2 Axɔ́sú 3 - MAWUXÓWÉMA

¹ Hwenu e Jozafáti Judáa xɔ́sú ɔ́ ɖo xwe afɔtɔn-nukún-atɔn bló wɛ ɖo axɔ́súzinkpo jí ɔ́, Yolámu Akábu ví ɔ́ yi axɔ́súzinkpo Izlayɛ́li tɔn jí ɖo Samalíi. É ɖu axɔ́sú nú xwe wěwe.

² É wa nǔ e má nyɔ́ Mawu Mavɔmavɔ nukún mɛ ǎ é. É ká sɔ tɔ́ tɔn kpó nɔ tɔn kpó tɔn ǎ, ɖó é mu awǐnnya e tɔ́ tɔn tun te bo nɔ sɛn dó sɔ́ vodún Baalu su é.

³ Lo ɔ́, é hu hwɛ e Jelobowámu Nɛvati ví ɔ́ hu bó dɔn Izlayɛ́linu lɛ́ɛ dó hwɛ mɛ lɛ́ɛ, bó ká kpo ɖ'é wú.

Axɔ́sú Yolámu fun ahwan xá Mɔwabunu lɛ́ɛ

⁴ Mɛca Mɔwabu xɔ́sú ɔ́, kanlinnyitɔ́ wɛ. Xwewú xwewú ɔ́, é nɔ ná lɛ̌ngbɔ́ví adɔ̌kpo atɔ́ɔ́n (100.000), agbo adɔ̌kpo atɔ́ɔ́n (100.000) kpó fún yětɔn kpó sín nǔjɔ Izlayɛ́li xɔ́sú ɔ́.

⁵ Lo ɔ́, ée Akábu zán wá kú ɔ́, axɔ́sú Mɛca fɔ́n gǔ dó Yolámu e jɛ tɛn tɔn mɛ ɔ́ jí.

⁶ Ée Yolámu se mɔ̌ ɔ́, é tɔ́n sín Samalíi, bo xa sɔ́ja Izlayɛ́li tɔn lɛ́ɛ bǐ.

⁷ Énɛ́ ɔ́ gúdo ɔ́, é dó wɛn sɛ́ dó axɔ́sú Judáa tɔn Jozafáti ɖɔ: “Axɔ́sú Mɔwabu tɔn fɔ́n gǔ dó jǐ ce. A ma ná gɔ́ nú mì nú mǐ ná yi tɔ́n ahwan ɛ a?” Jozafáti yí gbe n'i ɖɔ: “Mǐ ná yi; nyɛ kpó hwi kpó ɔ́, nǔ ɖokpó ɔ́ mǐ nyí, togun ce ɔ́, togun towe wɛ, togun towe ɔ́, togun ce wɛ, sɔ́ ce lɛ́ɛ ɔ́, sɔ́ towe lɛ́ɛ wɛ, sɔ́ towe lɛ́ɛ ɔ́, sɔ́ ce lɛ́ɛ wɛ.”

⁸ É lɛ́ ɖɔ: “Ali tɛ́ wɛ mǐ nǎ gbɔn yi?” Yolámu ɖɔ n'i ɖɔ: “Gbětótló Edɔ́mu tɔn sín ali ɔ́ wɛ mǐ ná gbɔn.”

⁹ Axɔ́sú Izlayɛ́li tɔn, Judáa tɔn kpódó Edɔ́mu tɔn kpó gbɔn ali tlɔlɔ ɔ́ ǎ. Ée yě ɖi zɔnlin káká nú azǎn tɛ́nwe ɔ́, sin wá vɔ dó sɔ́ja lɛ́ɛ kpódó kanlin e yě hɛn lɛ́ɛ kpó.

¹⁰ Énɛ́ ɔ́, Izlayɛ́li xɔ́sú ɔ́ sú xó ɖɔ: “Heelú! Mawu Mavɔmavɔ ylɔ́ mǐ mɛ axɔ́sú atɔn élɔ́ lɛ́ɛ, bó ná jó mǐ nú Mɔwabunu lɛ́ɛ.”

¹¹ Lo ɔ́, Jozafáti kanbyɔ́ ɖɔ: “Gbeyíɖɔ Mawu Mavɔmavɔ tɔn ɖé ɖo fí bónú mǐ nǎ kan nǔ byɔ́ Mawu Mavɔmavɔ ǎ cé?” Axɔ́sú Izlayɛ́li tɔn sín ahwangán ɖokpó yí gbe ɖɔ: “Elizée Cafáti ví e dó alɔ Elíi ɔ́ ɖo fí.”

¹² Bɔ Jozafáti ɖɔ: “Xó Mawu Mavɔmavɔ tɔn ɖo nu tɔn.” Ée é ɖɔ mɔ̌ ɔ́, yě mɛ axɔ́sú atɔn lɛ́ɛ yi mɔ Elizée tlóló.

¹³ Elizée ɖɔ nú axɔ́sú Izlayɛ́li tɔn ɔ́ ɖɔ: “Étɛ́ sín tagba dó nú mì wɛ a ká ɖe? Yi mɔ tɔ́ towe sín gbeyíɖɔ lɛ́ɛ, abǐ nɔ towe tɔn lɛ́ɛ.” Ée é ɖɔ mɔ̌ ɔ́, axɔ́sú Izlayɛ́li tɔn ɔ́ ɖɔ n'i ɖɔ: “Éeǒ, ɖó Mawu Mavɔmavɔ wɛ ylɔ́ mǐ mɛ axɔ́sú atɔn élɔ́ lɛ́ɛ, bó ná jó mǐ nú Mɔwabunu lɛ́ɛ.”

¹⁴ Elizée xwlé nǔ ɖɔ: “Mawu Mavɔmavɔ Nǔbǐwúkpétɔ́ e sín mɛsɛntɔ́ un nyí ɔ́ ɖo gbɛ. É má nyí sísí e un ɖó nú axɔ́sú Judáa tɔn Jozafáti ɔ́ wú wɛ ǎ ɔ́, un ɖo nu ná kɛ d'é mɛ nú we wɛ ǎ; un ka ɖo jɔ towe jí ná kpɔ́n wɛ ǎ.

¹⁵ Din ɔ́, mi yi kplá nǔxotɔ́ ɖokpó wá.” Ée nǔxotɔ́ ɔ́ wá, bó ɖo nǔ xo wɛ ɔ́, Mawu Mavɔmavɔ sín hlɔ̌nhlɔ́n wá Elizée jí,

¹⁶ bɔ é ɖɔ: “Mawu Mavɔmavɔ ɖɔ: ‘Mi kun do gbɔn tɔdo élɔ́ mɛ.

¹⁷ Jɔhɔn ná nyi ǎ, jǐ ka ná ja ǎ, bɔ sin ka ná gɔ́ tɔdo élɔ́, bɔ mi kpódó kanlin mitɔn lɛ́ɛ kpó ná nu.

¹⁸ Lo ɔ́, nǔ énɛ́ nyí nǔɖé ɖo Mawu Mavɔmavɔ nukɔn ǎ. É ná jó Mɔwabuto ɔ́ nú mi.

¹⁹ Mi ná gba toxo e è mɛ ahohó lɛ́ lɛ̌ dó lɛ́ɛ bǐ, bó ná gba toxo nukúnɖéjí lɛ́ɛ bǐ. Mi ná gbo atín e nɔ ná sínsɛ́n lɛ́ɛ bǐ, mi ná sú tɔjɔtɛn lɛ́ɛ bǐ, bó ná nyi awǐnnya dó gle e è lɛ lɛ́ɛ jí, bó ná hɛn bǐ gblé.’ ”

²⁰ Énɛ́ ɔ́, ayǐhɔ́ngbe tɔn zǎnzǎn ɔ́, gan e mɛ è nɔ xwlé vɔ̌sánú zǎnzǎn tɔn ɔ́ Mawu ɔ́, sin sa sín Edɔ́mu wá gba to ɔ́ bǐ.

²¹ Nǔ ɖo mɔ̌ có, Mɔwabunu lɛ́ɛ se ɖɔ axɔ́sú lɛ́ɛ ja ahwan tɔ́n émí gbé, bó cyán mɛ e ɖó xwe bó hɛn ɔ́, é ná yi ahwan lɛ́ɛ kpó mɛ e sín xwe ko zɛ mɔ̌ wú lɛ́ɛ kpó bǐ, bɔ yě fɔ ahwanfunnú, bó yi cí to ɔ́ sín dogbó jí.

²² Sɔ́ja Mɔwabu tɔn lɛ́ɛ fɔ́n zǎn, bɔ hwenu e hwesivɔ́ klé dó tɔ lɛ́ɛ jí ɔ́, yě mɔ tɔ ɔ́ sɛ́ dó ɖo nukɔn yětɔn, bɔ é myá hun ɖɔhun.

²³ Énɛ́ ɔ́, yě sú xó bó ɖɔ: “Mi kpɔ́n hun! Axɔ́sú lɛ́ɛ kpó ahwangɔnu yětɔn lɛ́ɛ kpó fun ahwan xá yěɖée, bó hu yěɖée. Din ɔ́, mǐ ní yi bɛ́ nǔ yětɔn lɛ́ɛ!”

²⁴ Ée yě ɖɔ mɔ̌ ɔ́, yě ɖidó Izlayɛ́li ví lɛ́ɛ gɔ́n. Ée yě sɛkpɔ́ yě ɔ́, Izlayɛ́li ví lɛ́ɛ ɖu ɖo yě jǐ, bɔ yě hɔn. Izlayɛ́li ví lɛ́ɛ nya yě káká byɔ́ to yětɔn mɛ, bó wa nǔ xá yě, bɔ tɛn tɔn mɛ vɛ́ jlɛ́.

²⁵ Yě gba toxo lɛ́ɛ, mɛ ɖokpó ɖokpó nyi awǐnnya dó gle lɛ́ɛ bǐ mɛ, bɔ awǐnnya gɔ́ gle lɛ́ɛ bǐ. Yě sú tɔjɔtɛn lɛ́ɛ bǐ, bó gbo atín e nɔ ná sínsɛ́n lɛ́ɛ bǐ. Kíi-Alɛsɛ́ti toxo ɔ́ wɛ nyí toxo ɖokpó e kpo ɖo te é. Lo ɔ́, sɔ́ja e hɛn klohwán lɛ́ɛ wá xá toxo ɔ́ lobo gba.

²⁶ Ée axɔ́sú Mɔwabu tɔn mɔ ɖɔ émí kún sixú ɖu ɖo ahwan ɔ́ jí ó ɔ́, é cyán sɔ́ja hwǐkplátɔ́ nǔwɔntɔn kanwe ko (700) dó éɖée jí, bɔ yě ná ba ali káká yi Silíi xɔ́sú ɔ́ gɔ́n; lo ɔ́, yě kpé wú ǎ.

²⁷ Énɛ́ ɔ́, é hu vǐ tɔn súnnu nukɔntɔn e ɖó ná nɔ do tɔn mɛ ɔ́ dó sá vɔ̌ ɖo toxo ɔ́ sín ahohó jí. Ée Izlayɛ́li ví lɛ́ɛ mɔ mɔ̌ ɔ́, xɛsi jɛ yě jí, bɔ yě hɔn jó Mɔwabu xɔ́sú ɔ́ dó, bó lɛ́ kɔ yi to yětɔn mɛ.