2 Tan 30 - MAWUXÓWÉMA

¹ Ezekiyási sɛ́ mɛ dó Izlayɛ́li to, axɔ́súɖuto Taligbé tɔn ɔ́ bǐ, bó sɛ́ dó Judáa to ɔ́ bǐ. Ezekiyási sɛ́ mɛ dó Izlayɛ́li to ɔ́ kpó Judáa to ɔ́ kpó mɛ ɖɔ mɛ bǐ ní wá Mawu Mavɔmavɔ xwé gbe, ɖo Jeluzalɛ́mu, bó ná ɖu Dǐndínwáyixwe ɔ́ dó Mawu Mavɔmavɔ, Mawu Izlayɛ́li tɔn ɔ́ tamɛ. Wěma wɛ é wlán sɛ́ dó akɔta Eflayímu tɔn ɔ́ kpó Manasée tɔn ɔ́ kpó ɖɔ yě bǐ ní wá.

² Cóbónú axɔ́sú ɔ́ ná sɛ́ mɛ dó ɔ́, é kpó azaglɔ́gán tɔn lɛ́ɛ kpó, kpódó Jeluzalɛ́munu lɛ́ɛ bǐ kpó yi gbesɔ ɖo Jeluzalɛ́mu bo ɖe wě, bónú è nǎ ɖu Dǐndínwáyixwe ɔ́ ɖo sun wegɔ́ ɔ́ mɛ.

³ È ɖu xwe ɔ́ ɖo sun nukɔn tɔn ɔ́ mɛ hwenu e è nɔ ɖu dó é ǎ, ɖó vɔ̌sánú-xwlémawutɔ́ e kó slá wǔ nú yěɖée lɛ́ɛ sukpɔ́ ǎ. Togun ɔ́ lɔmɔ̌ kplé ɖo Jeluzalɛ́mu ǎ.

⁴ Axɔ́sú ɔ́ kpó togun ɔ́ bǐ kpó yí gbe nú linlin énɛ́ ɔ́,

⁵ bó ɖe gbeta tɔ́n ɖɔ è nǎ jlá gbɔn Izlayɛ́li to ɔ́ bǐ mɛ, sín Bɛ̌-Ceva ɖo Tofɔligbé káká yi Dan ɖo Totaligbé, bónú mɛ bǐ ná wá Jeluzalɛ́mu bó ná ɖu Dǐndínwáyixwe ɔ́ dó Mawu Mavɔmavɔ, Mawu Izlayɛ́li tɔn ɔ́ tamɛ. Đó mɛ gěgé sɔ́ nɔ́ yi ɖu xwe ɔ́ lě e è wlǎn gbɔn ɔ́ ǎ.

⁶ Mɛ e axɔ́sú ɔ́ sɛ́ dó lɛ́ɛ yi gbɔn Izlayɛ́li to ɔ́ bǐ mɛ bó gbɔn Judáa to ɔ́ bǐ mɛ kpó wěma e axɔ́sú ɔ́ kpó azaglɔ́gán tɔn lɛ́ɛ kpó wlán lɛ́ɛ kpó. Bɔ yě xwedó gbeta e axɔ́sú ɔ́ ná yě ɔ́, bó ɖɔ: “Izlayɛ́li ví lɛ́ɛ mi, mi lɛ́ kɔ wá Mawu Mavɔmavɔ, Mawu Ablaxámu tɔn, Izáki tɔn kpó Izlayɛ́li tɔn ɔ́ kpó gɔ́n, bónú é ná lɛ́ kɔ wá mi mɛ e gán ɖo axɔ́sú Silíi tɔn ɔ́ sí lɛ́ɛ gɔ́n.

⁷ Mi ma wa nǔ tɔ́ mitɔn lɛ́ɛ kpó nɔví mitɔn lɛ́ɛ kpó ɖɔhun ó. Yědɛɛ lɛ́ɛ ɔ́, yě nɔ gbejí nú Mawu Mavɔmavɔ, Mawu tɔ́gbó yětɔn lɛ́ɛ tɔn ɔ́ ǎ, bɔ é dɔn yě dó lele mɛ lě e mɔ gbɔn wɛ mi ɖe é.

⁸ Hǔn mi bo ma tlí tó tɔ́ mitɔn lɛ́ɛ ɖɔhun ó. Mi zin alɔ dó akɔ́n ɖɔ émí ná se tónú nú Mawu Mavɔmavɔ. Mi lɛ́ kɔ wá xwé tɔn e é sɔ́ ɖó vo bɔ è nǎ nɔ́ sɛn ɛ ɖ'é gbe káká sɔ́yi ɔ́ gbe, bó sɛn Mawu Mavɔmavɔ, Mawu mitɔn ɔ́, bónú xomɛ ɖaxó e é sin dó mi ɔ́ ná fá.

⁹ Ényí mi lɛ́ kɔ wá Mawu Mavɔmavɔ gɔ́n ɔ́, mɛ e kplá nɔví mitɔn lɛ́ɛ kpó vǐ mitɔn lɛ́ɛ kpó yi kannumɔgbénu lɛ́ɛ ná kú nǔbláwǔ nú yě, bó ná jó yě dó bɔ yě ná lɛ́ kɔ wá to élɔ́ mɛ. Đó Mawu Mavɔmavɔ, Mawu mitɔn nyɔ́ xomɛ bó nɔ kú nǔbláwǔ nú mɛ. Ényí mi lɛ́ kɔ wá gɔ̌n tɔn ɔ́, é ná ɖe kɔ sín mi wú ǎ.”

¹⁰ Énɛ́ ɔ́, wɛnsagun lɛ́ɛ yi gbɔn toxo e ɖo Eflayímu kpó Manasée kpó lɛ́ɛ mɛ, káká yi Zabulɔ́ɔn. Lo ɔ́, mɛ lɛ́ɛ nɔ́ ko yě, bó nɔ́ ɖɔ slǎmɛ yě wú.

¹¹ Nǔ ɖo mɔ̌ có Acɛ́ɛ kpó Manasée kpó kpódó Zabulɔ́ɔn kpó sín mɛ ɖé lɛ́ɛ mɔ ɖɔ émí wa nǔ nyi do, bó wá Jeluzalɛ́mu.

¹² Mawu sɔ́ ayi ɖokpó ɔ́ dó xomɛ nú mɛ e ɖo Judáa lɛ́ɛ lɔmɔ̌ bónú gbeta e axɔ́sú ɔ́ kpó azaglɔ́gán tɔn lɛ́ɛ kpó ɖe tɔn ɔ́, yě ná bló ɖ'é jí lě e Mawu Mavɔmavɔ ɖɔ gbɔn é.

Ezekiyási ɖu Dǐndínwáyixwe ɔ́

¹³ Gbɛtɔ́ wɔ̌buwɔ́bú ɖé kplé ɖo Jeluzalɛ́mu ɖo sun wegɔ́ ɔ́ mɛ, bó ná ɖu wɔ̌xúxú e mɛ è ma dó tɔ́n ǎ é sín xwe ɔ́. Yě mɛ e wá kplé lɛ́ɛ sukpɔ́ ɖésú.

¹⁴ Yě sí te bó gba vɔ̌sákpe e jí è nɔ sá vɔ̌ nú vodún ɖe ɖo Jeluzalɛ́mu lɛ́ɛ kpó éé jí è nɔ dó zǎlínkpɔ́n zo nú vodún ɖe lɛ́ɛ bǐ kpó, bó bɛ́ yě kɔn nyi Sedlɔ́n tɔdo ɔ́ mɛ.

¹⁵ Énɛ́ ɔ́ gúdo ɔ́, yě gbo gbe kanlin e è nǎ dó ɖu Dǐndínwáyixwe ɔ́ ná lɛ́ɛ ɖo sun wegɔ́ ɔ́ sín azǎn wǒ-ɛnɛgɔ́ ɔ́ gbe. Énɛ́ ɔ́, winnyá hu vɔ̌sánú-xwlémawutɔ́ lɛ́ɛ kpódó Levíi ví lɛ́ɛ kpó, bɔ yě slá wǔ nú yěɖée, bó sá vɔ̌ e è nɔ dó zo lɛ́ɛ ɖo Mawu Mavɔmavɔ xwé gbe.

¹⁶ Tɛn e mɛ yě nɔ́ nɔ ɖ'ayǐ ɔ́, é mɛ wɛ yě nɔ lě e ɖɛ̌mɛnu Mawu tɔn Mɔyízisɛ́n ɔ́ ɖɔ gbɔn é: Levíi ví lɛ́ɛ nɔ́ zé kanlin e è hu lɛ́ɛ sín hun nú vɔ̌sánú-xwlémawutɔ́ lɛ́ɛ, bɔ yě nɔ́ kɔn dó vɔ̌sákpe ɔ́ jí.

¹⁷ Mɛ gěgé ɖo togun ɔ́ mɛ, bó slá wǔ nú yěɖée ǎ, bɔ Levíi ví lɛ́ɛ gbɔ bó gbo gbe kanlin e è nǎ dǒ ɖu Dǐndínwáyixwe ɔ́ ná lɛ́ɛ nú mɛ e ma mɛ́ ǎ lɛ́ɛ bǐ, bó ná sɔ́ kanlin lɛ́ɛ ɖó vo nú Mawu Mavɔmavɔ.

¹⁸ Đó mɛ e ɖo togun ɔ́ mɛ bó má slá wǔ ǎ lɛ́ɛ sukpɔ́; ɖo tají ɔ́, mɛ e ɖo akɔta Eflayímu tɔn ɔ́ mɛ lɛ́ɛ, Manasée tɔn ɔ́ mɛ lɛ́ɛ, Isakáa tɔn ɔ́ mɛ lɛ́ɛ kpódó Zabulɔ́ɔn tɔn ɔ́ mɛ lɛ́ɛ kpó gěgé slá wǔ ǎ. Yě ɖu Dǐndínwáyixwe ɔ́; yě ká xwedó nǔ e è wlǎn dó sɛ́n ɔ́ mɛ ɖɔ è ɖǒ ná wa lɛ́ɛ dó ɖu ǎ. Énɛ́ ɔ́ wú wɛ Ezekiyási xo ɖɛ dó ta yětɔn mɛ ɖɔ:

¹⁹ “Mawu Mavɔmavɔ, Mawu tɔ́gbó mǐtɔn lɛ́ɛ tɔn, yě mɛ e ɖo gǎn dó wɛ kpó ayi yětɔn bǐ kpó, bó ná dó tunwun jlǒ towe lɛ́ɛ bǐ ɔ́, yě ná bó ma slá wǔ bó ɖo mǐmɛ́ jí ǎ hǔn, kɛnklɛ́n bó sɔ́ hwɛ yětɔn lɛ́ɛ kɛ yě ɖo xomɛnyínyɔ́ towe mɛ.”

²⁰ Énɛ́ ɔ́, Mawu Mavɔmavɔ ɖótó Ezekiyási bó sɔ́ dɔn tó nú togun ɔ́ ǎ.

²¹ Mɛ e kplé ɖo Jeluzalɛ́mu lɛ́ɛ bǐ ɖu wɔ̌xúxú e mɛ è ma dó tɔ́n ǎ é sín xwe ɔ́ kpó awǎjijɛ ɖaxó ɖé kpó, xɔ azǎn tɛ́nwe. Ayǐhɔ́ngbe ayǐhɔ́ngbe ɔ́, Levíi ví lɛ́ɛ kpó vɔ̌sánú-xwlémawutɔ́ lɛ́ɛ kpó nɔ́ ɖo susu kpa nú Mawu Mavɔmavɔ wɛ, kpó nǔxonú e ɖi gbe ganjí, bɔ è nɔ zán dó kpa susu nú Mawu Mavɔmavɔ lɛ́ɛ kpó.

²² Levíi ví e ɖo gbesisɔ mɛ, bó ɖo azɔ̌ wa nú Mawu Mavɔmavɔ wɛ kpó ayi yětɔn bǐ kpó lɛ́ɛ ɔ́, xó e Ezekiyási ɖɔ lɛ́ɛ xo ayi yětɔn zlɛ́. Yě ɖu kanlin e yě hu lɛ́ɛ xɔ azǎn tɛ́nwe, bó nɔ ɖo kɔnɖókpɔ́ vɔ́ lɛ́ɛ sá wɛ, bó nɔ́ ɖo susu kpa nú Mawu Mavɔmavɔ, Mawu tɔ́gbó yětɔn lɛ́ɛ tɔn wɛ.

²³ Kplékplé mɛ ɔ́ bǐ ɖó gbe kpɔ́, bó ɖɔ émí ná lɛ́ ɖu xwe ɔ́ nú azǎn tɛ́nwe. Bɔ yě lɛ̌ sɔ́ azǎn tɛ́nwe ɖěvo ɖó te dó ɖu xwe ɔ́ kpó awǎjijɛ kpó.

²⁴ Đó Ezekiyási Judáa xɔ́sú ɔ́ ná nyibúsú afatɔ́n (1.000), bó ná gbɔ̌ děgba ɖě afɔwó-afatɔ́n (7.000) kplékplé mɛ ɔ́. Azaglɔ́gán lɛ́ɛ ná nyibúsú afatɔ́n (1000), bó ná gbɔ̌ děgba we afɔwó (10.000). Vɔ̌sánú-xwlémawutɔ́ e slá wǔ lɛ́ɛ sukpɔ́ ɖésú.

²⁵ Énɛ́ ɔ́, mɛ e wá kplé ɖo Judáa lɛ́ɛ bǐ ɖo awǎjijɛ mɛ: vɔ̌sánú-xwlémawutɔ́ lɛ́ɛ, Levíi ví lɛ́ɛ, Judáanu lɛ́ɛ, mɛ e tɔ́n xwe ɔ́ gbé sín axɔ́súɖuto Taligbé tɔn lɛ́ɛ, Izlayɛ́linu e wá cí Judáa lɛ́ɛ.

²⁶ Yě j'awǎ ɖésú ɖo Jeluzalɛ́mu. Sín axɔ́sú Izlayɛ́li tɔn Salomɔ́ɔ Davídi ví ɔ́ hwenu ɔ́, mɛɖé sɔ́ j'awǎ mɔ̌hunkɔtɔn kpɔ́n gbeɖé ɖo Jeluzalɛ́mu ǎ.

²⁷ Ée yě ɖu xwe ɔ́ fó ɔ́, vɔ̌sánú-xwlémawutɔ́ Levíi ví lɛ́ɛ sí te bó xo ɖɛ dó togun ɔ́ jí. Mawu ɖótó yě, bɔ ɖɛ yětɔn hun káká yi sɛ́xwé, nɔtɛn mímɛ́ Mawu tɔn ɔ́.