2 Samuwɛ́li 8 - MAWUXÓWÉMA

Davídi ɖu ɖo togun e lɛ́ lɛ̌ dó e lɛ́ɛ jí

¹ Énɛ́ ɔ́ gúdo ɔ́, Davídi ɖu ɖo Filisitɛ́ɛn lɛ́ɛ jí, bó dó winnyá yě, bó yí gbě énɛ́ ɔ́ jí sín acɛ yětɔn mɛ.

² É lɛ́ ɖu ɖo Mɔwabunu lɛ́ɛ jí. É ná gbe bɔ yě bǐ mlɔ́ kɔ́ mɛ bɔ è nɔ xa mɛ atɔn bó nɔ́ hu we bó nɔ́ jó ɖokpó dó. Énɛ́ ɔ́, é wá kpo gbɛtɔ́ atɔnvlɔ́ɖó ɖo gbɛ ɖo to ɔ́ mɛ. Sín hwenɛ́nu ɔ́, Mɔwabunu lɛ́ɛ húzú kannumɔ Davídi tɔn, bo nɔ hɛn nǔjɔ wá n'i.

³ Hwenu e Sova xɔ́sú Hadadɛzɛ́ɛ Hlexɔ́vu ví ɔ́ jló ná lɛ́ vɔ́ yí fí e gbɔn Efláti tɔ ɔ́ kpáxwé lɛ́ɛ ɔ́, Davídi hu i.

⁴ Davídi wlí sɔ́xátɔ́ afatɔ́n nǔwɔntɔn kanwe ko (1.700), bó wlí sɔ́ja adɔ̌kpo (20.000). Amɔ̌, é jó sɔ́ e ná dɔn ahwankɛkɛ́ví kanwe ko (100) mɔ̌ lɛ́ɛ dó, bó ká sɛ́n dɔn nú sɔ́ e kpo lɛ́ɛ bǐ.

⁵ Silíinu e ɖo Damási lɛ́ɛ wá bó ná dó alɔ Hadadɛzɛ́ɛ, Davídi ka ɖu ɖo yě lɔ jí, bó hu Silíinu adɔ̌kpo ɖě afɔwó (22.000) ɖo yě mɛ.

⁶ Davídi sɔ́ tokpɔngán lɛ́ɛ ɖó yě nu gǎnnugǎnnu, bɔ Silíinu lɛ́ɛ húzú kannumɔ tɔn, bó nɔ ná nǔjɔ. Mawu Mavɔmavɔ dó alɔ Davídi bɔ é fun ahwan gbɔn fí ɖěbǔ ɔ́, é nɔ ɖu ɖ'é jí.

⁷ Davídi bɛ́ siká gǎglónú e Hadadɛzɛ́ɛ sín mɛsɛntɔ́ lɛ́ɛ nɔ zán lɛ́ɛ, bó bɛ́ wá yi Jeluzalɛ́mu.

⁸ Axɔ́sú Davídi lɛ́ bɛ́ ganvɔ wɔ̌buwɔ́bú ɖé ɖo Hadadɛzɛ́ɛ sín toxo Bɛtáxi kpó Belotáyi kpó mɛ.

⁹ Axɔ́sú Hamáti tɔn e è nɔ ylɔ́ ɖɔ Toyi ɔ́ se ɖɔ Davídi ɖu ɖo Hadadɛzɛ́ɛ sín ahwangɔnu ɔ́ bǐ jí.

¹⁰ Ée é se mɔ̌ ɔ́, é sɛ́ vǐ tɔn Yolámu dó axɔ́sú Davídi gɔ́n, nú é ná yi dó gbe e, bó kpa gbe n'i ɖó ahwan e é fun xá Hadadɛzɛ́ɛ bó ɖu ɖo jǐ tɔn ɔ́ wú, ɖó Toyi lɔ ɖo ahwan fun xá Hadadɛzɛ́ɛ wɛ. Ée Yolámu xweyǐgbe ɔ́, é hɛn nǔ e è zě siká dó bló lɛ́ɛ, nǔ e è zě kpatágan dó bló lɛ́ɛ kpó nǔ e è zě ganvɔ dó bló lɛ́ɛ kpó wá nú Davídi.

¹¹ Davídi zé nǔ énɛ́ lɛ́ɛ bǐ ɖó vo nú Mawu Mavɔmavɔ lě e é zé kpatágan kpó siká kpó e é hɛn sín ahwangbénu wá lɛ́ɛ ɖó vo nú Mawu Mavɔmavɔ gbɔn é.

¹² Nǔ énɛ́ lɛ́ɛ ɔ́, é bɛ́ ɖě sín Silíi, bó bɛ́ ɖě sín Mɔwabu, bó bɛ́ ɖě sín Amumɔ́ɔ ví lɛ́ɛ gɔ́n, bó bɛ́ ɖě sín Filisitɛ́ɛn lɛ́ɛ gɔ́n, bó bɛ́ ɖě sín Amalɛ́ki ví lɛ́ɛ gɔ́n, bɔ nǔ e é fun ahwan xá Hadadɛzɛ́ɛ bo yí lɛ́ɛ gɔ́ ná.

¹³ Ée Davídi yi gba Edɔ́munu děgba ɛnɛ afɔwó (18.000) ɖo Jɛtɔdo ɔ́ mɛ bó lɛ́ kɔ wá xwé ɔ́, nyǐkɔ tɔn yi jǐ d'é jí.

¹⁴ É zé tokpɔngán lɛ́ɛ ɖó Edɔ́munu lɛ́ɛ nu gǎnnugǎnnu, bɔ Edɔ́munu lɛ́ɛ húzú kannumɔ Davídi tɔn. Mawu Mavɔmavɔ dó alɔ Davídi bɔ é fun ahwan gbɔn fí ɖěbǔ ɔ́, é nɔ ɖu ɖ'é jí.

Gǎn e nɔ wa azɔ̌ xá Davídi lɛ́ɛ

¹⁵ Davídi ɖó acɛ dó Izlayɛ́li to ɔ́ bǐ jí. É nɔ ɖɔ hwɛjlɔ́jlɔ́ nú mɛ bǐ ɖo togun tɔn bǐ mɛ.

¹⁶ Gǎn e nɔ wa azɔ̌ xá Davídi lɛ́ɛ ɖíe: Jowabu Selúya ví ɔ́; é wɛ nyí ahwangán. Yexosafáti Axiludi ví ɔ́; é wɛ nyí ɖɛ̌mɛnu axɔ́sú ɔ́ tɔn.

¹⁷ Sadɔ́ku Axitúvu ví ɔ́ kpó Aximɛlɛ́ki Abiyatáa ví ɔ́ kpó; vɔ̌sánú-xwlémawutɔ́ wɛ nú yě. Selaya; é wɛ nyí Wěgbójínɔtɔ́.

¹⁸ Benayahu Yexoyada ví ɔ́; é wɛ nyí gǎn ɖo Keleti lɛ́ɛ kpó Pɛlɛ́ti ví lɛ́ɛ kpó nu; yědɛɛ lɛ́ɛ wɛ nɔ́ cɔ́ axɔ́sú ɔ́ sín hɔnmɛ lɛ́ɛ. Bɔ Davídi ví lɛ́ɛ nyí vɔ̌sánú-xwlémawutɔ́.