2 Samuwɛ́li 7 - MAWUXÓWÉMA

Mawu dó akpá ɖé nú Davídi kpó vǐ tɔn lɛ́ɛ kpó

¹ Axɔ́sú Davídi jɛ hɔn tɔn mɛ, Mawu Mavɔmavɔ ɖo alɔ cyɔ́n jǐ tɔn wɛ ɖo kɛntɔ́ e lɛ́ dó axɔ́súɖuto tɔn lɛ́ɛ bǐ nukɔn.

² É wá su gbe ɖokpó, bɔ Davídi ɖɔ nú gbeyíɖɔ Natáan ɖɔ: “Xɔ e mɛ nyɛ ɖe ɔ́, sɛ́dlutín wɛ è dǒ gbá, bɔ akɔjijɛgbá Mawu tɔn ɔ́ ká ɖo avɔgoxɔ mɛ. Étɛ́ a lin d'é wú?”

³ Bɔ Natáan yí gbe nú axɔ́sú ɔ́ ɖɔ: “Yi bló nǔ e lin wɛ a ɖe ɔ́, ɖó Mawu Mavɔmavɔ ɖo kpɔ́ xá we.”

⁴ Lo ɔ́, gbe nɛ́ gbe zǎn mɛ ɔ́, Mawu Mavɔmavɔ ɖɔ xó nú Natáan. É ɖɔ n'i ɖɔ:

⁵ “Yi ɖɔ nú mɛsɛntɔ́ ce Davídi ɖɔ: Xó e Mawu Mavɔmavɔ ɖɔ è nǐ ɖɔ nú we ɔ́ ɖíe: ‘Hwi wɛ ná sá xwé nú mì bɔ un ná nɔ mɛ ǎ.

⁶ Sín gbe e gbe un kplá Izlayɛ́li ví lɛ́ɛ sín Ejípu ɔ́ káká wá jɛ égbé ɔ́, un nɔ xɔ ɖě mɛ kpɔ́n ǎ; goxɔ jɛ́n nyí xwé ce, bɔ un nɔ ɖ'é mɛ, bó nɔ́ ɖo yiyi xá yě wɛ.

⁷ Fí e gbɔn wɛ nyi kpó Izlayɛ́li ví lɛ́ɛ bǐ kpó ɖe ɔ́, un zɔ́n nǔɖé Izlayɛ́li gán e un ɖɔ ná ɖɔ yě ní kpé nukún dó Izlayɛ́li to ɔ́ wú lɛ́ɛ ɖě kpɔ́n gbeɖé a? Un ka kanbyɔ́ yě ɖɔ étɛ́wú yě má gbá sɛ́dluxɔ nú mì a jí kpɔ́n a?’

⁸ Din ɔ́, a nǎ ɖɔ nú mɛsɛntɔ́ ce Davídi ɖɔ xó e Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe: ‘Sín hwenu e a ɖo lɛ̌ngbɔ́nyitɔ́ nyí wɛ ɔ́ wɛ un ylɔ́ we, bó sɔ́ we gǎn ɖó togun ce Izlayɛ́li nu.

⁹ Un nɔ kpɔ́ xá we ɖo fí e a gbɔn lɛ́ɛ bǐ; un vívá kɛntɔ́ towe lɛ́ɛ sín kún ɖo nukún towe mɛ; un zé nyǐkɔ towe su gǎn e ɖo ayǐkúngban ɔ́ jí lɛ́ɛ ɖɔhun.

¹⁰ Un ná ná tɛnmɛ ɖé togun ce Izlayɛ́li, bó ná sɔ́ ɛ ɖó fínɛ́, bɔ ayi tɔn ná j'ayǐ. Adǎnúwatɔ́ lɛ́ɛ ɖě sɔ́ ná dó ya n'i lě e yě nɔ́ bló gbɔn n'i ɖ'ayǐ é ɖɔhun ǎ.

¹¹ É sɔ́ ná cí hwenu e un zé hwɛɖɔtɔ́ lɛ́ɛ bɔ yě nɔ́ kpɔ́n jǐ tɔn é ɖɔhun ǎ. Davídi, un hwlɛ́n we sín kɛntɔ́ towe lɛ́ɛ bǐ sí, bó ná gbɔjɛ we. Nyɛ Mawu Mavɔmavɔ ɖo ɖiɖɔ nú we wɛ ɖɔ nyɛ wɛ ná sɔ́ xwé towe jínjɔ́n ayǐ .

¹² Hwenu e kú ná wá kplá we, bɔ a nǎ yi mlɔ́ tɔ́gbó towe lɛ́ɛ kpá ɔ́, un ná sɔ́ vǐ e hwi ɖésúnɔ ji lɛ́ɛ ɖokpó axɔ́sú ɖó tɛn towe mɛ, bó ná bló bɔ acɛkpikpa tɔn ná syɛ́n ɖésú.

¹³ É wɛ ná sá xwé nú mì, bɔ un ná sɔ́ axɔ́súɖuɖu tɔn jínjɔ́n ayǐ káká sɔ́yi.

¹⁴ Un ná nyí tɔ́ n'i, bɔ é ná nyí vǐ nú mì. Nú é wa nǔ nyi do ɔ́, un ná dɔn tó n'i lě e tɔ́ nɔ kplɔ́n vǐ gbɔn é.

¹⁵ Amɔ̌, un ná gɔn hun jɛ dó jǐ tɔn ǎ; é ná cí lě e un bló gbɔn xá Sawúlu, bo jó e dó, bó zé we ɖó tɛn tɔn mɛ é ɖɔhun ǎ.

¹⁶ A gosín axɔ́súzinkpo jí ɔ́, vǐ towe lɛ́ɛ wɛ ná nɔ ɖu axɔ́sú ɖě jɛ ɖě gúdo káká sɔ́yi, ɖó nǔɖé ná yí axɔ́súɖuɖu ɔ́ sín xwédo towe mɛ ǎ.’ ”

¹⁷ Natáan wlí nǔ e Mawu ɖe xlɛ́ ɔ́ bǐ ɖɔ nú Davídi.

Davídi xo ɖɛ

¹⁸ Ée axɔ́sú ɔ́ se mɔ̌ ɔ́, é yi Mawu Mavɔmavɔ nukɔn bo ɖɔ: “Aklúnɔ, Mawu Mavɔmavɔ ce, étɛ́ un ka nyí, nɛ̌ a ka mɔ xwédo ce gbɔn, bó zé mì wá ɖó tɛn e mɛ un ɖe din é?

¹⁹ Aklúnɔ, Mawu Mavɔmavɔ ce, nǔ énɛ́ e a blǒ nú mì ɔ́ kó su nukún towe mɛ ǎ, bɔ a lɛ̌ dó akpá ɖ'ayǐ nú xwédo ce din, bɔ é ná nɔ ayǐ káká sɔ́yi, bó lɛ́ wá ɖɔ nú nyɛ mɛ e nyí gbɛtɔ́ yǎyá é.

²⁰ Étɛ́ nyɛ Davídi ka sixú lɛ́ ɖɔ nú we din? Aklúnɔ, Mawu Mavɔmavɔ ce, a tunwun nyɛ mɛsɛntɔ́ towe ganjí.

²¹ A blǒ nǔ ɖaxó ɖaxó énɛ́ lɛ́ɛ bǐ, bó ɖe yě xlɛ́ mì, ɖó é jló we mɔ̌ bɔ a dǒ akpá tɔn nú mì.

²² Aklúnɔ, Mawu Mavɔmavɔ ce, a kló ɖésú. È sixú jlɛ́ we dó mɛ ɖěbǔ wú ǎ. Xó e è ɖɔ bɔ mǐ se lɛ́ɛ bǐ ɖe xlɛ́ ɖɔ Mawu ɖěvo kún tíin zɛ hwɛ wú ó.

²³ Mɔ̌ ɖokpó ɔ́, togun ɖé ɖo ayǐkúngban ɔ́ jí, bó cí togun towe Izlayɛ́li ɖɔhun ǎ. A wa hwlɛ́n ɛ gán sín tagba e dó n'i wɛ Ejípunu lɛ́ɛ kpó vodún yětɔn lɛ́ɛ kpó ɖe é mɛ, bó sɔ́ ɛ dó bló togun towe ná. A blǒ nǔjíwǔ lɛ́ɛ, nǔdábaɖa lɛ́ɛ ɖo to towe mɛ, bo dó sɔ́ ɛ su.

²⁴ A blǒ bɔ togun towe Izlayɛ́li lí dǒ, bó ná nyí togun towe káká sɔ́yi, bɔ hwi Mawu Mavɔmavɔ ɔ́, a húzú Mawu tɔn.

²⁵ Din ɔ́, Mawu Mavɔmavɔ, Mawu ce, nǔ e a ɖɔ dó mɛsɛntɔ́ towe kpó xwédo tɔn kpó jí ɔ́ ní nɔ mɔ̌ káká sɔ́yi, bónú nǔ e a ɖɔ ɔ́ ní jɛ.

²⁶ Nyǐkɔ towe ní nyí nǔsísí káká sɔ́yi, bónú è nǐ nɔ ɖɔ: ‘Mawu Mavɔmavɔ Nǔbǐwúkpétɔ́ ɔ́ wɛ nyí Mawu Izlayɛ́li tɔn.’ Énɛ́ ɔ́, mɛsɛntɔ́ towe Davídi ɔ́ sín xwédo ná lí dǒ ɖo nukɔn towe.

²⁷ Đó hwi ɖésú Mawu Mavɔmavɔ Nǔbǐwúkpétɔ́ ɔ́, hwi Mawu Izlayɛ́li tɔn ɔ́, a ɖe hwiɖée xlɛ́ nyɛ mɛsɛntɔ́ towe bó ɖɔ: ‘Un ná zé xwédo towe jínjɔ́n ayǐ.’ Xó énɛ́ ɔ́ wɛ ná akɔ́nkpinkpan nyɛ mɛsɛntɔ́ towe, bɔ un ɖo ɖɛ élɔ́ xo wɛ.

²⁸ Din ɔ́, Aklúnɔ, Mawu Mavɔmavɔ ce, Mawu wɛ a nyǐ bɔ nǔ e a ɖɔ ɔ́ nɔ jɛ, bɔ a ka ɖɔ nyɔ̌ná énɛ́ xó nú nyɛ mɛsɛntɔ́ towe.

²⁹ Bo kɛnklɛ́n xo ɖɛ dó nyɛ mɛsɛntɔ́ towe sín xwédo jí, bónú é ná sixú nɔ te ɖo nukɔn towe káká sɔ́yi. Đó hwi Aklúnɔ, Mawu Mavɔmavɔ wɛ ɖɔ xó, bɔ gbɔn ɖɛxodómɛjí towe mɛ ɔ́, nyɛ mɛsɛntɔ́ towe sín xwédo ná nɔ nyɔ̌ná mɛ káká sɔ́yi.”