2 Timɔtée 1 - MAWUXÓWÉMA

Gbedómɛ

¹ Nyɛ Pɔ́lu e nyí mɛsɛ́dó Klísu Jezu tɔn ɖo jlǒ Mawu tɔn mɛ, bó ná jlá gbɛ e sín akpá è dǒ nú mǐ ɖo bǔ e mǐ ɖe xá Klísu Jezu ɔ́ mɛ ɔ́

² wɛ ɖo wěma élɔ́ sɛ́ dó we wɛ, vǐ ce vívɛ́ná Timɔtée. Mawu Tɔ́ ɔ́ kpódó Aklúnɔ mǐtɔn Klísu Jezu kpó ní ná fɛ́nú we, bó kú nǔbláwǔ nú we, bó ná fífá we.

Pɔ́lu dó kú nú Mawu

³ Un nɔ dó kú nú Mawu e tɔ́gbó ce lɛ́ɛ sɛn, bɔ nyɛ ɖésú ɖo sinsɛn wɛ kpódó ayixa mímɛ́ kpó é. Un dó kú n'i ɖó é bló bɔ zǎn kpó kéze kpó ɔ́, un nɔ flín we hwebǐnu, ɖo ɖɛ ce lɛ́ɛ mɛ.

⁴ Un nɔ flín avǐ e a ya é, bó nɔ ɖó jlǒ ɖaxó ɖɔ ma lɛ́ wá mɔ we, bónú xomɛ ná hun mì titewungbe.

⁵ Nǔɖiɖi titewungbe e a ɖǒ ɔ́ ɖo ayi ce mɛ, bɔ un ɖo flínflín wɛ. Nǔɖiɖi énɛ́ ɔ́ wɛ nɔ towe sín nɔ Lɔyisi kpódó nɔ towe Enisi kpó ko ɖó jɛ nukɔn nú we. Un ka ɖeji ɖɔ hwi lɔ ɖó nǔɖiɖi énɛ́.

⁶ Énɛ́ ɔ́ wú wɛ un ɖo flínflín we wɛ ɖɔ hwi ní hɛn nǔníná e Mawu ná we hwenu e un ɖó alɔ jǐ towe ɔ́ ɖó gbɛ.

⁷ Ényí xɛsiɖiɖi sín yɛ wɛ Mawu ná mǐ ǎ; lo ɔ́, hlɔ̌nhlɔ́n kpódó wǎn yíyí kpó, kpódó mɛ ɖésúnɔ jí ɖu ɖe kpó sín yɛ wɛ é ná mǐ.

⁸ Hǔn kúnnu ɖe nú Aklúnɔ mǐtɔn ní má nɔ́ hu winnyá nú we ó. Winnyá ní ma ka lɛ́ hu we dó nyɛ mɛ e nyí gantɔ́ ɖó Klísu tamɛ é wú ó; é nyɔ́ wa ɔ́, ji ya e nyí towe ɔ́ dó Wɛn Ɖagbe ɔ́ tamɛ lě e Mawu ná hlɔ̌nhlɔ́n tɔn we gbɔn é.

⁹ É wɛ hwlɛ́n mǐ gán, bó ylɔ́ mǐ nú mǐ ná nyí mɛɖeɖóvo tɔn; é ká nyí nǔ e mǐ nɔ wa lɛ́ɛ wútu wɛ é ylɔ́ mǐ ǎ; lo ɔ́, tito é ɖésúnɔ tɔn kpódó fɛ́nú tɔn kpó wú wɛ é ylɔ́ mǐ. É ko ná fɛ́nú énɛ́ mǐ ɖo bǔ e mǐ ɖe ɖo Klísu Jezu mɛ cóbɔ gbɛ ɔ́ wá tíin é mɛ.

¹⁰ Amɔ̌ din ɔ́, é wá ɖe xlɛ́ mǐ gbɔn Mɛhwlɛ́ngántɔ́ mǐtɔn Klísu Jezu sín wǐwá jí. É wɛ nyí mɛ e hu acɛ nú kú, bó sɔ́ Wɛn Ɖagbe dó ɖe jɔmakúgbɛ xlɛ́ mǐ é.

¹¹ Wɛn Ɖagbe énɛ́ ɔ́ wútu wɛ Mawu sɔ́ mì mawuxóɖɔtɔ́, bó sɔ́ mì mɛsɛ́dó, bó zɔ́n mì ɖɔ ma kplɔ́n nǔ mɛ.

¹² Énɛ́ ɔ́ wú wɛ un ɖo ya élɔ́ lɛ́ɛ ji wɛ; é ka hu winnyá nú mì ǎ; ɖó un tunwun mɛ e un ɖi nǔ ná é, bó ka ɖó jiɖiɖe ɖɔ é ɖó hlɔ̌nhlɔ́n e ná hɛn nǔ e é sɔ́ dó así nú mǐ ɔ́ káká jɛ azǎn énɛ́ ɔ́ gbe.

¹³ Đó nǔɖiɖi kpódó wǎn yíyí e mǐ ɖó ɖo bǔ e mǐ ɖe xá Klísu Jezu ɔ́ kpán mɛ é wú ɔ́, hɛn xó jɔ xó e a se ɖo nu ce lɛ́ɛ é, bónú yě ní nyí kpɔ́ndéwú nú we.

¹⁴ Yɛsinsɛn e ɖo mǐ mɛ ɔ́ ní d'alɔ we, bónú a nǐ hɛn nǔkplɔ́nmɛ titewungbe e è sɔ́ dó así nú we lɛ́ɛ.

¹⁵ Lě e a ko tunwun gbɔn ɔ́, mɛ e ɖo Azíi yíkúngban jí lɛ́ɛ bǐ lɛ́ kɔ sín gǔdo ce; yě ɖě nɛ́ nyí Fijɛ́lu kpódó Ɛɛmɔjɛ́ni kpó nɛ́.

¹⁶ Aklúnɔ ní ɖe nǔbláwǔkúnúmɛ tɔn xlɛ́ hɛ̌nnu Onɛzifɔ́ɔ tɔn, ɖó é nɔ dó wǔsyɛ́n lanmɛ nú mì hwɛhwɛ; winnyá hu i ɖó nyɛ mɛ e ɖo gankpá mɛ ɔ́ wú ǎ.

¹⁷ É nyɔ́ wa ɔ́, hwenu e é wá Hlɔ̌ma ɔ́, é ba mì kpódó vǐvɛ́ dó nú nǔ kpó káká bó mɔ mì.

¹⁸ Aklúnɔ ní bló bónú é ní mɔ nǔbláwǔkúnúmɛ Aklúnɔ tɔn yí ɖo azǎn énɛ́ gbe. Alɔ tobutóbú e é gɔ́ nú mì ɖo Efɛ́zi ɔ́, a tunwun ganjí.