2 Piyɛ́ɛ 2 - MAWUXÓWÉMA

Nǔkplɔ́nmɛtɔ́-nyíjɛtɔ́ lɛ́ɛ

¹ Đ'ayǐ xóxó ɔ́, gbeyíɖɔmawutɔn-nyíjɛtɔ́ ɖé lɛ́ɛ tɔ́n ɖo togun ɔ́ mɛ; mɔ̌ ɖokpó ɔ́, nǔkplɔ́nmɛtɔ́-nyíjɛtɔ́ ɖé lɛ́ɛ ná tɔ́n ɖo tɛ́ntin mitɔn; yě ná sɔ́ kplɔ́n nyanya, kplɔ́n e nɔ hɛn nǔ gblé ɔ́ byɔ́ mi mɛ, bó ná gbɛ́ gǎn e hwlɛ́n yě gán é; énɛ́ ɔ́, yě ná vɔ yěɖée bléwún.

² Mɛ gěgé ná xwedó yě ɖo gbɛ kwíji kwíji énɛ́ e yě nɔ zán ɔ́ mɛ, bɔ lě e yě nɔ wa nǔ gbɔn ɔ́ ná zɔ́n bɔ è nǎ ɖɔ xó nyanya dó nǔgbó sín ali ɔ́ wú.

³ Nǔkplɔ́nmɛtɔ́-nyíjɛtɔ́ énɛ́ lɛ́ɛ ná nɔ ɖo akwɛ́ gbé mɛ, bó ná nɔ kpa xó ɖɔ nú mi, bó dó xo mi ɖu. Amɔ̌, mɛ e ná ɖó hwɛ nú yě ɔ́ ko ɖo te kpɔ́n yě sín tɛgbɛ, bó ná ɖó hwɛ nú yě, bɔ vivɔ yětɔn sixú gblá gbeɖé ǎ.

⁴ Đó Mawu gɔn hwɛ ɖó nú wɛnsagun e hu hwɛ lɛ́ɛ é ǎ; lo ɔ́, é bɛ́ yě kɔn nyi zo mɛ, bɔ è hɛn yě dó wlɔ mɛ ɖo zǐnflú mɛ fínɛ́ nú hwɛɖɔzán gbe.

⁵ Mawu gɔn hwɛ ɖó nú gbɛ xóxó ɔ́ ǎ; lo ɔ́, é bló bɔ tɔ ɖi sin kpé fí bǐ, bɔ gbɛtɔ́ dídá e ɖo gbɛ énɛ́ ɔ́ mɛ lɛ́ɛ kú tɔ. Nɔwée e ɖo lě e Mawu ba ɖɔ yě ní zán gbɛ gbɔn ɔ́ sín xó ɖɔ nú yě wɛ ɔ́ kɛ́ɖɛ́ wɛ é hwlɛ́n gán kpó mɛ tɛ́nwe ɖěvo kpó.

⁶ Mawu ɖó hwɛ nú Sodɔ́mu kpó Gomɔ́ɔ kpó, bó zé myɔ dó vɔ yě ná; é bló mɔ̌, bó dó ná nǔ e ɖo ná jɛ dó mɛdídá e ná wá lɛ́ɛ jí wɛ ɔ́ sín xlɛ́ ɖokpó yě.

⁷ Mawu hwlɛ́n Lɔ̌ti gán; Lɔ̌ti ɔ́, nǔjlɔ́jlɔ́watɔ́ wɛ, bɔ gbɛ kwíji kwíji e gbɛtɔ́ dídá hwetɔnnu tɔn lɛ́ɛ zán ɔ́ vɛ́ n'i.

⁸ Đó nya nǔjlɔ́jlɔ́watɔ́ énɛ́ e ɖo tɛ́ntin yětɔn ɔ́, ɖo nǔ e wa wɛ yě ɖe ɔ́ mɔ wɛ, bó ɖo sise wɛ, bɔ nǔ énɛ́ zɔ́n bɔ é nɔ mɔ wǔvɛ́ ayǐhɔ́ngbe ayǐhɔ́ngbe ɖo ayi tɔn mímɛ́ ɔ́ mɛ.

⁹ Énɛ́ ɔ́, Aklúnɔ tunwun lě e é nɔ hwlɛ́n mɛ e nɔ ɖó sísí n'i lɛ́ɛ gán sín adǎngbomɛ lɛ́ɛ mɛ gbɔn é, bó lɛ́ tunwun lě e é nɔ sɔ́ yě mɛ e ɖo nǔ nyanya wa wɛ lɛ́ɛ ɖ'ayǐ gbɔn, bó ná dɔn tó nú yě ɖo hwɛɖɔzán gbe é.

¹⁰ Yě mɛ e nɔ xwedó jlǒ kwíji kwíji gbɛtɔ́ e yě nyí ɔ́ tɔn, bó nɔ gbɛ́ wǎn nú acɛkpikpa Mawu tɔn lɛ́ɛ ɔ́ wɛ é ná dɔn tó ná tawun. Nǔkplɔ́nmɛtɔ́-nyíjɛtɔ́ e xó un ɖɔ nú mi lɛ́ɛ ɔ́, ta wɛ yě nɔ syɛ́n, bó nɔ dó gbe kawun kawun dó ɖɔ xó nú mɛ; yě ɖó sísí nú nǔɖíɖó susunɔ e ɖo jǐxwé lɛ́ɛ é ǎ; lo ɔ́, zun wɛ yě nɔ zun yě.

¹¹ Wɛnsagun Mawu tɔn lɛ́ɛ ɖó hlɔ̌nhlɔ́n, bó ɖó acɛ hú nǔkplɔ́nmɛtɔ́-nyíjɛtɔ́ énɛ́ lɛ́ɛ, yě nɔ zé zun dó dó hwɛ nǔɖíɖó susunɔ lɛ́ɛ ná ɖo Aklúnɔ nukɔn ǎ.

¹² Amɔ̌, mɛ énɛ́ lɛ́ɛ ɔ́, yě nɔ lin tamɛ kpɔ́n cóbó nɔ wa nǔ ǎ; yě cí gběkanlin e jɔ, bɔ è nǎ wlí bó hu é ɖɔhun; yě nɔ zun nǔ e wú yě ma mɔ nukúnnú jɛ ǎ é; è nǎ hu yě lě e è nɔ hu gběkanlin lɛ́ɛ gbɔn é.

¹³ Mɔ̌ wɛ è nǎ sú hwɛ e yě hu lɛ́ɛ sín axɔ́ yě gbɔn. Yě ná wa nǔ dó gbɔ jlǒ nyanya yětɔn lɛ́ɛ ɖo kéze ɖéɖé wɛ nɔ hun xomɛ nú yě. Ényí yě ɖo tɛ́ntin mitɔn, bó ɖo mi blɛ́ wɛ, bó ɖo nǔ mitɔn ɖu wɛ ɔ́, winnyánú wɛ é nyí, bó nyí afɔklɛ́nnú.

¹⁴ Aga nukún wɛ ɖo ta nú yě, bɔ hwɛhuhu nɔ ci kɔ nú yě gbeɖé ǎ. Yě nɔ ɖó mɔ nú mɛ e vɔ́ lɛ́ɛ, bɔ yě nɔ jɛ mɛ; nukúnkɛn wɛ yě nɔ dó; Mawu ko dó nu yě.

¹⁵ Yě gosín ali jlɔ́jlɔ́ ɔ́ jí, bó yi bú; Bosɔ́ɔ sín vǐ Baláamu e yí wǎn nú nǔ nyanya wiwa dó ɖu le ɔ́, ali e é gbɔn ɔ́ wɛ yě wlǐ.

¹⁶ Lo ɔ́, è gbɛ̌ nǔ n'i, ɖó tóli e é vɛ́ ɔ́ wú. Nǔgbó ɔ́, tócí sɔ́ gbɛtɔ́ sín gbe dó jɛ xó ɖɔ jí, bó ɖó xlonɔnú e wa wɛ gbeyíɖɔ ɔ́ ɖe ɔ́ te; tócí ka nɔ ɖɔ xó ǎ.

¹⁷ Nǔkplɔ́nmɛtɔ́-nyíjɛtɔ́ énɛ́ lɛ́ɛ cí tɔjɔtɛn e xusin é ɖɔhun; yě cí akpɔ́kpɔ́ e jɔhɔn ɖaxó ɖé ɖo zǐzé wɛ ɔ́ ɖɔhun; Mawu sɔ́ tɛnmɛ ɖ'ayǐ nú yě ɖo zǐnflú gɔngɔn bǐ ɔ́ mɛ.

¹⁸ Yě nɔ ɖo goyítɔ́ xó ɖɔ wɛ, bó nɔ ɖo xlonɔ xó ɖɔ wɛ; yě nɔ wlí mɛ e ma ko hɔn sín yě mɛ e ɖo ali bú wɛ lɛ́ɛ tɛ́ntin zinzin ǎ lɛ́ɛ dó mɔ mɛ; nǔblíblí wiwa sín jlǒ e yě ɖó ɖo gbɛtɔ́ nyínyí mɛ lɛ́ɛ wɛ yě nɔ́ dó wlí yě dó mɔ mɛ.

¹⁹ Yě nɔ dó akpá nú yě ɖɔ yě ná jɛ yěɖée sí; lo ɔ́, jijɔ e nɔ dɔn mɛ yi kú lɛ́ɛ sín kannumɔ wɛ yě ɖésú ka nyí; ɖó kannumɔ wɛ mɛ ɖokpó ɖokpó nyí nú nǔ e nɔ ɖu ɖo jǐ tɔn é.

²⁰ Nǔgbó ɔ́, ényí yě mɛ e tunwun Jezu Klísu e nyí Aklúnɔ mǐtɔn, bó nyí Mɛhwlɛ́ngántɔ́ mǐtɔn, bó ma ka ko hɔn sín nǔblíblíwiwa gbɛmɛ fí tɔn lɛ́ɛ mɛ zinzin ǎ lɛ́ɛ lɛ́ jó yěɖée dó nú nǔblíblíwiwa énɛ́ lɛ́ɛ, bɔ yě ɖu ɖo yě jí ɔ́, ninɔmɛ e yě nɔ wá ɖó ɖo vivɔnu ɔ́ nɔ lɛ́ nylá hú ée yě ko ɖó ɖo bǐbɛ́mɛ é.

²¹ Ényí yě gbɔ bó gɔn ali jlɔ́jlɔ́ ɔ́ tunwun ɔ́, é nyɔ́ nú yě hú ɖɔ yě ní tunwun bó ka wá lɛ́ kɔ sín nǔ mímɛ́ e è ɖɔ yě ní wa lɛ́ɛ gúdo.

²² Nǔ e jɛ dó yě jí ɔ́ sɔgbe xá xó e lǒ élɔ́ lɛ́ɛ ɖɔ é: “Cukú bɛ́ nǔ e é vi ɔ́ ɖu”, abǐ “Aglǔza e è lɛ wǔ ná din tlóló ɔ́ lɛ́ lɛ́ kɔ yi lɛ babá.”