2 Samuwɛ́li 9 - MAWUXÓWÉMA

¹ Davídi kanbyɔ́ éɖée gbe ɖokpó ɖɔ: “Sawúlu sín mɛ ɖě ká kpo ɖo gbɛ bɔ un ná wa ɖagbe n'i ɖó Jonatáan wú a?”

² Mɛ ɖokpó ka tíin, bó kó wa azɔ̌ ɖo Sawúlu xwé ɖ'ayǐ, bɔ è kplá ɛ wá nú Davídi. È nɔ ylɔ́ mɛsɛntɔ́ ɔ́ ɖɔ Siva. È kplá ɛ wá bɔ Davídi kanbyɔ́ ɛ ɖɔ: “Hwi wɛ nyí Siva a?” Bɔ é yí gbe n'i ɖɔ: “Ɛɛn nyɛ wɛ.”

³ Bɔ axɔ́sú ɔ́ lɛ́ kanbyɔ́ ɛ ɖɔ: “Sawúlu sín mɛ ɖě sɔ́ kpo ɖo gbɛ, bɔ un ná wa ɖagbe n'i a?” Bɔ é yí gbe n'i ɖɔ: “É kpo Jonatáan sín vǐ ɖokpó ɖo fínɛ́, bó xwe ayǐsó. È nɔ ylɔ́ ɛ ɖɔ Mɛfibáalu.”

⁴ Axɔ́sú ɔ́ ɖɔ n'i ɖɔ: “Fítɛ́ vǐ ɔ́ ká ɖe?” Bɔ é yí gbe n'i ɖɔ: “É ɖo Amumiyɛli ví Makíi xwé, ɖo Lodeváa.”

⁵ Ée axɔ́sú ɔ́ se mɔ̌ ɔ́, é sɛ́ mɛ dó vǐ ɔ́ gbé mɛ ɖo Lodeváa ɖɔ è nǐ yi kplá ɛ wá.

⁶ Ée Mɛfibáalu Jonatáan ví, Sawúlu vívú ɔ́ wá axɔ́sú Davídi gɔ́n ɔ́, é xwe agbɔ̌nnusú do bó ɖe kɔ́, bɔ axɔ́sú ɔ́ kanbyɔ́ ɛ ɖɔ: “Hwi wɛ nyí Mɛfibáalu a?” Bɔ é yí gbe n'i ɖɔ: “Sɛ́mɛɖó, nyɛ wɛ nyí mɔ̌.”

⁷ Bɔ Davídi ɖɔ n'i ɖɔ: “Ado ma hu we ó, un jló ná wa ɖagbe ɖé nú we ɖó tɔ́ towe Jonatáan wú. Un ná jó ayǐkúngban e nyí tɔ́gbó towe Sawúlu tɔn lɛ́ɛ bǐ nú we, bɔ a ka ná nɔ lɛ́ ɖu nǔ xá mì tɛgbɛ.”

⁸ Ée é ɖɔ mɔ̌ ɔ́, Mɛfibáalu ɖe kɔ́, bó ɖɔ: “Sɛ́mɛɖó, nɛ̌ ka gbɔn bɔ è wlǐbo nú nyɛ mɛ e cukú kúkú nyí nǔ hú ɔ́ sɔ mɔ̌?”

⁹ Axɔ́sú ɔ́ ylɔ́ Siva mɛsɛntɔ́ Sawúlu tɔn bo ɖɔ n'i ɖɔ: “Un bɛ́ nǔ e nyí gǎn towe Sawúlu kpó mɛ tɔn lɛ́ɛ kpó tɔn lɛ́ɛ bǐ jó nú vǐvú tɔn Mɛfibáalu.

¹⁰ Siva, hwi kpó vǐ towe lɛ́ɛ kpó, mɛsɛntɔ́ towe lɛ́ɛ kpó ná nɔ lɛ gle n'i, bó ná nɔ hɛn nǔ e mɛ tɔn lɛ́ɛ ná nɔ ɖu ɔ́ wá xwé gbe. Amɔ̌, Mɛfibáalu ɔ́ ná nɔ ɖu nǔ xá mì tɛgbɛ tɛgbɛ.” Siva ka ɖó vǐ súnnu afɔtɔn, bo ɖó mɛsɛntɔ́ ko.

¹¹ Siva ɖɔ nú axɔ́sú ɔ́ ɖɔ: “Sɛ́mɛɖó, nǔ e è ɖɔ ɔ́ ná nyí wiwa.” Énɛ́ ɔ́, Mɛfibáalu nɔ ɖu nǔ xá axɔ́sú ɔ́ axɔ́ví wɛ é nyí ɖɔhun.

¹² Mɛfibáalu ɖó vǐ súnnu ɖokpó bɔ è nɔ ylɔ́ ɛ ɖɔ Mika. Mɛ e ɖo Siva xwé lɛ́ɛ bǐ wɛ nyí mɛsɛntɔ́ Mɛfibáalu tɔn.

¹³ Mɛfibáalu ɔ́ nɔ́ nɔ Jeluzalɛ́mu, bo nɔ wá ɖu nǔ gbe bǐ gbe ɖo axɔ́sú ɔ́ gɔ́n. Afɔ tɔn we lɛ́ɛ bǐ wɛ ka kú.