2 Tan 2 - MAWUXÓWÉMA

¹ Salomɔ́ɔ cyán súnnu adɔ̌kpo atɔn děgba we afɔwó (70.000), bɔ yě ná nɔ́ bɛ́ agban. É lɛ́ cyán súnnu adɔ̌kpo ɛnɛ (80.000), bɔ yědɛɛ lɛ́ɛ ná nɔ kpa awǐnnya ɖo sókan mɛ. É lɛ́ cyán súnnu afɔwó-afatɔ́n nǔwɔntɔn (3.600) jɛjí, bɔ yě ná nɔ azɔ̌ lɛ́ɛ nu.

² É sɛ́ mɛ dó axɔ́sú Tíi tɔn Ilámu gɔ́n, nú yě ní yi ɖɔ n'i ɖɔ: “A nǎ sɛ́dlutín tɔ́ ce Davídi bɔ é dó gbá xwé tɔn ná. Blǒ mɔ̌ nú nyi lɔmɔ̌.

³ Un ɖo nǔ sɔ́ wɛ, bó ná sá xwé ɖokpó nú Mawu Mavɔmavɔ, Mawu ce; un ná sɔ́ xwé ɔ́ ɖó vo n'i; è nǎ nɔ́ dó zǎlínkpɔ́n zo n'i ɖo xwé ɔ́ gbe; wɔ̌xúxú e è nɔ to ɖě ɖó ɖě jí tɛgbɛ tɛgbɛ lɛ́ɛ ɔ́, è nǎ nɔ́ xwlé e ɖo xwé ɔ́ gbe; è nǎ nɔ́ sá vɔ̌ e è nɔ dó zo ɔ́ zǎnzǎn gbada ɖo xwé ɔ́ gbe. È nǎ nɔ́ sá vɔ̌ e è nɔ dó zo ɔ́ gbɔjɛzán lɛ́ɛ gbe, bó ná nɔ́ sá gbe e gbe sun wá jǐ é kpó Mawu Mavɔmavɔ, Mawu mǐtɔn sín xwezán ɖě lɛ́ɛ gbe kpó. Izlayɛ́li ví lɛ́ɛ kpo ɖo walɔ énɛ́ lɛ́ɛ zán wɛ káká jɛ égbé.

⁴ Xɔ e gbá gbé un ja ɔ́ ɖó ná sɔ́ avɔ, ɖó Mawu mǐtɔn kló hú vodún lɛ́ɛ bǐ.

⁵ È ka ná ɖɔ lɔ ɔ́, mɛɖé sixú bló nɔtɛn nú Mawu ǎ. Đó jǐnukúnsin d'agba sɔ mɔ̌ có, é sixú hɛn ɛ ǎ. Nyɛ ɖésúnɔ ɔ́, un sixú glá ɖɔ un ná bló nɔtɛn n'i ǎ. Nǔ ɖokpó e un jló ná bló kpowun ɔ́ wɛ nyí fí e è nǎ nɔ́ sɛn ɛ ɖe, bó ná nɔ́ sá vɔ̌ n'i ɖe é.

⁶ Din ɔ́, sɛ́ mɛ e nyɔ́ siká kpó kpatágan kpó, ganvɔ kpó gan kpó sín azɔ̌ wa ganjí é ɖokpó dó mì. Mɛ ɔ́ ná lɛ́ nyɔ́ avɔ vɔvɔ, avɔ vɔvɔ cɛ́cɛ́, kpó avɔ kwélesinnɔ kpó sín azɔ̌ wa ganjí, bó ká ná lɛ́ tunwun lě e è nɔ kun nǔ dó nǔ mɛ gbɔn ɔ́ ganjí. É ná wá gɔ́ nú azɔ̌watɔ́ ce e alɔnu yětɔn mɛ́ ganjí, bɔ daá ce ko cyán ɖ'ayǐ nú mì lɛ́ɛ, bɔ yě ná wa azɔ̌; yě mɛ ɖě ɖo Jeluzalɛ́mu toxo mɛ ɖo Judáa, abǐ Judáa toxo ɖěvo mɛ.

⁷ Sɛ́ sɛ́dlutín kpó siplɛ́tín kpó santálutín kpó dó mì sín Libáan sókan mɛ. Đó un tunwun ɖɔ mɛsɛntɔ́ towe lɛ́ɛ nyɔ́ Libáan sín atín lɛ́ɛ gbo. Mɛsɛntɔ́ ce lɛ́ɛ ná wá gɔ́ alɔ nú yě,

⁸ bɔ yě ná gbo atín nú mì, bɔ é ná sukpɔ́ ɖésú, ɖó xwé e un jló ná sá ɔ́ ná sɔ́ avɔ, bó ná nyɔ́ ɖɛkpɛ ganjí.

⁹ Nyɛ ɔ́, un ná ná linfín tɔ́nu děgba ɖě afɔwó (6.000), ɔ́ji tɔ́nu děgba ɖě afɔwó (6.000), vɛ̌ɛn lǐtli adɔ̌kpo kanɖé (800.000), kpódó ami lǐtli adɔ̌kpo kanɖé (800.000) kpó mɛsɛntɔ́ towe e ná gbo atín lɛ́ɛ.”

¹⁰ Ée Tíi xɔ́sú Ilámu se mɔ̌ ɔ́, é wlán wěma sɛ́ dó Salomɔ́ɔ, bó ɖɔ n'i ɖɔ: “Mawu Mavɔmavɔ yí wǎn nú togun tɔn wú wɛ é sɔ́ we axɔ́sú ɖó yě nu.

¹¹ È ɖǒ ná dó kú nú Mawu Mavɔmavɔ, Mawu Izlayɛ́li tɔn; é mɛ e ɖó jǐnukúnsin kpódó ayǐkúngban kpó é; é ná vǐ súnnu ɖokpó Davídi, bɔ nǔnywɛ́ kpé e, ayixa tɔn sɔgbe, é bǐ ganjí. É hɛn ɔ́, é ná sá xwé nú Mawu Mavɔmavɔ, bó ná sá xwé é ɖésúnɔ tɔn.

¹² Din ɔ́, un sɛ́ mɛ e tunwun azɔ̌ ganjí, bɔ alɔnu tɔn mɛ́ ganjí ɔ́ ɖokpó dó we.

¹³ É nɔ́ nyí Ilámu-Abíi, tɔ́ tɔn nyí Tíinu, bɔ nɔ tɔn jɔ ɖo Dan sín akɔta mɛ. É nyɔ́ siká kpó kpatágan kpó, ganvɔ kpó gan kpó, awǐnnya kpódó atín kpó sín azɔ̌ wa ganjí. É lɛ́ nyɔ́ avɔ vɔvɔ, avɔ kwélesinnɔ, abǐ avɔ vɔvɔ cɛ́cɛ́ sín azɔ̌ wa ganjí. É lɛ́ nyɔ́ la sín azɔ̌ wa ganjí. É lɛ́ tunwun lě e è nɔ kun nǔ dó nǔ mɛ gbɔn é ganjí. È zě azɔ̌ ɖěbǔ dó así n'i ɔ́, é nɔ́ tunwun lě e é ná bló gbɔn bɔ é ná nyɔ́ é. É ná wá gɔ́ nú azɔ̌watɔ́ towe e alɔ yětɔn nu mɛ́ ganjí lɛ́ɛ, kpódó ée daá towe axɔ́sú Davídi ko cyán ɖ'ayǐ lɛ́ɛ kpó, bɔ yě ná wa azɔ̌.

¹⁴ Din ɔ́, sɛ́ blěe, ɔ́ji, ami kpó vɛ̌ɛn kpó e xó a ɖɔ ɔ́ dó mǐ.

¹⁵ Mǐ ná gbo atín e ba wɛ a ɖe ɖo Libáan lɛ́ɛ bǐ nú we. Mǐ ná to yě, bɔ yě ná gbɔn xu jí káká wá Jafa, bɔ a nǎ bɛ̌ yě sín fínɛ́ yi Jeluzalɛ́mu.”

¹⁶ Salomɔ́ɔ xa jǒnɔ nabí e ɖo Izlayɛ́li, bɔ tɔ́ tɔn Davídi ko sɔ́ kɛ́n yětɔn ɖ'ayǐ lɛ́ɛ bǐ, bó mɔ gbɛtɔ́ adɔ̌kpo tɛ́nwe děgba atɔn afɔtántɔn (153.600).

¹⁷ É ɖe gbɛtɔ́ adɔ̌kpo atɔn děgba we afɔwó (70.000), bɔ yě ná nɔ́ bɛ́ agban. É ɖe gbɛtɔ́ adɔ̌kpo ɛnɛ (80.000), bɔ yě ná nɔ kpa awǐnnya ɖo sókan mɛ, bó ɖe gbɛtɔ́ afɔwó-afɔtántɔn (3.600), bɔ yě ná nɔ azɔ̌ lɛ́ɛ nu, bɔ mɛ bǐ ná wa azɔ̌.