2 Samuwɛ́li 17 - MAWUXÓWÉMA

¹ Axitofɛ́li ɖɔ nú Abusalɔ́mu ɖɔ: “Nǎ gbe mì nú má cyán súnnu děgba atɔn (12.000), bónú má jɛ Davídi gbé mɛ zǎn élɔ́ mɛ din.

² Un ná yi fyán ɛ hwenu e nǔ ná kó cikɔ n'i bɔ kanmɛ ná ko gbɔ́jɔ́ ɛ é. Un ná dó xɛsi i, bɔ togun ɔ́ bǐ ná hɔn jó e dó, lobɔ un ná hu é ɖokpónɔ géé.

³ Énɛ́ ɔ́, un ná kplá togun ɔ́ bǐ wá nú we. Nú nya e ba wɛ a ɖe ɔ́ kú din ɔ́, mɛ bǐ ná lɛ́ kɔ wá, bɔ togun ɔ́ sín ayi ná j'ayǐ.”

⁴ É cí xó nɛ́ ɔ́ jɛ jí nú Abusalɔ́mu kpó tomɛxó Izlayɛ́li tɔn lɛ́ɛ bǐ kpó ɖɔhun.

⁵ Nǔ cí mɔ̌ có Abusalɔ́mu ɖɔ: “Mi yi ylɔ́ Hucáyi Aakíti ɔ́ wá, nú mǐ ná se nǔ e élɔ́ ná ɖɔ é.”

⁶ Hucáyi wá Abusalɔ́mu gɔ́n, bɔ é ɖɔ nǔ e Axitofɛ́li ɖɔ é n'i, lobo kanbyɔ́ ɛ ɖɔ: “Nǔ e Axitofɛ́li ɖɔ ɔ́ nɛ́. Mǐ nǎ bló gbɔn mɔ̌ a, abǐ mǐ nǎ gbɔ? Hwɛ ɖó xó ɖé hǔn, ɖɔ.”

⁷ Hucáyi ka ɖɔ nú Abusalɔ́mu ɖɔ: “Nǔ e Axitofɛ́li kplɔ́n we din ɔ́ nyɔ́ ǎ.

⁸ A tunwun lě e tɔ́ towe kpó sɔ́ja tɔn lɛ́ɛ kpó syɛ́n sɔ é. Yě nylá hun hú lɔnmɔ e ba vǐ tɔn kpo ɖo nǔkan mɛ é. Tɔ́ towe ɔ́, ahwanfuntɔ́ ɖaxó ɖokpó wɛ. É ná dɔ́ fí ɖokpó ɔ́ xá sɔ́ja tɔn lɛ́ɛ ǎ.

⁹ Fí e mǐ ɖe din é ɔ́, é ná kó yi hɔn hwlá cí sóxo mɛ, abǐ fí ɖé din. Ényí è bɛ̌ ahwanfunfun din tlóló bónú yě jɛ mɛ hu jí ɖo mǐ mɛ ɔ́, è nǎ se gbɔn fí bǐ ɖɔ è ɖu ɖo mɛ e ɖo Abusalɔ́mu jí lɛ́ɛ jí.

¹⁰ Hwenɛ́nu ɔ́, kanmɛ ná gbɔ́jɔ́ mɛ e syɛ́n ta kinnikínní ɖɔhun ɖo mi mɛ lɛ́ɛ bǐ, ɖó Izlayɛ́li to ɔ́ bǐ kó tunwun ɖɔ tɔ́ towe ɔ́, ahwanfuntɔ́ ɖaxó ɖokpó wɛ, bɔ sɔ́ja tɔn lɛ́ɛ lɔ syɛ́n ɖésú.

¹¹ Nǔ e nyɛ ná kplɔ́n we ɔ́ ɖíe: a nǎ dɔn sɔ́ja Izlayɛ́li tɔn lɛ́ɛ bǐ dó wǔ; a nǎ kplé yě sín Dan ɖo totaligbé káká wá Bɛ̌-Ceva ɖo tofɔligbé, bɔ yě ná sukpɔ́ nyɛ̌kɛ́n e ɖo xutó é ɖɔhun, bɔ hwi ɖésúnɔ ná nɔ ahwan ɔ́ nu.

¹² Davídi jɛ tɔ dó fí ɖé ɔ́, mǐ nǎ ba ɛ káká bó mɔ. Mǐ nǎ vun blá ɛ lě e ahǔn nɔ ja kɔn nyi kɔ́ mɛ é ɖɔhun. Yě mɛ kwín ɖokpó ná gló mǐ ǎ.

¹³ Nú é ka hɔn byɔ́ toxo ɖé mɛ ɔ́, Izlayɛ́li ví lɛ́ɛ bǐ ná dó kan toxo ɔ́ bǐ lɛ́ lɛ̌ dó, bó dɔn bǐ xwíí yi dó tɔsisa e ɖo fínɛ́ é mɛ; mǐ ná jó awǐnnya vɔ́vɔ́ dó nyi to ɔ́ mɛ ǎ.”

¹⁴ Abusalɔ́mu kpó Izlayɛ́li ví lɛ́ɛ bǐ kpó ɖɔ: “Wě e Hucáyi Aakíti ɔ́ ɖe ɔ́ nyɔ́ hú Axitofɛ́li tɔn.” Mawu Mavɔmavɔ wɛ ka ko to ɖó mɔ̌ ɖɔ è nǎ jó nǔkplɔ́nmɛ ɖagbe Axitofɛ́li tɔn dó, bɔ awě ná mɔ tɛn bo xo Abusalɔ́mu.

Davídi gbɔn Judɛ́ɛn tɔ mɛ dín

¹⁵ Hucáyi wlí nǔ e Axitofɛ́li kplɔ́n Abusalɔ́mu kpó tomɛxó Izlayɛ́li tɔn lɛ́ɛ kpó é ɖɔ nú vɔ̌sánú-xwlémawutɔ́ Sadɔ́ku kpó Abiyatáa kpó; é lɛ́ ɖɔ nǔ e é ɖésúnɔ wá kplɔ́n yě ɔ́.

¹⁶ É ɖɔ nú yě ɖɔ: “Din ɔ́, mi yá wǔ dó wɛn sɛ́ dó Davídi ɖɔ é ma dɔ́ fí e è nɔ zɔn afɔ gbɔn Judɛ́ɛn tɔ ɔ́ mɛ dín ɖe ɔ́ kpá ɖo gbětótló mɛ ó, é ɖó ná dó asá Judɛ́ɛn tɔ ɔ́ dandan, é má nyí mɔ̌ ǎ ɔ́, yě táá hu é kpódó sɔ́ja tɔn lɛ́ɛ kpó.”

¹⁷ È sɔ́ Jonatáan Abiyatáa ví ɔ́ kpó Aximáasi Sadɔ́ku ví ɔ́ kpó yi ɖó Eyinu-Hlogɛ́li, bɔ nyɔ̌nu mɛsɛntɔ́ ɖé ná nɔ gosín toxo ɔ́ mɛ, bó ná nɔ́ dó wɛn yě, bɔ yě ná nɔ́ yi dó axɔ́sú Davídi. Đó yědɛɛ lɛ́ɛ ɖésú glá ná yi toxo ɔ́ mɛ ǎ, è táá mɔ yě.

¹⁸ Nyaví ɖokpó ká mɔ yě, bó ɖɔ nú Abusalɔ́mu. Lo ɔ́, yě mɛ we lɛ́ɛ yá wǔ bó ɖidó. Yě wǎ Baxulimu, bó byɔ́ dǎwe ɖokpó xwé, bó mɔ dotɔ ɖokpó ɖo nya ɔ́ sín kɔ́xota, lobo byɔ́ mɛ, bó hɔn hwlá cí fínɛ́.

¹⁹ Énɛ́ ɔ́, asi tɔn zé nǔ bó cyɔ́n dó dotɔ ɔ́ nu, lobo kan jinukún xyá ɖ'é jí, bónú mɛɖé ma tunwun ɖɔ nǔɖé ɖo fínɛ́ ó.

²⁰ Mɛ e Abusalɔ́mu sɛ́ dó gbě yětɔn mɛ lɛ́ɛ wá mɔ nyɔ̌nu ɔ́, bó kanbyɔ́ ɛ ɖɔ: “Fítɛ́ Aximáasi kpó Jonatáan kpó ɖe?” Nyɔ̌nu ɔ́ ɖɔ nú yě ɖɔ: “Yě wlí ali e gbɔn sindo ɔ́ kɔn é.” Ée é ɖɔ mɔ̌ nú yě ɔ́, yě yi ba yě, bó ba yě kpo, bó lɛ́ kɔ wá yi Jeluzalɛ́mu.

²¹ Ée mɛ e Abusalɔ́mu sɛ́ dó lɛ́ɛ yi é ɔ́, Aximáasi kpó Jonatáan kpó tɔ́n sín tɔ ɔ́ mɛ, bó yi ɖɔ nǔ e Axitofɛ́li kplɔ́n Abusalɔ́mu ɔ́ nú Davídi. Énɛ́ ɔ́ gúdo ɔ́, yě ɖɔ n'i ɖɔ: “Ée Axitofɛ́li kplɔ́n nǔ yě mɔ̌ din é ɔ́, yǎ wǔ sɔ́ nǔ bó jɛ ali. Yǎ wǔ dó asá Judɛ́ɛn tɔ ɔ́.”

²² Tlóló ɔ́, Davídi kpó mɛ e ɖo fínɛ́ xá ɛ lɛ́ɛ kpó jɛ Judɛ́ɛn tɔ zlɛ́ jí, bɔ cóbónú ayǐ ná hɔ́n ɔ́, yě bǐ ko dó asá tɔ ɔ́; é sɔ́ kpo mɛɖé ɖo tɔ ɔ́ gúdo ǎ.

²³ Ée Axitofɛ́li mɔ ɖɔ yě kún xwedó nǔ e émí kplɔ́n yě ɔ́ ó é ɔ́, é blá akpa nú tócí tɔn bó xá jí, bó ɖidó toxo tɔn mɛ. Ée é wá xwé é ɔ́, é ɖɔ xó nú mɛ tɔn lɛ́ɛ, lobo dó kan kɔ bó kú. Lě e é hu éɖée gbɔn é nɛ́, bɔ è yi ɖi i dó tɔ́ tɔn sín yɔdo mɛ.

Davídi wá Maxanayímu

²⁴ Davídi wá Maxanayímu. Hwe énɛ́ ɔ́ nu ɔ́, Abusalɔ́mu kpódó Izlayɛ́li ví e xwedó e lɛ́ɛ bǐ kpó ɖo Judɛ́ɛn tɔ ɔ́ dó asá wɛ.

²⁵ Abusalɔ́mu zé Amasa ɖó Jowabu tɛnmɛ, bɔ é nɔ sɔ́ja lɛ́ɛ nu. Amasa ɔ́, nya Izlayɛ́li ví ɖé sín vǐ wɛ, bɔ è nɔ ylɔ́ nya ɔ́ ɖɔ Yitla. Yitla ɔ́ wɛ da Avigalu Naxáci ví ɔ́. Avigalu ɔ́, Selúya, Jowabu nɔ ɔ́ sín nɔví ká wɛ.

²⁶ Izlayɛ́li ví lɛ́ɛ kpó Abusalɔ́mu kpó ɖó gɔnu ɖó Galadi.

²⁷ Hwenu e Davídi wá Maxanayímu é ɔ́, Coví Naxáci ví Hlabanu ɔ́ kpó Makíi Amumiyɛli ví Lodeváanu ɔ́ kpó, kpódó Baaziláyi Hlogɛlímunu e ɖo Galadinu ɔ́ kpó,

²⁸ hɛn zan, gannú, zɛ̌n, blěe, ɔ́ji, linfín, jinukún mimɛ, akpakún, ayikún,

²⁹ wǐin, bɔ̌ta, amɔ̌, nyibú tɔn, kpó gbɔ̌ tɔn kpó. Yě hɛn nǔ énɛ́ lɛ́ɛ wá nú Davídi kpó ahwan tɔn lɛ́ɛ kpó, ɖó yě lin ɖɔ: “Mɛ énɛ́ lɛ́ɛ e ɖo gbětótló mɛ din é ɔ́, xovɛ́ ná kó sin yě, nǔ ná ko cikɔ nú yě, kɔ ná kó xú yě.”