2 Axɔ́sú 6 - MAWUXÓWÉMA

¹ É su gbe ɖokpó, bɔ gbeyíɖɔ Mawu tɔn lɛ́ɛ ɖɔ nú gǎn yětɔn Elizée ɖɔ: “Xɔ élɔ́ e mɛ mǐ kpó hwi kpó ɖe ɔ́ hwedó mǐ dín.

² Nǎ gbe mǐ, nú mǐ nǎ yi káká Judɛ́ɛn tɔ ɔ́ tó, bónú mǐ mɛ ɖokpó ɖokpó ná gbo atín kloklo ɖokpó ɖokpó, bó ná dó gbá xɔ ɖokpó ɖó fínɛ́.” Elizée ka ɖɔ nú yě ɖɔ: “Mi bo yi.”

³ Mɛ ɖokpó ká ɖo yě mɛ bó ɖɔ: “Gǎn, a ma ná kɛnklɛ́n xwedó mǐ yi a?” É yí gbe nú yě ɖɔ: “É nyɔ́.”

⁴ Nǔgbó ɔ́, é xwedó yě bɔ yě yi. Ée yě wá Judɛ́ɛn tɔ ɔ́ tó ɔ́, yě gbo atín.

⁵ Mɛ ɖokpó ká ɖo yě mɛ, bɔ hwenu e é ɖo atín ɔ́ gbo wɛ ɔ́, asyɔ́ví ɔ́ sún jɛ tɔ mɛ. Bɔ é sú xó bó ɖɔ: “Yéége gǎn ce! Asyɔ́ví ɔ́, hwě wɛ mǐ hwé mɛ!”

⁶ Elizée ɖɔ: “Fítɛ́ é jɛ?” Ée é kan mɔ̌ byɔ́ ɛ ɔ́, é xlɛ́ ɛ fí e é jɛ ɔ́. Énɛ́ ɔ́, Elizée sɛ́n kpo ɖokpó, bó sɔ́ nyi fí ɔ́, bɔ asyɔ́ví ɔ́ wá tɔ nukún mɛ tlóló,

⁷ bɔ é ɖɔ: “Bo sɔ́!” Bɔ nya ɔ́ dlɛ́n alɔ kpowun bo sɔ́.

Elizée wlí sɔ́ja Silíi tɔn lɛ́ɛ

⁸ Hwenu e Silíi xɔ́sú ɔ́ nɔ́ ɖo ahwan fun xá Izlayɛ́li wɛ ɔ́, é kan fí e ahwangɔnu tɔn ná ɖó gɔnu ɖó ɔ́ byɔ́ ahwangán tɔn lɛ́ɛ bó sɔ́ fí e yě ɖɔ n'i é.

⁹ Lo ɔ́, Elizée ɖɔ sɛ́ dó axɔ́sú Izlayɛ́li tɔn ɔ́ ɖɔ é ní cɔ́ éɖée, bó má yi tɛn ɔ́ mɛ ó, ɖó sɔ́ja Silíi tɔn lɛ́ɛ ɖo dɔ̌n.

¹⁰ Ée Izlayɛ́li xɔ́sú ɔ́ se mɔ̌ ɔ́, é sɛ́ mɛ dó nú yě ná yi cɔ́ fí e xó gbeyíɖɔ Mawu tɔn ɔ́ ɖɔ é. Azɔn nabí ɖé wɛ Elizée sɛ́ mɛ dó Izlayɛ́li xɔ́sú ɔ́ gɔ́n, bɔ é ná sɔ́ nǔ ɖ'ayǐ.

¹¹ Axɔ́sú Silíi tɔn sín ayi gba dó, bɔ é ylɔ́ azaglɔ́gán tɔn lɛ́ɛ, bó ɖɔ nú yě ɖɔ: “Mɛ̌ ká ɖo mǐ mɛ, bó ɖo axɔ́sú Izlayɛ́li tɔn jí tawun?”

¹² Azaglɔ́gán tɔn lɛ́ɛ ɖokpó yí gbe n'i ɖɔ: “Sɛ́mɛɖó, mɛ ɖěbǔ ɖo mǐ mɛ bó ɖo jǐ tɔn ǎ. Elizée gbeyíɖɔ Mawu tɔn e ɖo Izlayɛ́li ɔ́ wɛ nɔ wlí nǔ e a nɔ ɖɔ ɖo xɔ glɔ́ ɔ́ bǐ ɖɔ nú Izlayɛ́li xɔ́sú ɔ́.”

¹³ Énɛ́ ɔ́, axɔ́sú ɔ́ ɖɔ: “Mi yi kpɔ́n fí e é ɖe ɔ́, nú ma sɛ́ mɛ dó nú è nǎ yi wlí i.” È yi kpɔ́n, bó wá ɖɔ nú axɔ́sú ɔ́ ɖɔ é ɖo Dotáni toxo mɛ.

¹⁴ Nǔgbó ɔ́, Silíi xɔ́sú ɔ́ sɛ́ sɔ́, kɛkɛ́ví kpó, kpódó sɔ́ja gěgé kpó dó, bɔ yě wá xá Dotáni zǎn mɛ.

¹⁵ Elizée sín mɛsɛntɔ́ fɔ́n ayǐtéhɔ̌nnu, bó tɔ́n, bó mɔ sɔ́ja lɛ́ɛ kpódó kɛkɛ́ví lɛ́ɛ kpó xá toxo ɔ́. Ée é mɔ mɔ̌ ɔ́, é ɖɔ nú gǎn tɔn Elizée ɖɔ: “Yéége! Gǎn, nɛ̌ mǐ ká ná bló gbɔn?”

¹⁶ Bɔ é yí gbe n'i ɖɔ: “Ma ɖi xɛsi ó, ɖó mɛ e ɖo kpɔ́ xá mǐ lɛ́ɛ sukpɔ́ hú mɛ e ɖo kpɔ́ xá yě lɛ́ɛ.”

¹⁷ Énɛ́ ɔ́ gúdo ɔ́, Elizée xo ɖɛ bo ɖɔ: “Mawu Mavɔmavɔ, kɛnklɛ́n hun nukún n'i, bónú é ná sixú mɔ nǔ.” Ée é ɖɔ mɔ̌ ɔ́, Mawu Mavɔmavɔ hun nukún nú mɛsɛntɔ́ ɔ́, bɔ é mɔ sɔ́ kpó kɛkɛ́ví myɔnɔ kpó kpé só ɔ́ jí bǐ lɛ́ lɛ̌ dó Elizée.

¹⁸ Hwenɛ́nu ɔ́, sɔ́ja Silíi tɔn lɛ́ɛ ɖidó Elizée gɔ́n. Énɛ́ ɔ́, Elizée xo ɖɛ bo ɖɔ: “Mawu Mavɔmavɔ, kɛnklɛ́n va nukún sɔ́ja élɔ́ lɛ́ɛ.” Bɔ Mawu Mavɔmavɔ va nukún yě lě e Elizée byɔ́ gbɔn é.

¹⁹ Énɛ́ ɔ́ gúdo ɔ́, Elizée ɖɔ nú yě ɖɔ: “Ali ɔ́ ɖíe ǎ. Toxo ɔ́ ɖíe ǎ. Mi xwedó mì nú má kplá mi yi nya e ba wɛ mi ɖe ɔ́ gɔ́n.” Bɔ Elizée kplá yě yi Samalíi toxo mɛ.

²⁰ Ée yě byɔ́ Samalíi toxo ɔ́ mɛ ɔ́, Elizée lɛ́ xo ɖɛ bo ɖɔ: “Mawu Mavɔmavɔ, hun nukún nú mɛ élɔ́ lɛ́ɛ nú yě ná mɔ nǔ.” Ée Mawu Mavɔmavɔ hun nukún nú yě ɔ́, yě mɔ ɖɔ Samalíi toxo tɛ́ntin wɛ émí ɖe.

²¹ Ée axɔ́sú Izlayɛ́li tɔn mɔ yě ɔ́, é kanbyɔ́ Elizée ɖɔ: “Gǎn, má hu yě a?”

²² Bɔ Elizée yí gbe n'i ɖɔ: “Ma hu yě ó. Sɔ́ja e a nɔ wlí ɖo ahwangbénu lɛ́ɛ ɔ́, hu wɛ a nɔ hu yě a? Nǎ nǔɖuɖu yě, bó ná sin yě, bó lɛ́ kɔ nú yě yi gǎn yětɔn gɔ́n.”

²³ Axɔ́sú Izlayɛ́li tɔn ylɔ́ agɔ̌ nú yě, bɔ yě ɖu nǔ bó nu ahan. Énɛ́ ɔ́ gúdo ɔ́, é jó yě dó bɔ yě lɛ́ kɔ yi axɔ́sú yětɔn gɔ́n ɖo Silíi. Bɛ́ sín gbe nɛ́ gbe ɔ́, sɔ́ja Silíi tɔn lɛ́ɛ sɔ́ lɛ́ kɔ wá Izlayɛ́li yíkúngban jí ǎ.

Adɔ tɔ́n ɖo Samalíi

²⁴ É wá su hwe ɖěvo nu, bɔ axɔ́sú Silíi tɔn Bɛni-Hadadi kplé sɔ́ja tɔn lɛ́ɛ bǐ, bɔ yě yi xá Samalíi toxo ɔ́.

²⁵ Mɛ e yi to ɔ́ mɛ lɛ́ɛ sú ali dó nǔ bǐ, bɔ adɔ ɖaxó ɖé wá tɔ́n ɖo Samalíi, káká bɔ tócí sín ta yǎyá nɔ xɔ kpatágankwɛ́ kanwe (80), bɔ ahwannɛ́mí gannú vlɔ́ nɔ xɔ kpatágankwɛ́ atɔ́ɔ́n.

²⁶ É wá su gbe ɖokpó bɔ Izlayɛ́li xɔ́sú ɔ́ ɖo ahohó dó ɔ́ jí gbɔn wɛ; nyɔ̌nu ɖé sú xó bó ɖɔ n'i ɖɔ: “Áo! Sɛ́mɛɖó, hwlɛ̌n mì!”

²⁷ Ée nyɔ̌nu ɔ́ ɖɔ mɔ̌ ɔ́, axɔ́sú ɔ́ ɖɔ n'i ɖɔ: “Ényí Mawu Mavɔmavɔ má hwlɛ́n we gán ǎ ɔ́, étɛ́ nyɛ ka ná zé dó hwlɛ́n we gán ná? Blěe ɖě sɔ́ kpo ǎ, vɛ̌ɛn ɖě sɔ́ kpo ǎ.”

²⁸ Axɔ́sú ɔ́ kanbyɔ́ ɛ ɖɔ: “Nɛ̌ ká gbɔn nú we?” É yí gbe nú axɔ́sú ɔ́ ɖɔ: “Kpɔ́n nyɔ̌nu élɔ́! É ɖɔ nú mì ɖɔ nyɛ ní sɔ́ vǐ nyɛtɔn wá nú mǐ ná ɖa ɖu égbé, bónú é su sɔ ɔ́, mǐ ná ɖu émítɔn.

²⁹ Ée é ɖɔ mɔ̌ ɔ́, mǐ sɔ́ vǐ nyɛtɔn bó ɖa ɖu. Ayǐhɔ́ngbe tɔn ɔ́, un ɖɔ n'i ɖɔ é ní sɔ́ vǐ éyɛ́ tɔn wá bónú mǐ ná ɖa ɖu, bɔ é ká sɔ́ vǐ éyɛ́ tɔn hwlá.”

³⁰ Ée axɔ́sú ɔ́ se xó e nyɔ̌nu ɔ́ ɖɔ lɛ́ɛ ɔ́, é vún awu dó kɔ nú éɖée; ahohó ɔ́ jí gbɔn wɛ é ka ɖe hwenɛ́nu, bɔ togun ɔ́ bǐ mɔ ɖɔ ati wɛ é dó ɖó do.

³¹ Axɔ́sú ɔ́ ɖɔ: “Ényí Elizée Cafáti ví ɔ́ sín ta nɔ kɔ tɔn nu égbé hǔn, Mawu ní dɔn tó e syɛ́n hú tódɔnnúmɛ lɛ́ɛ bǐ é nú mì.”

Elizée ɖɔ adɔ ná gbɔ

³² Hwenɛ́nu ɔ́, Elizée ɖo ayǐjínjɔ́n ɖo xwé tɔn gbe, bɔ tomɛxó lɛ́ɛ jínjɔ́n akpá tɔn. Axɔ́sú ɔ́ sɛ́ mɛ dó e. Lo ɔ́, cóbónú mɛ e axɔ́sú ɔ́ sɛ́ dó ɔ́ ná wá ɔ́, Elizée ɖɔ nú tomɛxó lɛ́ɛ ɖɔ: “Mi mɔ nǔ a? Nǔ mɛhutɔ́ nɛ́ ɔ́ sɛ́ mɛ dó ɖɔ è nǐ wá ɖe ta sín kɔ nu nú mì á! Mi ɖótó mì: ényí nya ɔ́ wá hǔn, mi sú hɔn ɔ́, bó má lɔn nú é byɔ́ xwé ɔ́ gbe ó. È ko ɖo gǎn tɔn e sɛ́ ɛ dó ɔ́ sín afɔgbe se ɖo gǔdo tɔn jǎwe wɛ lɔ.”

³³ Elizée kpo ɖo xó ɖɔ xá yě wɛ, bɔ axɔ́sú ɔ́ wá, bó ɖɔ n'i ɖɔ: “Mawu Mavɔmavɔ gɔ́n wɛ awě élɔ́ bǐ gosín, bó wá ɖo mɛ xo wɛ. Étɛ́ wɛ un ka sixú lɛ́ ɖó nukún ɖo gɔ̌n tɔn?”