2 Tan 11 - MAWUXÓWÉMA

¹ Ée Hlobowámu wá Jeluzalɛ́mu ɔ́, é kplé ahwanfuntɔ́ syɛ́nsyɛ́n adɔ̌kpo tɛ́nnɛ (180.000) ɖo akɔta Judáa tɔn kpódó Bɛnjamɛ́ɛ tɔn kpó mɛ, bónú yě ná yi fun ahwan xá Izlayɛ́linu e ɖo Totaligbé lɛ́ɛ, bɔ Hlobowámu ná ɖu axɔ́sú ɖo yě nu gǎnnugǎnnu.

² Mawu Mavɔmavɔ ká ɖɔ nú ɖɛ̌mɛnu tɔn Cemaya ɖɔ:

³ “Đɔ nú Hlobowámu Salomɔ́ɔ ví, axɔ́sú Judáa tɔn ɔ́ kpódó Izlayɛ́li ví e ɖo akɔta Judáa tɔn ɔ́ mɛ lɛ́ɛ bǐ kpó, kpódó Bɛnjamɛ́ɛ tɔn ɔ́ bǐ kpó ɖɔ:

⁴ ‘Mawu Mavɔmavɔ ɖɔ mi ní ma yi fun ahwan xá nɔví mitɔn lɛ́ɛ ó, ɖɔ mɛ ɖokpó ɖokpó ní lɛ́ kɔ yi xwé tɔn gbe, ɖó émí wɛ zɔ́n bɔ nǔ énɛ́ lɛ́ɛ bǐ jɛ.’ ” Yě se nǔ e Mawu Mavɔmavɔ ɖɔ ɔ́, bó lɛ́ kɔ, bó sɔ́ fun ahwan xá Jelobowámu ǎ.

Hlobowámu mɛ ahohó lɛ́ lɛ̌ dó toxo gěgé ɖo Judáa

⁵ Hlobowámu wá cí Jeluzalɛ́mu, bó mɛ ahohó lɛ́ lɛ̌ dó toxo e ɖo Judáa lɛ́ɛ.

⁶ É mɛ ahohó lɛ́ lɛ̌ dó Bɛteleyɛ́mu, Etámu, Tekowa,

⁷ Bɛti-Súu, Soko, Adulámu,

⁸ Gati, Maleca, Zifu,

⁹ Adolayímu, Lakíci, Azeka,

¹⁰ Soléa, Ayalɔ́ni kpódó Eblɔ́n kpó. Toxo énɛ́ lɛ́ɛ ɖo Judáa kpódó Bɛnjamɛ́ɛ kpó yíkúngban jí.

¹¹ É mɛ ahohó lɛ́ lɛ̌ dó yě, bó sɔ́ tokpɔngán ɖó toxo lɛ́ɛ ɖokpó ɖokpó nu, bó nɔ́ bɛ́ nǔɖuɖu kpódó ami kpó, kpódó vɛ̌ɛn kpó dó toxo énɛ́ lɛ́ɛ mɛ.

¹² É bɛ́ gǎglónú kpódó hwǎn kpó ɖó toxo énɛ́ lɛ́ɛ ɖokpó ɖokpó mɛ. Toxo énɛ́ lɛ́ɛ e é bló bɔ yě syɛ́n sɔ mɔ̌ ɔ́ zɔ́n, bɔ Judáa to ɔ́ kpódó Bɛnjamɛ́ɛ to ɔ́ kpó nɔ acɛ tɔn mɛ.

Vɔ̌sánú-xwlémawutɔ́ lɛ́ɛ kpódó Levíi ví lɛ́ɛ kpó nɔ Jelobowámu jí

¹³ Vɔ̌sánú-xwlémawutɔ́ lɛ́ɛ kpódó Levíi ví lɛ́ɛ kpó gosín fí tɛnmɛ tɛnmɛ ɖo Izlayɛ́li bó wá nɔ Jelobowámu jí.

¹⁴ Levíi ví lɛ́ɛ jó toxo yětɔn lɛ́ɛ kpódó ayǐkúngban yětɔn lɛ́ɛ kpó dó, bó yi cí Jeluzalɛ́mu kpó Judáa kpó, ɖó Jelobowámu kpódó vǐ tɔn lɛ́ɛ kpó lɔn nǔ nú yě ná wa vɔ̌sánú-xwlémawuzɔ́ yětɔn ǎ.

¹⁵ Jelobowámu ɖésúnɔ kó ɖe mɛɖé lɛ́ɛ, bɔ yě nyǐ vɔ̌sánú-xwlémawutɔ́ gbɔn tɛn mímɛ́ e ɖo só jí só jí lɛ́ɛ, bó ɖe mɛ ɖé lɛ́ɛ, bɔ yě nyí vodúnnɔ ɖo fí e gbǎgbá kpó nyibúví kpó sín akpajlɛ́ e é bló lɛ́ɛ nɔ́ nɔ lɛ́ɛ.

¹⁶ Mɛ e ɖo akɔta Izlayɛ́li tɔn e ɖo Totaligbé lɛ́ɛ mɛ, bɔ Mawu Mavɔmavɔ, Mawu Izlayɛ́li tɔn ɔ́ ná sɛn myá nukún ná lɛ́ɛ bǐ jɛ Levíi ví lɛ́ɛ gúdo yi Jeluzalɛ́mu, bó xwlé vɔ̌sánú Mawu Mavɔmavɔ, Mawu tɔ́gbó yětɔn lɛ́ɛ tɔn.

¹⁷ Nǔ énɛ́ ɔ́ zɔ́n bɔ yě ná hlɔ̌nhlɔ́n axɔ́súɖuto Judáa tɔn ɔ́, lobo dó wǔsyɛ́n lanmɛ nú Hlobowámu Salomɔ́ɔ ví ɔ́ káká nú xwe atɔn, ɖó yě zǎn gbɛ yětɔn Davídi kpódó Salomɔ́ɔ kpó ɖɔhun hwenɛ́nu.

Xwédo Hlobowámu tɔn

¹⁸ Hlobowámu da Maxaláti; asi tɔn tɔ́ nɔ́ nyí Yelimɔ́ti; Davídi ví wɛ. Asi tɔn sín nɔ nɔ nyí Avihayilu. Avihayilu ɔ́, Eliavu ví wɛ é nyí, bó nyí Jɛsée vívú.

¹⁹ Maxaláti ji vǐ atɔn n'i: é ji Yewúci, Cemaliya kpódó Zaxámu kpó.

²⁰ Hlobowámu lɛ́ wá da Maaka, Abusalɔ́mu ví ɔ́. Éyɛ́ ji vǐ ɛnɛ n'i. É ji Abiya, Atayi, Ziza kpódó Celomíti kpó.

²¹ Hlobowámu yí wǎn nú Maaka Abusalɔ́mu ví ɔ́ hú asi ɖě lɛ́ɛ bǐ. Asi afɔtɔn-nukún-atɔn wɛ é ɖó, bó lɛ́ ɖó asi kanɖé ko (60) ɖěvo. É ɖó vǐ súnnu koatɔ́n-nukún-atɔn (28) bó ɖó vǐ nyɔ̌nu kanɖé ko (60).

²² Hlobowámu sɔ́ Abiya Maaka ví ɔ́ gǎn ɖó nɔví tɔn lɛ́ɛ nu, ɖó é jló ná sɔ́ ɛ axɔ́sú.

²³ Ayi tɔn yá wǔ mɔ nǔ, bɔ é má vǐ tɔn e kpo lɛ́ɛ gbɔn Judáa to ɔ́ kpódó Bɛnjamɛ́ɛ to ɔ́ kpó mɛ, ɖo toxo e é mɛ ahohó lɛ́ lɛ̌ dó lɛ́ɛ mɛ. É sɛ́ nǔɖuɖu dó yě kpɔ́ gégé, lobo da asi nú yě kɔn nyi kpɔ́.