2 Tan 27 - MAWUXÓWÉMA

Yotámu ɖu axɔ́sú

¹ Xwe koatɔ́n (25) wɛ Yotámu ɖó bó yi axɔ́súzinkpo jí ɖo Jeluzalɛ́mu, bó ɖu axɔ́sú nú xwe afɔtɔn-nukún-ɖokpó. È nɔ ylɔ́ nɔ tɔn ɖɔ Yeluca; Sadɔ́ku ví wɛ.

² Yotámu nɔ wa nǔ e nyɔ́ Mawu Mavɔmavɔ nukún mɛ é. Lě e tɔ́ tɔn Oziyási wa nǔ gbɔn ɔ́ wɛ é bló gbɔn pɛ́pɛ́pɛ́. Amɔ̌, é byɔ́ Mawu Mavɔmavɔ xwé gbe ǎ. Nǔ ka ɖo mɔ̌ có, togun ɔ́ lɛ́ kpo ɖo nǔ gblégblé wa wɛ.

³ Yotámu wɛ bló hɔntogbó aga tɔn e ɖo Mawu Mavɔmavɔ xwé ɔ́ nu ɔ́, bó gbá xɔ gěgé ɖó ahohó Ofɛ́lu slá tɔn ɔ́ jí.

⁴ É ɖó toxo ɖaxó gěgé ayǐ gbɔn sókan Judáa tɔn ɔ́ mɛ, bó sá xwé ɖé lɛ́ɛ, bó mɛ ahohó lɛ́ lɛ̌ dó, bó lɛ́ bló mɛcɔ́tɔ́xɔ ɖé lɛ́ɛ gbɔn atínkan ɖé lɛ́ɛ mɛ.

⁵ Yotámu fun ahwan xá Amumɔ́ɔ xɔ́sú ɔ́, bó ɖu ɖ'é jí. Xwe énɛ́ ɔ́ xwe ɔ́, Amumɔ́ɔ ví lɛ́ɛ ná nǔjɔ axɔ́sú ɔ́. Yě ná kpatágan tɔ́nu atɔn, blěe tɔ́nu afɔwó-afatɔ́n (3.000) kpódó ɔ́ji tɔ́nu afɔwó-afatɔ́n (3.000) kpó. Mɔ̌ wɛ yě lɛ́ ná ɛ xwe wegɔ́ ɔ́ mɛ, bó ná ɛ xwe atɔngɔ́ ɔ́ mɛ.

⁶ Yotámu sín acɛkpikpa nɔ ɖo syɛ́nsyɛ́n d'é jí wɛ, ɖó é nɔ́ zán gbɛ tɔn ɖó jlɔ̌jlɔ́ jí ɖo Mawu Mavɔmavɔ, Mawu tɔn nukɔn.

⁷ È wlǎn axɔ́sú Yotámu sín tan e kpo lɛ́ɛ, ahwan e é fun lɛ́ɛ bǐ kpó nǔ e é wa lɛ́ɛ kpó dó Izlayɛ́li xɔ́sú lɛ́ɛ kpódó Judáa xɔ́sú lɛ́ɛ kpó sín “Tan wéma” mɛ.

⁸ Xwe koatɔ́n (25) wɛ é ɖó bó yi axɔ́súzinkpo jí ɖo Jeluzalɛ́mu, bó ɖu axɔ́sú nú xwe afɔtɔn-nukún-ɖokpó.

⁹ Yotámu zán wá kú, bɔ è sɔ́ ɛ yi ɖó Davídi Toxo mɛ, bɔ vǐ tɔn Akázi ɖu axɔ́sú ɖó tɛn tɔn mɛ.