2 Samuwɛ́li 14 - MAWUXÓWÉMA

¹ Jowabu Selúya ví ɔ́ mɔ ɖɔ Davídi ɖo ganjí xá Abusalɔ́mu,

² bó sɛ́ mɛ dó nyɔ̌nu bíbí ɖokpó gbé mɛ, ɖo Tekowa, bɔ é wá lobɔ é ɖɔ n'i ɖɔ: “A nǎ wa nǔ mɛ ɖo aluwɛ mɛ ɖɔhun, bó ná dó nǔwamɛwu; a nǎ sá nǔsáwǔ ǎ, a nǎ cí nyɔ̌nu e mɛ tɔn ɖé kú bɔ é ɖo avǐ tɔn ya wɛ bɔ é kó lín é ɖɔhun.

³ Mɔ̌ wɛ a nǎ zɔn, bó yi axɔ́sú ɔ́ gɔ́n, bó ná ɖɔ xó e un ná ɖɔ nú we lɛ́ɛ n'i.” Bɔ Jowabu ɖɔ xó e nyɔ̌nu ɔ́ ná yi ɖɔ nú Davídi ɔ́ n'i.

⁴ Nyɔ̌nu ɔ́ yi mɔ axɔ́sú ɔ́, bó xwe agbɔ̌nnusú do ɖo asá tɔn mɛ bó sú xó ɖɔ: “Sɛ́mɛɖó, hwlɛ́n mì!”

⁵ Bɔ axɔ́sú ɔ́ kanbyɔ́ ɛ ɖɔ: “Nɛ̌ ká gbɔn nú we?” Bɔ nyɔ̌nu ɔ́ ɖɔ: “Asú ce wɛ kú, asúkúsi wɛ nú mì.

⁶ Un ka ɖó vǐ súnnu we bɔ yě xo hun ɖo gle mɛ, bɔ mɛ ɖokpó hu mɛ ɖokpó, ɖó mɛ ɖěbǔ ɖo fínɛ́ bó ɖá yě ǎ.

⁷ Din ɔ́, hɛ̌nnu ɔ́ bǐ sí te dó nyɛ mɛsɛntɔ́ mɛtɔn jí, bó nɔ́ ɖɔ: ‘Ɖe mɛ e hu nɔví tɔn é tɔ́n nú mǐ, nú mǐ ná hu i. Mǐ nǎ hu i dó ba hlɔn nú nɔví tɔn e kú é! Mǐ ná hu i, bó ná sú gǔɖutɔ́ ɔ́ sín kún dó.’ Ényí yě bló mɔ̌ din ɔ́, yě ná vívá nǔ e ɖó nukún wɛ un ɖe ɔ́ sín kún dó, bɔ asú ce sɔ́ ná ɖó donu ɖěbǔ ɖo ayǐkúngban jí fí ǎ.”

⁸ Ée é ɖɔ mɔ̌ ɔ́, axɔ́sú ɔ́ ɖɔ n'i ɖɔ: “Yi xwé towe gbe, un ná ɖɔ xó dó xó towe wú.”

⁹ Ée axɔ́sú ɔ́ ɖɔ mɔ̌ ɔ́, nyɔ̌nu ɔ́ lɛ́ ɖɔ n'i ɖɔ: “Sɛ́mɛɖó! Nú é ji nǔɖé ɔ́, nyɛ kpó mɛ ce lɛ́ɛ kpó wɛ ná kpan. Nǔ e é ná ji ɔ́ ná nɔ kɔ nú mɛ ǎ, é ká ná nɔ kɔ nú acɛkpikpa mɛtɔn ǎ.”

¹⁰ Bɔ axɔ́sú ɔ́ ɖɔ n'i ɖɔ: “Ényí mɛ ɖé kɛ nu dó wǔ we hǔn, kplá mɛ ɔ́ wá nú mì; é sɔ́ ná ɖo yiyi wɛ bo ná ɖɔ nǔɖé nú we gbeɖé ǎ.”

¹¹ Bɔ nyɔ̌nu ɔ́ ɖɔ: “Sɛ́mɛɖó, è nǐ zin alɔ dó akɔ́n nú mì ɖo Mawu Mavɔmavɔ, Mawu mɛtɔn nukɔn, bónú mɛ e ja vǐ ce sín hlɔn ba gbé ɔ́ má ɖo nǔ dó sin wɛ káká bó wá hu vǐ ɖokpó e kpo nú mì é ó.” Bɔ axɔ́sú ɔ́ xwlé Mawu n'i ɖɔ: “Mawu Mavɔmavɔ ɖo gbɛ; ɖa e ɖo vǐ towe ta é ɖokpó ná jɛ kɔ́ mɛ ǎ. Nyi wɛ ɖɔ mɔ̌ nú we.”

¹² Bɔ nyɔ̌nu ɔ́ ɖɔ: “Sɛ́mɛɖó, è kɛnklɛ́n má lɛ́ ɖɔ xó ɖokpó nú mɛ.” Bɔ axɔ́sú ɔ́ ɖɔ: “A ɖǒ xó ɖé hǔn ɖɔ.”

¹³ Bɔ é ɖɔ nú axɔ́sú ɔ́ ɖɔ: “Étɛ́wú mɛ ka lin nǔ mɔ̌hun dó togun Mawu tɔn wú? Lě e mɛ ɖɔ xó gbɔn din zaanɖé ɔ́ slɛ́ mɛ, ɖɔ mɛ wa nǔ nyi do. Étɛ́wú mɛ ma ka sɛ́ wɛn dó Abusalɔ́mu bónú é gosín to e mɛ é hɔn yi cí é, bó wá xwé ǎ.

¹⁴ Nǔgbó wɛ; mǐ bǐ wɛ ná kú bó yi sin e gba kɔn nyi kɔ́ mɛ bɔ è ma sɔ́ sixú xwá ǎ é ɖɔhun. Amɔ̌, linlin Mawu tɔn wɛ nyí ɖɔ mɛ e è gbɛ̌ sín vǐ mɛ din bɔ é yi é ɔ́, má sɔ́ wá ó ǎ.

¹⁵ Sɛ́mɛɖó, ényí un wá ɖo xó élɔ́ lɛ́ɛ ɖɔ nú mɛ wɛ égbé din ɔ́, xɛsi e dó mì wɛ togun ɔ́ ɖe ɔ́ wɛ zɔ́n. Bɔ un gbɔ bo ɖɔ un ná wá jɛ hwɛ nú mɛ, afɔ nyɔ́ ɔ́, mɛ sixú bló nǔ e ba wɛ un ɖe ɔ́ nú mì.

¹⁶ Axɔ́sú ɔ́ ná hwlɛ́n nyi kpó vǐ ce kpó gán ɖo mɛ e jló ná ɖe mǐ sín togun Mawu tɔn mɛ ɔ́ sí.

¹⁷ Sɛ́mɛɖó, nǔ e un nɔ lin ɔ́ ɖíe: ‘Xó e axɔ́sú ɔ́ ná ɖɔ ɔ́ ná fá xomɛ nú mɛ bǐ, ɖó sɛ́mɛɖó ce ɔ́, wɛnsagun Mawu tɔn ɖɔhun wɛ mɛ cí, mɛ tunwun nǔ e nyɔ́ ɔ́ kpó nǔ e gblé ɔ́ kpó.’ Mawu Mavɔmavɔ, Mawu mɛtɔn ní nɔ kpɔ́ xá mɛ.”

¹⁸ Bɔ axɔ́sú ɔ́ ɖɔ nú nyɔ̌nu ɔ́ ɖɔ: “Un ná kan nǔ ɖokpó byɔ́ we. Ma hwlá xomɛ dó mì ó.” Bɔ nyɔ̌nu ɔ́ ɖɔ: “Sɛ́mɛɖó, un ɖo xó mɛtɔn se wɛ.”

¹⁹ Bɔ axɔ́sú ɔ́ ɖɔ: “Xó énɛ́ lɛ́ɛ e a ɖɔ nú mì din ɔ́, Jowabu ɖó nu ɖ'é mɛ ǎ cé?” Bɔ nyɔ̌nu ɔ́ xwlé nǔ nú axɔ́sú ɔ́ ɖɔ: “Sɛ́mɛɖó, mɛ ɖo gbɛ; xó nǔgbó ɔ́ nɛ́ mɛ ɖɔ nɛ́. Mɛsɛntɔ́ mɛtɔn Jowabu wɛ to nǔ e un wá ɖɔ lɛ́ɛ bǐ dó así nú mì.

²⁰ É wa mɔ̌ bó ná dó dɔn nǔ lɛ́ɛ bǐ wlú. Amɔ̌, hwɛ sɛ́mɛɖó ɔ́, mɛ ɖó nǔnywɛ́ wɛnsagun Mawu tɔn ɖɔhun, bó nɔ tunwun nǔ e ɖo jijɛ wɛ ɖo ayǐkúngban ɔ́ jí é.”

²¹ Énɛ́ ɔ́ gúdo ɔ́, axɔ́sú ɔ́ ɖɔ nú Jowabu ɖɔ: “Un ná gbɔ bo bló lě e a ɖɔ gbɔn é. Yi kplá vǐ ce Abusalɔ́mu wá.”

²² Ée axɔ́sú ɔ́ ɖɔ mɔ̌ ɔ́, Jowabu xwe agbɔ̌nnusú do, bó ɖe kɔ́, bó dó kú nú mɛ bo ɖɔ: “Sɛ́mɛɖó, nyi mɛsɛntɔ́ mɛtɔn mɔ din ɖɔ un mɔ fɛ́nú ɖo gɔ̌n mɛtɔn, ɖó mɛ bló nǔ e nyɛ mɛsɛntɔ́ mɛtɔn jló é.”

²³ Ée é ɖɔ mɔ̌ ɔ́, é sí te bo yi Gɛcúu, bó yi kplá Abusalɔ́mu wá Jeluzalɛ́mu.

²⁴ Lo ɔ́, axɔ́sú ɔ́ ɖɔ: “É ní yi xwé tɔn gbe; é ná mɔ nukún ce mɛ ǎ.” Bɔ Abusalɔ́mu yi xwé tɔn gbe; é mɔ axɔ́sú ɔ́ nukún mɛ nǔgbó ǎ.

Davídi dó hwɛ gbɔ xá Abusalɔ́mu

²⁵ Mɛ ɖěbǔ ɖo Izlayɛ́li to ɔ́ mɛ bó nyɔ́ ɖɛkpɛ sɔ Abusalɔ́mu ǎ. È kpɔ́n ɛ sín ta káká yi afɔ ɔ́, blɔ̌ ɖěbǔ ɖo wǔ tɔn ǎ.

²⁶ Xwewú xwewú tɛgbɛ ɔ́, nú ɖa tɔn gɔ́ dín ɔ́, è nɔ kpa n'i. Đa e è nɔ kpa sín ta n'i ɔ́ nɔ da hú kilóo we.

²⁷ Abusalɔ́mu ɖó vǐ súnnu atɔn, vǐ nyɔ̌nu ɖokpó. È nɔ ylɔ́ vǐ nyɔ̌nu ɔ́ ɖɔ Tamáa. Vǐ ɖé wɛ bó nyɔ́ ɖɛkpɛ ɖésú.

²⁸ Abusalɔ́mu bló xwe we ɖo Jeluzalɛ́mu ma mɔ axɔ́sú ɔ́ nukún mɛ.

²⁹ É sɛ́ wɛn dó Jowabu gbe ɖokpó, bó ná sɛ́ ɛ dó axɔ́sú ɔ́ gɔ́n, bɔ Jowabu ka jló ná wá ǎ. Abusalɔ́mu lɛ́ sɛ́ wɛn dó e azɔn wegɔ́ ɔ́ bɔ Jowabu lɛ́ gbɛ́ wǐwá.

³⁰ Bɔ Abusalɔ́mu gbɔ bo ɖɔ nú mɛsɛntɔ́ tɔn lɛ́ɛ ɖɔ: “Mi mɔ Jowabu sín gle a, é ɖo gle ce kpá; ɔ́ji ɖo gle ɔ́ jí din. Mi yi dó gle ɔ́ zo.” Bɔ mɛsɛntɔ́ lɛ́ɛ yi dó gle ɔ́ zo nǔgbó.

³¹ Jowabu sɔ́ nǔ tlóló bó yi mɔ Abusalɔ́mu ɖo xwé tɔn gbe, bó ɖɔ: “Étɛ́wú mɛsɛntɔ́ towe lɛ́ɛ ka dó gle ce zo?”

³² Bɔ Abusalɔ́mu yí gbe nú Jowabu ɖɔ: “Nǔ e wú wɛ ɔ́, un ɖɔ hwi ní wá gɔ̌n ce bɔ a gbɛ̌. Un ka jló ná sɛ́ we dó axɔ́sú ɔ́ gɔ́n wɛ, bɔ a nǎ yi kanbyɔ́ ɛ nú mì ɖɔ étɛ́wú un ka lɛ́ kɔ sín Gɛcúu wá é jí? Un gbɔ bo nɔ dɔ̌n ɔ́, é nyɔ́ hú. Din ɔ́, un jló ná yi mɔ axɔ́sú ɔ́, bónú hwɛ ɖé wɛ un hu ɔ́, é ná gbɔ bo hu mì.”

³³ Jowabu yi dó wɛn énɛ́ axɔ́sú ɔ́, bɔ axɔ́sú ɔ́ sɛ́ wɛn dó Abusalɔ́mu, bɔ é kán wezun bo wá xwe agbɔ̌nnusú do ɖo axɔ́sú ɔ́ sá mɛ. Énɛ́ ɔ́, axɔ́sú ɔ́ kplá así kɔ n'i.