2 Samuwɛ́li 2 - MAWUXÓWÉMA

¹ Ée nǔ énɛ́ lɛ́ɛ jɛ wá yi ɔ́, Davídi kanbyɔ́ Mawu Mavɔmavɔ ɖɔ: “Un ɖó ná yi Judáa toxo lɛ́ɛ ɖokpó mɛ wɛ a?” Mawu Mavɔmavɔ yí gbe n'i ɖɔ: “Ɛɛn!” Davídi lɛ́ kanbyɔ́ Mawu Mavɔmavɔ ɖɔ: “Toxo tɛ́ mɛ un ná yi?” Bɔ Mawu Mavɔmavɔ ɖɔ n'i ɖɔ: “Yi Eblɔ́n.”

² Ée Mawu Mavɔmavɔ ɖɔ mɔ̌ ɔ́, Davídi kplá asi tɔn we lɛ́ɛ bó ɖidó. Asi tɔn Axinɔwamu Izleyɛ́linu ɔ́, kpódó asi tɔn Avigayilu Kaamɛ́linu, asúkúsi Navalu tɔn kpó.

³ Davídi kplá hǎgbɛ́ tɔn lɛ́ɛ lɔmɔ̌, yě kpó mɛ yětɔn lɛ́ɛ bǐ kpó, bɔ yě yi cí gletoxo e lɛ́ dó Eblɔ́n lɛ́ɛ mɛ.

⁴ Énɛ́ ɔ́ gúdo ɔ́, Judáa ví lɛ́ɛ wá Eblɔ́n, bó wá sɔ́ Davídi axɔ́sú, ɖó Judáa to ɔ́ nu. È wǎ ɖɔ nú Davídi ɖɔ Yavɛ́cinu e ɖo Galadi lɛ́ɛ zé Sawúlu sín cyɔ bó yi ɖi.

⁵ Ée é se mɔ̌ ɔ́, é sɛ́ mɛ dó ɖɔ è nǐ yi ɖɔ nú yě ɖɔ: “Mawu Mavɔmavɔ ní dó acɛ mi jí, ɖó mi ɖe wǎn yíyí e mi ɖó nú Sawúlu gǎn mitɔn ɔ́ xlɛ́, bó zé cyɔ tɔn yi ɖi.

⁶ Din ɔ́, Mawu Mavɔmavɔ ní nyɔ́ xomɛ dó mi wú. Ní ɖe gbejíninɔ tɔn xlɛ́ mi. Nyɛ lɔmɔ̌ ná wa ɖagbe nú mi ɖó mɔ̌ e mi wa ɔ́ wú.

⁷ Din ɔ́, mi lɛ́ kpan akɔ́n bó syɛ́nlǐn. Gǎn mitɔn Sawúlu kú, mi ní ká tunwun ɖɔ nyɛ wɛ Judáa ví lɛ́ɛ sɔ́ axɔ́sú, bɔ un ná nɔ yě nu.”

È zě Icíbɔcɛ́ti Izlayɛ́li xɔ́sú

⁸ Avunɛ́ɛ Nɛ̌ɛ ví e nyí ahwangán Sawúlu tɔn ɔ́ kplá Icíbɔcɛ́ti Sawúlu ví ɔ́ yi ɖó toxo e è nɔ ylɔ́ ɖɔ Maxanayímu ɔ́ mɛ.

⁹ É sɔ́ ɛ axɔ́sú ɖó Galadi to ɔ́, Acúu to ɔ́, Izleyɛ́li to ɔ́, Eflayímu to ɔ́ kpó Bɛnjamɛ́ɛ to ɔ́ kpó nu. È nǎ ɖɔ ɔ́, é kpa acɛ dó Izlayɛ́li to ɔ́ bǐ nu.

¹⁰ Xwe kanɖé ɖó wɛ Icíbɔcɛ́ti ɖe bo nyí Izlayɛ́li xɔ́sú. É nɔ gǎnzinkpo ɔ́ jí nú xwe we. Akɔta Judáa tɔn ɔ́ kɛ́ɖɛ́ wɛ se tónú nú acɛkpikpa Davídi tɔn.

¹¹ Davídi ɖu axɔ́sú ɖo Eblɔ́n, bó kpa acɛ dó akɔta Judáa tɔn ɔ́ nu xɔ xwe tɛ́nwe adaɖé.

Judáa ví lɛ́ɛ kpó Izlayɛ́li ví lɛ́ɛ kpó fun ahwan ɖo Gabawɔ́ɔn

¹² Avunɛ́ɛ Nɛ̌ɛ ví ɔ́ kpó Icíbɔcɛ́ti Sawúlu ví ɔ́ sín ahwanfuntɔ́ lɛ́ɛ kpó tɔ́n sín Maxanayímu, bó tunta Gabawɔ́ɔn.

¹³ Jowabu Selúya ví ɔ́ kpó Davídi sín ahwanfuntɔ́ lɛ́ɛ kpó lɔmɔ̌ jɛ ali. Gbɛ̌ta we énɛ́ lɛ́ɛ wá kplé afɔ ɖo Gabawɔ́ɔn sindo ɔ́ kɔn. Yě mɛ ɖokpó ɖokpó sí ahwan te, bó nɔ te ɖisí amyɔ ɖo sindo ɔ́ tó.

¹⁴ Avunɛ́ɛ ɖɔ nú Jowabu ɖɔ: “Un jló ɖɔ sɔ́ja wínnyáwínnyá mǐtɔn lɛ́ɛ ní fun ahwan nú mǐ ná kpɔ́n mɛ e syɛ́n hú mɛ ɖě é.” Jowabu yí gbe n'i ɖɔ: “É nyɔ́.”

¹⁵ Ahwanfuntɔ́ lɛ́ɛ sɛkpɔ́ yěɖée. Akɔta Bɛnjamɛ́ɛ tɔn sín ahwanfuntɔ́ lɛ́ɛ nyí wěwe; yě wɛ zé Icíbɔcɛ́ti sín afɔ ɖó te, bɔ sɔ́ja Davídi tɔn lɛ́ɛ lɔ nyí wěwe.

¹⁶ Sɔ́ja ɖokpó ɖokpó nɔ wlí kɛntɔ́ tɔn sín ta, bó nɔ lun hwǐ dó adaja mɛ n'i. Yě bló mɔ̌, bó hu yě bǐ. È nɔ ylɔ́ tɛn énɛ́ e ɖo Gabawɔ́ɔn ɔ́ ɖɔ Hɛlukáti Hasulimu. Tínmɛ tɔn wɛ nyí: Awǐnnya lɛ́ɛ sín gle.

¹⁷ Ahwan e yě fun gbe nɛ́ gbe ɔ́ syɛ́n ɖésú. Davídi sín ahwanfuntɔ́ lɛ́ɛ ɖu ɖo Avunɛ́ɛ kpó ahwanfuntɔ́ tɔn lɛ́ɛ kpó jí.

¹⁸ Selúya sín vǐ atɔn lɛ́ɛ: Jowabu, Avicáyi kpó Asaxɛli kpó ɖo fínɛ́. Asaxɛli yá afɔ hú tɛ́.

¹⁹ É zun dó Avunɛ́ɛ jí; é zɛ dó aɖisí ǎ, é ká zɛ dó amyɔ ǎ.

²⁰ Avunɛ́ɛ kpɔ́n gǔdo bó ɖɔ: “Asaxɛli, hwi jɛ́n wɛ a?” Bɔ Asaxɛli yí gbe n'i ɖɔ: “Nyi jɛ́n wɛ.”

²¹ Bɔ Avunɛ́ɛ ɖɔ n'i ɖɔ: “Jɛ ahwanfuntɔ́ nɛ́ lɛ́ɛ ɖokpó gúdo ɖo ɖisí abǐ amyɔ, bó tɛ́nkpɔ́n bó wlí mɛ ɖokpó ɖo yě mɛ, bó yí ahwanfunnú tɔn lɛ́ɛ.” Lo ɔ́, Asaxɛli jló ná lɛ́ kɔ sín gǔdo tɔn ǎ.

²² Avunɛ́ɛ lɛ́ ɖɔ n'i ɖɔ: “Lɛ̌ kɔ sín gǔdo ce; ma lɔn nú un hu we ó, ɖó ényí un hu we bó wá mɔ nɔví towe Jowabu ɔ́, un ná tunwun nukún e un ná dó kpɔ́n ɛ ná ɔ́ ǎ.”

²³ Ée Asaxɛli gbɛ́ kɔ lɛ́ é ɔ́, Avunɛ́ɛ lun hwǎn tɔn sín nu xwíɖíxwíɖí ɔ́ dó adɔgo mɛ n'i, bɔ hwǎn ɔ́ xo adɔ ɔ́ zlɛ́ bó tɔ́n, bɔ Asaxɛli kú cúɖúɖú. Wǔ kú mɛ e wá jɛ fínɛ́ bó mɔ Asaxɛli cyɔ lɛ́ɛ bǐ, bɔ yě sɔ́ nɔ sɛ tɛn ǎ.

²⁴ Lo ɔ́, Jowabu kpó Avicáyi kpó jɛ Avunɛ́ɛ gbé mɛ, bɔ hwe wá yi xɔ dó yě ɖo Giveyati-Amuma, ɖo Giyáxi sín gbadahwe jí, ɖo ali e yi Gabawɔ́ɔn sín gbětótló mɛ ɔ́ jí.

²⁵ Ahwanfuntɔ́ Bɛnjamɛ́ɛ tɔn lɛ́ɛ so gbɛ̌ ɖo Avunɛ́ɛ gúdo, bó kplé cí só ɖokpó jí.

²⁶ Avunɛ́ɛ ylɔ́ Jowabu bo ɖɔ: “Mǐ ná fɔ́n tɛgbɛ bó ná ɖo mǐɖée hu wɛ a? A tunwun ɖɔ fífó tɔn ná blá wǔ ǎ cé? Étɛ́ nɔ te kpɔ́n wɛ a ka ɖe cóbó ná gbɛ́ nú ahwanfuntɔ́ towe lɛ́ɛ ɖɔ yě má sɔ́ nya nɔví yětɔn lɛ́ɛ ɖě ó?”

²⁷ Jowabu xwlé nǔ n'i ɖɔ: “Mawu ɖo gbɛ; ényí a ma ɖɔ mɔ̌ ǎ ɔ́, ahwanfuntɔ́ ce lɛ́ɛ ɖo mɛ e nya wɛ yě ɖe ɔ́ ná ɖó te wɛ káká cóbónú ayǐ ná hɔ́n ǎ.”

²⁸ Ée Jowabu ɖɔ mɔ̌ ɔ́, é ɖɔ bɔ è kún lanzo, bɔ sɔ́ja tɔn lɛ́ɛ lɛ́ kɔ sín Izlayɛ́li ví lɛ́ɛ gúdo bó ɖó ahwan e fun wɛ yě ɖe ɔ́ te.

²⁹ Avunɛ́ɛ kpó ahwanfuntɔ́ tɔn lɛ́ɛ kpó zun zɔnlin gbɔn Judɛ́ɛn tɔdo ɔ́ mɛ káká bɔ ayǐ hɔ́n. Yě wǎ dó asá Judɛ́ɛn tɔ ɔ́, bó gbɔn Bitlɔ́ni to ɔ́ mɛ dín, bó wá tɔ́n dó Maxanayímu.

³⁰ Ée Jowabu lɛ́ kɔ sín Avunɛ́ɛ gbé mɛ bó wá ɔ́, é kplé ahwanfuntɔ́ tɔn lɛ́ɛ, bó xa yě kpɔ́n, bó mɔ ɖɔ mɛ afɔtɔn-nukún-ɛnɛ jɛ́n hwe ɖo ahwanfuntɔ́ Davídi tɔn lɛ́ɛ mɛ, bɔ Asaxɛli gɔ́ ná.

³¹ Amɔ̌, Davídi sín ahwanfuntɔ́ lɛ́ɛ hu gbɛtɔ́ afɔɖé kɛnnɛ (360) ɖo sɔ́ja Bɛnjamɛ́ɛ kpó Avunɛ́ɛ kpó tɔn lɛ́ɛ mɛ.

³² Yě zě Asaxɛli sín cyɔ yi ɖi dó tɔ́ tɔn sín yɔdo mɛ ɖo Bɛteleyɛ́mu. Énɛ́ ɔ́ gúdo ɔ́, Jowabu kpó ahwanfuntɔ́ tɔn lɛ́ɛ kpó zun zɔnlin zǎn ɔ́ mɛ káká; ayǐ ko ɖo hǐnhɔ́n wɛ có yě wá Eblɔ́n.