2 Samuwɛ́li 21 - MAWUXÓWÉMA

Gabawɔ́ɔnnu lɛ́ɛ kpó Sawúlu kúnkan lɛ́ɛ kpó

¹ Adɔ tɔ́n xɔ xwe atɔn, hwenu e Davídi ɖo axɔ́sú ɖu wɛ é. Davídi kan xó byɔ́ Mawu Mavɔmavɔ bɔ é yí gbe n'i ɖɔ: “Adǎka e Sawúlu kpó mɛ tɔn lɛ́ɛ kpó xo hwenu e é hu Gabawɔ́ɔnnu lɛ́ɛ é wú wɛ adɔ tɔ́n.”

² Axɔ́sú ɔ́ ylɔ́ Gabawɔ́ɔnnu lɛ́ɛ, bó ná ɖɔ xó nú yě. Yě nyí Izlayɛ́li ví ǎ; Amɔliti e kpo bɔ Izlayɛ́li ví lɛ́ɛ xwlé nǔ nú yě ɖɔ émí kún ná hu yě ó lɛ́ɛ é wɛ. Nǔ cí mɔ̌ có Sawúlu ɖo hun jɛ dó Izlayɛ́li to ɔ́ kpó Judáa to ɔ́ kpó jí wɛ, bó ɖo lě e é ná sú Gabawɔ́ɔnnu lɛ́ɛ sín kún dó gbɔn ɔ́ ba wɛ.

³ Davídi kanbyɔ́ Gabawɔ́ɔnnu lɛ́ɛ ɖɔ: “Đagbe tɛ́ un sixú wa nú mi din? Nǔ tɛ́ un sixú wa nú mi bɔ mi ná wɔn ya e mi ko ji lɛ́ɛ, bó ná byɔ́ ɖagbe nú togun Mawu Mavɔmavɔ tɔn?”

⁴ Gabawɔ́ɔnnu lɛ́ɛ yí gbe nú Davídi ɖɔ: “Tagba e ɖo mǐ kpó Sawúlu kpó, kpó mɛ tɔn lɛ́ɛ kpó tɛ́ntin ɔ́ nyí kpatágan xó ǎ, é ká nyí siká xó ǎ, é ká nyí ɖɔ Izlayɛ́li ví wɛ è nǎ hu nú mǐ, bó ná ɖɔ gbo ǎ.” Bɔ axɔ́sú ɔ́ ɖɔ nú yě ɖɔ: “Étɛ́ ba wɛ mi ɖe bɔ un ná wa nú mi lo?”

⁵ Bɔ Gabawɔ́ɔnnu lɛ́ɛ ɖɔ nú Davídi ɖɔ: “Sawúlu ko jló ná fó xó mǐtɔn, é jló ná sú kún mǐtɔn dó; é ba ɖɔ mǐ mɛ ɖěbǔ ní nɔ gbɛ ɖo Izlayɛ́li yíkúngban jí ǎ.

⁶ Mǐ jló ɖɔ è nǐ jó vǐ tɔn súnnu tɛ́nwe nú mǐ, bónú mǐ ná yi dó kan kɔ nú yě ɖo Mawu Mavɔmavɔ nukɔn ɖo Giveya, toxo e mɛ Sawúlu axɔ́sú e Mawu Mavɔmavɔ sɔ́ é nɔ é mɛ.” Bɔ axɔ́sú ɔ́ ɖɔ: “Un ná jó yě nú mi.”

⁷ Davídi ka jó Mɛfibáalu Jonatáan ví Sawúlu vívú é ǎ, ɖó alɛ e é nu xá Jonatáan ɖo Mawu Mavɔmavɔ nyíkɔ mɛ ɔ́ wútu.

⁸ Axɔ́sú ɔ́ jó Sawúlu ví we: Aamɔni kpó Mɛfibáalu kpó; vǐ we énɛ́ lɛ́ɛ ɔ́, Hlisipa Aya ví nyɔ̌nu wɛ ji yě nú Sawúlu. É lɛ́ jó vǐ atɔ́ɔ́n e Sawúlu ví nyɔ̌nu Mikali ji nú Adliɛ́li Avɛ́li-Mɛholanu Baaziláyi ví é.

⁹ Axɔ́sú ɔ́ jó yě nú Gabawɔ́ɔnnu lɛ́ɛ, bɔ yě yi dó kan kɔ nú vǐ lɛ́ɛ ɖo só jí, ɖo Mawu Mavɔmavɔ nukɔn. Vǐ tɛ́nwe lɛ́ɛ bǐ kú zɛ̌nzɛ̌n. Azǎn nukɔn nukɔntɔn e mɛ è ɖo ɔ́ji ya wɛ lɛ́ɛ mɛ wɛ è hu yě.

¹⁰ Hlisipa, asúkúsi Sawúlu tɔn ɔ́ ɖe nǔwamɛvɔ e é dó ɔ́, bó tɛ́ nyi awǐnnya e jí cyɔ lɛ́ɛ ɖe ɔ́, bó nɔ fínɛ́ sín nǔkún-yiya hwenu káká jɛ hwenu e jǐ lɛ́ wɔ́ bó ja dó cyɔ lɛ́ɛ jí é. Kéze ɔ́, é nɔ lɔn nú xɛ lɛ́ɛ nɔ́ ɖó jɛ cyɔ lɛ́ɛ jí ǎ. Zǎn kú ɔ́, é nɔ́ nya gběkanlin lɛ́ɛ dó zɔ.

¹¹ È yi ɖɔ nǔ e Hlisipa wa ɔ́ nú Davídi.

¹² Ée Davídi se mɔ̌ ɔ́, é yi bɛ́ Sawúlu kpó vǐ tɔn Jonatáan kpó sín xú ɖo Yavɛ́cinu lɛ́ɛ sí, ɖo Galadi. Ée Filisitɛ́ɛn lɛ́ɛ wlí Sawúlu ɖo Gilubowa ɔ́, Bɛti-Ceani sín gblogblo jí wɛ yě wá dó kan kɔ nú Sawúlu kpó vǐ tɔn Jonatáan kpó ɖe. Fínɛ́ wɛ Yavɛ́cinu lɛ́ɛ wá fɔ xú yětɔn ɖe.

¹³ Davídi bɛ́ Sawúlu kpó vǐ tɔn Jonatáan kpó sín xú sín Yavɛ́ci, bó lɛ́ bɛ́ mɛ tɛ́nwe e è dǒ kan kɔ ná lɛ́ɛ sín xú,

¹⁴ bó yi ɖi dó Kícu, Sawúlu tɔ́ ɔ́ sín yɔdo mɛ, ɖo Sela, ɖo Bɛnjamɛ́ɛ yíkúngban jí. Ée è wa nǔ e axɔ́sú ɔ́ zɔ́n lɛ́ɛ bǐ fó é ɔ́, Mawu fá xomɛ dó to ɔ́ wú.

Izlayɛ́li ví lɛ́ɛ tɔ́n ahwan Filisitɛ́ɛn lɛ́ɛ

¹⁵ Tagba ɖěvo lɛ́ bɛ́ ɖo Filisitɛ́ɛn lɛ́ɛ kpó Izlayɛ́li ví lɛ́ɛ kpó tɛ́ntin. Davídi kpó sɔ́ja tɔn lɛ́ɛ kpó yi tɔ́n ahwan Filisitɛ́ɛn lɛ́ɛ. Tlóló kpowun ɔ́, nǔ jɛ kɔ ci nú Davídi jí.

¹⁶ Halafa ví ɖokpó nɔ́ nyí Yicibi-Be-Nɔvu. Nyaví nɛ́ ɔ́ ɖɔ émí ná hu Davídi géé. Nyaví ɔ́ kplá hwǐ yɔ̌yɔ́ ɖokpó, bó hɛn hwǎn ɖokpó, bɔ gan xwíɖíxwíɖí e ɖo nu tɔn ɔ́, ganvɔ wɛ è dǒ tun; ganvɔ ɔ́ da hú kilóo atɔn.

¹⁷ Lo ɔ́, Avicáyi Selúya ví ɔ́ hwlɛ́n Davídi gán, bó xo Filisitɛ́ɛn ɔ́, bó hu i. Énɛ́ ɔ́, sɔ́ja lɛ́ɛ yi mɔ Davídi, bó xwlé nǔ n'i bó ɖɔ: mǐ kpó mɛ kpán sɔ́ ná yi ahwan fun gbé ɖě ǎ; ɖó mɛ wɛ nyí zogbɛ́n Izlayɛ́li tɔn bɔ zogbɛ́n énɛ́ ɔ́ sɔ́ ná cí gbeɖé ǎ.

¹⁸ Ée ahwan énɛ́ fó ɔ́, Izlayɛ́li ví lɛ́ɛ lɛ́ tɔ́n ahwan Filisitɛ́ɛn lɛ́ɛ ɖo Gɔvu. Ahwan énɛ́ mɛ ɔ́, Sibekayi Hucanu ɔ́ hu Sáfu Halafa ví ɖěvo.

¹⁹ Izlayɛ́li ví lɛ́ɛ lɛ́ tɔ́n ahwan ɖěvo Filisitɛ́ɛn lɛ́ɛ ɖo Gɔvu ɖokpó ɔ́, bɔ Ɛluhanani Yaalé-Olegimu ví, Bɛteleyɛ́munu ɔ́ hu Goliyati Gatinu ɔ́. Goliyati ɖó hwǎn ɖokpó, bɔ kpo tɔn kló sɔ avɔlɔnkpɔntín.

²⁰ Izlayɛ́li ví lɛ́ɛ lɛ́ tɔ́n ahwan ɖěvo yě ɖo Gati. Nya gaga ɖokpó ɖo to énɛ́ mɛ; alɔví ayizɛ́n wɛ ɖo alɔ tɔn ɖokpó ɖokpó nu, bɔ afɔví ayizɛ́n ɖo afɔ tɔn ɖokpó ɖokpó nu, bɔ bǐ bló ko-nukún-ɛnɛ. Nya énɛ́ ɔ́ lɔ ɔ́, Halafa ví wɛ.

²¹ É nyi gbehwán sɛ́ dó Izlayɛ́li ví lɛ́ɛ, bɔ Davídi nɔví Cimɛ́ya sín vǐ Yexonatáni ɔ́ hu i.

²² Sɔ́ja ɛnɛ énɛ́ lɛ́ɛ bǐ ɔ́, Filisitɛ́ɛn wɛ yě nyǐ, bó nyí Halafa ví, bó ɖo Gati. Davídi kpó sɔ́ja tɔn lɛ́ɛ kpó ka hu yě bǐ.