2 Tan 23 - MAWUXÓWÉMA

È sɔ́ Joasi axɔ́sú

¹ Atalíi yi zinkpo jí ɔ́, xwe tɔn tɛ́nwegɔ́ ɔ́ mɛ ɔ́, Yexoyada kpan akɔ́n bó jɛ akɔ xá sɔ́ja kanwekogán Azalyahu Yeloxámu ví ɔ́, Yicimayɛ́li Yexoxanáni ví ɔ́, Azalyahu Ovɛ́di ví ɔ́, Maaseyahu Adayahu ví ɔ́, kpódó Elicafáti Zikli ví ɔ́ kpó.

² Sɔ́ja kanwekogán énɛ́ lɛ́ɛ gbɔn Judáa to ɔ́ bǐ mɛ. Yě gbɔn Judáa toxo lɛ́ɛ ɖokpó ɖokpó mɛ, bó kplé Levíi ví lɛ́ɛ kpó hɛ̌nnugán e ɖo Izlayɛ́li lɛ́ɛ kpó, bó kplá yě wá Jeluzalɛ́mu.

³ Yě mɛ e wá kplé ɖo Mawu xwé gbe lɛ́ɛ bǐ jɛ akɔ dó lě e è nǎ sɔ́ axɔ́sú ɔ́ gbɔn ɔ́ tamɛ, bɔ Yexoyada ɖɔ nú yě ɖɔ: “Joasi axɔ́sú ví ɔ́ ɖíe; é wɛ ɖó ná ɖu axɔ́sú lě e Mawu Mavɔmavɔ ɖɔ gbɔn dó Davídi ví lɛ́ɛ wú é.

⁴ Nǔ e mi ná wa é ɖíe: Mi vɔ̌sánú-xwlémawutɔ́ kpódó Levíi ví e ɖo azɔ̌ ná wa wɛ gbɔjɛzán gbe lɛ́ɛ kpó ná má miɖée ɖó atɔn. Atɔnvlɔ́ɖó ɖó ná nɔ Mawu xwé ɔ́ sín hɔntogbó lɛ́ɛ jí.

⁵ Atɔnvlɔ́ɖó ná cɔ́ axɔ́sú ɔ́ sín hɔnmɛ, bɔ atɔnvlɔ́ɖó e kpo ɔ́ ná ɖo Dodó hɔn ɔ́ jí, bɔ togun ɔ́ bǐ ná ɖo Mawu Mavɔmavɔ xwé ɔ́ sín kɔ́xota lɛ́ɛ.

⁶ Mɛ ɖěbǔ ní má byɔ́ xɔ ɔ́ mɛ zɛ vɔ̌sánú-xwlémawutɔ́ kpó Levíi ví e ɖo azɔ̌ ná wa wɛ lɛ́ɛ kpó wú ó. Yědɛɛ lɛ́ɛ ná byɔ́ mɛ, ɖó è ko ɖe yě ɖó vo nú azɔ̌ énɛ́ ɔ́. Togun ɔ́ bǐ ká ɖó ná xwedó sɛ́n e Mawu Mavɔmavɔ dó ɔ́, bó ná nɔ kɔ́xo.

⁷ Levíi ví ɖě lɛ́ɛ ná hɛn ahwanfunnú yětɔn alɔ mɛ, bó ná lɛ́ lɛ̌ dó axɔ́sú ɔ́. Axɔ́sú ɔ́ sɛ afɔ ɔ́, yě lɔ ná nɔ́ sɛ. Mɛ ɖěbǔ byɔ́ xwé ɔ́ gbe ɔ́, è nǎ hu i.”

⁸ Levíi ví lɛ́ɛ kpódó Judáanu lɛ́ɛ bǐ kpó bló lě e vɔ̌sánú-xwlémawutɔ́ Yexoyada ɖɔ gbɔn é. Mɛ ɖokpó ɖokpó sɛ mɛ tɔn lɛ́ɛ kplé, mɛ e ɖo azɔ̌ ná wa wɛ gbɔjɛzán gbe lɛ́ɛ kpó mɛ e ɖo te jɛ wɛ lɛ́ɛ kpó. Yexoyada jó mɛ ɖěbǔ dó ǎ.

⁹ Yexoyada bɛ́ hwǎn kpó gǎglónú tɛnmɛ tɛnmɛ kpó jó nú sɔ́ja kanwekogán lɛ́ɛ. Axɔ́sú Davídi tɔn wɛ nyí ahwanfunnú énɛ́ lɛ́ɛ, bɔ è bɛ̌ yi ɖó Mawu xwé gbe.

¹⁰ É to sɔ́ja lɛ́ɛ, bɔ ahwanlyánnú yětɔn lɛ́ɛ ɖo alɔ yětɔn mɛ; yě to lɛ́ lɛ̌ dó axɔ́sú ɔ́, bɛ́ sín sinsɛnxɔ ɔ́ sín ɖisíxwé káká yi amyɔxwé, ɖo xɔ ɔ́ kpó vɔ̌sákpe ɔ́ kpó nukɔn, bó nɔ́ cɔ́ axɔ́sú ɔ́.

¹¹ È kplá axɔ́ví Joasi wá, lobo zé tablá ɖokpó kpó sɛ́nwéma ɔ́ kpó jó n'i, bɔ Yexoyada kpó vǐ tɔn lɛ́ɛ kpó kɔn ami ɖó ta n'i, bó sɔ́ ɛ axɔ́sú, bó jɛ xó sú jí ɖɔ: “Susu nú axɔ́sú ɔ́!”

¹² Ée mɛ lɛ́ɛ ɖo wezun kán wɛ, bó ɖo susu kpa nú axɔ́sú ɔ́ wɛ bɔ Atalíi se ɔ́, é wá mɔ yě ɖo Mawu Mavɔmavɔ xwé gbe.

¹³ Ée é wá ɔ́, é mɔ axɔ́sú yɔ̌yɔ́ e è sɔ́ ɔ́ ɖo te ɖo dotín ɔ́ wú, ɖo hɔntogbó ɔ́ kpá. Ahwangán lɛ́ɛ kpó kpɛnkúntɔ́ lɛ́ɛ kpó ɖo te akpá tɔn. Togun ɔ́ bǐ ɖo awǎ jɛ wɛ, kpɛnkúntɔ́ lɛ́ɛ ɖo kpɛn kún wɛ. Nǔxotɔ́ lɛ́ɛ ɖo nǔ xo dó susu e kpa nú axɔ́sú ɔ́ wɛ è ɖe lɛ́ɛ mɛ. Ée Atalíi mɔ mɔ̌ é ɔ́, é vún awu dó kɔ nú éɖée, bó ɖɔ: “Ahizi nɛ́! Ahizi nɛ́!”

¹⁴ Ée é ɖɔ mɔ̌ ɔ́, vɔ̌sánú-xwlémawutɔ́ Yexoyada ylɔ́ sɔ́jakanwekogán e ɖo ahwangɔnu ɔ́ nu lɛ́ɛ wá, bó ɖɔ nú yě ɖɔ: “Mi ɖe nyɔ̌nu nɛ́ tɔ́n sín mɛ mɛ; mɛ ɖé xwedó e hǔn, mi hu mɛ ɔ́.” Yexoyada ɖɔ mɔ̌, ɖó é ba ɖɔ è nǐ hu i ɖo Mawu Mavɔmavɔ xwé gbe ǎ.

¹⁵ Ée é ɖɔ mɔ̌ ɔ́, yě dɔn ɛ gbɔn Sɔ́ lɛ́ɛ sín Hɔntogbó nu byɔ́ hɔn ɔ́ mɛ, bó hu i ɖo fínɛ́.

¹⁶ Yexoyada dɔn axɔ́sú ɔ́ kpó togun ɔ́ kpó, bɔ é kpó yě bǐ kpó jɛ akɔ xá Mawu Mavɔmavɔ, bó ná nyí togun Mawu Mavɔmavɔ tɔn.

¹⁷ Bɔ togun ɔ́ bǐ sɔ́ nǔ, bó yi kíjá xwé Baalu tɔn ɔ́ bǐ. Yě gba vɔ̌sákpe lɛ́ɛ kpó bǒcyɔ lɛ́ɛ kpó, lobo lɛ́ hu Matáni. Nya énɛ́ ɔ́ vodún Baalunɔ wɛ; yě hu i nyi vɔ̌sákpe lɛ́ɛ nukɔn.

¹⁸ Énɛ́ ɔ́ gúdo ɔ́, Yexoyada ɖe Levíi ví vɔ̌sánú-xwlémawutɔ́ lɛ́ɛ, bɔ yě ná nɔ́ cɔ́ Mawu Mavɔmavɔ xwé ɔ́. Davídi wɛ ko má yě mɛ énɛ́ lɛ́ɛ dó Mawu Mavɔmavɔ xwé gbe, bónú yě ná nɔ xwlé vɔ̌sánú e è nɔ dó zo lɛ́ɛ Mawu Mavɔmavɔ ɖo Mawu Mavɔmavɔ xwé ɔ́ gbe, lě e é ɖe gbɔn ɖo Mɔyízisɛ́n ɔ́ mɛ é. É kó ɖɔ nú yě ɖɔ yě ní nɔ́ wa azɔ̌ énɛ́ lɛ́ɛ kpó awǎjijɛ sín han lɛ́ɛ kpó.

¹⁹ Yexoyada zé hɔnjínɔtɔ́ lɛ́ɛ ɖó Mawu Mavɔmavɔ xwé ɔ́ sín hɔntogbó lɛ́ɛ jí, bónú mɛ e wa nǔblíblí lɛ́ɛ ɖokpó ní má byɔ́ xwé ɔ́ gbe ó.

²⁰ Yexoyada lɛ́ kplé sɔ́ja kanwekogán lɛ́ɛ, tonukún lɛ́ɛ, gǎn lɛ́ɛ kpódó togun ɔ́ bǐ kpó, bɔ yě kplá axɔ́sú ɔ́ tɔ́n sín Mawu Mavɔmavɔ xwé ɔ́ gbe. Yě gbɔn hɔntogbó ɖaxó ɔ́ nu byɔ́ hɔn ɔ́ mɛ. Énɛ́ ɔ́, è sɔ́ Joasi jínjɔ́n axɔ́súzinkpo ɔ́ jí.

²¹ Togun ɔ́ bǐ jɛ awǎ jɛ jí. Ée è hu Atalíi ɖo hɔnmɛ é ɔ́, to ɔ́ vo.