2 Samuwɛ́li 20 - MAWUXÓWÉMA

¹ Nya nǔvɔ́nɔ ɖé ɖo Gilugalu fínɛ́, bó nɔ nyí Cɛ́va; Bɛnjamɛ́ɛnu wɛ, lobo nyí Bikli ví. É kún lanzo bo sú xó bó ɖɔ: “Mǐ ɖó xó ɖěbǔ xá Davídi ǎ, mǐ kpó Jɛsée ví nɛ́ kpó kpé dó nǔɖé ǎ lóóo! Izlayɛ́li ví e mi! Mɛ ɖokpó ɖokpó ní lɛ́ kɔ yi xwé tɔn gbe!”

² Ée é ɖɔ mɔ̌ ɔ́, Izlayɛ́li ví lɛ́ɛ bǐ jó Davídi dó, bó xwedó Cɛ́va Bikli ví ɔ́. Judáa ví lɛ́ɛ ka nɔ gbejí nú axɔ́sú yětɔn, bó kplá ɛ sín Judɛ́ɛn tɔ ɔ́ kɔn káká wá Jeluzalɛ́mu.

³ Davídi byɔ́ hɔnmɛ, xwé tɔn gbe ɖo Jeluzalɛ́mu. É kplá asi tɔn wǒ e é ɖó xwé ɔ́ ná bó yi lɛ́ɛ dó xwé ɖokpó gbe, bó ɖó mɛ xwé ɔ́ kɔn bɔ è nɔ cɔ́; é nɔ́ kpé nukún dó yě wú, é ká sɔ́ ɖó xó xá yě ǎ. Yě nɔ hɔn sú dó mɔ̌ káká bó kú. Asú yětɔn ɖo gbɛ có yě cí asúkúsi ɖɔhun.

Jowabu hu Amasa

⁴ Axɔ́sú ɔ́ ɖɔ nú Amasa ɖɔ: “Kplé sɔ́ja e ɖo Judáa lɛ́ɛ bǐ nú mì ɖó fí azǎn atɔn gbe. Hwi lɔ ɔ́, afɔ towe ní sɔ gbe ɖo fí.”

⁵ Amasa yi nǔ e axɔ́sú ɔ́ zɔ́n ɛ ɔ́ bló gbé. É ká yi nɔ káká bɔ azǎn e axɔ́sú ɔ́ ɖó n'i ɔ́ dín.

⁶ Bɔ Davídi ɖɔ nú Avicáyi ɖɔ: “Nǔ e wa xá mǐ gbé wɛ Cɛ́va Bikli ví ɔ́ ja din é ɔ́ ná nylá hú ée Abusalɔ́mu wa xá mǐ é. Din ɔ́, a nǎ nɔ sɔ́ja ce lɛ́ɛ nu, bó jɛ gbě tɔn mɛ, bónú é ma hɔn yi hwlá cí toxo e è mɛ ahohó lɛ́ lɛ̌ dó lɛ́ɛ ɖě mɛ bó bú dó mǐ ó.”

⁷ Ée axɔ́sú ɔ́ ɖɔ mɔ̌ ɔ́, Avicáyi kplá sɔ́ja e nu Jowabu kpa acɛ dó lɛ́ɛ, sɔ́ja Keleti lɛ́ɛ, sɔ́ja Pɛlɛ́ti ví lɛ́ɛ kpódó sɔ́ja e sín alɔ se kpɛ́n ganjí lɛ́ɛ kpó. É kplá yě, bó tɔ́n sín Jeluzalɛ́mu, bó jɛ Cɛ́va Bikli ví ɔ́ gbé mɛ.

⁸ Awǐnnya ɖaxó e ɖo Gabawɔ́ɔn e kɔn jɛ wɛ yě ɖe kɛ́ɖɛ́, bɔ Amasa wá xwedó yě wú. Jowabu ɖo ahwan wu tɔn mɛ, bó sin gǒjíblánú, bó zé hwǐ tɔn slɔ́ mɛ, bɔ hwǐ ɔ́ ɖo akún mɛ. Lo ɔ́, hwenu e Jowabu ɖo yiyi wɛ é ɔ́, hwǐ ɔ́ sún j'ayǐ.

⁹ Jowabu ɖɔ nú Amasa ɖɔ: “Nɔví ce, a ɖo ganjí a?” É hɛn Amasa sín atán kpó alɔ aɖisí kpó, mɛ ɖo si ná kí n'i wɛ ɖɔhun.

¹⁰ Amasa tunwun hwenu Jowabu zé hwǐ ɔ́ sín kɔ́ mɛ kpó alɔ amyɔ kpó é ǎ, bɔ Jowabu sɔ́ hwǐ ɔ́ xomɛ n'i, bɔ adɔ tɔn lúlú kɔn nyi kɔ́ mɛ. Hwǐ énɛ́ e é sɔ́ ɛ ɔ́, é sɔ́ sɔ́ ɖěe cóbónú é kú ǎ. Ée Jowabu dó énɛ́ ɔ́ sin ɔ́, é kpó nɔví tɔn Avicáyi kpó wlí ali bo ɖidó Cɛ́va Bikli ví ɔ́ gbé mɛ.

Gǔ e Cɛ́va fɔ́n dó Davídi jí ɔ́ fó

¹¹ Jowabu sín sɔ́ja lɛ́ɛ ɖokpó nɔ te Amasa kpá bó ɖɔ: “Jowabu sín xɔ́ntɔn lɛ́ɛ kpó mɛ e ɖo Davídi jí lɛ́ɛ kpó ní xwedó Jowabu.”

¹² Amasa ka ɖo kúsukpɔ xo ɖo kanjɔ mɛ wɛ ɖo ali ɔ́ tɛ́ntin. Ée Jowabu sín sɔ́ja ɔ́ mɔ ɖɔ mɛ lɛ́ɛ bǐ ɖo te nɔ wɛ é ɔ́, é dɔn ɛ sín ali ɔ́ jí, bó dɔn ɛ dó gle mɛ, bó zé avɔ nyi jǐ tɔn.

¹³ Ée é bló mɔ̌ ɔ́, sɔ́ja lɛ́ɛ mɔ tɛn bo slɛ́ ɖo Jowabu gúdo, bó ɖidó Cɛ́va gbé mɛ.

¹⁴ Cɛ́va xo Izlayɛ́li sín akɔta lɛ́ɛ bǐ zlɛ́, bó tunta Avɛ́li-Bɛti-Maaka, bɔ Belíi ví lɛ́ɛ bǐ kplé, bó xwedó e.

¹⁵ Jowabu kpó mɛ tɔn lɛ́ɛ kpán wá xá Cɛ́va ɖo Avɛ́li-Bɛti-Maaka, lobo kplé kɔ́ káká yi sɔ́ toxo ɔ́ sín ahohó. Yě jɛ do kun dó ahohó ɔ́ glɔ́ jí, bó ná mu ahohó ɔ́.

¹⁶ Nyɔ̌nu bíbí ɖokpó nɔ toxo ɔ́ mɛ, bó jɛ xó sú jí, bó nɔ ɖɔ: “Mi ɖótó mì, mi ɖótó mì. Mi yi ɖɔ nú Jowabu ɖɔ é ní hun káká wá fí; un ɖó xó ɖé bó ná ɖɔ n'i.”

¹⁷ Jowabu wá, bɔ nyɔ̌nu ɔ́ kanbyɔ́ ɛ ɖɔ: “Hwi wɛ nyí Jowabu a?” Bɔ Jowabu yí gbe n'i ɖɔ: “Nyi wɛ nyí Jowabu.” Bɔ nyɔ̌nu ɔ́ ɖɔ: “Gǎn, ɖǒtó xó e ɖɔ nú we gbé un ja é.” Bɔ Jowabu ɖɔ: “Un ɖo tó ɖó we wɛ.”

¹⁸ Bɔ nyɔ̌nu ɔ́ ɖɔ: “È nɔ ɖɔ ɖ'ayǐ ɖɔ: ‘È yi kan nǔ ɖo Avɛ́li-Bɛti-Maaka ɔ́, è nɔ mɔ nu tɔn.’

¹⁹ Toxo mǐtɔn ɖo toxo e vo bo ɖo gbejí ɖo Izlayɛ́li lɛ́ɛ é mɛ. Lo ɔ́, hwɛ jló ná gba toxo élɔ́ e ɖo toxo nukúnɖéjí lɛ́ɛ mɛ ɖo Izlayɛ́li é. Étɛ́wú a ka jló ná hɛn nǔ e nyí Mawu Mavɔmavɔ tɔn é gblé?”

²⁰ Ée é ɖɔ mɔ̌ ɔ́, Jowabu sú xó bo ɖɔ: “Mawu ma lɔn ó, linlin e ná hɛn nǔ gblé, linlin e ná vívá kún nú nǔ é ɖě má byɔ́ ayi ce mɛ ó.

²¹ Nǔ nyí gbɔn mɔ̌ ǎ. Lo ɔ́ nya Eflayímu sókan mɛ nu ɖokpó wɛ fɔ́n gǔ dó axɔ́sú ɔ́ jí; nya ɔ́ nɔ nyí Cɛ́va, Bikli ví wɛ. Mi jó éyɛ́ kɛ́ɖɛ́ nú mì, bónú ma jó toxo mitɔn dó.” Ée é ɖɔ mɔ̌ ɔ́, nyɔ̌nu ɔ́ ɖɔ: “É nyɔ́! Un ná nyi ta tɔn sɛ́ dó we gbɔn ahohó ɔ́ jí.”

²² Nyɔ̌nu ɔ́ yi mɔ mɛ tɔn lɛ́ɛ, bó kplɔ́n nǔ yě, bɔ yě yi gbo Cɛ́va sín ta, bó nyi sɛ́ dó Jowabu. Ée Jowabu yí ta ɔ́, é kún lanzo, bɔ sɔ́ja lɛ́ɛ jó toxo ɔ́ dó; mɛ ɖokpó ɖokpó hɔn yi xwé tɔn gbe, bɔ Jowabu lɛ́ kɔ yi axɔ́sú ɔ́ gɔ́n ɖo Jeluzalɛ́mu.

Gǎn e nɔ wa azɔ̌ xá Davídi lɛ́ɛ sín nyǐkɔ

²³ Jowabu wɛ kpa acɛ dó ahwangɔnu Izlayɛ́li tɔn ɔ́ bǐ nu. Benayahu Yexoyada ví ɔ́ wɛ ɖo sɔ́ja Keleti lɛ́ɛ kpó sɔ́ja Pɛlɛ́ti ví lɛ́ɛ kpó nu.

²⁴ Adolámu wɛ nɔ nɔ mɛɖezɔ́ lɛ́ɛ nu. Yexosafáti Axiludi ví ɔ́ wɛ nyí gbeyíɖɔ axɔ́sú ɔ́ tɔn.

²⁵ Cewa wɛ nyí wěgbójínɔtɔ́. Sadɔ́ku kpó Abiyatáa kpó nyí vɔ̌sánú-xwlémawutɔ́.

²⁶ Ila, Yayíi ví ɔ́ lɔmɔ̌ nyí vɔ̌sánú-xwlémawutɔ́ Davídi tɔn.