2 Piyɛ́ɛ 1 - MAWUXÓWÉMA

Gbedómɛ

¹ Nyɛ Sinmɔ́ɔ Piyɛ́ɛ e nyí mɛsɛntɔ́ Jezu Klísu tɔn, bó nyí mɛsɛ́dó tɔn ɔ́ wɛ wlán wěma élɔ́; mɛ e è nǎ nǔɖiɖi xɔ akwɛ́ mǐtɔn ɖɔhun gbɔn azɔ̌ jlɔ́jlɔ́ e Mawu mǐtɔn Mɛhwlɛ́ngántɔ́ Jezu Klísu wa é gbla mɛ lɛ́ɛ wɛ un wlán sɛ́ dó, bó dó gbe yě.

² Mawu ní ná fɛ́nú kpó fífá kpó mi, bónú é túnflá ɖó Mawu kpó Aklúnɔ mǐtɔn Jezu kpán e mi tunwun ɔ́ wú.

Jijɔ e klísusɛntɔ́ ɖó ná ɖó lɛ́ɛ é

³ Hlɔ̌nhlɔ́n Mawu tɔn e Aklúnɔ ɖó ɔ́ ná nǔ e ɖo tají bɔ mǐ ná dó ɖó sísí nú Mawu ɖo gbɛzán mǐtɔn mɛ ɔ́ bǐ mǐ; é wɛ nyí ɖɔ: é bló bɔ mǐ tunwun Mawu e ylɔ́ mǐ bónú mǐ ná ɖó mǐmá ɖo susu é ɖésúnɔ tɔn kpó xomɛnyínyɔ́ tɔn kpó mɛ é.

⁴ Mɔ̌ wɛ é dó akpá ɖaxó ɖaxó e xɔ akwɛ́ lɛ́ɛ nú mǐ gbɔn; énɛ́ ɔ́, nú mi mɔ nǔ e sín akpá e é dó lɛ́ɛ yí ɔ́, mi ná sixú gló jlǒ e nɔ hɛn nǔ gblé bo ɖo axɔ́sú ɖu wɛ ɖo gbɛmɛ fí é, bó ná ɖó mǐmá ɖo ninɔmɛ Mawu tɔn mɛ.

⁵ Đó mǐmá e mi ná ɖó ɖo ninɔmɛ Mawu tɔn mɛ ɔ́ wú ɔ́, mi zán hlɔ̌nhlɔ́n e ɖo mi wú ɔ́ bǐ, bó ɖó zǐnzán ɖagbe gɔ́ nú nǔɖiɖi mitɔn, bó ɖó nǔtunwuntunwun gɔ́ nú zǐnzán ɖagbe mitɔn.

⁶ Bó ɖó mɛɖéejíɖuɖe gɔ́ nú nǔtunwuntunwun, bó ɖó suúlu gɔ́ nú mɛɖéejíɖuɖe, lobo zé sísí ɖó nú Mawu gɔ́ nú suúlu.

⁷ Bó ná dó fó ɔ́, mi ɖó wǎn yí nú nɔví gɔ́ nú sísí ɖó nú Mawu, bó ɖó wǎn yíyí ɖó nú mɛ bǐ gɔ́ nú wǎn yí nú nɔví.

⁸ Jijɔ énɛ́ lɛ́ɛ wɛ mi ɖó ná ɖó; ényí mi ɖó jijɔ énɛ́ lɛ́ɛ bónú é túnflá ɔ́, yě ná zɔ́n bɔ, ɖo Aklúnɔ mǐtɔn Jezu Klísu sín tunwuntunwun mɛ ɔ́, mi sɔ́ ná ɖi fɔnlín ǎ, mi ka sɔ́ ná gɔn sínsɛ́n ǎ.

⁹ Lo ɔ́, mɛɖé ma ɖó jijɔ énɛ́ lɛ́ɛ ǎ ɔ́, mɛ ɔ́ nɔ mɔ nǔ jɛ zɔ ǎ; é cí nukúntíntɔ́nnɔ ɖɔhun; é sɔ́ flín ɖɔ è ko slá wǔ nú émí sín hwɛ e émí hu ɖ'ayǐ lɛ́ɛ mɛ ǎ.

¹⁰ Énɛ́ ɔ́ wú ɔ́, nɔví lɛ́ɛ mi, mi lɛ́ dó gǎn d'é jí, bó zán gbɛ mitɔn nú é ní sɔgbe xá ylɔ̌ e Mawu ylɔ́ mi ɔ́ kpó cyán e é cyán mi ɔ́ kpó; ɖó nú mi nɔ wa nǔ gbɔn alɔkpa énɛ́ mɛ ɔ́, mi ná jɛ nǔ nyanya mɛ gbeɖé ǎ.

¹¹ Lě e Mawu ná ná acɛ ɖaxó mi, bɔ mi ná dó byɔ́ Jezu Klísu e nyí Aklúnɔ mǐtɔn, bó nyí Mɛhwlɛ́ngántɔ́ mǐtɔn ɔ́ sín axɔ́súɖuɖu mavɔ mavɔ ɔ́ mɛ gbɔn é nɛ́.

¹² Nǔ e wú un ná nɔ vɔ́ nǔ énɛ́ lɛ́ɛ flín mi tɛgbɛ é nɛ́, có mi ka ko tunwun yě, bó ko lí dǒ syɛ́nsyɛ́n ɖo nǔgbó e mi yí é mɛ.

¹³ Lo ɔ́, nú un kpo ɖo gbɛ jɛ́n wɛ ɔ́, un mɔ ɖɔ é sɔgbe nú ma nɔ flín nǔ énɛ́ lɛ́ɛ mi, bó ná dó hɛn ayixa mitɔn ɖó te.

¹⁴ Đó, un tunwun ɖɔ zaanɖé din ɔ́, un ná gosín agbaza élɔ́ e nɔ kú ɔ́ mɛ, lě e Aklúnɔ mǐtɔn Jezu Klísu ɖe xlɛ́ mǐ gbɔn é.

¹⁵ Hǔn, un ná bló lě e un kpé wú gbɔn ɔ́ bǐ, bó na xlɛ́ lě e mi ná sixú flín nǔ énɛ́ lɛ́ɛ hwebǐnu gbɔn, ɖo kú ce gúdo ɔ́ mi.

Mɛ e mɔ susu Klísu tɔn lɛ́ɛ é

¹⁶ Nǔgbó ɔ́, é nyí hwenuxó e è sɔ́ bǐbí dó kpa ná ɔ́ ɖě wú wɛ mǐ gán jɛ, bó dó kplɔ́n nǔ mi ɖɔ Aklúnɔ mǐtɔn Jezu Klísu ná wá kpó hlɔ̌nhlɔ́n kpó ǎ; lo ɔ́, mǐ mɔ susu ɖaxó e é ɖó ɔ́ kpó nukún mǐ ɖésúnɔ tɔn kpó.

¹⁷ Hwenu e Mawu Tɔ́ ɔ́ wlí yɛ̌yi n'i, bó sɔ́ ɛ su ɔ́, mǐ ɖo fínɛ́; hwenɛ́nu ɔ́, gbe ɖé ɖi sín Mawu susuɖaxónɔ ɔ́ gɔ́n wá gɔ̌n tɔn, bó ɖɔ n'i ɖɔ: “Vǐ ce vívɛ́ná wɛ mɛ élɔ́ nyí; xomɛ nɔ hun mì dó wǔtu tɔn.”

¹⁸ Mǐ ɖésúnɔ ɔ́, hwenu e mǐ kpó é kpó ɖo só mímɛ́ ɔ́ jí ɔ́, mǐ se gbe énɛ́ e ɖi sín jǐxwé é.

¹⁹ Énɛ́ ɔ́ zɔ́n bɔ mǐ lɛ́ ɖó jiɖiɖe dó wɛn e gbeyíɖɔ Mawu tɔn lɛ́ɛ dó ɔ́ wú ganjí. Ényí mi wlí tó wú ganjí ɔ́, é ná nyɔ́, ɖó é cí zogbɛ́n e ɖo ɖɛ̌ ɖi wɛ ɖo zǐnflú mɛ káká bɔ ayǐ ná hɔ́n, bɔ sunví zǎnzǎn tɔn ná ná wěziza dó ayi mitɔn mɛ ɔ́ ɖɔhun.

²⁰ Nǔ e mi ka ná tunwun ganjí hwɛ̌ ɔ́ ɖíe: mɛ ɖěbǔ sixú sɔ́ nǔnywɛ́ é ɖésúnɔ tɔn dó tín Mawuxó e è wlǎn ɔ́ mɛ ná ǎ.

²¹ Đó mɛ ɖěbǔ nɔ sɔ́ jlǒ é ɖésúnɔ tɔn kpowun dó ɖɔ Mawuxó ɔ́ ná kpɔ́n gbeɖé ǎ; lo ɔ́, Yɛsinsɛn wɛ nɔ sɔ́ dó ayi mɛ nú gbɛtɔ́ lɛ́ɛ, bɔ yě nɔ ɖɔ xó e Mawu ɖɔ yě ní ɖɔ é.