2 Samuwɛ́li 19 - MAWUXÓWÉMA

¹ Wǔ kú axɔ́sú Davídi, bɔ é ɖidó xɔ mɛ ɖo jǐ, ɖo toxo ɔ́ sín hɔntogbó ta, lobo y'avǐ. É ɖo yiyi wɛ, bo ɖo xó sú wɛ, bó nɔ ɖɔ: “Áo, vǐ ce Abusalɔ́mu! Áo vǐ ce! Áo vǐ ce! Kóóyi nya! Vǐ ce Abusalɔ́mu! Nyɛ wɛ ɖó ná kú ɖó tɛn towe mɛ mɛ nya! Áo Abusalɔ́mu! Vǐ ce! Áo vǐ ce!”

² È wǎ ɖɔ nú Jowabu ɖɔ axɔ́sú ɔ́ ɖo avǐ ya wɛ, bó ɖo alě ná wɛ dó Abusalɔ́mu tamɛ.

³ Gbe énɛ́ gbe ɔ́, ɖuɖéjí yětɔn húzú aluwɛ nú sɔ́ja lɛ́ɛ bǐ, ɖó gbe énɛ́ gbe ɖokpó ɔ́ jɛ́n yě lɔ se ɖɔ axɔ́sú ɔ́ ɖo vǐ tɔn e kú ɔ́ ví wɛ.

⁴ Yě gbɔn yɛwúyɛwú, bó byɔ́ toxo ɔ́ mɛ, sɔ́ja e hɔn sín ahwangbénu, bó wá xwé kpó winnyá kpó é ɖɔhun.

⁵ Amɔ̌, axɔ́sú ɔ́, éyɛ́ cyɔ́n nǔ nukún mɛ, bó ɖo xó sú wɛ, bó nɔ ɖɔ: “Abusalɔ́mu! Áo, Abusalɔ́mu vǐ ce! Vǐ ce!”

⁶ Jowabu yi mɔ axɔ́sú ɔ́ ɖo xɔ e mɛ é ɖe ɔ́, bó ɖɔ n'i ɖɔ: “Nǔ élɔ́ e wa wɛ mɛ ɖe égbé din ɔ́, winnyá dó sɔ́ja mɛtɔn lɛ́ɛ wɛ mɛ ɖe; yě wɛ ka xɔ gbɛ nú mɛ kpó vǐ mɛtɔn súnnu kpó nyɔ̌nu kpó, kpó asi mɛtɔn lɛ́ɛ bǐ kpó.

⁷ Mɛ e ma mɔ mɛ gbɔ ǎ lɛ́ɛ wɛ mɛ yí wǎn ná, bó gbɛ́ wǎn nú mɛ e yí wǎn nú mɛ lɛ́ɛ. Mɛ ɖo xíxlɛ́ wɛ ɖɔ ahwangán mɛtɔn lɛ́ɛ kpó mɛsɛntɔ́ mɛtɔn lɛ́ɛ kpó kún sɔ́ nyí nǔɖé wa nú nú mɛ ó. Un mɔ din ɖɔ nú mǐ mɛ bǐ wɛ kú, bɔ Abusalɔ́mu ɖo gbɛ ɔ́, é ná nyɔ́ mɛ nukún mɛ.

⁸ È byɔ̌ mɛɖée mɛ din, bo yi ɖɔ xó ɖé dó dó wǔyá lanmɛ nú sɔ́ja mɛtɔn lɛ́ɛ. Nú è ma yi ǎ ɔ́, un xwlé Mawu Mavɔmavɔ nú mɛ, yě bǐ ná gosín acɛ mɛtɔn mɛ zǎn élɔ́ mɛ. Awě énɛ́ e ná xo mɛ ɔ́ ná nylá hú éé ɖo mɛ xo wɛ sín dɔ̌nkpɛvú mɛ mɛtɔn káká wá jɛ égbé lɛ́ɛ bǐ.”

⁹ Ée é ɖɔ mɔ̌ é ɔ́, axɔ́sú ɔ́ sí te, bó yi jínjɔ́n ayǐ ɖo toxo ɔ́ sín hɔnnúwa sá. È yi ɖɔ nú sɔ́ja lɛ́ɛ bɔ yě bǐ wá kplé ɖo axɔ́sú ɔ́ gɔ́n. Abusalɔ́mu sín sɔ́ja lɛ́ɛ hɔn, bɔ mɛ ɖokpó ɖokpó hɔn yi xwé tɔn gbe.

Davídi lɛ́ kɔ ɖidó Jeluzalɛ́mu

¹⁰ Nǔ énɛ́ e jɛ ɔ́, è nɔ ɖo xó ɖɔ dó é wú wɛ kpó zǐngídi kpó gbɔn akɔta Izlayɛ́li tɔn lɛ́ɛ bǐ mɛ ɖɔ: “Axɔ́sú Davídi hwlɛ́n mǐ gán ɖo kɛntɔ́ mǐtɔn lɛ́ɛ sí, ɖo ta jí ɔ́, ɖo Filisitɛ́ɛn lɛ́ɛ sí; amɔ̌, din ɔ́, hɔn wɛ é gbɔ bó hɔn sín toxo ɔ́ mɛ ɖo Abusalɔ́mu nukɔn.

¹¹ Lo ɔ́, Abusalɔ́mu énɛ́ e mǐ zé axɔ́sú ɔ́ kú ɖo ahwangbénu. Din ɔ́, étɛ́ nɔ te kpɔ́n wɛ mǐ ɖe bó ná ylɔ́ axɔ́sú Davídi, bɔ é ná lɛ́ kɔ wá zinkpo ɔ́ jí?”

¹² Davídi ɔ́, éyɛ́ ɖɔ sɛ́ dó vɔ̌sánú-xwlémawutɔ́ Sadɔ́ku kpó Abiyatáa kpó ɖɔ: “Mi yi kanbyɔ́ tomɛxó Judáa tɔn lɛ́ɛ ɖɔ: ‘Étɛ́wú midɛɛ lɛ́ɛ wɛ ná nyí mɛ gǔdo gúdo tɔn e ná kplá axɔ́sú ɔ́ wá xwé tɔn gbe é? É ɖésú ko se nǔ e ɖɔ wɛ Izlayɛ́li ví ɖě lɛ́ɛ ɖe é.

¹³ Axɔ́sú ɔ́ sín nɔví wɛ mi nyí; hun tɔn wɛ mi nyí, hɛ̌n tɔn nu wɛ mi gosín. Mi ma nyí mɛ gǔdo gúdo tɔn e ná ɖɔ é ní lɛ́ kɔ wá lɛ́ɛ ó.’

¹⁴ Énɛ́ ɔ́ gúdo ɔ́, mi ná yi ɖɔ nú Amasa nú mì ɖɔ: ‘Hun ce wɛ a nyǐ ǎ cé? Hɛ̌n ce nu wɛ a gosín ǎ cé? Ényí un ma sɔ́ we ɖó Jowabu tɛnmɛ ɖo ahwangɔnu ɔ́ nu káká sɔ́yi ǎ hǔn, Mawu ní dɔn tó nú mì nú é syɛ́n hú tódɔnnúmɛ lɛ́ɛ bǐ.’ ”

¹⁵ Xó e Davídi ɖɔ lɛ́ɛ byɔ́ ayi mɛ nú Judáa ví lɛ́ɛ, bɔ yě bǐ ɖó gbe kpɔ́, bó ɖɔ sɛ́ dó e ɖɔ: “Mɛ kpó mɛsɛntɔ́ mɛtɔn lɛ́ɛ bǐ kpó ní lɛ́ kɔ wá.”

¹⁶ Ée axɔ́sú ɔ́ se mɔ̌ ɔ́, é wlí ali bo lɛ́ kɔ wá Judɛ́ɛn tɔ ɔ́ tó. Judáa ví e wá Gilugalu lɛ́ɛ yi kpé axɔ́sú ɔ́, lobo ná dó alɔ ɛ, bónú é ná dó asá tɔ ɔ́.

Davídi nyí gbɛ nú Cimɛ́yi

¹⁷ Cimɛ́yi Gela ví e nyí Bɛnjamɛ́ɛnu, bo gosín Baxulimu ɔ́ yá wǔ xwedó mɛ e gosín Judáa lɛ́ɛ é, bó wá kpé axɔ́sú Davídi.

¹⁸ Bɛnjamɛ́ɛnu e kplá Cimɛ́yi lɛ́ɛ yi afatɔ́n. Mɔ̌ ɖokpó ɔ́, Siva e nyí mɛsɛntɔ́ ɖo Sawúlu xwé é, kpódó vǐ tɔn afɔtɔn (1.000) lɛ́ɛ kpó, kpódó mɛsɛntɔ́ tɔn ko lɛ́ɛ kpó kplá Cimɛ́yi. Yě yi Judɛ́ɛn tɔ ɔ́ tó, bó ná yi kpé axɔ́sú ɔ́.

¹⁹ Hwenɛ́nu ɔ́, tɔjíhún e bɛ́ axɔ́sú ɔ́ sín mɛ lɛ́ɛ ɔ́ ɖo tɔ ɔ́ mɛ gbɔn dín wɛ, bɔ yě ɖó ná bló nǔ e axɔ́sú ɔ́ ná ɖɔ lɛ́ɛ. Ée axɔ́sú gbɔn tɔ ɔ́ mɛ dín é ɔ́, Cimɛ́yi jɛ kpo asá tɔn mɛ,

²⁰ bó ɖɔ: “Sɛ́mɛɖó, è ma kpɔ́n dó hwɛ e un hu ɔ́ wú ó! È nǐ wɔn agɔ e un jɛ dó mɛ hwenu e mɛ gosín Jeluzalɛ́mu é. È ma zé dó wa nǔ xá mì ó.

²¹ Sɛ́mɛɖó, un tunwun ganjí ɖɔ un hu hwɛ ɖokpó dó mɛ. Égbé din ɔ́, mɛ ɖésú mɔ ɖɔ nyɛ wɛ nyí mɛ nukɔntɔn e wá kpé mɛ ɖo Izlayɛ́li ví ɖě lɛ́ɛ e ɖo Totaligbé é bǐ mɛ é.”

²² Ée é ɖɔ mɔ̌ ɔ́, Avicáyi Selúya ví ɔ́ yí xó, bó ɖɔ: “Cimɛ́yi e dó nu axɔ́sú e Mawu Mavɔmavɔ sɔ́ é ɔ́, xó énɛ́ e ɖɔ wɛ é ɖe ɔ́ wɛ ná zɔ́n bɔ é ná gló kú a?”

²³ Lo ɔ́, Davídi ɖɔ nú Avicáyi kpódó nɔví tɔn Jowabu kpó ɖɔ: “Mi Selúya ví lɛ́ɛ ɔ́, xó tɛ́ mɛ dó ta wɛ mi ɖe? Étɛ́wú mi ka ɖo nǔ e ayi nyɛtɔn mɔ lɛ́ɛ gbɛ́ wɛ din? Un ba ɖɔ è nǐ hu Izlayɛ́li ví ǎ, ɖó égbé din ɔ́, nyɛ wɛ kpa acɛ dó togun énɛ́ ɔ́ nu.”

²⁴ Ée axɔ́sú ɔ́ ɖɔ mɔ̌ ɔ́, é ɖɔ nú Cimɛ́yi ɖɔ: “Un zin alɔ dó akɔ́n nú we; è nǎ hu we ǎ.”

Davídi gbɔ kɛn xá Mɛfibáalu

²⁵ Mɛfibáalu Sawúlu vívú ɔ́ lɔmɔ̌ wá kpé axɔ́sú ɔ́. Sín gbe e gbe axɔ́sú ɔ́ tɔ́n sín to ɔ́ mɛ káká wá jɛ gbe e gbe é wá Jeluzalɛ́mu wǔyɛ́yɛ́ afɔyɛ́yɛ́ ɔ́, Mɛfibáalu sɔ́ nɔ xwlɛ́ atán ǎ, é ká sɔ́ nɔ klɔ́ afɔ ǎ, é ká sɔ́ nɔ nya avɔ ǎ.

²⁶ Hwenu e é wá jɛ axɔ́sú ɔ́ nukɔn ɔ́, axɔ́sú ɔ́ kanbyɔ́ ɛ ɖɔ: “Mɛfibáalu, étɛ́wú a ma xwedó mì yi ǎ?”

²⁷ É yí gbe nú axɔ́sú ɔ́ ɖɔ: “Sɛ́mɛɖó, mɛsɛntɔ́ ce wɛ blɛ́ mì; un ko lin ɖ'ayǐ ɖɔ ée zɔnlin ma sɔxú mì ǎ ɔ́, un ná ɖɔ bɔ è nǎ blá akpa nú tócí ce, bɔ un ná xá jí, bɔ nyi lɔ ná kplá mɛ yi.

²⁸ Mɛsɛntɔ́ ce wá mɔ mɛ, bó ɖó adingban dó nu ce. Sɛ́mɛɖó, é bló mɔ̌ có, wɛnsagun Mawu tɔn ɖɔhun wɛ mɛ cí, hǔn nǔɖé jló mɛ hǔn, mɛ wa.

²⁹ Mɛ ɖěbǔ ɖo tɔ́gbó ce Sawúlu xwé gbe, bɔ è gɔn kúhwɛ ɖó ná ɖo nukɔn mɛtɔn ǎ. Sɛ́mɛɖó, nǔ ɖo mɔ̌ có mɛ yí mì dó mɛ e nɔ ɖu nǔ xá mɛ lɛ́ɛ mɛ. Un sɔ́ ɖó acɛ ɖé, bó ná byɔ́ ɖɔ mɛ ní wa ɖagbe ɖěvo nú mì hú énɛ́ ǎ.”

³⁰ Ée é ɖɔ mɔ̌ ɔ́, axɔ́sú ɔ́ ɖɔ n'i ɖɔ: “É nyɔ́, xó kpé we. Un ná gbe ɖɔ Siva kpó hwi kpó ná má Sawúlu sín ayǐkúngban lɛ́ɛ.”

³¹ Mɛfibáalu ɖɔ nú axɔ́sú ɔ́ ɖɔ: “Siva ɖokpónɔ sixú bɛ́ nǔ lɛ́ɛ bǐ. Sɛ́mɛɖó, nǔ e ɖo tají é ɔ́ wɛ nyí ɖɔ mɛ wá xwé wǔyɛ́yɛ́ afɔyɛ́yɛ́.”

Davídi wa ɖagbe nú Baaziláyi

³² Baaziláyi Hlogɛlímunu ɔ́ lɔmɔ̌ xwedó axɔ́sú ɔ́ káká yi jɛ Judɛ́ɛn tɔ ɔ́ tó, bó jó e dó. Hlogɛlímu toxo ɔ́, Galadi wɛ é ɖe.

³³ Baaziláyi ko kpo ɖésú; é ko ɖó xwe kanwe. Hwenu e axɔ́sú ɔ́ wá nɔ Maxanayímu é ɔ́, é dó agban n'i ɖó Baaziláyi ɔ́, nya ɖé wɛ bó jɛ dɔkun titewungbe.

³⁴ Axɔ́sú ɔ́ ɖɔ n'i ɖɔ: “Baaziláyi, wǎ mǐ yi Jeluzalɛ́mu; a nǎ nɔ xwé ce gbe bɔ un ná kpé nukún wǔ we.”

³⁵ Lo ɔ́, Baaziláyi ɖɔ nú axɔ́sú ɔ́ ɖɔ: “Xwe nabí ná nɔ gbɛ xɔ wɛ un ka lɛ́ ɖe, bó ná xwedó mɛ yi Jeluzalɛ́mu?

³⁶ Xwe kanwe wɛ ɖo ta ce égbé din. Un sɔ́ sixú tunwun nǔ e nyɔ́ é kpó nǔ e gblé é kpó ǎ. Nǔ e ɖu wɛ un ɖe ɔ́ kpó nǔ e nu wɛ un ɖe ɔ́ kpó to nyɔ́ kpó é gbɔ kpó ɔ́, un sixú tunwun ǎ. È na bo ɖo han ji ɖo akpá ce wɛ ɔ́, un sɔ́ nɔ tunwun súnnu gbe ɖo nyɔ̌nu gbe mɛ ǎ. Sɛ́mɛɖó, un xwedó mɛ din ɔ́, agban jɛ́n un ná nyí, bó ná nɔ kɔ mɛtɔn nu.

³⁷ Ényí un sixú xwedó mɛ jɛ Judɛ́ɛn tɔ ɔ́ gúdo hǔn, kpé jɛ́n un kpé wú nɛ́. È ka ná ɖɔ lɔ ɔ́, un nyí mɛ bo jɛ xá ɖagbe mɔ̌hun ǎ.

³⁸ Gbɔ nú nyi mɛsɛntɔ́ mɛtɔn ná lɛ́ kɔ yi xwé, bó ná yi kú jɛ fí e tɔ́ ce kpó nɔ ce kpó sín yɔdo ɖe é. Amɔ̌, vǐ ce Kimuxámu ɖíe; é ná xwedó mɛ yi, bɔ è nǎ zé e dó wa nǔ e jló mɛ ɔ́ ná.”

³⁹ Ée é ɖɔ mɔ̌ ɔ́, axɔ́sú ɔ́ ɖɔ: “É nyɔ́, Kimuxámu ní bo xwedó mì. Un ná bló nǔ e a ɖɔ é bǐ n'i. Un ná ná nǔ e a nǎ byɔ́ mì ɔ́ bǐ we.”

⁴⁰ Ée togun ɔ́ bǐ dó asá Judɛ́ɛn tɔ ɔ́, bɔ axɔ́sú ɔ́ lɔmɔ̌ dó asá é ɔ́, é kplá asi kɔ nú Baaziláyi, bo xo ɖɛ dó jǐ tɔn, bɔ Baaziláyi lɛ́ kɔ yi xwé tɔn gbe.

⁴¹ Bɔ axɔ́sú ɔ́ wlí ali bo ɖidó Gilugalu, bɔ Kimuxámu xwedó e. Judáa ví lɛ́ɛ bǐ kpó Izlayɛ́li ví e ɖo Totaligbé lɛ́ɛ vlɔ̌ kpó xwedó axɔ́sú ɔ́.

Judáa ví lɛ́ɛ kpó Izlayɛ́li ví lɛ́ɛ kpó ɖɔ jlɛ

⁴² Izlayɛ́li ví e ɖo Totaligbé lɛ́ɛ yi mɔ axɔ́sú ɔ́, bó kanbyɔ́ ɛ ɖɔ: “Étɛ́wú nɔví mǐtɔn Judáa ví lɛ́ɛ wá zé mɛ, bó kplá mɛ ɖésú kpó mɛ mɛtɔn lɛ́ɛ kpó, kpódó sɔ́ja mɛtɔn lɛ́ɛ kpó bó dó asá Judɛ́ɛn tɔ ɔ́?”

⁴³ Ée yě ɖɔ mɔ̌ é ɔ́, Judáa ví lɛ́ɛ ɖɔ nú yě ɖɔ: “Mɛ mǐtɔn wɛ é nyí wú wɛ mǐ blǒ mɔ̌! Étɛ́ xomɛ sin wɛ mi ka ɖe? Nǔɖé wɛ mǐ ɖu ɖo así tɔn a? Nǔɖé wɛ é ká ná mǐ wú wɛ mǐ bló mɔ̌ a?”

⁴⁴ Bɔ Izlayɛ́li ví lɛ́ɛ sú xó bó ɖɔ nú yě ɖɔ: “Axɔ́sú ɔ́ nyí mɛ mǐtɔn donu wǒ , lě e é nyí mi lɔ tɔn gbɔn é. Étɛ́wú mi ka ɖo mǐ ɖe kpo wɛ mɔ̌? Mǐdɛɛ lɛ́ɛ wɛ nyí mɛ nukɔntɔn e ɖɔ axɔ́sú mǐtɔn ní lɛ́ kɔ wá xwé é ǎ cé?” Judáa ví lɛ́ɛ ká jɛ xó vɛ́sin vɛ́sin ɖɔ jí, bɔ gbe yětɔn yi jǐ hú Izlayɛ́li ví lɛ́ɛ sín gbe.