2 Jǎan 1 - MAWUXÓWÉMA

Gbedómɛ

¹ Nyɛ Agunmɛxó ɔ́ wɛ ɖo wěma élɔ́ wlán sɛ́ dó Nyɔ̌nu e Mawu sɔ́ é wɛ; hwi kpódó vǐ towe lɛ́ɛ kpó wɛ un sɛ́ wěma ɔ́ dó . Wǎn yíyí nǔgbó nǔgbó wɛ un ɖó nú mi. É ka nyí nyɛ ɖokpónɔ wɛ yí wǎn nú mi ǎ; mɛ e tunwun nǔgbó ɔ́ lɛ́ɛ bǐ wɛ yí wǎn nú mi.

² Đó nǔgbó ɔ́ ɖo ayi mǐtɔn mɛ, bó ná nɔ xá mǐ káká sɔ́yi.

³ Mawu Tɔ́ ɔ́ kpódó Jezu Klísu e nyí vǐ tɔn ɔ́ kpó ní ná fɛ́nú kpódó nǔbláwǔkúnúmɛ kpó, kpó fífá kpó mǐ, bónú mǐ ní ɖó nǔ énɛ́ lɛ́ɛ ɖo wǎn yíyí kpódó nǔgbó kpó mɛ.

Nǔgbó kpódó wǎn yíyí kpó

⁴ Ée un mɔ vǐ towe ɖě lɛ́ɛ ɖo gbɛ zán wɛ ɖo nǔgbó mɛ lě e Tɔ́ ɔ́ zɔ́n mǐ gbɔn ɔ́, xomɛ hun mì tlala;

⁵ din ɔ́, nyɔ̌nu, nǔ e byɔ́ we wɛ un ɖe ɔ́ ɖíe: mi nú mǐ ná yí wǎn nú mǐɖée; é nyí sɛ́n yɔ̌yɔ́ ɖěvo wɛ nyí bɔ un wlán sɛ́ dó we ǎ; lo ɔ́, sɛ́n e mǐ ko yí sín hwenu e mǐ ɖi nǔ nú Klísu ɔ́ wɛ.

⁶ Wǎn yíyí ɖíɖó wɛ nyí è nǐ zán gbɛ lě e Tɔ́ ɔ́ sín sɛ́n lɛ́ɛ zɔ́n gbɔn é; sɛ́n ɔ́ wɛ nyí ɖɔ: mi ní zán gbɛ mitɔn ɖo wǎn yíyí mɛ, lě e mi se gbɔn sín hwenu e mi ɖi nǔ nú Klísu é.

⁷ Adingbannɔ gěgé gba kpé gbɛ ɔ́ mɛ, bó nɔ gbɛ́ ɖɔ Jezu Klísu kún zɔn agbaza mɛ wá ó. Mɛ e nɔ wa nǔ gbɔn mɔ̌ ɔ́, adingbannɔ wɛ; Klísu Kɛntɔ́ ɔ́ wɛ.

⁸ Mi cɔ́ miɖée, bó ma wá ba nǔ e wú mi wa azɔ̌ ɔ́ kpo ó; lo ɔ́, mi ní mɔ ajɔ mitɔn bǐ yí.

⁹ Mɛɖěbǔ ma nɔ te nǔkplɔ́nmɛ Klísu tɔn lɛ́ɛ kɛ́ɖɛ́ jí ǎ, bó lɛ́ ba ɖěvo d'é jí hǔn, mɛ énɛ́ ɖó Mawu ɔ́ ayi mɛ ǎ. Mɛ e ka nɔ te nǔkplɔ́nmɛ Klísu tɔn lɛ́ɛ jí ɔ́, mɛ ɔ́ ɖó Tɔ́ ɔ́ kpó Vǐ ɔ́ kpó ayi mɛ.

¹⁰ Ényí mɛɖé wá gɔ̌n mitɔn, bó ma hɛn kplɔ́n énɛ́ wá nú mi ǎ hǔn, mi ma yí i dó xwé mitɔn gbe ó; mi ma ka dó gbe e lɔ vɔ́vɔ́ ó.

¹¹ Đó mɛ e dó gbe e ɔ́, nǔ nyanya e é nɔ wa lɛ́ɛ wa xá ɛ wɛ é ɖe.

Xó gǔdo gúdo tɔn lɛ́ɛ

¹² Un ɖó xó gěgé bó ná ɖɔ nú mi, un ka jló ná wlán yě dó wěma jí sɛ́ dó mi ǎ; ɖó nú un wá gɔ̌n mitɔn, bó wá ɖɔ xó énɛ́ lɛ́ɛ nú mi kpódó nu ce kpo ɔ́, é nyɔ́ hú; énɛ́ ɔ́, awǎjijɛ mǐtɔn ná nyí awǎjijɛ kpíkpé.

¹³ Nɔví towe nyɔ̌nu e Mawu sɔ́ é sín vǐ lɛ́ɛ lɔ dó gbe sɛ́ dó we.