2 Tan 12 - MAWUXÓWÉMA

Cicáki Ejípu xɔ́sú ɔ́ tɔ́n ahwan Judáa

¹ Hwenu e Hlobowámu sɔ́ axɔ́súɖuto tɔn jínjɔ́n ayǐ, bɔ acɛkpikpa tɔn lí dǒ ɔ́, é sɔ́ nɔ́ nyi Mawu Mavɔmavɔ sɛ́n ɔ́ ǎ, bɔ Izlayɛ́li togun ɔ́ lɔ sɔ́ nɔ́ nyi ǎ.

² Hwenu e Hlobowámu ɖo xwe atɔ́ɔ́n bló wɛ ɖo zinkpo jí ɔ́, Izlayɛ́li ví lɛ́ɛ hu hwɛ dó Mawu Mavɔmavɔ; énɛ́ ɔ́ wú wɛ Mawu Mavɔmavɔ jló ná dɔn tó nú yě, lobo jó Cicáki Ejípu xɔ́sú ɔ́ dó bɔ é tɔ́n ahwan Jeluzalɛ́mu.

³ Cicáki Ejípu xɔ́sú ɔ́ hɛn kɛkɛ́ví afayizɛ́n (1.200), sɔ́xátɔ́ adɔ̌kpo atɔn (60.000), bó nɔ sɔ́ja maxamaxa Libíinu, Súki kpó Etiopíinu kpó nu, bɔ yě xwedó e sín Ejípu, bó tɔ́n ahwan Jeluzalɛ́mu.

⁴ É yí toxo Judáa tɔn e è mɛ ahohó lɛ́ lɛ̌ dó lɛ́ɛ, bó wá káká Jeluzalɛ́mu.

⁵ Hwenu e Cicáki jǎwe ɔ́, Hlobowámu kpódó Judáa gán lɛ́ɛ kpó wá kplé cí Jeluzalɛ́mu, bɔ gbeyíɖɔ Mawu tɔn Cemaya yi yě gɔ́n, bó ɖɔ nú yě ɖɔ: “Mi ɖótó nǔ e Mawu Mavɔmavɔ ɖɔ é: ‘Mi jó mì dó! Din ɔ́, nyi lɔ ná jó mi dó; un jó mi nú Cicáki.’ ”

⁶ Ée yě se mɔ̌ ɔ́, axɔ́sú ɔ́ kpó gǎn lɛ́ɛ kpó yí hwɛ yětɔn lɛ́ɛ gbe, bó ɖɔ: “Mawu Mavɔmavɔ sín hwɛ jɔ.”

⁷ Ée Mawu Mavɔmavɔ mɔ ɖɔ yě yí hwɛ yětɔn lɛ́ɛ gbe ɔ́, é lɛ́ ɖɔ nú Cemaya ɖɔ: “Yě kó yí hwɛ yětɔn lɛ́ɛ gbe, un sɔ́ ná vívá kún yětɔn ǎ, un ná yá wǔ hwlɛ́n yě sín adǎn élɔ́ mɛ. Un sɔ́ ná ɖo xomɛ sin dó Jeluzalɛ́mu toxo ɔ́ wɛ káká, bó ná jó Cicáki dó bɔ é ná gba ɛ ǎ.

⁸ Amɔ̌, yě ná nɔ acɛ tɔn mɛ; énɛ́ ɔ́, è sɛn nyɛ abǐ è sɛn axɔ́sú gbɛmɛ fí tɔn lɛ́ɛ ɔ́, yě ná mɔ vogbingbɔn e ɖ'é mɛ é.”

⁹ Ejípu xɔ́sú Cicáki tɔ́n ahwan Jeluzalɛ́mu. É bɛ́ dɔkun e ɖo Mawu Mavɔmavɔ xwé gbe lɛ́ɛ kpó éé ɖo axɔ́sú ɔ́ sín hɔnmɛ lɛ́ɛ kpó bǐ yi. É lɛ́ bɛ́ gǎglónú e Salomɔ́ɔ zé siká dó bló lɛ́ɛ bǐ.

¹⁰ Axɔ́sú Hlobowámu zé ganvɔ dó bló gǎglónú ná ɖó tɛn yětɔn mɛ, bó bɛ́ d'alɔ mɛ nú sɔ́jagán e nɔ cɔ́ hɔnmɛ sín hɔntogbó lɛ́ɛ é.

¹¹ Nú axɔ́sú ɔ́ xwe Mawu Mavɔmavɔ xwé hweɖěbǔnu ɔ́, sɔ́ja lɛ́ɛ nɔ́ bɛ́ gǎglónú lɛ́ɛ, bó nɔ́ xwedó e. É ka lɛ́ kɔ wá yi ɔ́, yě nɔ́ bɛ́ yě wá ɖó xɔ yětɔn mɛ.

¹² Hlobowámu yí hwɛ tɔn lɛ́ɛ gbe; énɛ́ ɔ́ wú wɛ Mawu Mavɔmavɔ jó xomɛ e é sin ɔ́ dó, bó sɔ́ sú kún tɔn dó bǐ ǎ. Nǔ e ɖo Judáa lɛ́ɛ bǐ ká nylá ǎ.

Axɔ́súɖuɖu Hlobowámu tɔn fó

¹³ Hlobowámu ɖu axɔ́sú ɖo Jeluzalɛ́mu, bó sɔ́ acɛkpikpa tɔn jínjɔ́n ayǐ ganjí. Xwe kanɖé-nukún-ɖokpó (41) wɛ é ɖó, bó ɖu axɔ́sú. É ɖu axɔ́sú ɖo Jeluzalɛ́mu nú xwe afɔtɔn-nukún-we. Jeluzalɛ́mu ɔ́, toxo e Mawu Mavɔmavɔ sɔ́ ɖo akɔta Izlayɛ́li tɔn lɛ́ɛ bǐ mɛ, bɔ nyǐkɔ tɔn ná nɔ wú ɔ́ wɛ. Hlobowámu sín nɔ nɔ nyí Naama; Amumɔ́ɔ ví wɛ.

¹⁴ Hlobowámu wa nǔ e nylá Mawu Mavɔmavɔ nukún mɛ é, ɖó jlǒ Mawu Mavɔmavɔ tɔn wiwa myá nukún n'i ǎ.

¹⁵ Axɔ́sú Hlobowámu sín tan ɔ́, è wlǎn, sín fí e é bɛ́ sín ɔ́ káká yi fí e é fó dó ɔ́, dó gbeyíɖɔ Mawu tɔn Cemaya kpó nǔmɔtɔ́ Idóo kpó sín Tan wéma lɛ́ɛ mɛ, fí e è wlǎn tɔ́gbó yětɔn lɛ́ɛ sín nyǐkɔ lɛ́ɛ dó é. Ahwan fun wɛ jɛ́n Hlobowámu kpódó Jelobowámu kpó nɔ́ ɖe.

¹⁶ Hlobowámu zán wá kú bɔ è sɔ́ ɛ ɖó Davídi Toxo mɛ bɔ vǐ tɔn Abiya ɖu axɔ́sú ɖó tɛn tɔn mɛ.