2 Tan 14 - MAWUXÓWÉMA

¹ Asa wa nǔ e nyɔ́ bó sɔgbe ɖo Mawu Mavɔmavɔ, Mawu tɔn nukún mɛ é.

² Asa ɖe vɔ̌sákpe e jí yě nɔ́ sá vɔ̌ nú vodún lɛ́ɛ ɖe lɛ́ɛ kpódó vodún xwé e ɖo só jí lɛ́ɛ kpó síin. É gba awǐnnya e yě tun te bó nɔ sɛn lɛ́ɛ, bó sɛ́n vodún Acela lɛ́ɛ.

³ É ɖɔ nú Judáanu lɛ́ɛ ɖɔ yě ní sɛn Mawu Mavɔmavɔ, Mawu tɔ́gbó yětɔn lɛ́ɛ tɔn. Yě ní nyi sɛ́n tɔn, lobo wa nǔ e é zɔ́n lɛ́ɛ é.

⁴ Asa ɖe vodúnxwé e ɖo só jí lɛ́ɛ kpódó vɔ̌sákpe e jí yě nɔ́ dó zǎlínkpɔ́n zo ɖe lɛ́ɛ kpó sín toxo e ɖo Judáa lɛ́ɛ bǐ mɛ. Ée é bló mɔ̌ ɔ́, fífá byɔ́ axɔ́súɖuto tɔn mɛ.

⁵ Ée Asa yi zinkpo jí ɔ́, mɛ ɖěbǔ fun ahwan xá ɛ ǎ, ɖó Mawu Mavɔmavɔ ɖésú wɛ ná ɛ vivo. Ée é mɔ ɖɔ vivo ɖo to ɔ́ mɛ é ɔ́, é mɛ ahohó lɛ́ lɛ̌ dó toxo gěgé.

⁶ É ɖɔ nú Judáanu lɛ́ɛ ɖɔ: “Din e to ɔ́ kpo ɖo mǐtɔn nyí wɛ ɔ́, mi nú mǐ nǎ bló toxo lɛ́ɛ ɖó; mǐ nǎ mɛ ahohó lɛ́ lɛ̌ dó toxo lɛ́ɛ, bó ná mɛ tocɔ́kpe gbɔn ahohó lɛ́ɛ jí lɛ́ lɛ̌ dó, bó ná dó hɔn toxo lɛ́ɛ nu, bó ná nɔ́ sú yě. Mǐ nǎ bló mɔ̌, ɖó mǐ nɔ gbejí nú Mawu Mavɔmavɔ, Mawu mǐtɔn, bɔ gbejíninɔ mǐtɔn zɔ́n bɔ é ná ayij'ayǐ mǐ gbɔn ɖisí amyɔ.” Ée é ɖɔ mɔ̌ ɔ́, yě jɛ azɔ̌ wú, bó bló toxo énɛ́ lɛ́ɛ bǐ ɖó.

⁷ Asa sín ahwangɔnu ɔ́, gbɛtɔ́ adɔ̌kpo afɔtɔn (300.000) wɛ nyí Judáanu, bɔ yě hɛn gǎglónú ɖaxó kpódó hwǎn kpó. Bɛnjamɛ́ɛnu lɛ́ɛ ká yi gbɛtɔ́ adɔ̌kpo wɛ̌nɛ (280.000), bɔ yě hɛn gǎglónú kpɛví; yě nyɔ́ gǎ da. Yě bǐ wɛ nyí ahwanfuntɔ́ syɛ́nsyɛ́n.

⁸ Zeláxi Etiopíinu ɔ́ sɔ́ ahwannú, bó kplá ahwanfuntɔ́ lǐvi (1.000.000), bó hɛn kɛkɛ́ví afɔɖé kanwe ko (300), bó hun káká wá Maleca.

⁹ Asa ɖidó Zeláxi kpó ahwan tɔn lɛ́ɛ kpó kpé gbé. Ée yě jɛ dɔ̌n ɔ́, yě to yěɖée ɖó ahwan lɔ jí ɖo tɔdo Sefáta tɔn mɛ, ɖo Maleca kpá.

¹⁰ Asa ylɔ́ Mawu Mavɔmavɔ, Mawu tɔn bó ɖɔ: “Mawu Mavɔmavɔ, mɛ e ɖó gǎn lɛ́ɛ kpódó mɛ e ma ɖó gǎn ǎ lɛ́ɛ kpó ná hwlɛ́n gán ɔ́ nyí nǔ ɖěbǔ nú we ǎ. Wǎ gɔ́ alɔ nú mǐ, Mawu Mavɔmavɔ, Mawu mǐtɔn! Đó hwi wú wɛ mǐ gǎn jɛ, nyǐkɔ towe mɛ wɛ mǐ wǎ kpé ahwan xá ahwan wɔ̌buwɔ́bú élɔ́ ɖe. Mawu Mavɔmavɔ, Mawu mǐtɔn wɛ a nyǐ. Ní má nyí ɖɔ gbɛtɔ́ wɛ ná ɖu ɖo jǐ towe ó!”

¹¹ Mawu Mavɔmavɔ nya Etiopíinu lɛ́ɛ ɖo Asa kpó sɔ́ja Judáanu lɛ́ɛ kpó nukɔn, bɔ yě hɔn,

¹² bɔ Asa kpódó mɛ tɔn lɛ́ɛ kpó nya yě káká wá Geláa, bɔ Etiopíinu lɛ́ɛ ɖo ayǐ kɔn nyi wɛ káká bɔ yě bǐ kú. Yě mɛ ɖěbǔ gán ǎ; Mawu Mavɔmavɔ kpódó ahwangɔnu tɔn kpó vívá kún yětɔn. Asa kpódó mɛ tɔn lɛ́ɛ kpó bɛ́ nǔ sín ahwangbénu wá xwé kpɔ́ gégé.

¹³ Ée Asa kpó mɛ tɔn lɛ́ɛ kpó bló mɔ̌ ɔ́, yě wǎ yí toxo e ɖo Geláa kpá lɛ́ɛ bǐ, ɖó mɛ e ɖo toxo énɛ́ lɛ́ɛ mɛ lɛ́ɛ mɔ nǔ e Mawu Mavɔmavɔ dó sin lɛ́ɛ, bɔ xɛsi tɔn ɖo yě jí. Asa kpó mɛ tɔn lɛ́ɛ kpó bɛ́ nǔ e ɖo toxo nɛ́ lɛ́ɛ mɛ lɛ́ɛ; nǔ e yě bɛ́ lɛ́ɛ sukpɔ́ ɖésú.

¹⁴ Yě gba nǔ káká bó gba kanlinkpó lɛ́ɛ lɔ, bó bɛ́ lǎkúnmí kpó sɔ́ kpó kɔn nyi kpɔ́ gégé. Énɛ́ ɔ́ gúdo ɔ́, yě lɛ́ kɔ yi Jeluzalɛ́mu.