2 Samuwɛ́li 13 - MAWUXÓWÉMA

¹ Énɛ́ ɔ́ gúdo ɔ́, nǔ e wá jɛ ɔ́ ɖíe: Abusalɔ́mu Davídi ví ɔ́ ɖó nɔví nyɔ̌nu ɖokpó. É nyɔ́ ɖɛkpɛ ɖésú; è nɔ ylɔ́ ɛ ɖɔ Tamáa. Davídi ɔ́, vǐ tɔn súnnu ɖokpó tíin, bɔ è nɔ ylɔ́ ɛ ɖɔ Amunɔ́ɔ. É yí wǎn nú tɔ́ví tɔn Tamáa ɔ́ ɖésú.

² Wǎn e Amunɔ́ɔ yí nú tɔ́ví tɔn Tamáa ɔ́ dó azɔn ɛ, lo ɔ́, Amunɔ́ɔ tunwun lě e é ná sɛkpɔ́ ɛ gbɔn é ǎ, ɖó é kpo ɖo alɔ jí.

³ Amunɔ́ɔ ka ɖó xɔ́ntɔn súnnu ɖokpó, bɔ è nɔ ylɔ́ ɛ ɖɔ Yonadávu. Davídi nɔví Cimɛ́ya sín vǐ wɛ. Yonadávu ka nyí mɛɖé bó bí ɖésú.

⁴ É kanbyɔ́ Amunɔ́ɔ ɖɔ: “Hwɛ mɛ e nyí axɔ́sú ɖokpó sín vǐ é ɔ́, étɛ́wú a ka fɔ́n tɛgbɛ bo ɖo wǔ blá wɛ mɔ̌? A jlǒ ná ɖɔ nǔ e wú wɛ ɔ́ nú mì ǎ cé?” Amunɔ́ɔ ɖɔ n'i ɖɔ: “Tɔ́ví ce Abusalɔ́mu sín nɔví Tamáa ɔ́ wɛ un yí wǎn nǎ.”

⁵ Yonadávu ɖɔ n'i ɖɔ: “Yi mlɔ́ ayǐ bó bló azunzɔnnɔ. Nú tɔ́ towe wá mɔ we ɔ́, a nǎ ɖɔ n'i ɖɔ: ‘Yi ɖɔ nú nɔví ce Tamáa ní wá ná nǔɖuɖu mì nú má ɖu. É ní wá ɖa nǔɖuɖu ɔ́ ɖo nukún ce mɛ bónú má mɔ. É ɖésúnɔ wɛ ná dó nú mì, bɔ un ná ɖu.’ ”

⁶ Nǔgbó ɔ́, Amunɔ́ɔ mlɔ́ ayǐ, bó bló azunzɔnnɔ, bɔ axɔ́sú ɔ́ wá kpɔ́n ɛ, bɔ Amunɔ́ɔ ɖɔ n'i ɖɔ: “Nǎ gbe nɔví ce Tamáa nú é wá bló wɔ̌xúxú we nú mì, bo ná ná mì bɔ un ná ɖu.”

⁷ Davídi sɛ́ wɛn dó Tamáa ɖo xwé tɔn gbe ɖɔ: “Yi nɔví towe Amunɔ́ɔ xwé, bó ɖa nǔɖuɖu n'i.”

⁸ Tamáa yi Amunɔ́ɔ gɔ́n, bó mɔ ɛ ɖo ayǐmlɔ́mlɔ́. É zé linfín bó nya, bó mlí, bó ɖa wɔ̌xúxú ɖo nukún tɔn mɛ.

⁹ É húzú wɔ̌xúxú ɔ́ sín gannú e mɛ é ɖa ɖe é, bó zé nú Amunɔ́ɔ, é ká gbɛ́ ɖuɖu, lobo ɖɔ mɛ bǐ ní tɔ́n, bɔ mɛ bǐ tɔ́n nǔgbó.

¹⁰ Bɔ Amunɔ́ɔ ɖɔ nú Tamáa ɖɔ: “Zě nǔɖuɖu ɔ́ sɛkpɔ́ mì ɖo zan ce tó, bó dó nú mì, nú má ɖu.” Tamáa zé nǔɖuɖu e é bló ɔ́ yi jó nú Amunɔ́ɔ ɖo xɔnɔnɔ ɔ́ mɛ, ɖo zan tɔn tó.

¹¹ Hwenu e Tamáa ɖo nǔɖuɖu ɔ́ dó n'i wɛ ɔ́, Amunɔ́ɔ zunfán ɛ, bó ɖɔ: “Nɔví ce, wǎ mǐ ní mlɔ́ ayǐ.”

¹² Bɔ Tamáa sú xó, bó ɖɔ: “Gbɔ nú mì Amunɔ́ɔ; ma hwlɛ́n kan xá mì ó! È nɔ wa mɔ̌ ɖo Izlayɛ́li ǎ. Ma wa hɛ̌nnú nɛ́ ó!

¹³ Fítɛ́ un ná yi nɔ kpó winnyá énɛ́ kpó? Bɔ hwɛ ná húzú nǔ baɖabaɖa ɖo Izlayɛ́li to ɔ́ mɛ. Din ɔ́, nǔ e byɔ́ we wɛ un ɖe ɔ́, a nǎ yi ɖɔ nú axɔ́sú ɔ́. Un ɖi ɖɔ é ná gbɛ́ ɖɔ émí kún ná sɔ́ mì da nú we ó ǎ.”

¹⁴ Amunɔ́ɔ ka jló ná se gbɔ ǎ; é hwlɛ́n kan xá ɛ bó ɖó xó xá ɛ.

¹⁵ Ée é bló mɔ̌ fó ɔ́, é jɛ wǎn gbɛ́ n'i jí; wǎn e é gbɛ́ n'i ɔ́ syɛ́n hú wǎn e é yí n'i ɖ'ayǐ é; é ɖɔ n'i ɖɔ: “Alě! Sí te bo tɔ́n!”

¹⁶ Bɔ Tamáa sú xó bó ɖɔ n'i ɖɔ: “Gbɔ, ma nya mì mɔ̌ ó, nǔ énɛ́ e wa wɛ a ɖe ɔ́ ná lɛ́ nylá hú ée a blǒ wá yi din é.” Amunɔ́ɔ ka jló ná se xó e ɖɔ wɛ é ɖe ɔ́ ǎ.

¹⁷ É ylɔ́ nyaví mɛsɛntɔ́ e ɖo gɔ̌n tɔn é, bó ɖɔ n'i ɖɔ: “Đe nyɔ̌nu élɔ́ tɔ́n sín fí, bó dó gan hɔn ɔ́ mɛ.”

¹⁸ Nyaví ɔ́ nya Tamáa tɔ́n, bó dó gan hɔn ɔ́ mɛ. Tamáa ka dó awu gaga ɖagbe ɖagbe ɖé, lě e axɔ́ví e ma ko da asú ǎ lɛ́ɛ nɔ dó gbɔn é.

¹⁹ É lɛ afín dó ta, bó vún awu dó kɔ nú éɖée, bó kplá así ta bo wlí xósúsú bo ɖidó.

²⁰ Nɔví tɔn Abusalɔ́mu kanbyɔ́ ɛ ɖɔ: “Nɔví, é má nyí Amunɔ́ɔ wɛ hwlɛ́n kan xá we bó ɖó xó xá we a? Ma ɖɔ nú mɛɖé ó, ɖó nɔví towe wɛ; ma dó ga nú xó nɛ́ ɔ́ dín ó.” Sín hwenɛ́nu ɔ́, Tamáa gbɔ bo cí nɔví tɔn Abusalɔ́mu xwé, nyɔ̌nu e è jǒ dó é ɖɔhun.

²¹ Ée axɔ́sú Davídi se xó nɛ́ ɔ́, xomɛ sin i ɖésú, có é kɛ nu d'é wú nú Amunɔ́ɔ ǎ, ɖó vǐ súnnu ɖaxó tɔn wɛ, bɔ é yí wǎn n'i ɖésú.

²² Xó nɛ́ ɔ́ nyɔ́ kpó é nylá kpó ɔ́, Abusalɔ́mu kɛ nu d'é wú nú Amunɔ́ɔ ǎ. Amɔ̌, Amunɔ́ɔ sín nǔ nɔ ɖo Abusalɔ́mu wú vɛ́ wɛ, ɖó kan e é hwlɛ́n xá nɔví tɔn, bó ɖó xó xá ɛ é wú.

Abusalɔ́mu zɔ́n bɔ è hu Amunɔ́ɔ

²³ Ée nǔ énɛ́ lɛ́ɛ jɛ bɔ é bló xwe we ɔ́, mɛ e nɔ kpa fún nú gbɔ̌ lɛ́ɛ ɔ́ ɖo fún kpa nú Abusalɔ́mu sín gbɔ̌ lɛ́ɛ wɛ, ɖo Baalu-Hasɔ́ɔ, ɖo Eflayímu kpá. Énɛ́ ɔ́ wú wɛ Abusalɔ́mu jló ná ylɔ́ axɔ́sú ɔ́ sín vǐ lɛ́ɛ bǐ.

²⁴ Abusalɔ́mu yi mɔ axɔ́sú ɔ́, bó ɖɔ n'i ɖɔ: “Sɛ́mɛɖó, mɛ e nɔ kpa fún nú gbɔ̌ lɛ́ɛ é ɖo fún kpa nú gbɔ̌ ce lɛ́ɛ wɛ. Un jló ɖɔ mɛ kpó gǎn hɔn-yitɔ́ mɛtɔn lɛ́ɛ kpó ní wá ɖu agɔ̌ xá mì.”

²⁵ Axɔ́sú ɔ́ ka ɖɔ nú Abusalɔ́mu ɖɔ: “Éeǒ vǐ ce; é byɔ́ ɖɔ mǐ bǐ ná wá ǎ, ɖó mǐ táá nyí agban bo ná nɔ kɔ nú we.” Abusalɔ́mu jɛ kɔ n'i, lo ɔ́, axɔ́sú ɔ́ jló ná yi ǎ, bo gbɔ bo xo ɖɛ dó jǐ tɔn.

²⁶ Abusalɔ́mu ɖɔ nú axɔ́sú ɔ́ ɖɔ: “È ma ná kɛnklɛ́n bo ná gbe nɔví ce Amunɔ́ɔ bónú é ná xwedó mǐ yi a?” Bɔ axɔ́sú ɔ́ ɖɔ: “Étɛ́wú é ká ná xwedó mi yi?”

²⁷ Abusalɔ́mu ka ɖo kɔ jɛ nú axɔ́sú ɔ́ wɛ káká bɔ é gbɔ bó jó Amunɔ́ɔ kpó vǐ tɔn ɖě lɛ́ɛ bǐ kpó dó, bɔ yě xwedó e yi.

²⁸ Abusalɔ́mu ná gbe mɛsɛntɔ́ tɔn lɛ́ɛ ɖɔ: “Mi ɖo hwenu e Amunɔ́ɔ ná nu ahan mú bó ɖo awǎ jɛ wɛ ɔ́ cɔ́ wɛ, bónú un ɖɔ nú mi ɖɔ: ‘Mi hu Amunɔ́ɔ’ ɔ́, mi ná hu i. Mi ma ɖi xɛsi ó, nyi wɛ ná gbe tɔn mi. Mi kpan akɔ́n, bó dó súnnu gán.”

²⁹ Abusalɔ́mu sín mɛsɛntɔ́ lɛ́ɛ wa Amunɔ́ɔ nú lě e Abusalɔ́mu zɔ́n yě gbɔn é, bɔ axɔ́sú Davídi sín vǐ lɛ́ɛ bǐ sí te, bɔ mɛ ɖokpó ɖokpó xá sɔ́tócí tɔn jí bó hɔn.

³⁰ Hwenu e yě ɖo ali jí ja xwé ɔ́, Davídi se ɖɔ Abusalɔ́mu hu vǐ émítɔn lɛ́ɛ bǐ, bɔ é kún sɔ́ kpo mɛ ɖokpó géé ɖo gbɛ ó.

³¹ Ée Davídi se mɔ̌ ɔ́, é sí te bo vún awu dó kɔ nú éɖée, bó mlɔ́ kɔ́ mɛ. Mɛsɛntɔ́ tɔn lɛ́ɛ lɔmɔ̌ vún awu dó kɔ nú yěɖée, bó lɛ́ lɛ̌ dó e.

³² Yonadávu, Davídi nɔví Cimɛ́ya ví ɔ́ yí xó, bó ɖɔ: “Sɛ́mɛɖó, è ma vɛdó ɖɔ vǐ mɛtɔn lɛ́ɛ bǐ wɛ è hu sín ó. Amunɔ́ɔ kɛ́ɖɛ́ wɛ kú. Nǔ e lin wɛ Abusalɔ́mu ka ɖe sín gbe e gbe Amunɔ́ɔ hwlɛ́n kan xá nɔví tɔn Tamáa bó ɖó xó xá ɛ ɔ́ ka nɛ́.

³³ Sɛ́mɛɖó, è ma zé dó ayi mɛ ɖɔ vǐ mɛtɔn lɛ́ɛ bǐ wɛ è hu bo ɖo nǔ lin kpɔ́n wɛ dín ó. Amunɔ́ɔ ɖokpónɔ wɛ kú.

³⁴ Abusalɔ́mu ka hɔn yi.” Nyaví dɔ̌nkpɛvú e nɔ ɖo ali cɔ́ wɛ ɔ́ zé ta bo kpɔ́n zɔ sɛ́ dó, bó mɔ gbɛtɔ́ wɔ̌buwɔ́bú ɖé ɖo ali e gosín sókan mɛ bó ɖo gǔdo tɔn é jí jǎwe.

³⁵ Énɛ́ ɔ́, Yonadávu ɖɔ nú axɔ́sú Davídi ɖɔ: “Sɛ́mɛɖó, vǐ mɛtɔn lɛ́ɛ ɖíe jǎwe e; un ma ɖɔ mɔ̌ nú mɛ a?”

³⁶ Yonadávu ɖo xó ɖɔ fó wɛ kɛ́ɖɛ́ bɔ axɔ́sú ɔ́ sín vǐ lɛ́ɛ wá, bó wlí avǐ, bɔ axɔ́sú ɔ́ kpó gǎn hɔn-yitɔ́ tɔn lɛ́ɛ kpó bǐ y'avǐ xá yě, ɖasin hoho.

³⁷ Abusalɔ́mu hɔn bo yi cí Talumayi Amumihúu ví, Gɛcúu xɔ́sú ɔ́ xwé. Davídi ka fɔ́n bó ɖo vǐ tɔn sín aluwɛ mɛ.

³⁸ Abusalɔ́mu hɔn bo yi cí Gɛcúu bó nɔ fínɛ́ nú xwe atɔn.

³⁹ Hwenɛ́nu ɔ́, Davídi sɔ́ ɖo Abusalɔ́mu sín gbě nya wɛ ǎ, ɖó é kó sɔ́ vǐ tɔn Amunɔ́ɔ e kú ɔ́ sá wǔ.