2 Tan 18 - MAWUXÓWÉMA

Jozafáti jɛ akɔ xá Izlayɛ́li xɔ́sú Akábu

¹ Axɔ́sú Jozafáti jɛ dɔkun bó xɔ susu bɔ é vɛ́ jlɛ́. É byɔ́ axɔ́sú Akábu sín vǐ nú vǐ tɔn bɔ hɛ̌nnu we lɛ́ɛ jɛ akɔ.

² Ée yě jɛ akɔ énɛ́ ɔ́, é bló xwe ɖé ǎ, bɔ é yi Akábu gɔ́n ɖo Samalíi, bɔ Akábu hu gbɔ̌ kpódó nyibú kpó kɔn nyi kpɔ́, bó dó yí é kpódó mɛ e xwedó e wá lɛ́ɛ kpó sín jǒnɔ. Énɛ́ ɔ́ gúdo ɔ́, é ɖɔ nú Jozafáti ɖɔ émí jló ɖɔ émí kpódó é kpó ná yi tɔ́n ahwan Hlamɔti toxo ɔ́ ɖo Galadi.

³ Akábu kanbyɔ́ Jozafáti ɖɔ: “A ma ná gɔ́ nú mì bónú mǐ nǎ yi tɔ́n ahwan Hlamɔti toxo ɔ́ ɖo Galadi yíkúngban jí a?” Bɔ Jozafáti yí gbe n'i ɖɔ: “Nyɛ kpódó hwi kpó ɔ́, nǔ ɖokpó ɔ́ wɛ mǐ nyí, togun ce ɔ́, togun towe wɛ, togun towe ɔ́, togun ce wɛ. Mǐ ná yi tɔ́n ahwan toxo ɔ́ xá we.”

Gbeyíɖɔ axɔ́sú Akábu tɔn e nɔ ɖɔ nǔ e ba wɛ é ɖe lɛ́ɛ n'i lɛ́ɛ

⁴ Énɛ́ ɔ́ gúdo ɔ́, Jozafáti ɖɔ nú axɔ́sú Izlayɛ́li tɔn ɔ́ ɖɔ: “Din ɔ́, bo kɛnklɛ́n bó kan nǔ byɔ́ Mawu Mavɔmavɔ hwɛ̌.”

⁵ Axɔ́sú Izlayɛ́li tɔn ɔ́ kplé gbeyíɖɔ tɔn afɔwe (400) lɛ́ɛ bó kanbyɔ́ yě ɖɔ: “Mǐ ní yi tɔ́n ahwan Hlamɔti toxo ɔ́ ɖo Galadi yíkúngban jí a, abǐ má gbɔ?” Bɔ yě yí gbe n'i ɖɔ: “Yi! Mawu ná jó toxo ɔ́ nú we.”

⁶ Jozafáti ka kanbyɔ́ ɖɔ: “Gbeyíɖɔ Mawu Mavɔmavɔ tɔn ɖě sɔ́ ɖo fí bónú mǐ ná kan nǔ byɔ́ Mawu Mavɔmavɔ gbɔn jǐ tɔn ǎ cé?”

⁷ Bɔ axɔ́sú Izlayɛ́li tɔn ɔ́ yí gbe nú Jozafáti ɖɔ: “Nya ɖokpó lɛ́ ɖo fí, bɔ mǐ sixú kan nǔ byɔ́ Mawu Mavɔmavɔ gbɔn jǐ tɔn. Un ka gbɛ́ wǎn n'i, ɖó é nɔ mɔ nǔ ɖagbe ɖé ɖɔ nú mì ǎ; nǔ nyanya kɛ́ɖɛ́ jɛ́n é nɔ mɔ ɖɔ nú mì. Micée Yimula ví ɔ́ wɛ.” Ée é ɖɔ mɔ̌ ɔ́, Jozafáti ɖɔ n'i ɖɔ: “Sɛ́mɛɖó, ma ɖɔ mɔ̌ ó.”

⁸ Énɛ́ ɔ́, Izlayɛ́li xɔ́sú ɔ́ ylɔ́ agooɖojǐe tɔn ɖokpó, bó ɖɔ n'i ɖɔ ní yi kplá Micée Yimula ví ɔ́ wá din tlóló.

⁹ Hwenɛ́nu ɔ́, Izlayɛ́li xɔ́sú ɔ́ kpódó Judáa xɔ́sú ɔ́ kpó ɖo ayǐjínjɔ́n ɖo axɔ́súzinkpo yětɔn yětɔn jí, bó ɖo axɔ́súwu yětɔn mɛ. Samalíi toxo ɔ́ sín hɔntogbó jí wɛ yě ɖe, ɖo gblogblo jí, bɔ gbeyíɖɔ lɛ́ɛ bǐ ɖo xó ɖɔ nú yě wɛ.

¹⁰ Sidikíyahu Kenáana ví ɔ́ zé gan dó tun lanzo ná, bó ɖɔ: “Mawu Mavɔmavɔ ɖɔ: ‘Lanzo we élɔ́ lɛ́ɛ ná nyí hlɔ̌nhlɔ́n e a nǎ dó gba Silíinu lɛ́ɛ é sín xlɛ̌.’ ”

¹¹ Ée é ɖɔ mɔ̌ ɔ́, gbeyíɖɔ ɖě lɛ́ɛ bǐ ɖɔ xó ɖokpó ɔ́, bó wá ɖɔ nú Akábu ɖɔ: “Sɛ́mɛɖó! È nǐ yi Hlamɔti toxo mɛ ɖo Galadi yíkúngban jí, ahwan ɔ́ ná kpa mɛ. Mawu Mavɔmavɔ ná jó toxo ɔ́ nú mɛ.”

Micée ɖɔ nú axɔ́sú ɔ́ ɖɔ ahwan ɔ́ kún ná kpa ɛ ó

¹² Wɛnsagun e yi Micée ylɔ́ gbé ɔ́ ɖɔ n'i ɖɔ: “Gbeyíɖɔ ɖě lɛ́ɛ bǐ wɛ ɖɔ nǔ ɖokpó ɔ́; yě bǐ ɖɔ xó ɖagbe nú axɔ́sú ɔ́. Hwi lɔ tɛ́nkpɔ́n bó ɖɔ xó ɖagbe nú axɔ́sú ɔ́ yě ɖɔhun.”

¹³ Micée ka xwlé Mawu n'i ɖɔ: “Mawu Mavɔmavɔ ɖo gbɛ! Nǔ e Mawu ce ɖɔ nyɛ ní ɖɔ ɔ́ wɛ un ná ɖɔ.”

¹⁴ Ée gbeyíɖɔ Mawu tɔn Micée wá axɔ́sú ɔ́ gɔ́n ɔ́, axɔ́sú ɔ́ kanbyɔ́ ɛ ɖɔ: “Mǐ ní yi tɔ́n ahwan Hlamɔti toxo ɖo Galadi yíkúngban jí a, abǐ mǐ ní gbɔ?” Bɔ Micée yí gbe n'i ɖɔ: “Sɛ́mɛɖó, é ná kpa mɛ! Mawu ná jó toxo ɔ́ nú mɛ.”

¹⁵ Axɔ́sú ɔ́ ká wá kanbyɔ́ ɛ ɖɔ: “Azɔn nabí mɔ̌ wɛ un ná byɔ́ we ɖɔ hwi ní xwlé nǔ ɖɔ nǔgbó jɛ́n ɖɔ nú mì wɛ a ɖe ɖo Mawu Mavɔmavɔ nyíkɔ mɛ?”

¹⁶ Ée é ɖɔ mɔ̌ ɔ́, Micée ɖɔ n'i ɖɔ: “Un mɔ nǔ: un mɔ Izlayɛ́li togun ɔ́ bǐ gba dó gbɔn sókan mɛ sókan mɛ, lɛ̌ngbɔ́ e má ɖó nyinyitɔ́ ǎ lɛ́ɛ ɖɔhun, bɔ Mawu Mavɔmavɔ ɖɔ: ‘Mɛ nɛ́ lɛ́ɛ sɔ́ ɖó mɛɖé bɔ é ɖo yě nu ǎ. Mɛ ɖokpó ɖokpó ní bó lɛ́ kɔ yi xwé tɔn gbe; è ma fun ahwan ó!’ ”

¹⁷ Énɛ́ ɔ́, axɔ́sú Izlayɛ́li tɔn ɔ́ ɖɔ nú Jozafáti ɖɔ: “Un ma ɖɔ mɔ̌ nú we a? É nɔ́ mɔ nǔ ɖagbe ɖé bó nɔ́ ɖɔ nú mì gbeɖé ǎ, xó nyanya kɛ́ɖɛ́ jɛ́n é nɔ mɔ ɖɔ nú mì.”

¹⁸ Micée ka ɖɔ n'i ɖɔ: “Se nǔ e Mawu Mavɔmavɔ ɖɔ ɔ́. Un mɔ Mawu Mavɔmavɔ ɖo ayǐjínjɔ́n ɖo axɔ́súzinkpo tɔn jí, bɔ mɛsɛntɔ́ sɛ́xwé tɔn lɛ́ɛ bǐ ɖo gɔ̌n tɔn. Mɛ hǎbǔ ɖo ɖisí tɔn xwé, bɔ mɛ hǎbǔ ɖo amyɔ tɔn xwé.

¹⁹ Bɔ Mawu Mavɔmavɔ ɖɔ: ‘Mɛ̌ ká ná blɛ́ Akábu axɔ́sú Izlayɛ́li tɔn ɔ́, bɔ é ná yi tɔ́n ahwan Hlamɔti toxo ɔ́ ɖo Galadi yíkúngban jí, bó ná kú?’ Bɔ yě ɖɔ yětɔn yětɔn.

²⁰ Hwenɛ́nu ɔ́, yɛ ɖokpó wá Mawu Mavɔmavɔ nukɔn, bó ɖɔ: ‘Nyɛ ná yi blɛ́ ɛ.’ Bɔ Mawu Mavɔmavɔ kanbyɔ́ ɛ ɖɔ: ‘Nɛ̌ wɛ a nǎ bló gbɔn?’

²¹ Bɔ é yí gbe nú Mawu Mavɔmavɔ ɖɔ: ‘Un ná yi, bó ná nyí yɛ adingbannɔ ɖo gbeyíɖɔ tɔn lɛ́ɛ bǐ sín nu mɛ.’ Ée é ɖɔ mɔ̌ ɔ́, Mawu Mavɔmavɔ ɖɔ n'i ɖɔ: ‘Wlɛnwín ɖagbe nɛ́! A nǎ kpé wú bó ná blɛ́ ɛ nǔgbó. Bo yi bo bló gbɔn mɔ̌.’

²² Bɔ nǔgbó din ɔ́, Mawu Mavɔmavɔ sɔ́ yɛ adingbannɔ dó gbeyíɖɔ towe e ɖo fínɛ́ lɛ́ɛ bǐ sín nu mɛ. Amɔ̌, nú è nǎ ɖɔ nǔgbó ɔ́, awě sɛ́ dó we wɛ Mawu Mavɔmavɔ ɖe.”

²³ Ée Micée ɖɔ mɔ̌ tlóló ɔ́, Sidikíyahu Kenáana ví ɔ́ sɛkpɔ́ ɛ, bó gba tomɛ n'i bó ɖɔ: “Fítɛ́ wɛ yɛ Mawu Mavɔmavɔ tɔn ɔ́ gbɔn, bó tɔ́n sín nyɛ mɛ, bó wá ɖɔ xó nú we?”

²⁴ Bɔ Micée yí gbe n'i ɖɔ: “Gbe e gbe a nǎ jɛ hinhɔn hwlá jí gbɔn xɔ mɛ xɔ mɛ ɔ́, a nǎ mɔ.”

²⁵ Bɔ axɔ́sú Izlayɛ́li tɔn ɔ́ ɖɔ nú mɛsɛntɔ́ tɔn lɛ́ɛ ɖɔ: “Mi wlí Micée bó kplá ɛ yi jó nú Amɔ́ni, gǎn e kpa acɛ dó toxo ɔ́ nu ɔ́ kpó vǐ ce Yoaci kpó.

²⁶ Mi ná ɖɔ nú yě ɖo nyǐkɔ ce mɛ ɖɔ yě ní sú nya élɔ́, bónú è nǐ nɔ́ ɖo nǔɖuɖu kpɛví ɖé, sin kpɛví ɖé ná ɛ wɛ káká bónú má lɛ́ kɔ sín ahwangbénu wǔyɛ́yɛ́ afɔyɛ́yɛ́.”

²⁷ Bɔ Micée ka ɖɔ n'i ɖɔ: “Nú a lɛ̌ kɔ wá wǔyɛ́yɛ́ afɔyɛ́yɛ́ hǔn, Mawu Mavɔmavɔ ɖɔ xó gbɔn jǐ ce ǎ.” Ée é ɖɔ mɔ̌ gúdo ɔ́, é ɖɔ: “Togun lɛ́ɛ bǐ ní ɖótó!”

Axɔ́sú Akábu kú ɖo ahwangbénu

²⁸ Axɔ́sú Izlayɛ́li tɔn Akábu kpódó Jozafáti axɔ́sú Judáa tɔn kpó yi tɔ́n ahwan Hlamɔti ɖo Galadi.

²⁹ Cóbónú yě ká ná yi ɔ́, axɔ́sú Izlayɛ́li tɔn ɔ́ ɖɔ nú Jozafáti ɖɔ: “Nyɛ ɔ́, un ná húzú kan; un ná dó axɔ́súwu ce lɛ́ɛ ǎ; amɔ̌, hwɛ ɔ́, dǒ axɔ́súwu towe lɛ́ɛ.” Ée axɔ́sú Izlayɛ́li tɔn ɔ́ ɖɔ mɔ̌ ɔ́, é dó nǔ ɖěvo lɛ́ɛ, bɔ yě ɖidó ahwangbénu.

³⁰ Axɔ́sú Silíi tɔn ká ko ɖɔ nú gǎn e kpa acɛ dó ahwankɛkɛ́ví tɔn lɛ́ɛ nu lɛ́ɛ ɖɔ yě ní má ɖó alɔ ahwanfuntɔ́ kpaa lɛ́ɛ wú ó, yě ní má ká ɖó alɔ ahwangán lɛ́ɛ wú ó, lo ɔ́ axɔ́sú Izlayɛ́li tɔn ɔ́ kɛ́ɖɛ́ wɛ yě ná wlí.

³¹ Ée gǎn e kpa acɛ dó ahwankɛkɛ́ví lɛ́ɛ nu lɛ́ɛ mɔ Jozafáti jǎwe ɔ́, yě lin dó ayi mɛ ɖɔ: “Axɔ́sú Izlayɛ́li tɔn ɔ́ wɛ.” Énɛ́ ɔ́, yě xá ɛ bó ná wlí i. Jozafáti ka sú xó e è nɔ sú ɖo ahwangbénu é, bɔ Mawu Mavɔmavɔ nya kɛntɔ́ tɔn lɛ́ɛ, bó hwlɛ́n ɛ.

³² Ée gǎn e kpa acɛ dó ahwankɛkɛ́ví lɛ́ɛ nu lɛ́ɛ mɔ ɖɔ é kún nyí axɔ́sú Izlayɛ́li tɔn ɔ́ wɛ ó ɔ́, yě jó e dó.

³³ Hwenɛ́nu ɔ́, sɔ́ja Silíinu ɖé ka da gǎ tɔn kpowun, bɔ gǎ ɔ́ yi gbɔn fí e ganwu e Izlayɛ́li xɔ́sú ɔ́ dó ɔ́ kpé ɖe ɔ́, bó sɔ́ ɛ, bɔ axɔ́sú ɔ́ ɖɔ nú mɛ e ɖo kunkun i wɛ ɔ́ ɖɔ: “Lɛ̌ kɔ, bó kplá mì sín ahwangbénu, ɖó un xo akpa.”

³⁴ Ahwan ɔ́ ká syɛ́n gbe nɛ́ gbe káká bɔ è gbɔ bo hɛn ɛ ɖó te ɖo kɛkɛ́ví tɔn mɛ, bɔ é nɔ ahwan ɔ́ nu ɖo ahwangɔnu Silíi tɔn ɔ́ nukɔn. Hwenu e hwe ɖo xɔ yi wɛ ɔ́, é kú.