawu Mavɔmavɔ yí ɖɛ tɔn, bó kplá ɛ wá Jeluzalɛ́mu, bó lɛ́ sɔ́ ɛ ɖó axɔ́súzinkpo tɔn jí. Énɛ́ ɔ́, Manasée mɔ ɖɔ Mawu Mavɔmavɔ ɖokpónɔ wɛ è ɖǒ nǎ sɛn.

¹⁴ Ée nǔ énɛ́ lɛ́ɛ jɛ wá yi ɔ́, Manasée mɛ ahohó ɖé ɖó Davídi Toxo ɔ́ gúdo, ɖo Gixɔ́ni sín gbadahwe jí, gbɔn tɔdo ɔ́ mɛ káká yi Hweví Hɔntogbó ɔ́ kɔn, bó lɛ́ dó Ofɛ́lu. É mɛ ahohó ɔ́ bɔ é yi jǐ ɖésú. É lɛ́ sɔ́ ahwangán lɛ́ɛ ɖó Judáa sín toxo e è mɛ ahohó lɛ́ lɛ̌ dó lɛ́ɛ mɛ.

¹⁵ É ɖe nǔmɛsɛn lɛ́ɛ kpó bǒcyɔ ɔ́ kpó sín Mawu Mavɔmavɔ xwé gbe, bó gba vodúnkpe e é mɛ ɖó só e ɖo Mawu Mavɔmavɔ xwé gbe ɔ́ jí lɛ́ɛ kpó ée ɖo Jeluzalɛ́mu lɛ́ɛ kpó, lobo bɛ́ bǐ kɔn nyi gbě sín toxo ɔ́ mɛ.

¹⁶ É lɛ́ vɔ́ vɔ̌sákpe Mawu Mavɔmavɔ tɔn ɔ́ mɛ, bó nɔ sá kɔnɖókpɔ́ vɔ́ lɛ́ɛ kpódó kú dó nú Mawu vɔ́ lɛ́ɛ kpó ɖ'é jí, lobo ɖɔ nú Judáanu lɛ́ɛ ɖɔ yě ní nɔ sɛn Mawu Mavɔmavɔ, Mawu Izlayɛ́li tɔn.

¹⁷ Togun ɔ́ lɛ́ kpo ɖo vɔ̌ sá gbɔn só ta só ta wɛ; amɔ̌, Mawu Mavɔmavɔ, Mawu yětɔn kɛ́ɖɛ́ jɛ́n yě nɔ́ sá ná.

¹⁸ Axɔ́sú Manasée sín tan e kpo lɛ́ɛ, xó e é xo ɖɛ bo ɖɔ nú Mawu tɔn lɛ́ɛ kpódó xó e nǔmɔtɔ́ lɛ́ɛ ɖɔ n'i dó Mawu Mavɔmavɔ, Mawu Izlayɛ́li tɔn nyíkɔ mɛ lɛ́ɛ kpó ɔ́, è wlǎn bǐ dó axɔ́sú Izlayɛ́li tɔn lɛ́ɛ sín Tan wéma mɛ.

¹⁹ Đɛ e é xo ɔ́, lě e Mawu yǐ ɖɛ tɔn gbɔn ɔ́, hwɛ e é hu lɛ́ɛ, gbejí e é má nɔ nú Mawu ǎ é, fí e é xo vodúnkpe gbɔn só jí só jí gbɔn lɛ́ɛ, vodún Acela e é tun te é kpódó bǒcyɔ e é tun te, có bó wá yí hwɛ e é hu lɛ́ɛ gbe ɖo Mawu nukɔn lɛ́ɛ kpó ɔ́, è wlǎn bǐ dó “Hozayi sín Tan wéma” ɔ́ mɛ.

²⁰ Manasée zán wá kú bɔ è sɔ́ ɛ ɖó xwé tɔn gbe. Vǐ tɔn Amɔ́ni wɛ ɖu axɔ́sú ɖó tɛn tɔn mɛ.

Amɔ́ni ɖu axɔ́sú

²¹ Xwe ko-nukún-we wɛ Amɔ́ni ɖó bó yi axɔ́súzinkpo jí ɖo Jeluzalɛ́mu, bó ɖu axɔ́sú nú xwe we.

²² Nǔ e má nyɔ́ Mawu Mavɔmavɔ nukún mɛ ǎ lɛ́ɛ wɛ é dó sin tɔ́ tɔn Manasée ɖɔhun. É nɔ́ sá vɔ̌ nú bǒcyɔ e tɔ́ tɔn bló lɛ́ɛ bǐ, bó nɔ sɛn yě.

²³ Amɔ̌, éyɛ́ yí hwɛ e é hu lɛ́ɛ gbe ɖo Mawu Mavɔmavɔ nukɔn lě e Manasée yí hwɛ tɔn lɛ́ɛ gbe gbɔn é ǎ, ɖó éyɛ́ Amɔ́ni ɔ́, é fɔ́n ɔ́, nǔ wa nyi do d'é jí wɛ jɛ́n é nɔ ɖe.

²⁴ Azaglɔ́gán tɔn lɛ́ɛ blá gbě tɔn bó hu i ɖo xɔ tɔn mɛ gbe ɖokpó.

²⁵ Lo ɔ́, mɛ e ɖo Judáa lɛ́ɛ hu yě mɛ e blá axɔ́sú Amɔ́ni gbé bó hu i lɛ́ɛ bǐ, bó sɔ́ vǐ tɔn Joziyási ɖó zinkpo ɔ́ jí ɖó tɛn tɔn mɛ.