2 Axɔ́sú 21 - MAWUXÓWÉMA

Manasée, Judáa axɔ́sú

¹ Xwe wěwe wɛ Manasée ɖó bó yi zinkpo jí ɖo Jeluzalɛ́mu. É ɖu axɔ́sú nú xwe kanɖé afɔtɔn (55). Nɔ tɔn nɔ nyí Efusí-Ba.

² É wa nǔ e ma nyɔ́ Mawu Mavɔmavɔ nukún mɛ ǎ lɛ́ɛ. Akɔta e Mawu nya bó yí ayǐkúngban yětɔn nú Izlayɛ́li ví lɛ́ɛ ɔ́, é xwedó walɔ baɖabaɖa e yě nɔ́ zán lɛ́ɛ.

³ Vɔ̌sákpe e tɔ́ tɔn Ezekiyási gba gbɔn só jí só jí lɛ́ɛ ɔ́, é lɛ́ vɔ́ bǐ blóɖó. É bló vɔ̌sákpe gěgé nú Baalu, bó tun vodún Acela te lě e Izlayɛ́li xɔ́sú e è nɔ ylɔ́ ɖɔ Akábu é bló gbɔn é. É nɔ́ sɛn nǔ e nɔ́ ná wěziza ɖo jǐxwé lɛ́ɛ.

⁴ É bló vodúnkpe gbɔn Mawu Mavɔmavɔ xwé gbe fí e Mawu Mavɔmavɔ ɖɔ émí ná ɖe émíɖée xlɛ́ ɖe é.

⁵ É bló vɔ̌sákpe nú nǔ e nɔ́ ná wěziza ɖo jǐxwé lɛ́ɛ gbɔn kɔ́xota we e ɖo Mawu Mavɔmavɔ xwé gbe lɛ́ɛ.

⁶ É bló káká bó sɔ́ vǐ tɔn dó sá vɔ̌ ná. É nɔ́ bló majíki tɛnmɛ tɛnmɛ, bó nɔ́ yi kan nǔ ɖo mɛ e nɔ kan bo lɛ́ɛ gɔ́n. É nɔ́ fɔ́n bó nɔ́ ɖo nǔ e má nyɔ́ Mawu Mavɔmavɔ nukún mɛ ǎ lɛ́ɛ wa wɛ, bó dó xomɛsin n'i.

⁷ Vodún Acela e é bló ɔ́, é sɔ́ yi ɖó Mawu Mavɔmavɔ xwé ɔ́ gbe. Mawu Mavɔmavɔ ka ko ɖɔ nú Davídi kpó vǐ tɔn Salomɔ́ɔ kpó ɖɔ: “Xwé élɔ́ gbe ɖo Jeluzalɛ́mu wɛ un ná ɖe nyɛɖée xlɛ́ ɖe káká yi mavɔ mavɔ; Jeluzalɛ́mu toxo ɔ́ wɛ un sɔ́, ɖo toxo akɔta wěwe Izlayɛ́li tɔn lɛ́ɛ tɔn mɛ, bó ná ɖe nyɛɖée xlɛ́ ɖe, káká yi mavɔ mavɔ.

⁸ Nú Izlayɛ́li ví lɛ́ɛ vɛ́ kó sixú bló nǔ e un zɔ́n lɛ́ɛ ɔ́, nú yě vɛ́ kó sixú nyi sɛ́n e mɛsɛntɔ́ ce Mɔyízi ná yě lɛ́ɛ bǐ ɔ́, un sɔ́ ná kplá yě sín to e un ná tɔ́gbó yětɔn lɛ́ɛ ɔ́ mɛ bɔ yě ná yi flú ɖě ǎ.”

⁹ Lo ɔ́, Judáanu lɛ́ɛ se tónú ǎ. Manasée dɔn yě bú, bɔ nǔ nyanya e yě dó sin lɛ́ɛ hú nǔ nyanya e togun e Mawu Mavɔmavɔ nya, bó yí ayǐkúngban yětɔn nú Izlayɛ́li ví lɛ́ɛ tɔn.

¹⁰ Énɛ́ ɔ́ wú wɛ Mawu Mavɔmavɔ dó wɛn gbɔn mɛsɛntɔ́ tɔn gbeyíɖɔ lɛ́ɛ jí ɖɔ:

¹¹ “Manasée, Judáa xɔ́sú ɔ́ dó nǔ nyanya énɛ́ lɛ́ɛ sin. É dó nǔ sin hú nǔ e Amɔliti lɛ́ɛ kó dó sin ɖ'ayǐ lɛ́ɛ. É lɛ́ sɔ́ vodún tɔn lɛ́ɛ dó dɔn Judáanu lɛ́ɛ dó hwɛ mɛ.

¹² Énɛ́ ɔ́ wútu ɔ́, Mawu Mavɔmavɔ, Mawu Izlayɛ́li tɔn ɖɔ: Un ná dó nǔ sin xá Jeluzalɛ́mu, bɔ mɛ ɖěbǔ se ɔ́, é ná sú alɔ tó nu.

¹³ Un ná gba Jeluzalɛ́mu toxo ɔ́ hánnyá lě e un gba Samalíi toxo ɔ́ kpódó Akábu xwédo ɔ́ kpó gbɔn é; un ná klɔ́ Jeluzalɛ́mu lě e è nɔ klɔ́ agbǎn bó nɔ́ húzú xwe nu do é ɖɔhun.

¹⁴ Mɛ e ná kpo ɖo gbɛ ɖo togun ce mɛ lɛ́ɛ ɔ́, un ná ɖe alɔ sín kan yětɔn mɛ, un ná jó yě nú kɛntɔ́ yětɔn lɛ́ɛ, bɔ yě ná bɛ́ dɔkun yětɔn lɛ́ɛ bǐ, bó ná vɔ to yětɔn.

¹⁵ Đó, sín gbe e gbe tɔ́gbó yětɔn lɛ́ɛ kó gosín Ejípu tomɛ káká wá jɛ égbé ɔ́, yě nɔ́ ɖo nǔ e un gbɛ́ wǎn ná lɛ́ɛ bló wɛ, bó nɔ ɖo xomɛsin dó nú mì wɛ.”

¹⁶ Axɔ́sú Manasée hu xomɛvɔ́nɔ káká bɔ kanjɔ sa tɔ gbɔn Jeluzalɛ́mu toxo ɔ́ bǐ mɛ. Nǔ baɖabaɖa énɛ́ lɛ́ɛ yi jɛ hwɛ e é hu bó dɔn Judáa togun ɔ́ d'é mɛ́ é jí. É dɔn togun ɔ́ bɔ é wa nǔ e má nyɔ́ Mawu Mavɔmavɔ nukún mɛ ǎ é.

¹⁷ È wlǎn Manasée sín tan e kpo lɛ́ɛ, nǔ e é wa lɛ́ɛ bǐ, kpó hwɛ e é hu lɛ́ɛ kpó dó “Judáa xɔ́sú lɛ́ɛ sín Tan wéma” mɛ.

¹⁸ Ée Manasée zán wá kú ɔ́, è sɔ́ ɛ yi ɖó jikpá e ɖo xwé tɔn gbe ɔ́ mɛ, Wúza jikpá mɛ, bɔ vǐ tɔn Amɔ́ni ɖu axɔ́sú ɖó tɛn tɔn mɛ.

Amɔ́ni, Judáa xɔ́sú

¹⁹ Xwe ko-nukún-we wɛ Amɔ́ni ɖó bó yi zinkpo jí ɖo Jeluzalɛ́mu, bó ɖu axɔ́sú nú xwe we. Nɔ tɔn nɔ nyí Mɛculɛmɛti, bo nyí Halúsi Yotivanu ɔ́ sín vǐ.

²⁰ Nǔ e má nyɔ́ Mawu Mavɔmavɔ nukún mɛ ǎ lɛ́ɛ wɛ é dó sin tɔ́ tɔn Manasée ɔ́ ɖɔhun.

²¹ Ali e tɔ́ ɔ́ gbɔn é bǐ wɛ élɔ́ gbɔn; é sɛn vodún e tɔ́ ɔ́ nɔ sɛn lɛ́ɛ; é nɔ jɛ kpo nú yě.

²² É jó Mawu Mavɔmavɔ, Mawu e tɔ́gbó tɔn lɛ́ɛ nɔ sɛn é dó. É xwedó Mawu Mavɔmavɔ sín ali ɔ́ ɖěbǔ ǎ.

²³ Azaglɔ́gán Amɔ́ni tɔn lɛ́ɛ blá gbě tɔn, bó hu i sɔ́ nyi xwé tɔn gbe.

²⁴ Lo ɔ́, togun ɔ́ hu mɛ e hu axɔ́sú Amɔ́ni lɛ́ɛ bǐ, bó sɔ́ vǐ tɔn Joziyási ɖó tɛn tɔn mɛ.

²⁵ È wlǎn axɔ́sú Amɔ́ni sín tan e kpo ɔ́ bǐ dó “Judáa xɔ́sú lɛ́ɛ sín Tan wéma” mɛ.

²⁶ Ée Amɔ́ni zán wá kú ɔ́, è sɔ́ ɛ yi ɖó yɔdo tɔn mɛ ɖo Wúza jikpá mɛ, bɔ vǐ tɔn Joziyási ɖu axɔ́sú ɖó tɛn tɔn mɛ.