2 Samuwɛ́li 15 - MAWUXÓWÉMA

¹ Ée nǔ énɛ́ lɛ́ɛ jɛ gúdo ɔ́, Abusalɔ́mu ba kɛkɛ́ví ɖokpó, bó xo sɔ́ kplé, bó xo gbɛtɔ́ kanɖé wǒ (50) kplé, bɔ yě nɔ́ ɖo wezun jí ɖo kɛkɛ́ví ɔ́ nukɔn.

² É nɔ́ fɔ́n zǎn, bó nɔ́ yi cí te ali e byɔ́ toxo ɔ́ mɛ ɔ́ tó, bɔ mɛ ɖěbǔ gbɔn fínɛ́ bó xwe hwɛ jɛ nú axɔ́sú ɔ́ gbé ɔ́, é nɔ kanbyɔ́ mɛ ɔ́ ɖɔ: “Fítɛ́ a gosín?” Nú mɛ ɔ́ ɖɔ: “Un gosín akɔta lě mɛ ɖo Izlayɛ́li” ɔ́,

³ é nɔ́ ɖɔ n'i ɖɔ: “Éɖíe, nǔ e a wa ɔ́ nyɔ́, hwɛ towe jɔ, amɔ̌, mɛɖé ɖo axɔ́sú ɔ́ xwé bó ɖo tó ná ɖó xó towe wɛ ǎ.”

⁴ É nɔ́ lɛ́ ɖɔ: “Nú nyɛ wɛ nɔ ɖɔ hwɛ ɖo tomɛ fí din ɔ́, mɛ e ɖo jlɛ ɖɔ wɛ lɛ́ɛ, abǐ mɛ e ɖó hwɛ ɖé bɔ è na ɖɔ gbo lɛ́ɛ bǐ ná nɔ wá mɔ mì, bɔ un ná nɔ ɖɔ hwɛ gbo nú yě.”

⁵ Nú mɛɖé sɛkpɔ́ ɛ bó ja kɔ́ ɖe gbé ɔ́, é nɔ jlɔ́ mɛ ɔ́, bó nɔ kplá así kɔ n'i.

⁶ Mɔ̌ wɛ Abusalɔ́mu nɔ bló gbɔn nú Izlayɛ́li ví e xwe axɔ́sú ɔ́ gɔ́n bó ná jɛ hwɛ n'i lɛ́ɛ bǐ. Nǔ énɛ́ e wa wɛ é ɖe ɔ́, ayi ɖó nukɔn nú Izlayɛ́li ví lɛ́ɛ wɛ é ká ɖe, bónú yě ná nɔ jǐ tɔn.

⁷ Xwe ɛnɛ gúdo ɔ́, Abusalɔ́mu yi mɔ axɔ́sú ɔ́ bó ɖɔ: “È nǐ ná gbe mì bónú ma yi Eblɔ́n, lobo ná yi ɖe akpá e un dó nú Mawu Mavɔmavɔ é.

⁸ Nǔ e wú un ɖɔ mɔ̌ ɔ́, hwenu e un ɖo Gɛcúu Silíi yíkúngban jí ɔ́, un ɖɔ nú Mawu Mavɔmavɔ ɖɔ nú é kplá mì yi Jeluzalɛ́mu ɔ́, un ná yi sá vɔ̌ n'i ɖo Eblɔ́n.”

⁹ Axɔ́sú ɔ́ ɖɔ n'i ɖɔ: “Yi kpó fífá kpó.” Bɔ Abusalɔ́mu wlí ali, bó yi Eblɔ́n.

¹⁰ Abusalɔ́mu sɛ́ nǔdobatɔ́ tɔn lɛ́ɛ dó akɔta Izlayɛ́li tɔn lɛ́ɛ ɖokpó ɖokpó mɛ, nú yě ná yi ɖɔ nú mɛ lɛ́ɛ ɖɔ: “Lanzo ɖɔ nǔ nú mi se ɔ́, mi ná sú xó bó ɖɔ: ‘Abusalɔ́mu yi zinkpo jí ɖo Eblɔ́n.’ ”

¹¹ Abusalɔ́mu da gbɛtɔ́ afɔɖé (200), bɔ yě kplá ɛ sín Jeluzalɛ́mu wá. Yě ká mɔ do nú nǔ e wa gbé yě xwe ɔ́ ǎ.

¹² Hwenu e Abusalɔ́mu ɖo vɔ̌ lɛ́ɛ sá wɛ ɔ́, é sɛ́ wɛn dó Axitofɛ́li e nɔ ɖe wě xá Davídi ɔ́, sín Gilóo toxo e mɛ é nɔ́ nɔ é. Abusalɔ́mu lɛ́ mɔ ahwan dó éɖée jí, bɔ gbě e blá wɛ yě ɖe ɔ́ lɛ́ ɖo syɛ́nsyɛ́n d'é jí wɛ.

Davídi hɔn sín Jeluzalɛ́mu

¹³ Mɛ ɖokpó wá ɖɔ nú Davídi ɖɔ: “Izlayɛ́li ví lɛ́ɛ ɖo Abusalɔ́mu jí.”

¹⁴ Ée Davídi se mɔ̌ tlóló ɔ́, é ɖɔ nú gǎn hɔn-yitɔ́ tɔn e ɖo Jeluzalɛ́mu fínɛ́ xá ɛ lɛ́ɛ bǐ ɖɔ: “Mi sɔ́ nǔ, nú mǐ ná hɔn yi, ɖó mǐ sɔ́ sixú wa nǔɖé bó gló Abusalɔ́mu ǎ. Mi yá wǔ, é má nyí mɔ̌ ǎ ɔ́, é ɖo nǎ lín wɛ cóbó ná tɔ́n ahwan mǐ, bó ná hu mǐ, bó ná hu mɛ e ɖo toxo ɔ́ mɛ lɛ́ɛ ǎ.”

¹⁵ Ée axɔ́sú ɔ́ ɖɔ mɔ̌ ɔ́, gǎn hɔn-yitɔ́ lɛ́ɛ ɖɔ n'i ɖɔ: “Sɛ́mɛɖó, mǐ ɖo gbesisɔ mɛ, mɛ ɖɔ nǔ ɖěbǔ ɔ́, mǐ ná bló bǐ.”

¹⁶ Axɔ́sú ɔ́ tɔ́n sín hɔn ɔ́ mɛ, bɔ mɛ tɔn lɛ́ɛ bǐ xwedó e, asi tɔn wǒ jɛ́n é jó dó nyi hɔn ɔ́ mɛ, bɔ yě ná kpé nukún d'é wú.

¹⁷ Hwenu e axɔ́sú ɔ́ kpó mɛ e xwedó e lɛ́ɛ kpó ɖo toxo ɔ́ mɛ tɔ́n sín wɛ ɔ́, yě nɔ te ɖo xwé gǔdo gúdo tɔn ɔ́ kpá.

¹⁸ Gǎn hɔn-yitɔ́ axɔ́sú ɔ́ tɔn lɛ́ɛ bǐ slɛ́, bó ɖo nukɔn tɔn gbɔn dín wɛ: Keleti lɛ́ɛ, Pɛlɛ́ti ví e nɔ cɔ́ axɔ́sú ɔ́ lɛ́ɛ, kpó gbɛtɔ́ nǔwɔntɔn (600) e xwedó e sín Gati lɛ́ɛ kpó. Yě bǐ ɖo nukɔn tɔn gbɔn dín wɛ.

¹⁹ Axɔ́sú ɔ́ kanbyɔ́ Itayi, ahwangán e kpa acɛ dó sɔ́ja e gosín Gati lɛ́ɛ ɔ́ ɖɔ: “Étɛ́wú a ka xwedó mǐ? Lɛ̌ kɔ bo yi nɔ kpɔ́ xá axɔ́sú yɔ̌yɔ́ ɔ́, ɖó jǒnɔ wɛ hwɛ nyí; to towe mɛ wɛ a hɔn sín, bó wá ɖo fí.

²⁰ A wǎ gɔ̌n ce din ɔ́, é lín ǎ, bɔ égbé din ɔ́, un ná kplá we bɔ a nǎ jɛ flúflú xá mǐ jí yi ɖisí amyɔ. Nyi lɔ ɖíe ma ko tunwun fí e un xwe é ǎ e. Kplá nɔví towe lɛ́ɛ, bónú hwi kpó yě kpó lɛ́ kɔ. Mawu Mavɔmavɔ ní nyɔ́ xomɛ dó wǔ we, bó nɔ gbejí nú we.”

²¹ Itayi ka xwlé Mawu nú axɔ́sú ɔ́ ɖɔ: “Mawu Mavɔmavɔ ɖo gbɛ! Sɛ́mɛɖó ce axɔ́sú ɔ́ ɖo gbɛ; è yi fí ɖé ɔ́, nyi lɔ ná yi. È nɔ gbɛ ɔ́, nyi lɔ ná nɔ gbɛ. È kú ɔ́, nyi lɔ ná kú.”

²² Ée é ɖɔ mɔ̌ ɔ́, Davídi ɖɔ: “É nyɔ́, bo wá yi.” Bɔ Itayi kpó sɔ́ja tɔn lɛ́ɛ kpó, kpó mɛ yětɔn lɛ́ɛ bǐ kpó wá yi.

²³ Hwenu e mɛ lɛ́ɛ ɖo wǐwá yi wɛ ɔ́, mɛ bǐ ɖo avǐ ya wɛ, bó ɖo xó sú wɛ. Davídi ka wlí ali e gbɔn Sedlɔ́n tɔ ɔ́ mɛ yi gbětótló mɛ é, é kpó ahwangbɛ́ tɔn lɛ́ɛ kpó.

²⁴ Vɔ̌sánú-xwlémawutɔ́ Sadɔ́ku lɔmɔ̌ ɖo fínɛ́, bɔ Levíi ví lɛ́ɛ hɛn akɔjijɛgbá Mawu tɔn, bó ɖo fínɛ́ xá ɛ. Yě zlɔ́n akɔjijɛgbá ɔ́, bɔ vɔ̌sánú-xwlémawutɔ́ Abiyatáa ɖo vɔ̌ sá nú Mawu wɛ káká bɔ togun ɔ́ bǐ tɔ́n sín toxo ɔ́ mɛ.

²⁵ Axɔ́sú ɔ́ ɖɔ nú vɔ̌sánú-xwlémawutɔ́ Sadɔ́ku ɖɔ: “Lɛ̌ zé akɔjijɛgbá ɔ́ yi ɖó toxo ɔ́ mɛ. Nú Mawu Mavɔmavɔ jló ná wa ɖagbe nú mì ɔ́, é ná bló bɔ un ná lɛ́ kɔ wá, bó ná lɛ́ mɔ akɔjijɛgbá tɔn kpó tɛn mímɛ́ tɔn kpó.

²⁶ Amɔ̌, nú é ma jló ná wa ɖagbe nú mì ǎ ɔ́, nyi ɖíe ɖo fí e, é ní wa nǔ ce lě e é jló e gbɔn é.”

²⁷ Axɔ́sú ɔ́ lɛ́ ɖɔ n'i ɖɔ: “A mɔ din a? Lɛ̌ kɔ yi kpó fífá kpó, hwi kpó vǐ towe Aximáasi kpó Abiyatáa kpó vǐ tɔn Jonatáan kpó.

²⁸ Nyɛ ɔ́, un ná yi nɔ te ɖo gbětótló mɛ, fí e è nɔ zɔn afɔ gbɔn Judɛ́ɛn tɔ ɔ́ mɛ dín ɖe ɔ́ kpá, káká jɛ hwenu e un ná se wɛn mitɔn dó é.”

²⁹ Ée axɔ́sú ɔ́ ɖɔ mɔ̌ ɔ́, Sadɔ́ku kpó Abiyatáa kpó ɖíɖá akɔjijɛgbá ɔ́ bo lɛ́ kɔ yi Jeluzalɛ́mu, bó cí fínɛ́.

Davídi sɛ́ Hucáyi dó bɔ é yi ba do nú Abusalɔ́mu

³⁰ Davídi ɖo Olívutín só ɔ́ jí xá wɛ kpó avǐ kpó, bó cyɔ́n nǔ ta, bo ɖo afɔ vɔ́. Mɛ e xwedó e lɛ́ɛ lɔmɔ̌ cyɔ́n nǔ ta, bo ɖo avǐ ya wɛ, bó ɖo só ɔ́ jí xá wɛ.

³¹ È wa ɖɔ nú Davídi ɖɔ Axitofɛ́li ɖo mɛ e ɖo Abusalɔ́mu jí, bó ɖo gbě tɔn blá wɛ lɛ́ɛ mɛ, bɔ Davídi sú xó bo ɖɔ: “Mawu Mavɔmavɔ, blǒ bónú nǔ e Axitofɛ́li ná kplɔ́n Abusalɔ́mu lɛ́ɛ ní nyí nǔ yǎyá.”

³² Hwenu e Davídi ɖo só ɔ́ jí xá wɛ, ɖo fí e é ná ɖe kɔ́ nú Mawu ɖe ɔ́, é mɔ Hucáyi Aakíti ɔ́ ɖo nukɔn tɔn, bɔ awu tɔn bǐ vún, bɔ é lɛ kɔ́ dó ta.

³³ Bɔ Davídi ɖɔ n'i ɖɔ: “Ma xwedó mì ó; a xwedó mì ɔ́, a nǎ nyí agban bo ná nɔ kɔ jí nú mì.

³⁴ Nǔ e a nǎ wa ɔ́, a nǎ lɛ́ kɔ yi toxo ɔ́ mɛ, bó ná yi ɖɔ nú Abusalɔ́mu ɖɔ: ‘Sɛ́mɛɖó, un ɖo kan mɛtɔn nu. Đ'ayǐ ɔ́, tɔ́ mɛtɔn sín mɛsɛntɔ́ wɛ un nyí, amɔ̌, din ɔ́, mɛ wɛ un ɖó ná sɛn.’ Nú a ɖɔ mɔ̌ n'i ɔ́, a nǎ dó alɔ mì, bɔ nǔ e Axitofɛ́li ná kplɔ́n ɛ ɔ́, a nǎ hɛn bǐ gblé.

³⁵ A blǒ mɔ̌ ɔ́, vɔ̌sánú-xwlémawutɔ́ Sadɔ́ku kpó Abiyatáa kpó ná nɔ jǐ we. A nǎ ɖɔ nǔ e a se ɖo hɔnmɛ ɔ́ bǐ nú yě.

³⁶ Aximáasi Sadɔ́ku ví ɔ́ kpó Jonatáan Abiyatáa ví ɔ́ kpó ɖo fínɛ́ xá yě; ényí mi se xó ɖé ɔ́, mi ná nɔ ɖɔ sɛ́ dó mì gbɔn yě jí.”

³⁷ Hucáyi Davídi xɔ́ntɔn ɔ́ lɛ́ kɔ yi Jeluzalɛ́mu, bɔ Abusalɔ́mu lɔmɔ̌ ko ɖo fínɛ́ wá wɛ hwenɛ́nu.