2 Tan 20 - MAWUXÓWÉMA

È tɔ́n ahwan axɔ́súɖuto Judáa tɔn ɔ́

¹ Énɛ́ ɔ́ gúdo ɔ́, Mɔwabunu lɛ́ɛ, Amumɔ́ɔ ví lɛ́ɛ kpódó Mɛwun lɛ́ɛ kpó yi tɔ́n ahwan Jozafáti.

² Bɔ è wǎ ɖɔ nú Jozafáti ɖɔ: “Ahwangɔnu tobutóbú ɖé gosín Xu Kúkú ɔ́ sín awa jí, ɖo Edɔ́mu yíkúngban jí, bó jǎwe. Hasasɔ́ni-Tamáa wɛ yě ɖe din.” Hasasɔ́ni-Tamáa wɛ nyí Eyinu-Gɛdi.

³ Ée Jozafáti se mɔ̌ ɔ́, ado hu i, bɔ é ɖɔ émí ná kan nǔ byɔ́ Mawu Mavɔmavɔ. Énɛ́ ɔ́, é ɖɔ bɔ mɛ bǐ ná blá nu gbɔn axɔ́súɖuto Judáa tɔn ɔ́ bǐ mɛ.

⁴ Judáanu lɛ́ɛ gosín toxo e ɖo to ɔ́ mɛ lɛ́ɛ bǐ mɛ, bó wá kplé, bó ná byɔ́ alɔdó Mawu Mavɔmavɔ tɔn.

⁵ Ée yě wá kplé ɔ́, Jozafáti sí te, bó kpan nukɔn kɔ́xota yɔ̌yɔ́ e ɖo Mawu xwé gbe ɔ́, bɔ Jeluzalɛ́munu lɛ́ɛ kpódó Judáanu ɖě lɛ́ɛ kpó lɛ́ dó e.

⁶ Énɛ́ ɔ́, é xo ɖɛ bó ɖɔ: “Mawu Mavɔmavɔ, Mawu tɔ́gbó mǐtɔn lɛ́ɛ tɔn e, hwi wɛ ɖu axɔ́sú ɖo jǐnukúnsin. Hwi wɛ kpa acɛ dó axɔ́súɖuto e ɖo gbɛ ɔ́ mɛ lɛ́ɛ bǐ nu. Hwi wɛ ɖó acɛ bó kpé nǔ bǐ wú, bɔ mɛ ɖěbǔ nɔ sixú nɔ te ɖo nukɔn towe ǎ.

⁷ Mawu mǐtɔn, hwenu e togun towe Izlayɛ́li jǎwe to mɛ fí ɔ́, hwi wɛ yí to ɔ́ sín toví lɛ́ɛ sí, bó zé ná xɔ́ntɔn towe Ablaxámu ví lɛ́ɛ, bɔ é nyí yětɔn káká sɔ́yi.

⁸ Yě nɔ to ɔ́ mɛ fí, bó sá xwé nú we, bó ɖɔ:

⁹ ‘Ényí awě ɖé xo mǐ ɔ́: ahwan wɛ tɔ́n mǐ oo, tó wɛ è dɔn nú mǐ oo, jɛmɛjí abǐ adɔ wɛ tɔ́n oo, mǐ ná nɔ wá gɔ̌n towe ɖo xwé élɔ́ gbe, ɖó nyǐkɔ towe wɛ ɖo xwé ɔ́ jí. Mǐ ná sú xó ylɔ́ we ɖo adǎngbomɛ hwenu, bɔ a nǎ se, bó ná hwlɛ́n mǐ gán.’

¹⁰ Din ɔ́, kpɔ́n! Amumɔ́ɔ ví lɛ́ɛ, Mɔwabunu lɛ́ɛ kpódó Seyíi sókanmɛnu lɛ́ɛ kpó ɖíe tɔ́n ahwan mǐ e. Hwenu e tɔ́gbó mǐtɔn lɛ́ɛ ká gosín Ejípu ɔ́, a gbɛ̌ nú yě ɖɔ yě ní má gbɔn toxo énɛ́ lɛ́ɛ sín ayǐkúngban jí ó, bɔ tɔ́gbó mǐtɔn lɛ́ɛ kpa kɛ́n nú yě, bó vívá kún yětɔn ǎ.

¹¹ Đagbe e yědɛɛ lɛ́ɛ ka mɔ, bó ná wa nú mǐ égbé din ɔ́ wɛ nyí ɖɔ yě wǎ, bó ná nya mǐ sín ayǐkúngban e a nǎ mǐ ɔ́ jí.

¹² Mawu mǐtɔn, a nǎ dɔn tó nú yě ǎ wɛ a? Đó mǐ kpé nǔ ɖěbǔ wú ɖo ahwan wɔ̌buwɔ́bú énɛ́ e jǎwe ahwan tɔ́n mǐ gbé ɔ́ nukɔn ǎ. Mǐ ká tunwun nǔ e mǐ ná wa ɔ́ ǎ. Amɔ̌, mǐ ɖo nukún ɖó we wɛ ɖɔ a nǎ hwlɛ́n mǐ gán.”

¹³ Judáanu lɛ́ɛ bǐ ɖo te fínɛ́ ɖo Mawu Mavɔmavɔ xwé ɔ́ nukɔn, yě kpó asi yětɔn lɛ́ɛ kpó vǐ yětɔn lɛ́ɛ kpó.

Mawu bló bɔ Judáanu lɛ́ɛ ɖuɖéjí

¹⁴ Énɛ́ ɔ́, yɛ Mawu Mavɔmavɔ tɔn wá Yaxaziɛ́li jí ɖo agun ɔ́ mɛ. Yaxaziɛ́li ɔ́, Zekaliyahu ví wɛ é nyí, bó nyí Benaya vívú, bó nyí Yeyiɛ́li vívú vivu, bó nyí Mataniya vitikli, bó nyí Levíi ví, bó jɔ ɖo Asáfu kún mɛ.

¹⁵ Ée yɛ ɔ́ wá Yaxaziɛ́li jí mɔ̌ ɔ́, é ɖɔ: “Judáanu e mi, Jeluzalɛ́munu e mi, mi ɖótó mì; axɔ́sú Jozafáti, hwi lɔ ní ɖótó mì. Mi ɖótó xó e Mawu Mavɔmavɔ ɖo ɖiɖɔ nú mi wɛ é; é ɖɔ: ‘Mi ma ɖi xɛsi ó, ado ní má hu mi ɖo ahwan wɔ̌buwɔ́bú e jǎwe ɔ́ nukɔn ó, ɖó ahwan énɛ́ ɔ́, mi wɛ ɖo nǎ fun wɛ ǎ, nyɛ Mawu wɛ ɖo nǎ fun wɛ.

¹⁶ É jɛ sɔ ɔ́, mi ná wlí ali bo ná yi mɔ kɛntɔ́ mitɔn lɛ́ɛ. Yě ná gbɔn Tisi kpó ɔ́ jí wá, mi ná mɔ yě ɖo tɔdo ɔ́ tó, ɖo gbětótló Yeluɛli tɔn ɔ́ nukɔn.

¹⁷ Midɛɛ lɛ́ɛ wɛ xwe ahwan fun xá yě gbé ɖo fínɛ́ ǎ. Judáanu e mi, Jeluzalɛ́munu e mi, mi cí fínɛ́ kpowun, mi ma sɛ tɛn ó, bó ná kpɔ́n lě e un ná hwlɛ́n mi gán gbɔn é. Mi ma ɖi xɛsi ó, ado ní ma hu mi ó. É jɛ sɔ ɔ́, mi ná tɔ́n bó yi kpé yě. Nyɛ Mawu Mavɔmavɔ ká ná nɔ kpɔ́ xá mi.’ ”

¹⁸ Ée Yaxaziɛ́li ɖɔ mɔ̌ ɔ́, Jozafáti xwe agbɔ̌nnusú do, bɔ Jeluzalɛ́munu lɛ́ɛ bǐ kpó Judáanu ɖě lɛ́ɛ bǐ kpó jɛ kpo bó ɖe kɔ́ nú Mawu Mavɔmavɔ, lobo sɛn ɛ.

¹⁹ Levíi ví e ɖo Kexáti ví lɛ́ɛ kpó Kolée ví lɛ́ɛ kpó mɛ lɛ́ɛ sí te, bó sú xó, bó kpa susu nú Mawu Mavɔmavɔ, Mawu Izlayɛ́li tɔn ɔ́ kpó awǒbóbó kpó.

²⁰ Ayǐhɔ́ngbe tɔn zǎnzǎn tɛɛn ɔ́, yě bǐ jɛ ali ɖidó Tekowa sín gbětótló ɔ́ mɛ. Hwenu e yě jló ná jɛ ali ɔ́, Jozafáti wá ɖɔ nú yě ɖɔ: “Judáanu e mi, Jeluzalɛ́munu e mi, mi ɖótó mì. Mi ɖeji dó Mawu Mavɔmavɔ, Mawu mitɔn wú; énɛ́ ɔ́, é ná dó wǔsyɛ́n lanmɛ nú mi. Mi ɖeji dó gbeyíɖɔ tɔn lɛ́ɛ wú; énɛ́ ɔ́, mi ná ɖuɖéjí.”

²¹ Jozafáti ɖɔ xá togun ɔ́, bó ɖe yě mɛ e ná ji han lɛ́ɛ, bɔ yě fɔ awu e è nɔ zán ɖo Mawu Mavɔmavɔ xwé gbe lɛ́ɛ, bó jɛ ahwangɔnu ɔ́ nukɔn, lobo ɖo Mawu Mavɔmavɔ sɔ́ su wɛ dó han mɛ ɖɔ: “Mi kpa susu nú Mawu Mavɔmavɔ, ɖó wǎn yíyí tɔn ɖó dogbó ǎ.”

²² Hwenu e yě dó han bo ɖo susu kpa nú Mawu Mavɔmavɔ wɛ ɔ́, Mawu Mavɔmavɔ dó kíjá Amumɔ́ɔ ví lɛ́ɛ, Mɔwabunu lɛ́ɛ, kpódó Seyíi sókanmɛnu lɛ́ɛ kpó mɛ, bɔ yě jɛ yěɖée hu jí.

²³ Amumɔ́ɔ ví lɛ́ɛ kpó Mɔwabunu lɛ́ɛ kpó byɔ́ Seyíi sókanmɛnu lɛ́ɛ mɛ, bó hu yě bǐ; mɛ ɖokpó kpo ǎ. Énɛ́ ɔ́ gúdo ɔ́, yě húzú kpan nukɔn yěɖée, bó jɛ yěɖée hu jí.

²⁴ Ée Judáanu lɛ́ɛ wá jɛ fí e è nɔ mɔ gbětótló ɔ́ sɛ́ dó ɖe ɔ́, bó ná zé kɔ kpowun ɔ́, kɛntɔ́ yětɔn lɛ́ɛ sín cyɔ jɛ́n yě mɔ ɖo títɛ́ kpaɖaɖa. Mɛ ɖěbǔ ɖo gbɛ ǎ.

²⁵ Jozafáti kpó mɛ tɔn lɛ́ɛ kpó yi bɛ́ nǔ yětɔn lɛ́ɛ. Yě mɔ kanlin, dɔkun, awu kpó nǔ xɔ akwɛ́ tɛnmɛ tɛnmɛ lɛ́ɛ kpó kpɔ́ gégé. Nǔ lɛ́ɛ sukpɔ́, bɔ yě ɖo bǐbɛ́ wɛ káká nú azǎn atɔn, cóbɔ é lɛ́ kpo.

²⁶ Azǎn ɛnɛgɔ́ ɔ́ gbe ɔ́, yě kplé ɖo Belaka tɔdo ɔ́ mɛ. È kpo ɖo tɛn énɛ́ ɔ́ mɛ ylɔ́ ɖɔ “Belaka tɔdo” wɛ káká jɛ égbé, ɖó fínɛ́ wɛ yě dó kú nú Mawu Mavɔmavɔ ɖe .

²⁷ Jozafáti zɔn Jeluzalɛ́munu lɛ́ɛ kpó Judáanu ɖě lɛ́ɛ kpó nu, bɔ yě bǐ lɛ́ kɔ ɖidó Jeluzalɛ́mu kpó awǎjijɛ kpó, ɖó Mawu Mavɔmavɔ hwlɛ́n yě sín kɛntɔ́ yětɔn lɛ́ɛ sí, bó dó dó xomɛhunhun ɖaxó ɖé nú yě.

²⁸ Yě byɔ́ Jeluzalɛ́mu toxo ɔ́ mɛ, bɔ hǔn kpó agǐdigbo kpó, kpódó kpɛn kpó ɖo gbe jɛ wɛ, bɔ yě ɖo xixo wɛ káká yi Mawu Mavɔmavɔ xwé gbe.

²⁹ Axɔ́súɖuto ɖě lɛ́ɛ bǐ se lě e Mawu Mavɔmavɔ fun ahwan xá Izlayɛ́li kɛntɔ́ lɛ́ɛ gbɔn é, bó jɛ xɛsi ɖi nú Mawu Mavɔmavɔ jí.

³⁰ Énɛ́ ɔ́, axɔ́súɖuto Jozafáti tɔn ɔ́ mɔ agbɔ̌n, ɖó Mawu tɔn ná ɛ ayij'ayǐ gbɔn fí bǐ.

Axɔ́súɖuɖu Jozafáti tɔn fó

³¹ Xwe gbantɔ́n (35) wɛ Jozafáti ɖó hwenu e é yi axɔ́súzinkpo jí ɖo Jeluzalɛ́mu é. É ɖu axɔ́sú nú xwe koatɔ́n (25), bó nɔ́ nɔ Jeluzalɛ́mu. Nɔ tɔn nɔ nyí Azuva; Ciluxi ví wɛ.

³² É zán gbɛ jlɔ́jlɔ́ tɔ́ tɔn Asa ɖɔhun. É nɔ wa nǔ e sɔgbe ɖo Mawu Mavɔmavɔ nukún mɛ é. É lɛ́ kɔ sín nǔ e tɔ́ ɔ́ nɔ́ wa lɛ́ɛ ɖěbǔ gúdo ǎ.

³³ Nǔ ka ɖo mɔ̌ có, é gba vodún xwé lɛ́ɛ ǎ; énɛ́ ɔ́ zɔ́n bɔ togun ɔ́ sín ayi bǐ ɖo Mawu tɔ́gbó yětɔn lɛ́ɛ tɔn wú ǎ.

³⁴ Axɔ́sú Jozafáti sín tan e kpo ɔ́, è wlǎn, sín fí e é bɛ́ sín ɔ́ káká yi fí e é fó dó ɔ́, dó Tan wéma Jehu Hanáni ví ɔ́ tɔn mɛ. Wěma énɛ́ ɔ́ ɖo “Izlayɛ́li xɔ́sú lɛ́ɛ sín wěma” mɛ.

³⁵ Énɛ́ ɔ́ gúdo ɔ́, Judáa xɔ́sú Jozafáti dó Izlayɛ́li xɔ́sú Akaziasi sín gbɛ̌. Axɔ́sú énɛ́ ɔ́ ka nɔ́ zán gbɛ ɖagbe ǎ.

³⁶ Yě ɖó gbe kpɔ́, bó bló tɔjíhún e nɔ́ yi to línlín mɛ lɛ́ɛ. Tɔjíhúnglíntɛn Esiɔ́ni-Gevɛ́ɛ wɛ yě bló tɔjíhún lɛ́ɛ ɖe.

³⁷ Lo ɔ́, gbeyíɖɔ Mawu tɔn Eliezɛ́ɛ, Dodawahu, Malecanu ɔ́ ɖɔ nú Jozafáti ɖɔ: “A dǒ Akaziasi gbɛ́; énɛ́ wú ɔ́, Mawu Mavɔmavɔ ná hɛn azɔ̌ e a wa ɔ́ gblé.” Nǔgbó ɔ́, tɔjíhún lɛ́ɛ sixú yi tomɛ ǎ; yě bǐ gba.