2 Tan 16 - MAWUXÓWÉMA

Asa fun ahwan xá Baeca

¹ Hwenu e Asa ɖo xwe gbantɔ́n-nukún-ɖokpó (36) bló wɛ ɖo axɔ́súzinkpo jí ɔ́, axɔ́sú Izlayɛ́li tɔn Baeca yi, bó tɔ́n ahwan Judáa to ɔ́ gbe ɖokpó, bó jɛ ahohó mɛ lɛ́ dó Hlama gletoxo ɔ́ jí, bó dó gbo ali nú axɔ́sú Judáa tɔn Asa.

² Asa ɖe kpatágan kpódó siká kpó ɖo dɔkun e ɖo Mawu Mavɔmavɔ xwé gbe lɛ́ɛ mɛ kpódó éé ɖo axɔ́sú ɔ́ sín hɔnmɛ lɛ́ɛ kpó mɛ, bó bɛ́ sɛ́ dó axɔ́sú Silíi tɔn Bɛni-Hadadi ɖo Damási, bó ɖɔ sɛ́ dó e ɖɔ:

³ “Wǎ nú mǐ ní jɛ akɔ lě e tɔ́ ce kpódó tɔ́ towe kpó jɛ akɔ ɔ́ ɖɔhun. Kpatágan kpódó siká kpó e un sɛ́ dó we ɔ́ ɖíe. Yi klán akɔ xá axɔ́sú Izlayɛ́li tɔn Baeca, bónú é ní gosín ayǐkúngban ce jí.”

⁴ Bɛni-Hadadi yí gbe nú xó e axɔ́sú Asa ɖɔ ɔ́, bó sɛ́ ahwangán tɔn lɛ́ɛ dó, bɔ yě yi tɔ́n ahwan Izlayɛ́li sín toxo lɛ́ɛ; yě yǐ Iyɔ́ni, bó yí Dan, bó yí Avɛ́li-Mayimu. Yě yǐ agbanxɔ e ɖo Nɛfutali toxo lɛ́ɛ mɛ lɛ́ɛ bǐ.

⁵ Ée Baeca se mɔ̌ ɔ́, é ɖó ahohó e è mɛ lɛ́ dó Hlama wɛ é ɖe ɔ́ te, bó ɖó azɔ̌ e wa wɛ é ɖe lɛ́ɛ bǐ te.

⁶ Axɔ́sú Asa kplá Judáanu lɛ́ɛ bǐ, bɔ yě yi bɛ́ nǔ e axɔ́sú Baeca dó ɖo dǒ mɛ lɛ́ dó Hlama wɛ lɛ́ɛ bǐ: yě bɛ́ awǐnnya kpó atín kpó, bɔ Asa bɛ́ dó mɛ ahohó lɛ́ dó Gɛva, bó lɛ́ mɛ lɛ́ dó Misipa.

Asa wlí nǔmɔtɔ́ Hanáni dó gan

⁷ Hwenɛ́nu ɔ́, nǔmɔtɔ́ Hanáni yi Judáa xɔ́sú Asa gɔ́n, bó ɖɔ n'i ɖɔ: “A ba ná gán jɛ Mawu Mavɔmavɔ, Mawu towe wú ǎ, bó gán jɛ Silíi xɔ́sú ɔ́ wú. Nǔ énɛ́ e a wa ɔ́ zɔ́n bɔ ahwangɔnu Silíi xɔ́sú ɔ́ tɔn gló we.

⁸ Etiopíinu lɛ́ɛ kpódó Libíinu lɛ́ɛ kpó kplé, bó nyí ahwangɔnu ɖaxó ɖokpó, bó hɛn kɛkɛ́ví kpó sɔ́xátɔ́ kpó kɔn nyi kpɔ́ gégé. Ée a ká gán jɛ Mawu Mavɔmavɔ wú hwe énɛ́ ɔ́ nu ɔ́, Mawu Mavɔmavɔ jó yě nú we ǎ cé?

⁹ Mawu Mavɔmavɔ bló mɔ̌, ɖó nukún tɔn ɖo ayǐkúngban ɔ́ bǐ jí, bɔ é nɔ́ dó wǔsyɛ́n lanmɛ nú mɛ e yí wǎn n'i kpó ayixa yětɔn bǐ kpó lɛ́ɛ. Din ɔ́, a wa nǔ mɛ e ayixa ma sɔgbe ná ǎ ɖɔhun; énɛ́ wú ɔ́, ahwan fun wɛ jɛ́n a nǎ nɔ ɖe.”

¹⁰ Ée Asa se mɔ̌ ɔ́, xomɛ sin i dó nǔmɔtɔ́ ɔ́ wú, bɔ é wlí i dó gan, ɖó xó e é ɖɔ ɔ́ vɛ́ n'i dín. É lɛ́ dó ya nú toví ɖé lɛ́ɛ.

Asa ɖu gǎn fó

¹¹ Axɔ́sú Asa sín tan ɔ́, è wlǎn sín fí e é bɛ́ sín ɔ́ káká yi fí e é fó dó ɔ́, dó axɔ́sú Judáa tɔn lɛ́ɛ kpódó Izlayɛ́li tɔn lɛ́ɛ kpó sín Tan wéma mɛ.

¹² Hwenu e Asa ɖo xwe gbantɔ́n-nukún-ɛnɛ (39) bló wɛ ɖo axɔ́súzinkpo jí ɔ́, azɔn baɖabaɖa ɖé wá hɛn afɔ tɔn. É wlí azɔn mɔ̌ có, é sɛn Mawu Mavɔmavɔ ǎ, azɔngblétɔ́ lɛ́ɛ wɛ é yi mɔ.

¹³ Xwe kanɖé-nukún-ɖokpó (41) bló wɛ Asa ɖe ɖo axɔ́súzinkpo jí bɔ zǎn tɔn kú.

¹⁴ Yɔdo e é kun ɖ'ayǐ nú é ɖésúnɔ ɖo Davídi Toxo mɛ ɔ́ mɛ wɛ è sɔ́ ɛ ɖó. È sɔ́ cyɔ tɔn mlɔ́ kpe ɖé jí ɖo yɔdo ɔ́ mɛ, bó kplé nǔsáwǔ wǎnɖagbenɔ ɖó fí ɔ́; lě e nǔsáwǔ wǎnɖagbenɔ ɖa tɔ́ lɛ́ɛ nɔ ɖa gbɔn ɔ́ wɛ è ɖa gbɔn, bó dó gěgé zo dó wlí yɛ̌yi n'i.