2 Samuwɛ́li 6 - MAWUXÓWÉMA

Davídi jló ná zé akɔjijɛgbá Mawu tɔn wá Jeluzalɛ́mu

¹ Davídi lɛ́ kplé sɔ́ja Izlayɛ́li tɔn e sín alɔ se kpɛ́n lɛ́ɛ, bɔ yě bǐ yi adɔ̌kpo ɖě děgba we afɔwó (30.000).

² Davídi kplá sɔ́ja énɛ́ lɛ́ɛ, bó yi Baalé-Yehuda ɖo Judáa yíkúngban jí, bó ná yi zé akɔjijɛgbá Mawu tɔn. Mawu Mavɔmavɔ Nǔbǐwúkpétɔ́ ɔ́ sín nyǐkɔ ɖ'é wú, bɔ é ɖo ayǐjínjɔ́n ɖo akɔjijɛgbá ɔ́ jí, ɖo axɔ́súzinkpo tɔn jí.

³ Akɔjijɛgbá ɔ́, Avinadávu xwé wɛ é ká ɖe, ɖo só jí. È zě dó kɛkɛ́ví yɔ̌yɔ́ ɖé mɛ, bó ɖidó. Avinadávu ví Wúza kpó Axiyo kpó ɖo kɛkɛ́ví ɔ́ kun wɛ.

⁴ Akɔjijɛgbá ɔ́ ɖo kɛkɛ́ví ɔ́ jí, bɔ Axiyo ɖo zɔnlin jí ɖo kɛkɛ́ví ɔ́ nukɔn.

⁵ Davídi kpó Izlayɛ́li ví lɛ́ɛ bǐ kpó ɖo awǎ jɛ wɛ ɖo Mawu Mavɔmavɔ nukɔn, bó ɖo nǔxonú tɛnmɛ tɛnmɛ lɛ́ɛ xo wɛ. Yě hɛn nǔxonú ɖé lɛ́ɛ bɔ è zě atín e è nɔ ylɔ́ ɖɔ sikplɛ́ ɔ́ dó bló ná. Yě hɛn agǐdigbo kpó kanhún kpó, bó hɛn hǔnví, bó hɛn asán kpó gan kpó.

⁶ Ée yě wá jɛ Nakɔ́ni sín kɔ́xota ɔ́, nyibú lɛ́ɛ jló ná zin akɔjijɛgbá ɔ́ dɛ́, bɔ Wúza dlɛ́n alɔ, bó hɛn akɔjijɛgbá ɔ́ ɖó te.

⁷ Bɔ Mawu Mavɔmavɔ sin xomɛ dó Wúza, bó dɔn tó n'i ɖo fínɛ́ tɛn tɔn mɛ ɖó su e é ɖu ɔ́ wú, bɔ Wúza kú jɛ fínɛ́ ɖo akɔjijɛgbá ɔ́ kpá.

⁸ Lě e Mawu Mavɔmavɔ hu Wúza gbɔn nɛ́ ɔ́ sin xomɛ nú Davídi. È ɖǒ nyǐkɔ nú tɛn e mɛ Wúza kú ɖe ɔ́ ɖɔ Pelɛ́si-Wúza. È kpo ɖo fí ɔ́ ylɔ́ ɖɔ mɔ̌ wɛ káká jɛ égbé.

⁹ Gbe énɛ́ gbe ɔ́, xɛsi ɖi Davídi dó Mawu Mavɔmavɔ wú, bɔ é ɖɔ: “Un sixú yí gbe bɔ akɔjijɛgbá Mawu Mavɔmavɔ tɔn ná byɔ́ toxo ce mɛ ǎ.”

¹⁰ Davídi jló ɖɔ akɔjijɛgbá ɔ́ ní byɔ́ xwé émítɔn gbe ɖo toxo émítɔn mɛ ǎ, lobo zé akɔjijɛgbá ɔ́ yi ɖó nya Gatinu ɖé xwé. È nɔ ylɔ́ nya ɔ́ ɖɔ Ovɛ́di-Edɔ́mu.

¹¹ Akɔjijɛgbá Mawu Mavɔmavɔ tɔn ɔ́ nɔ Ovɛ́di-Edɔ́mu xwé xɔ sun atɔn, bɔ Mawu Mavɔmavɔ dó acɛ Ovɛ́di-Edɔ́mu kpó mɛ tɔn lɛ́ɛ bǐ kpó jí.

Akɔjijɛgbá Mawu tɔn wá Jeluzalɛ́mu

¹² È wǎ ɖɔ nú axɔ́sú Davídi ɖɔ Mawu Mavɔmavɔ dó acɛ Ovɛ́di-Edɔ́mu kpó mɛ tɔn lɛ́ɛ kpó jí, bɔ nǔ tɔn bǐ nyɔ́, ɖó akɔjijɛgbá Mawu tɔn e ɖo xwé tɔn gbe ɔ́ wú. Ée Davídi se mɔ̌ ɔ́, é wlí ali bo ɖidó Ovɛ́di-Edɔ́mu xwé, lobo ná yi zé akɔjijɛgbá Mawu Mavɔmavɔ tɔn ɔ́ wá ɖó Toxo tɔn mɛ, kpó awǒbóbó kpó.

¹³ Ée mɛ e hɛn akɔjijɛgbá ɔ́ lɛ́ɛ ɖe afɔ ayizɛ́n ɔ́, é ɖó yě te, bɔ è hu nyibúsú ɖokpó, nyibúví kloklo ɖokpó.

¹⁴ Davídi nɔ dó hlɔ̌nhlɔ́n bó nɔ́ ɖú we dó sɔ́ Mawu Mavɔmavɔ su. Lɛ̌ɛnkanvɔ e mɛ vɔ̌sánú-xwlémawutɔ́ lɛ́ɛ nɔ nɔ ɔ́ mɛ jɛ́n wɛ é ɖe, bó ɖo we ɖú wɛ.

¹⁵ Davídi kpó Izlayɛ́li ví lɛ́ɛ bǐ kpó zɔn akɔjijɛgbá ɔ́ jí wá Jeluzalɛ́mu, bó ɖo awǒbóbó kpa wɛ, bó ɖo lanzo kún wɛ.

¹⁶ Hwenu e akɔjijɛgbá Mawu Mavɔmavɔ tɔn ɖo Davídi Toxo mɛ byɔ́ wɛ ɔ́, Sawúlu sín vǐ nyɔ̌nu Mikali Davídi si ɔ́ kpɔ́n sɛ́ dó gbɔn flɛtɛ́li nu, bó mɔ axɔ́sú Davídi ɖo we ɖú wɛ, bó ɖo lɛ́ lɛ̌ wɛ ɖo akɔjijɛgbá ɔ́ nukɔn, bɔ Davídi sín nǔ vɛ́ wǔ tɔn ɖésú.

¹⁷ Ée è zě akɔjijɛgbá ɔ́ wá ɔ́, è sɔ́ yi ɖó tɛn tɔn mɛ ɖo goxɔ ɔ́ tɛ́ntin fí e Davídi ko bló tɛnmɛ tɔn ɖó ɖ'ayǐ é. Énɛ́ ɔ́ gúdo ɔ́, Davídi sá vɔ̌ e è nɔ dó zo ɔ́ kpó kɔnɖókpɔ́vɔ́ kpó nú Mawu Mavɔmavɔ.

¹⁸ Ée Davídi sá vɔ̌ lɛ́ɛ fó ɔ́, é xo ɖɛ dó togun ɔ́ bǐ jí ɖo Mawu Mavɔmavɔ Nǔbǐwúkpétɔ́ ɔ́ sín nyǐkɔ mɛ.

¹⁹ Énɛ́ ɔ́ gúdo ɔ́, é ná gbe ɖɔ è nǐ ná wɔ̌xúxú ɖokpó, dǎti xúxú mlímlí, kpó vǐwun xúxú mlímlí kpó mɛ ɖokpó ɖokpó. Bɔ è mǎ nú Izlayɛ́li togun ɔ́ bǐ, súnnu kpó nyɔ̌nu kpó. Énɛ́ ɔ́ gúdo ɔ́, mɛ ɖokpó ɖokpó yi xwé.

²⁰ Davídi lɛ́ kɔ wá xwé, bó ná xo ɖɛ dó mɛ tɔn lɛ́ɛ jí, bɔ Mikali Sawúlu ví ɔ́ wá kpé e, bó ɖɔ: “Izlayɛ́li xɔ́sú ɔ́ xɔ susu égbé mɛ nya! É xɔ susu káká bó ɖibla jɛ mɛ̌, bó húzú nǔkpínkpɔ́n nú kannumɔ tɔn lɛ́ɛ sín mɛsɛntɔ́ nyɔ̌nu lɛ́ɛ, mɛ ma nyí mɛɖé ɖɔhun mɔ̌ á!”

²¹ Davídi yí gbe n'i ɖɔ: “Mawu Mavɔmavɔ wlí yɛ̌yi ná wɛ un ɖe. É mɔ ɖɔ un nyɔ́ hú tɔ́ towe kpó mɛ tɔn lɛ́ɛ kpó bó sɔ́ mì, bónú má kpa acɛ dó togun tɔn Izlayɛ́li nu, bɔ un ɖo lě e xomɛ hun mì gbɔn ɔ́ ɖe xlɛ́ ɛ wɛ.

²² Un ná wɛ ta bo ná zé nyiɖée bǐ hwe hú mɔ̌; un na bo bló mɔ̌ ɔ́, un ná xɔ susu ɖo mɛsɛntɔ́ nyɔ̌nu énɛ́ e xó ɖɔ wɛ a ɖe lɛ́ɛ lɔ nukɔn.”

²³ Mikali Sawúlu ví ɔ́ ji vǐ káká cóbó kú ǎ.