2 Piyɛ́ɛ 3 - MAWUXÓWÉMA

Aklúnɔ dó akpá ɖɔ émí ná wá

¹ Mɛvívɛ́ná ce lɛ́ɛ mi, wěma wegɔ́ ɔ́ ɖíe wlán sɛ́ dó mi wɛ un ɖe e. Đo wěma we lɛ́ɛ bǐ mɛ ɔ́, un nɔ ba ná fɔ́n linlin e sɔgbe lɛ́ɛ ɖo ayixa mitɔn mɛ, gbɔn nǔkplɔ́nmɛ e un nɔ flín mi lɛ́ɛ gbla mɛ.

² Un jló ɖɔ mi ná nɔ flín xó e gbeyíɖɔ mímɛ́ Mawu tɔn lɛ́ɛ ɖɔ ɖ'ayǐ xóxó lɛ́ɛ kpódó nǔ e Aklúnɔ Mɛhwlɛ́ngántɔ́ zɔ́n ɖɔ mi ní wa, bɔ mɛsɛ́dó mitɔn lɛ́ɛ kplɔ́n mi ɔ́ kpán.

³ Nǔ e mi ná tunwun jɛ nukɔn ɔ́ wɛ nyí ɖɔ: ɖo azǎn gǔdo gúdo tɔn lɛ́ɛ mɛ ɔ́, mɛ e nɔ zán gbɛ yětɔn lě e jlǒ yě ɖésúnɔ tɔn ba gbɔn lɛ́ɛ ná ɖe yěɖée xlɛ́. Yě ná ɖɔ slǎmɛ mi wú,

⁴ bó ná ɖɔ: “É dó akpá ɖɔ émí ná wá; mɔ̌ wɛ ǎ cé? Énɛ́! Fítɛ́ é ka ɖe? Tɔ́gbó mǐtɔn lɛ́ɛ ko kú; lo ɔ́, nǔ bǐ ɖo lě e é ko ɖe gbɔn sín hwenu e gbɛ ɔ́ ko tíin ɔ́ ɖokpóó é.”

⁵ Yě nɔ jló bó nɔ wɔn ɖɔ é ko lín din bɔ Mawu ɖɔ xó bɔ jǐnukúnsin kpó ayǐkúngban kpó tíin. Ayǐkúngban ɔ́, sin mɛ wɛ è dɔn ɛ sín; sin wɛ é dó bló ná.

⁶ Mɔ̌ ɖokpó ɔ́, sin wɛ Mawu dó vɔ gbɛ xóxó ɔ́ ná; tɔ ɖi sin kpé fí bǐ; sin énɛ́ wɛ é dó vɔ gbɛ ɔ́ ná.

⁷ Lo ɔ́, xó ɖokpó ɔ́ wɛ Mawu dó zé jǐnukúnsin kpó ayǐkúngban din tɔn ɔ́ kpó ɖ'ayǐ, bó ná wá zé myɔ dó vɔ yě ná. É hɛn yě ɖó te nú gbe e gbe é ná wá ɖó hwɛ nú mɛ nyanya lɛ́ɛ, bó ná vɔ yě dó é.

⁸ Lo ɔ́, nɔví ce vívɛ́ná lɛ́ɛ mi, nǔ ɖokpó ka tíin, bɔ mi ɖó ná wɔn ǎ: é wɛ nyí ɖɔ, ɖo Aklúnɔ nukɔn ɔ́, azǎn ɖokpó cí xwe afatɔ́n ɖɔhun, bɔ xwe afatɔ́n cí azǎn ɖokpó ɖɔhun.

⁹ Aklúnɔ nɔ lín có bó nɔ ɖe akpá e é dó lɛ́ɛ, lě e mɛɖé lɛ́ɛ nɔ vɛdó ɔ́ ǎ. Lo ɔ́, é nɔ ɖó suúlu dó mi wú; ɖó é jló ɖɔ mɛ ɖěbǔ ní dɔn ǎ; é nyɔ́ wa ɔ́, é jló ɖɔ mɛ bǐ ní mɔ ali, bó lɛ́ kɔ sín nǔ nyanya wiwa gúdo.

¹⁰ É ka ɖo mɔ̌ có, Aklúnɔ sín azǎn ɔ́ ná wá ajotɔ́ ɖɔhun. Azǎn énɛ́ gbe ɔ́, jǐnukúnsin ná bú kpó zǐngídi ɖaxó ɖé kpó; Mawu ná zé myɔ dó vɔ nǔ e ɖo jǐnukúnsin lɛ́ɛ ná; ayǐkúngban kpó nǔ e ɖ'é mɛ lɛ́ɛ kpó bǐ ná bú.

¹¹ Ée é nyí ɖɔ nǔ énɛ́ lɛ́ɛ bǐ ná vɔ gbɔn mɔ̌ ɔ́, mi mɔ nukúnnú jɛ ninɔmɛ e mi ɖó ná ɖó ɔ́ wú ganjí. Mi ɖó ná nɔ zán gbɛ mímɛ́, bó ná nɔ ɖó sísí nú Mawu,

¹² lobo ná ɖo te kpɔ́n azǎn tɔn, bó ná ɖo nǔ e wú mi kpé ɔ́ bǐ wa wɛ, bónú é ná yá wǔ wá. Azǎn énɛ́ gbe wɛ Mawu ná zé myɔ dó fyɔ́ jǐnukúnsin ná, bɔ nǔ e ɖo jǐnukúnsin lɛ́ɛ bǐ ná sínsín ɖo myɔ ɔ́ sín zozo nu.

¹³ Amɔ̌, Mawu dó jǐnukúnsin yɔ̌yɔ́ kpó ayǐkúngban yɔ̌yɔ́ kpó sín akpá; fínɛ́ wɛ è nǎ nɔ wa nǔ kpódó hwɛjijɔ kpán ɖe; nǔ e mǐ ɖo te kpɔ́n ɔ́ nɛ́.

¹⁴ Énɛ́ ɔ́ wú ɔ́, nɔví ce vívɛ́ná lɛ́ɛ mi, ée mi ɖo te kpɔ́n nǔ énɛ́ lɛ́ɛ sín jijɛ ɔ́, mi bo ɖo nǔ e wú mi kpé ɔ́ bǐ wa wɛ, bó ná dó nyí mɛ mímɛ́ ma ɖó blɔ̌ ɖo wǔ ɖo Mawu nukɔn, bó ná dó nɔ fífá mɛ kpó Mawu kpó.

¹⁵ Mi ní tunwun ɖɔ suúlu e Aklúnɔ mǐtɔn ɖó ɔ́ wɛ nyí hwlɛngán mitɔn, lě e Mawu ná nǔnywɛ́ nɔví mǐtɔn vívɛ́ná Pɔ́lu, bɔ é lɔmɔ̌ wlán sɛ́ dó mi gbɔn é.

¹⁶ Wěma e mɛ é ɖɔ xó dó nǔ énɛ́ lɛ́ɛ wú ɖe lɛ́ɛ bǐ ɔ́, nǔ e é wlán d'é mɛ lɛ́ɛ nɛ́. Xó ɖé lɛ́ɛ ɖo wěma tɔn lɛ́ɛ mɛ, bɔ nukúnnú-mɔjɛmɛ tɔn nɔ vɛ́ wǔ, bɔ mɛ e ma mɔ do nú nǔɖé ǎ, bó ma ka lí dǒ ǎ lɛ́ɛ nɔ kpé ta do ná, lě e yě ko nɔ bló gbɔn nú Mawuxó ɔ́ ɖo akpá ɖěvo lɛ́ɛ xwé é. Nǔ e yě ná wa, bɔ yě ɖésúnɔ ná yi vɔ ɖ'é mɛ ɔ́ wa wɛ yě ɖe.

¹⁷ Amɔ̌, nɔví ce vívɛ́ná lɛ́ɛ mi, midɛɛ lɛ́ɛ ɔ́, è ko ɖɔ xó énɛ́ lɛ́ɛ ɖ'ayǐ nú mi din. Hǔn, mi bó cɔ́ miɖée, bó ma jó miɖée dó nú nǔ wa nyi do gbɛtɔ́ nyanya lɛ́ɛ tɔn ní dɔn mi bú ó; mi ma ka lɛ́ gɔn acéjí e mi ɖe ɔ́ nɔ ó.

¹⁸ Lo ɔ́, mi ní ɖo Jezu Klísu e nyí Aklúnɔ mǐtɔn, bó nyí Mɛhwlɛ́ngántɔ́ mǐtɔn ɔ́ tunwun d'é jí wɛ, bó ɖo fɛ́nú tɔn tunwun d'é jí wɛ. Susu n'i sín din káká sɔ́yi mavɔ mavɔ. Amǐ.