2 Tan 26 - MAWUXÓWÉMA

Oziyási ɖu axɔ́sú

¹ Judáa to ɔ́ bǐ zě Oziyási ɖó tɔ́ tɔn Amasiyasi tɛnmɛ. Xwe afɔtɔn-nukún-ɖokpó ɖó wɛ é ɖe hwenɛ́nu.

² Ée Oziyási tɔ́ kú ɔ́, é wɛ lɛ́ vɔ́ Eyilati toxo ɔ́ yí, bó blóɖó.

³ Xwe afɔtɔn-nukún-ɖokpó wɛ Oziyási ɖó, bó yi axɔ́súzinkpo Judáa tɔn jí ɖo Jeluzalɛ́mu. É ɖu axɔ́sú nú xwe kanɖé wěwe (52). Nɔ tɔn ɔ́, Jeluzalɛ́munu wɛ, bɔ è nɔ ylɔ́ ɛ ɖɔ Yekolia.

⁴ Oziyási nɔ wa nǔ e nyɔ́ Mawu Mavɔmavɔ nukún mɛ é tɔ́ tɔn Amasiyasi ɖɔhun.

Oziyási nɔ gbejí nú Mawu sɔ́yi ǎ

⁵ Hwenu e Zekaliyahu ɖo gbɛ, bó nɔ́ kplɔ́n sísí ɖó nú Mawu Oziyási ɔ́, Oziyási nɔ dó gǎn, bó nɔ́ wa Mawu Mavɔmavɔ sín jlǒ, bɔ Mawu nɔ bló bɔ é wa nǔɖé ɔ́, é nɔ́ mɔ nu tɔn.

⁶ Oziyási yi tɔ́n ahwan Filisitɛ́ɛn lɛ́ɛ, bó mu ahohó Gati tɔn, bó mu Yavunɛ́ tɔn, kpódó Acidɔ́di tɔn kpó. Énɛ́ ɔ́ gúdo ɔ́, é mɛ ahohó lɛ́ lɛ̌ dó toxo e gbɔn Acidɔ́di gbé jí lɛ́ɛ, bó lɛ́ mɛ lɛ́ lɛ̌ dó toxo e gbɔn Filisitɛ́ɛn lɛ́ɛ yíkúngban e kpo lɛ́ɛ jí.

⁷ Mawu gɔ́ alɔ n'i ɖo ahwan e é fun xá Filisitɛ́ɛn lɛ́ɛ, ée é fun xá Alabíinu Gǔu-Baalunu lɛ́ɛ kpó ée é fun xá Mɛwun lɛ́ɛ kpó é mɛ.

⁸ Mɛwun lɛ́ɛ lɔ nɔ ná nǔjɔ Oziyási. É ɖó acɛ ɖésú, énɛ́ ɔ́ zɔ́n bɔ nyǐkɔ tɔn gba kpé fí bǐ, káká yi Ejípu.

⁹ Oziyási mɛ tocɔ́kpe ɖé lɛ́ɛ ɖó Jeluzalɛ́mu; é mɛ ɖó Zwemɛhɔntogbó ɔ́ ta nu, bó mɛ ɖó tɔdo mɛ hɔn ɔ́ ta nu, bó lɛ́ mɛ ɖó fí e è nɔ ylɔ́ ɖɔ Zwemɛ é; é mɛ tocɔ́kpe lɛ́ɛ bɔ yě yi jǐ ganjí.

¹⁰ É lɛ́ mɛ tocɔ́kpe kɔn nyi gbětótló mɛ; é kun dotɔ gěgé, ɖó é ɖó kanlin gěgé ɖo tɔdo lɛ́ɛ mɛ bó ɖó ɖo ayǐkúngban wɛnjɛ lɛ́ɛ jí. É ɖó glesi lɛ́ɛ kpódó vǐwunglejíkpɔ́ntɔ́ lɛ́ɛ kpó, bɔ yě ɖo azɔ̌ wa n'i wɛ ɖo sókan lɛ́ɛ mɛ kpódó Kaamɛ́li gbé ɔ́ jí kpó, ɖó é yí wǎn nú gle.

¹¹ Oziyási ɖó ahwangɔnu ɖokpó; sɔ́ja tɔn lɛ́ɛ bǐ ɖo gbesisɔ mɛ bó ná fun ahwan. Wěgbójínɔtɔ́ Yeyiɛ́li kpó nǔjíkpɔ́ntɔ́ Maaseyahu kpó wɛ sɔ́ kɛ́n yětɔn. Ahwangán axɔ́sú ɔ́ tɔn ɖokpó nɔ́ nyí Hananiyahu; é wɛ nɔ kɛ́nsísɔ́ ɔ́ nu. Ahwanfuntɔ́ nabí e yě mɔ ɔ́ wɛ yě kpɔ́n, bó má yě ɖó sonu sonu.

¹² Hɛ̌nnugán afɔwó nǔwɔntɔn (2.600) wɛ ɖo ahwanfuntɔ́ syɛ́nsyɛ́n énɛ́ lɛ́ɛ nu.

¹³ Ahwanfuntɔ́ énɛ́ lɛ́ɛ bǐ bló gbɛtɔ́ adɔ̌kpo afɔtɔn děgba ɖě afɔtɛ́nwe kanwe ko (307.500). Yě dó hlɔ̌nhlɔ́n ganjí; yě bǐ ɖo gbesisɔ mɛ, bó ná fun ahwan xá axɔ́sú ɔ́ sín kɛntɔ́ lɛ́ɛ.

¹⁴ Yě xwe ahwan fun gbé hweɖěbǔnu ɔ́, axɔ́sú ɔ́ nɔ́ bɛ́ gǎglónú, hwǎn, gangbákún, ganwu, gǎ kpódó hwǎn e è nɔ zé dó klohwán mɛ ɔ́ kpó nú yě.

¹⁵ Oziyási zɔ́n nǔdówátɔ́ ɖé, bɔ é bló mɔ ɖé lɛ́ɛ ɖo Jeluzalɛ́mu. Mɔ énɛ́ lɛ́ɛ ɔ́, síngbó lɛ́ɛ jí kpó zwe lɛ́ɛ mɛ kpó wɛ è nɔ zé yě ɖó, bó nɔ dó da gǎ, abǐ nyi awǐnnya ɖaxó ɖaxó dó zɔ. Mawu gɔ́ alɔ nú Oziyási ɖésú, káká bɔ é sɔ́ acɛkpikpa tɔn jínjɔ́n ayǐ, bɔ nyǐkɔ tɔn gba kpé fí bǐ.

¹⁶ Lo ɔ́, ée acɛkpikpa tɔn jínjɔ́n ayǐ mɔ̌ ɔ́, é jɛ go yí jí, bó sɔ́ éɖée nyi gbě. É sɔ́ nɔ́ nɔ gbejí nú Mawu Mavɔmavɔ, Mawu tɔn ǎ. É wá jɛ gbe ɖokpó, bɔ é hun káká yi Mawu Mavɔmavɔ xwé gbe, bó jló ná dó zǎlínkpɔ́n zo ɖo vɔ̌sákpe jí.

¹⁷ Vɔ̌sánú-xwlémawutɔ́ ɖaxó Azalyahu ka kplá vɔ̌sánú-xwlémawutɔ́ e kpan akɔ́n ɔ́ kanwe (80), bó jɛ gǔdo tɔn.

¹⁸ Yě byɔ́ xwé ɔ́ gbe, bó húzú kpan nukɔn axɔ́sú Oziyási, bó ɖɔ n'i ɖɔ: “Axɔ́sú Oziyási, a ɖǒ acɛ e xwlé zǎlínkpɔ́n Mawu Mavɔmavɔ ɔ́ ǎ. Vɔ̌sánú-xwlémawutɔ́ Aalɔ́ɔn ví lɛ́ɛ wɛ ɖó acɛ énɛ́; yědɛɛ lɛ́ɛ wɛ è sɔ́ bɔ yě ná nɔ xwlé zǎlínkpɔ́n Mawu Mavɔmavɔ. Tɔ́n, ɖó a ɖo su ɖu wɛ! Đagbe ɖě ká ɖ'é mɛ nú we ɖo Mawu Mavɔmavɔ gɔ́n ǎ.”

¹⁹ Zǎlínkpɔ́nfyɔ́nú ká kó ɖo Oziyási lɔ mɛ hwenɛ́nu nɛ́. Ée vɔ̌sánú-xwlémawutɔ́ lɛ́ɛ ɖɔ mɔ̌ n'i ɔ́, é sin xomɛ dó yě. Hwenu e é sín xomɛ ɔ́, gudu tɔ́n ɖo nukɔngɛ́ngɛ́n tɔn jí, ɖo xwé ɔ́ gbe fínɛ́, ɖo vɔ̌sákpe e jí è nɔ dó zǎlínkpɔ́n zo ɖe ɔ́ kpá, ɖo vɔ̌sánú-xwlémawutɔ́ lɛ́ɛ bǐ nukún mɛ.

²⁰ Énɛ́ ɔ́, vɔ̌sánú-xwlémawutɔ́ ɖaxó Azalyahu kpódó vɔ̌sánú-xwlémawutɔ́ ɖě lɛ́ɛ kpó ɖo kpínkpɔ́n ɛ wɛ, bó mɔ ɖɔ gudu tɔ́n ɖo nukɔn tɔn, bó yá wǔ nya ɛ tɔ́n; é ɖésúnɔ ká mɔ ɖɔ Mawu Mavɔmavɔ sín alɔ ko jɛ émí wú, bó yá wǔ tɔ́n sín xwé ɔ́ gbe.

Oziyási sín axɔ́súɖuɖu fó

²¹ Axɔ́sú Oziyási bɛ́ azɔn baɖabaɖa ɖé: é bɛ́ gudu bɔ gudu ɔ́ nɔ wǔ tɔn mɔ̌ jɛ gbe e gbe é kú é. Hwenu e é ɖo azɔn ɔ́ jɛ wɛ ɔ́, è sɔ́ ɛ yi ɖó xwé ɖé gbe ɖo zɔ nú mɛ bǐ, bónú é ma lɛ́ kɔ wá Mawu Mavɔmavɔ xwé gbe ó. È sɔ́ vǐ tɔn Yotámu e kpa acɛ ɖo hɔnmɛ ɔ́ ɖó axɔ́súɖuto ɔ́ bǐ nu

²² Axɔ́sú Oziyási sín tan e kpo ɔ́, gbeyíɖɔ Mawu tɔn Ezayíi Amɔ̌si ví ɔ́ wlán sín fí e é bɛ́ sín ɔ́ káká yi fí e é fó dó é.

²³ Oziyási zán wá kú bɔ è sɔ́ ɛ yi ɖi dó kúxwé axɔ́sú lɛ́ɛ tɔn; è sɔ́ ɛ yi ɖó tɔ́gbó tɔn lɛ́ɛ sín yɔdo mɛ ǎ, ɖó gudu e é jɛ ɔ́ wú. Vǐ tɔn Yotámu ɖu axɔ́sú ɖó tɛn tɔn mɛ.